Tucui shunguhuanmi Jehová Diosta juyapanchi

1, 2. Jehová Diosca ¿imamandata ñucanchitaca paipa familiashna cachun ayudarca? Chaipaca ¿imatata rurarca?

JEHOVÁ DIOSCA ñucanchicuna paipa familiashna cachunmi munan. Jehovapa familiaca paita tucui shunguhuanmi sirvin, paipa Churi Jesuspipashmi feta charin. Jehovapa familiashna caimandami cunanbillata cushilla causapanchi. Shamuj punllacunapicarin cielopi cashpa o cai Alpapi cashpapash para siempre causapashun.

² Ñucanchita juyaimandami ñucanchicuna paipa familiashna cai ushachunga Jehová Diosca paipa Churi Jesusta cai Alpaman huañuchun cachamurca (Juan 3:16). Bibliapica “cangunaca, ninan valishcapaj randi tucushcami canguichi” ninmi (1 Cor. 6:20). Jesús huañushcamandami ñucanchicunaca Jehovapa amigocuna cai ushapanchi. Jehovatapash “ñucanchi Taitalla” ni ushapanchi. Imashinami chaishuj temapi yachajuparcanchi, Jehová Dioshna shuj alipacha taitaca nimaipi na tianllu.

3. ¿Imatata talvez tapuripashcanchi? (“¿Jehová Diosca ñucata rijsihuanllu?” nishca recuadrotapash ricupangui).

³ Ñucanchicunapashmi talvez Salmo librota escribij runagushna “Mandaj Dios ñucaman tucui alicunata rurashcamandaca, ¿imatata paiman cupashayari?” nishpa tapuripashcanchi (Sal. 116:12). Cabalguta parlashpaca nimahora na Jehová Diostaca tucuimanda pagaitaca ushapashunllu. Shinapash Jehová Dios ñucanchita juyashcamandami ima modospash pagangapaj munapanchi. Apóstol Juanga nircami: “Diosra ñucanchita juyajujpimi, ñucanchipash paitaca juyanchi” nishpa (1 Juan 4:19). Shinaca Jehová Diosta juyashcataca ¿imashinata ricuchi ushapanchi?

JEHOVÁ DIOSMANDACA AMA CARUYAPASHUNCHICHU

4. Santiago 4:8​pi nishca shinaca ¿imamandata Jehovapaman quimiringapaj esforzarina capanchi?

⁴ Ñucanchicuna paipaman quimirichun, paihuan parlachunbashmi Jehová Diosca munan (Santiago 4:8, liingui). Paita na cungashpa cutin cutin mañachunmi munan. Jehová Diosca ñucanchi mañaicunata uyangapaj listomi can (Rom. 12:12). Paica ñucanchi mañaicunata uyanataca na shaijunllu. Shinapash ñucanchicunaca ¿imashinata Jehová Diostaca uyai ushapanchi? Jehovata uyangapaca Bibliatami liina capanchi. Bibliata intindichunga publicaciongunami ayudan. Shinallata tandanajuicunapi cashpaca imata ninajujtami ali ali uyana capanchi. Imashinami shuj huahua paipa taitahuan ali llevarichunga paicunapura parlarina ayudan. Shinallatami ñucanchicunapash Jehovapa ali amigocuna cangapaca cutin cutin paihuan parlarina capanchi.

5. Jehová Diostaca ¿imashinata mañana capanchi?

⁵ Jehová Diostaca ¿imashinata mañana capanchi? Jehová Diosca ñucanchi imata yuyashcata, imata sintishcatami paiman villachun munan (Sal. 62:8). Shinaca tapuripashunchi: “Ñuca mañaicunaca ¿chai yuyaitallata cutin cutin imprimishca tarjetacunashnachu can? O ¿tucui shunguhuan escribishca juyailla cartagucunashnachu can?”. Tucuicunallatami Jehová Diosta juyaimandaca siempre paipa amigocuna cashpa catingapaj munapanchi. Jehovapa amigocuna cangapaca siempremi paita mañariajuna capanchi. Imashina sintirijushcata, imapash llaquicunata charishcata, tucuita Jehová Diosman villapashunchi. Paica tucui ñucanchi imata nishcata uyashpami ayudangalla.

