Jehová Diosca ñucanchi mañashcacunataca ¿uyanllu?

1, 2. ¿Imacunamandata Jehová Dios ñucanchipa mañaicunata na uyajtashna sintipanchiman?

BIBLIAPICA: “Mandaj Dioshuanlla cushijui. Paimi, cambaj shungupi imatalla mañashcacunataca caranga” nijunmi (Sal. 37:4). Caipi nishca shimicunaca alipachami uyarin. Shinapash cai shimicunaca ñucanchi tucui ima munashcata mañajpi ñapash contestana cashcataca na ricuchijunllu. Por ejemplo, shuj soltera paniguca Escuela para Evangelizadores del Reinoman ringapami Jehová Diosta mañan. Shinapash huaquin huatacuna yalijpipash paitaca na invitanllu. Cutin shuj joven huauquiguca ungushca caimandami congregacionbi ashtahuan ayudangapaj munaimanda chai unguicunamanda Jehová Diosta jambichun mañan. Shinapash paipa saludhuanga na mejorarinllu. Cutin shuj taitacunaca Jehová Diostaca paipa churigu Jehová Diosta ashtahuan sirvishpa catichunmi mañan. Shinapash churiguca Jehová Diosmanda caruyaitarami caruyan.

² ¿Quiquinbashchu Jehová Diostaca imagutapash mañapashcangui? Y chai mañashcacunata na ucha contestashcamandachu Jehová Diosca ñucapa mañashcacunatallami na uyahuan ¿yashpachu pensapashcangui? O imatapash malota rurashcamandami ñuca mañashcacunataca na contestahuan ¿yapashcanguichu? Janice shuti shuj panigumi cashna pensarca.b Cai paniguca paipa cusagundi Betelpi sirvingapaj munaimandami Jehová Diostaca chaiman ringapaj ayudahuai nishpa mañashca carca. Paniguca ninmi: “Ñucanchicunataca Betelmanga ñallami invitanga yaparcanchimi”. Shinapash ashtaca tiempo yalijpipash paicunataca nara invitashcachu carca. Paniguca cashna pasashcamandaca cashnami nin: “Ñucaca llaquillami sintirircani. Ñucanchi mañashcata Jehová Dios imamanda na uyashcatami na intindijurcani. Ñucaca Betelman ringapaj munashcataca Jehová Diostaca claritomi mañarcani” ninmi.

3. Cai temapica ¿ima yuyaicunatata yachajugripanchi?

³ Huaquinbica ñucanchicunaca ‘¿imamandashi ñucapa mañashcacunataca Jehová Diosca na uyan?’ yashpami pensarita ushapanchiman. Punda tiempopi Diosta ali sirvijcunapashmi cashnallata pensarirca (Job 30:20; Sal. 22:2; Hab. 1:2). Jehová Diosca ñucanchi mañashcacunataca uyanmi. Shinapash pai uyajta ñucanchicuna seguro cachunga ¿imata ayudaita ushan? (Sal. 65:2). Cai tapuita contestangapaca huaquin yuyaicunata yachajupashunchi. Callari yuyai: Jehová Dios imashina cajta ricuna. Cati yuyai: Jehová Dios ñucanchicuna imata rurachun munajta ricuna. Último yuyai: Ñucanchi mañashcacunapi pensarishpa maijanshi Jehová Diospa voluntadhuanga ashtahuan de acuerdo canman yashpa pensana.

JEHOVÁ DIOS IMASHINA CAJTA RICUNA

4. Jeremías 29:12​pica Jehová Diosca ¿imatata ñucanchicunamanga prometishca?

⁴ Jehová Diosca ñucanchi mañashcacunataca uyashami nishpami prometishca (Jeremías 29:12​ta liipangui). Jehová Diosca paipa sirvijcunataca ninandami juyan. Chaimandami ñucanchi mañashcacunata pai uyanataca seguro caita ushapanchi (Sal. 10:17; 37:28). Shinapash ñucanchi mañashcacunataca na siemprechu ñapash contestanga. Huaquin mañashcacunatacarin talvezpashmi paraisopi Jehová Dios cungacaman shuyana tucunga.

