JESUSPA CHAQUITA CATISHPA CAUSASHUNCHI

Religionda na charij gentecunaman Jehovamanda villachipashunchi

Quiquinga ¿ima horapash shuj religionda na charij persona, na uyangachu yashpa villachinata jarcaripashcanguichu? Shina rurashca cashpaca caita yaripangui. Cunanbi ashtaca testigo de Jehovacunaca shuj religionda na charij, shinallata ateo gentecunami carca. Paicunaca Taita Dios ciertopacha tiashcata cringapaca, ashaguta yachachishpa ayudachunllami minishtinajushca carca (Ro 1:20; 10:14).

YARIPASHUNCHI: TAITA DIOSPI NA CRIJ GENTECUNAPASHMI TUCUI SHUNGUHUAN CRIRCA: MAIJAN RELIGIONDAPASH NA CATIJ GENTECUNA NISHCA VIDEOTA RICUSHCA JIPACA, CAI TAPUITA CONTESTAPANGUI:

Shuj religionda na charij gentecunaman villachingapaca Tommaso huauquigupa experienciaca ¿imashinata quiquindaca ayudan?

Respuesta

Imatata rurai ushapangui

Taita Diospi na crij gentecunahuan tuparishpaca cushilla aliguman parlapangui, imata nijpipash ali ali uyapangui (2Ti 2:24). Paicuna gushtana temacunamanda parlapangui. Taita Dios ciertopacha tiashcata ricuchij pruebacunata yachajushpami ashtaca gentecunaca Taita Diospi crishca. ¿Taita Diospi na crij personaca chai pruebacunata yachajungapaca dispuestochu can? Uyangapaj dispuesto cajpica, Taita Dios ciertopacha tiajta ricuchij publicaciongunata, videocunata utilizapangui. ¿Es la vida obra de un Creador? y El origen de la vida. Cinco cuestiones dignas de análisis nishca folletocunataca Yachachingapaj publicacionguna nishca partepimi facillla tarichun churapashcanchi.

Taita Diospi na crij gentecunaman predicanata pensashpallatami talvez manllaihuan sintiripangui. Shina cashpaca, experienciata charij huauqui o panigupa ayudata mañapangui. Shinallata Jehova Diosca na tianllu nishpa crishca cajpipash paimanda yachajungapaj munaj gentecunata ayudai ushashcatami yarina capangui (Hch 13:48).