6. Jehovapa ali amigocuna cashpa catingapaca ¿imatata rurana capanchi?

⁶ Jehová Diospa ali amigocuna cashpa catingapaca, paita tucuimanda agradicinataca na cunganachu capanchi. Ñucanchicunapashmi Salmo librota escribij runagushna cashna nina capanchi: “Ñucata Mandaj Taita Dioslla, ashtahuanmi jatun manllarinacunata rurashpa mirachishcangui. Ñucanchitapash ashtahuanmi yarijungui. Chaicunaca, cambaj ñaupajpica na cuentai ushanallami. Chaicunata ñuca villashpa parlajpica, na cuentai ushanallami” can nishpa (Sal. 40:5). Shinapash Jehová Diosta agradicini nishpallaca na quedanachu capanchi. Jehovata agradicishcataca ruraicunahuanmi ricuchina capanchi. Shinami shuj gentecunamanda shican cashcata ricuchipashun. Mundopi gentecunaca, Taita Dios paicunamanda imata rurashcataca na agradicinllu. Shina gentecuna ‘tucurimui punllacunapi’ tiana cashcataca ñami Bibliapica villajurca (2 Tim. 3:1, 2). Ñucanchicunaca cai mundopi gentecunashna cangapaca na munapanchichu.

7. ¿Imata rurachunda Jehová Diosca munan? ¿Imamandata chaita rurana capanchi?

⁷ Taitamamacunaca paipa huahuacuna ali llevarichunmi munan. Ñucanchi taita Jehová Diospashmi ñucanchicunapura ali llevarichun munan. Tucui huauquipanicunahuan juyarishpa, ali llevarishpaca Jesuspa ali catijcuna cashcatami ricuchipanchi (Juan 13:35). Salmo librota escribij runaguca nircami: “Ricuichi, huauquipura juyarinajushpa tandanajushpa causanaca, alipacha juyaillagumari” can nishpa (Sal. 133:1). Ñucanchicunapashmi Salmo librota escribij runagushnallata yuyapanchi. Ñucanchi huauquipanicunata juyashpaca, Jehová Diosta juyashcatami ricuchinajupanchi (1 Juan 4:20). ‘Tucuicunahuan aliguta causashpa, caishuj chaishuj llaquirishpa’ causajcunahuan tandanajunaca alipachami can (Efes. 4:32).

JUYAIMANDAMI JEHOVATA CAZUNA CAPANCHI

8. ¿Imamandata 1 Juan 5:3​pi nishca shinaca Jehová Diosta cazupanchi?

⁸ Jehová Diosca huahuacuna taitamamacunata cazuchunmi munan. Shinallata ñucanchicunapash paita cazuchunmi munan (Efes. 6:1). Ñucanchita rurashcamanda, causaiguta carashcamanda, shuj alipacha taita cashcamandami Jehová Diostaca cazuna capanchi. Ashtahuanbachaca paita ninanda juyaimandami cazuna capanchi (1 Juan 5:3, liingui). Ashtaca cosascunamandami Jehová Diostaca cazunapacha capanchi. Shinapash paita cazuchunga pitapash na obliganllu. Ñucanchi munai paita cazujpica ninandami Jehová Diosca cushijun.

9, 10. Jehovapa mandashcacunata pactachishpa causanaca ¿imamandata minishtirishcapacha can?

⁹ Taitamamacunaca paicunapa huahuacuna ali causachun munashpami imata rurana cashcata, imata na rurana cashcatapash yachachin. Chai mandashcacunata cazuj huahuacunaca taitamamacunapi confiashcata, respetashcatami ricuchin. Shina cuendami ñucanchicunapash Jehová Dios ñucanchiman imata mandashcata yachajuna capanchi. Chai mandashcacunata pactachishpapash causana capanchi. Shinami Jehová Diosta juyashcata, respetashcatapash ricuchipashun, shinallata cushillapash causapashun (Is. 48:17, 18). Cutin Jehovapa mandashcacunata na cazushpa, na pactachishpa causajcunaca paicunallatami llaqui apan (Gál. 6:7, 8).

¹⁰ Jehovapa mandashcacunata pactachishpa causanaca cuerpopipash, yuyaipipash, shungupipash ali sintirishpa causachunmi ayudan. Shinallata Jehovapa ali amigocuna cashpa catichunbashmi ayudan. Jehová Diosmi ñucanchipa ima ali cajta, ima nali cajtapash yachan. Estados Unidospi causaj, Aurora shuti paniguca: “Jehová Diosta cazuna ñucanchillata cushilla, ali causachun ayudajtaca alimi yachani” ninmi. Cai shimicunaca cabalpachami can. Shinaca tapuripashunchi: “Jehovapa mandashcacunata cazunaca ¿imacunapillata ñucataca ayudahuashca?” nishpa.

11. Jehovata mañanaca ¿imapillata ayudan?

¹¹ Juchayucuna caimandaca Jehovapa mandashcacunata cazushpa pactachinaca huaquinbica shinllimi can. Jehovapa mandashcacunata na pactachi ushajushpaca Jehovatallatami pactachingapaj ayudahuai nishpa mañana capanchi. Salmo librota escribij runaguca nircami: “Ali yuyaita cuhuayari. Can mandashcataca cazushallami. Chaitaca, tucui shunguhuanmi pactachijusha” nishpa (Sal. 119:34). Denise shuti paniguca precursora regularmi can. Paica: “Jehovapa imapash mandashcacunata na pactachijushpaca, Jehovatami alita rurangapaj, quiquinda cazungapaj ayudahuai nishpa mañani” ninmi. Shina mañajpica Jehová Diosca siempremi ñucanchi mañaicunata uyanga (Luc. 11:9-13).