5. Jehová Diosca ñucanchi mañaicunata contestangapaca ¿imatata primeroca ricun?

⁵ Jehová Diosca mañaicunata contestangapaca primeroca ñucanchi mañaicuna paipa voluntadhuan de acuerdo o na de acuerdo cashcatarami ricun (Is. 55:​8, 9). Paipa voluntadca cai alpapi causaj gentecuna paipa Gobiernota reconocishpa, cushilla causaita charichunmi munan. Shinapash Diabloca gentecuna cushilla causachunga Diospa Gobiernoca na minishtirinllu nishcami (Gén. 3:​1-5). Jehová Diosca Diablo llullajushcata ricuchingapami gentecunallata gobernarishpa causachun saquishca. Chaimandami cai mundopica ashtaca llaquicuna tiashca (Ecl. 8:9). Y cai mundopi tiashca tucui llaquicunataca Jehová Diosca cunan horasca nara tucuchingachu. Cai llaquicunata pai cunan horas tucuchijpica huaquin gentecunaca ñucanchillata gobernarishpapash alimi causaita ushanchi yanmanmi.

6. ¿Imamandata Jehová Dios tucuita ali, juyaihuan ruraj cashcapi confianaca minishtirishcapacha can?

⁶ Jehová Diosca shuj persona chaitallata mañajpipash cada personamanmi de diferente manera contestaita ushan. Por ejemplo, caipi pensaripashunchi. Rey Ezequías shuj unguihuan ña huañunalla cashpaca, Jehová Diosta jambihuai nishpa mañajpica Jehová Diosca jambircami (2 Rey. 20:​1-6). Cutin apóstol Pablo ‘ñuca cuerpopi tujsijuj shuj cashatashna’ jambihuai nishpa mañajpica Jehová Diosca paitaca na pai munashcashnachu ayudarca. Y paipa cuerpopi shuj cashashnaca talvez shuj unguimi cashcanga (2 Cor. 12:​7-9). Shinallata Santiagohuan y apóstol Pedrohuan ima pasashcata ricupashunchi. Rey Herodesca paicunataca ishcanditami huañuchingapaj munarca. Chaimandami congregacionmanda huauquipanicunaca ishcanditallata ama imapash pasachun Jehová Diosta mañarca. Shinapash a la finalca apóstol Pedrollami salvarirca. Santiagotaca huañuchircallatami apóstol Pedrotaca Jehová Diosca shuj milagrota rurashpami salvarca (Hech. 12:​1-11). Ñucanchicunaca ¿imashpashi Jehová Diosca shujtalla salvarca? nishpami pensarita ushapanchiman. Bibliapica imamanda chashna pasashcataca na villanllu. Shinapash ñucanchicunaca Jehová Dios ‘ima nalitapash’ na ruraj Dios cashcata o nunca ima pipash na pandari cashcapimi confiaita ushapanchi. Shinallata tanto Pedrota y Santiagota Jehová Dios juyashcatami seguro caita ushapanchi (Deut. 32:4; Apoc. 21:14).c Huaquinbica Jehová Diosca ñucanchi mañaicunataca na ñucanchi munashcashnachu contestan. Jehová Dios ñucanchi mañaicunata imashina contestajpipash pai juyaj Dios cashcata yachashpa, ima nalitapash na ruraj Dios cashcata yachaimandami paipi confiashpa na quejaripanchi (Job 33:13).

7. ¿Imatata na rurana capanchi?

⁷ Ñucanchicunaca, ñucanchipa situaciondaca shujcunapa situacionhuanga na comparanachu capanchi. Huaquinbica Jehová Diostaca caipi o chashna ayudahuai nishpa mañashca jahuapash na contestajtami sintipanchiman. O na cashpaca, shuj persona ñucanchi mañashcatallata mañajpi Jehová Dios contestashcatami ricuita ushapanchiman. Anna shuti panigutaca chaimi pasarca. Anna panigupa cusaguca cancerhuanmi ungushca carca. Chaimandami paica Jehová Diostaca jambichun mañashca carca. Shinapash chai tiempopillatami shuj ishcai mayorlla panigucunapash cáncer unguihuanllata carca. Chaimi Anna paniguca quimsandillata jambirichun Jehová Diostaca mañarca. Shinapash Anna panigupa cusaguca huañurcami. Cutin chai ishcai mayorlla panigucunaca jambirircami. Chaimandami Anna paniguca callaripica Jehová Diospachacha cai panigucunataca jambirichu ayudarca yashpa pensajurca. Jehová ayudashca cashpaca imashpashi cutin ñuca cusagutaca na ayudarca yajurcami. Imamandapacha cai mayorlla panigucuna jambirishcataca na yachapanchichu. Shinapash Jehová Dios shuj punlla tucui gentecunapa llaquicunata tucuchinata, paita sirvishpa huañushcacunatapash causachingapaj tucui shunguhuan munashcatami seguro capanchi (Job 14:15).

