Taita Diosta mañanaca ¿imashinata ñucanchitaca ayudan?

Pamela huarmiguca cancerhuan caimandami doctorpaman rirca. Paica chai llaquita aguantangapami fuerzata carahuai nishpa Taita Diostaca mañarca. Chai huarmigutaca ¿Taita Diosta mañanaca ayudarcachu?

Pamela huarmiguca ninmi: “Cancerpa tratamientota catijushpaca huaquinbica ninandami manllan carcani. Pero Jehová Diosta mañashpaca tranquilami sintirin carcani. Cunangamanmi nanaicunahuan causani. Shinapash Taita Diosta mañanami ama yapata preocuparichun ayudahuan. Huaquinbica gentecunaca alillachu cangui nishpami tapuhuan. Shina tapuhuajpica, ñuca saludhuan na ali cashpapash cushillami sintirini ninimi”.

Taita Diosta mañangapaca imapash jatun llaqui japichunga na shuyanachu capanchi. Tucuicunallatami shuj shuj llaquicunata charimanda ñaupaman catingapaca ayudata minishtipanchi. Shinapash ¿Taita Diosta mañanaca ciertopachachu ayudan?

Bibliapica “llasha quipishna cambaj llaquitaca, Mandaj Diosman saquilla. Paica ayudangallami. Imatapash cashcatapacha rurajtaca, na tucui causaipi llaquita apajuchun saquingachu” ninmi (Salmo 55:22). Cai shimicunaca ñucanchitaca ninandami cushichin. Shinaca ¿Taita Diosta mañanaca ñucanchitaca ayudanllu? Taita Dios munashcashna mañajpica Taita Diosca llaquicunata aguantachunmi ayudanga (“Taita Diosta mañanaca ¿imamandata ali can?” nishca tapuita ricupangui).

Taita Diosta mañanaca ¿imamandata ali can?

Tranquilomi causashun

Bibliapica “Taita Diosmanmi, imatapash villashpa ninanda mañana canguichi. [...] Casilla ali causaitaca, Taita Diosmi caramunga. Chashna aliguta causanataca, pipash na yachajui ushanalla cajpimi, cangunapaj shungutapash, yuyaicunatapash, Cristo Jesushuan shujlla tucushcamanda huacaichijunga” ninmi (Filipenses 4:6, 7). Imagumandapash preocupado cashpaca Taita Diosmanmi villana capanchi. Shinami Taita Diosca ali yuyashpa imagutapash rurachun, tranquilo sintirichun ayudanga.

Ali yachaitami charishun

Bibliapica “canguna purapi ali yachaita maijambash na charishpaca, Taita Diostami mañana canguichi. Paica carangapachami. Pimambash na mitsashpa, ashtacata caramunga” ninmi (Santiago 1:5). Llaquicunahuan cashpami huaquinbica na ali desiciongunata agllanchi. Shinapash Taita Diosta ali yachaita carahuai nishpa mañajpica Bibliapi yachajushca consejocunata yarichishpami Taita Diosca ayudanga.

Cushillami sintirishun

Bibliapica “na ñucanchimandalla ushaita charishpapash, Taita Diosmandami ninan ushaita charinchi” ninmi (2 Corintios 4:7). Jehová Diosca tucui ushaita charij Dios caimandami ñucanchicuna ima llaquipi cajpipash fuerzata cushpa ñaupaman catichun ayudan (Isaías 40:29). Bibliapica “tucuipi cushichij Taita Dios” caimandami “ñucanchita jatun llaquicuna japijpipash, Diosmi cushichin” ninmi (2 Corintios 1:3, 4).