SHUJ GENTECUNAPASH JEHOVATA JUYACHUN AYUDAPASHUNCHI

12. Efesios 5:1​pica ¿imatata mandajun?

¹² (Efesios 5:1, liingui). Jehová Diospaca ñucanchicunaca ‘juyashca huahuacunami’ capanchi. Chaimi Jehová Dioshna cangapaj esforzaripanchi. Shujcunata juyaihuan respetohuan tratashpa, perdonaitapash perdonashpami Jehová Dioshna cangapaj munashcataca ricuchipanchi. Shujcunata ali tratajta ricushpami gentecunaca talvez Jehová Diosmanda yachajungapaj munanga (1 Ped. 2:12). Testigo taitamamacunaca paicunata imashna Jehová Dios juyaihuan tratanshnallatami paicunapa huahuacunatapash juyaihuan tratana can. Huahuacunata juyaihuan taitamamacuna tratajpica, huahuacunaca Jehová Dioshuan amigo cangapami munanga.

13. Jehovamanda ama manllashpa villachichunga ¿imatata ayudanga?

¹³ Shuj huahuaca paipa taitamandaca cushijushpami shujman shujman ñuca taitaca ali alimi can nishpa parlan. Shinallatami ñucanchicunapash Jehová Diosmandaca cushijushpa shujman shujman parlapanchi. ¿Imamandata shina parlapanchi? Tucui gentecuna Jehovata rijsichun munaimandami shina parlapanchi. Rey Davidshnami ñucanchicunapash sintiripanchi. Paica nircami: “Mandaj Dioshuanmi, ñuca almaca cushijunga” nishpa (Sal. 34:2). Huaquin huauquipanicunaca pingaimanda, manllaimandami Jehovamanda villachitaca na ushan. Shinapash ama manllachunga ¿imata ayudanga? Shuj gentecuna Jehovamanda yachajushpa ashtaca bendiciongunata chasquinata, Jehovata rijsishpa paita cushilla sintichinata yarinami chai manllaicunata mishachun ayudanga. Jehová Diosmi ama manllashpa villachichun ayudanga. Imashinami apostolcunapa punllacunapi paicunata ayudarca. Shinallatami ñucanchicunatapash ayudanga (1 Tes. 2:2).

14. Ali villaigucunata villachinaca ¿imamandata minishtirishcapacha can?

¹⁴ Jehová Diosca tucuilla gentecunatami igual tratan. Shinaca ñucanchicunapash shuj shuj llactacunamanda gentecunata juyaihuan tratajta ricushpaca Jehová Diosca cushillami sintirin (Hech. 10:34, 35). Ali villaigucunata villachishpami gentecunata juyashcata ricuchipanchi (Mat. 28:19, 20). Shina villachinaca ¿imamandata minishtirishcapacha can? Ali villaigucunata gentecuna yachajushpaca cunanmandallatami cushilla causaita ushanga. Shamuj punllacunapicarin para siempremi causaita ushanga (1 Tim. 4:16).

JEHOVATA JUYASHPACA CUSHILLAMI CAUSASHUN

15, 16. ¿Imamandata cushilla caita ushapanchi?

¹⁵ Jehová Diosca shuj juyaj taita caimandami paita sirvijcuna cushilla causachun munan (Is. 65:14). Cunanbi ashtaca llaquicunahuan causashpapash cushillami sintiripanchi. Por ejemplo, Jehová Dios ñucanchita ninanda juyashcamanda, Bibliamanda cabalguta yachachishcamandapashmi cushilla sintiripanchi (Jer. 15:16). Ñucanchicunaca Jehová Diosta juyaj, paipa mandashcacunata cazuj gentecunapurapimi causapanchi. Shinallata caishujmanda chaishujmanda juyaripanchi (Sal. 106:4, 5).

¹⁶ Shamuj punllacunapi juyailla causaigu tianata yachashpapashmi cushilla sintiripanchi. Jehová Diosca ñallami nali gentecunata tucuchinga. Paipa Gobierno cai Alpata mandajujpica cai Alpaca shuj paraisomi tucunga. Shinallata huañushcacuna causarishpa paicunapa familiacunahuan cutin tandanajunatami tucui shunguhuan cripanchi (Juan 5:28, 29). Chaica aligupachami canga. Ashtahuanbachaca shamuj punllacunapi Jehovapa sirvijcuna cielopi cashpa o cai alpapi cashpapash Jehová Diostalla alabanata, tucui shunguhuan paitalla sirvinataca seguromi capanchi.