8. a) Isaías 43:2​pi nishcashnaca, Jehová Diosca ñucanchita ayudangapaca ¿imatata ruran? b) Jehová Diosta mañanaca jatun llaquicunahuan cajpica ¿imashinata ayudaita ushan? (Llaquicunata charijpica Taita Diosta mañanami ayudan nishca videota ricupangui).

⁸ Jehová Diosca siempremi ñucanchitaca ayudanga. Paica ñucanchita juyaimandami ñucanchi sufrichunga na munan (Is. 63:9). Shinapash Jehová Diosca ñucanchipa tucui llaquicunata, problemacunataca na anchuchinllu. Bibliapica ñucanchi llaquicunata, problemacunataca jatun riocunahuan nina rupajujcunahuanmi chimbapuran (Isaías 43:2​ta liipangui). Shinapash Jehová Diosca cai jatun rioshna problemacunata, ninashna problemacunata mishashpa ñaupaman catichunmi ayudasha nijunmi. Y llaquicunata, problemacunata aguantachunga Jehová Diosca paipa espíritu santotapashmi caran (Luc. 11:13; Filip. 4:13). Chaimandami aguantashpa catichun, paita na saquishpa sirvichun, Jehová Dios paillata ayudanataca seguro caita ushapanchi.d

JEHOVÁ ÑUCANCHICUNA IMATA RURACHUN MUNAJTA RICUNA

9. Santiago 1:​6, 7​pica Jehová Dios ñucanchita ayudanapi confiana minishtirishca cashcataca ¿imashinata ricuchin?

⁹ Jehová Diosca paipi confiachunmi munan (Heb. 11:6). Huaquinbica ñucanchi problemacunahuan ñana ushanajushpami Jehová Diosca ñuca mañashcacunataca na uyashcachu, na ayudagrihuanllu yarin yashpa pensaita ushapanchiman. Shinapash Bibliapica Diospa poderhuanga ‘jatun pircacunata urmachishpa yali ushashcatami’ ricuchin (Sal. 18:29). Shinaca problemacunapilla pensarijunapa randica tucui shunguhuan Jehová Dios ñucanchipa mañashcacunata contestanata confiapashunchi (Santiago 1:​6, 7​ta liipangui).

10. Jehová Diosta mañashca jipapash ¿imatata rurana capanchi? Shuj ejemplomanda parlapai.

¹⁰ Jehová Diosca mañashca jipapash chai mañashcacuna pactarichun, ñucanchipash imagutapash rurachunmi munan. Por ejemplo, caipi pensaripashunchi: Shuj huauquiguca quimsa punlla asambleaman ringapaj munaimandami paipa jefe permisota cuchunga Jehová Diosta mañan. Y Jehová Diosca paitaca ¿imashinashi ayudagrin? Jehová Diosca talvezpashmi paipa jefehuan na manllashpa parlachun shinllichishpa ayudanga. Shinapash Jehová Dios ayudachunga cai joven huauquiguca paipa jefehuan parlangapaj rinami can. Y talvezpashmi paipa jefehuanga cutin cutin parlanaiman tucunga. Y jefeca talvezpashmi paipa turnocunataca shuj compañerohuan cambiachun mañanga. Y minishtirijpicarin cai joven huauquiguca paipa tiempo libreta mañajushcamandaca chai tiempo libremandaca na cobragrinichu nitapashmi nina tucunga.

11. ¿Imamandata Jehová Diostaca cutin cutin mañana capanchi?

¹¹ Jehová Diosca ñucanchicuna imapi ayudachun munashcataca cutin cutin mañachunmi munan (1 Tes. 5:17). Jesusca ñucanchipa mañashcacunataca Jehová Dios na ñapash contestanatami intindichirca (Luc. 11:9). Chaimandami imaguta mañashpapash siempre cutin cutin mañana capanchi (Luc. 18:​1-7). Jehová Diosta ñucanchicuna imagumandapash cutin cutin mañashpaca ñucanchipa mañashcacunata, Jehová Dios ayudai ushashcata y chaicunata ciertopacha minishtimanda mañanajushcatami ricuchita ushapanchi.

¿IMAMANDATA ÑUCANCHI MAÑANAICUNATACA CAMBIANA O JEHOVÁ DIOSPA VOLUNTADHUAN DE ACUERDO CACHUN RICUNA MINISHTIRINMAN?

12. a) ¿Imatata pensarita ushapanchiman? b) Ñucanchi mañaicuna Jehová Diospa ñaupapi ali ricurichunga ¿imatata yaipi charina capanchi? (“Ñuca mañashcacunaca ¿Jehová Diosta respetashcataca ricuchijunllu?” nishca recuadrotapash ricupangui).

¹² Ñuca mañashcacunata Jehová Diosca na contestahuashcachu yashpa pensajushpaca, cai quimsa tapuicunapi pensarita ushapanchiman. Primero: “¿Jehová Dios munashcashnachu mañajuni?” nishpa. Ñucanchicunaca ñucanchipa ima ali cashcataca siempremi yachanchi yapanchimi. Shinapash talvezpashmi ñucanchi mañashcacunaca ashapalla ayudana mañaicuna caita ushanman. Huaquinbica shuj problemata solucionangapaca shuj shuj diferente formami tiaita ushan. Shinapash ñucanchicunaca talvezpashmi Jehová Diostaca ñucanchi munashcashna chai problemataca solucionachun mañanajupanchiman. Shina cashcamandami ñucanchi mañaicunaca Jehová Diospa voluntadhuan na de acuerdo caita ushanman (1 Juan 5:14). Párrafo unopi parlashca taitacunata yaripashunchi. Cai taitacunaca Jehová Diosmanda na caruyashpa paita sirvishpa catichunmi mañarca. Jahualla ricuipillaca cai mañashcacunaca alimi ricurin. Shinapash caipi pensaripashunchi: Jehová Diosca paita sirvichunga ni pitapash na obliganllu. Jehová Diosca tucuicunallata paicunapa shungupi munashcamanda paita adorachunmi munan (Deut. 10:​12, 13; 30:​19, 20). Shinaca cai taitacunaca ¿Jehová Diostaca imata mañashpata ashtahuan ali canman? Cai taitacunaca paipa churigu, Jehová Diosta asha asha juyashpa paipa ali amigo tucuchun ayudapai nishpami mañaita ushanman (Prov. 22:6; Efes. 6:4).

13. Hebreos 4:16​pi nishcashnaca Jehová Diosca ¿imata ricushpata ñucanchitaca ayudan?

¹³ Catipica cashnami pensarita ushapanchi: “Jehovapa ricuipichu ñuca mañashcacunataca ¿ña contestana horas can?” nishpa. Ñucanchicunaca imata mañashpapash ucha, ligero contestachunmi munapanchi. Shinapash Jehová Diosllami ima horapacha ñucanchipa mañaicunata contestana ali cashcata alipacha yachan (Hebreos 4:16​ta liipangui). Imaguta mañajpipash Jehová Dios na ucha contestajpica ñuca mañashcacunataca na uyahuanllu yashpa pensaita ushapanchiman. Shinapash huaquinbica Jehová Diosca ñucanchiman contestangapaca ashata shuyanrami. Callari parrafocunamanda joven huauquigupi pensaripashunchi. Cai huauquiguca ungushca caimandami Jehová Diostaca jambichun mañarca. Y Jehová Dios cai jovenda shuj milagrota rurashpa jambijpica, Diabloca chai jovenga ‘can jambishcamandallami candaca sirvijun’ nita ushanmanmi carca (Job 1:​9-11; 2:4). Jehová Diosca tucui gentecunapa unguicunata tucuchingapaj shuj punllataca ñami agllashcalla charin (Is. 33:24; Apoc. 21:​3, 4). Chaimandami Jehová Dios cunan horas shuj milagrota rurashpa tucui unguicunata anchuchichunga na shuyapanchi. Shinaca cai jovenga Jehová Diostaca ¿imatata mañaita ushanman? Cai jovenga ungushca cashpapash tranquilo sintiringapaj, Jehová Diosta na saquishpa sirvingapaj, fuerzata cuchunmi mañaita ushanman (Sal. 29:11).

14. Janice panigupa ejemplomandaca ¿imatata yachajupanchi?

¹⁴ Janice panigumandapash yaripashunchi. Paica Betelpi sirvingapaj munaimandami Jehová Diosta mañarca. Shinapash paica cinco huatacuna jipami paipa mañashcata contestangapaj Jehová Dios imatalla rurashcata cuenta japirca. Paniguca ninmi: “Jehová Diosca ñuca mañaicunata contestangapaca ñucapa cualidadcunapi mejorachunrami ayudahuashca. Chaimandami Jehová Diosca na contestahuanllu yashpa pensajushca tiempopica, Jehová Diospi confianata, Bibliamanda aliguta estudianata, ñucanchi munashcacuna na pactarijpipash cushilla canata yachachihuashca” ninmi. Jipamanga paipa cusaguta paindi superintendente shina sirvichunmi invitarca. Paniguca ninmi: “Ali ricujpica Jehová Diosca ñuca mañaicunataca uyashcami. Ñuca munashcashna na contestashpapash, ñucapa ima ashtahuan ali cashcata ricushpami contestahuashca. Ashtaca tiempo jipami ñuca mañashcacunata contestashcataca cuenta japipashcani. Ñucata, Jehová Dios juyaihuan llaquishpa tratajushcata cuenta japichun ayudashcamandaca ninandami agradicipani” ninmi.

15. ¿Imamandata huaquinbica Jehová Dios munashcashna pactarichun imatapash mañana ashtahuan ali canman? (Fotocunatapash ricupangui)

¹⁵ “Ñuca pensashcashna pactarichunllu ¿imatapash mañajupani?” Imaguta munashpapash chaitapacha Jehová Dios cuchun mañana ali cajpipash, huaquinbica Jehová munashcashna imapash llujchichun mañanami ashtahuan ali canman. Shinami ñucanchicunaca Jehová Dios ñucanchipa imatapacha munashcata cuenta japita ushapashun. Escuela para Evangelizadores del Reinoman ringapaj shuj soltera panigu Jehová Diosta mañashcata yaripashunchi. Cai paniguca minishtirijuj pushtupi sirvingapaj ringapaj munaimandami cai escuelaman ringapaj munan. Jehová Diosta cai escuelaman ringapaj ayudahuai nishpa mañashca jahuapash publicadorcunata ashtahuan minishtijuj pushtupi sirvichun ayudahuai nishpapashmi mañaita ushan (Hech. 16:​9, 10). Y mañashca jipaca paicunapa superintendente de circuito huauquitami maijan congregacionbita ashtahuan precursorcuna minishtirijun nishpami tapuita ushan. Shinallata sucursalmanda huauquicunatapashmi maipi ashtahuan predicashpa ayudachun minishtinajujta tapuita ushan.e

16. ¿Imatata seguro caita ushapanchi?

¹⁶ Cai temapica, Jehová Dios ñucanchi mañaicunata juyaihuan ñucanchipa imapacha ali cashcata ricushpa contestajtami yachajupashcanchi (Sal. 4:3; Is. 30:18). Jehová Diosca huaquinbica na ñucanchi munashcashnachu contestan. Shinapash chaica na nisha ninllu ñucanchipa mañaicunata na uyaj cashcataca. Paica ñucanchitaca ninandami juyan, siempremi cuidajun (Sal. 9:10). Shinaca Jehová Diospi tucui shunguhuan confiashpa catipashunchi. ‘Tucui tiempopi paitalla shuyapashunchi’. Shinallata imata pensashcataca tucuita Jehová Diosman villapashunchi (Sal. 62:8).