Juyaimanda predicashpa catipashunchi

1. 2023 huatapa tandanajuipica ¿imatata yachajuparcanchi?

2023PA HUATAa tandanajuipica punda crishcacunapa huaquin mushuj entendimientocunatami yachachiparca. Shinallata predicacionmanda huaquin villaicunatapashmi villaparca. Por ejemplo, huaquin gentecunaca Importante Babilonia Llactata o panda religionda nara tucuchijpillatami Jehová Diosman quimirina oportunidadta charinga nishpami intindichirca. Ashtahuanbash Importante Babilonia o panda religionda tucuchishca jipapashmi Jehová Diosman quimirina oportunidadta talvez charinga nishpapashmi intindichirca. Ashtahuanbash noviembre de 2023​mandaca mashna horascunata y mashna publicaciongunata saquishcataca informe de predicacionbi jundachina ñana minishtirishca cashcatami villarca. ¿Cai cambiocunaca pundashna predicana ñana importante cashcatachu ricuchijun? Na.

2. ¿Imamandata predicanaca importantepacha can? (Marcos 13:10).

² Jehová Diospa punllaca ñapachami chayamunga. Chaimandami uchalla ashtahuan predicashpa catina capanchi. Último punllacunapi predicacionmanda parlashpa Marcos 13:10​pi Jesús ima nishcata ricupashun (cai textota liipangui). Mateo libropica Jesusca ‘tucurimui’ punlla nara chayamujpillatami mundo enteromanda tucui gentecunaman ali villaigucunata predicaringa nircami (Mat. 24:14). ‘Tucurimui’ nishpaca Diablo mandajuj cai nali mundo tucuritapacha tucurina cashcatami ningapaj munarca. Caita pactachingapaca “ima punlla, ima hora” ruranataca ña decidishcallami can (Mat. 24:36; 25:13; Hech. 1:7). Shinaca Jehovapa punlla ñapacha chayamuna cashcamandami uchalla predicashpa catina capanchi (Rom. 13:11).

3. ¿Imamandata predicapanchi?

³ Tucuicunallatami ali villaigucunataca ¿imamandata predicapanchi? nishpami pensarina capanchi. Juyaimandami predicanchi. Predicashpaca, ali villaigucunata, gentecunata, Jehová Diosta y paipa shutiguta juyashcatami ricuchinajupanchi. Cai yuyaicunamandaca asha ashami yachajupashun.

ALI VILLAIGUCUNATACA JUYAIMANDAMI PREDICAPANCHI

4. Shuj ali noticiata uyashpaca ¿imashinata sintiripanchi?

⁴ Pipash shuj cushilla noticiata cujpica ¿nachu cushilla sintiripashcangui? Talvez familiamanda pipash vijsayu nijta uyashpa o minishtijujpipacha shuj trabajota ofrecijpichari ninanda cushijupariangui. Cushijuimandami familiaman y amigocunaman uchalla villangapaj munapariangui. ¿Nachu Jehovapa Gobiernomanda ali villaigucunata uyashpaca shinallata sintiriparcangui?

5. Bibliata yachajujushpaca ¿imashinata sintiriparcangui? (Fotocunata ricupangui).

⁵ Bibliata yachajujushpa imashina sintirishcata yaripangui. Bibliata yachajujushpaca Jehová Dios quiquinda juyajta, paipa organizacionbi cachun munashcata, imapash sufrimientocunata tucuchina cashcata y shamuj punllacunapi huañushca familiacunata cutin causachina cashcatami yachajupariangui (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). Chaita yachaj chayashpaca ninandami cushijupariangui (Luc. 24:32). Bibliapi imata yachajujushcata ninanda gushtaimandami tucui gentecunaman villachina munaita charipariangui (Jeremías 20:9​ta comparashpa ricupangui).

6. Ernest y Rose cusahuarmigucunapa experienciamandaca ¿imatata yachajupangui?

⁶ Cunanga Ernestb huauquihuan ima pasashcata ricupashun. Cai huauquigu 10 huatacunata charijpimi paipa taitaca huañurca. Huauquiguca: “Ñuca taitaca ¿jahua cielomanlla rirca o para siemprechu huañurca? nishpami pensarin carcani” ninmi. “Ñucaca taitacunata charij huahuacunataca envidiashpami ricun carcani”. Paica cada punllami panteonman rishpa cungurishpa shuj oracionda ruran carca. Paica Taita Diostaca: “Por favor, ñuca papito maipi cajta yachangapami munani” nishpami mañan carca. Cai huauquigu 27 huatacunata charijpimi shuj Testigoca ¿Bibliamanda yachajungapaj munapanguichu? nishpa tapurca. Chaimi paica Bibliata yachajunata decidirca. Huauquiguca huañushcacuna ñana imatapash sintijta yachajushpa, shamuj punllacunapi cutin causarinata yachashpaca ninandami cushijurca (Ecl. 9:​5, 10; Hech. 24:15). Huauquiguca pai yachangapaj munashcacunatapachami Bibliapi respuestata tarirca. Ashtahuanbash Bibliapi shuj shuj yuyaicunamanda yachajushpa catimandami cushillapacha sintirirca. Huauquigupa huarmi Rose panigupashmi Bibliamanda yachajui callarirca. Paniguca Bibliapi imata yachajujushcataca ninandami gushtarca. Paicunaca huata 1978​pimi bautizarirca. Ernest y Rose cusahuarmigucunaca Bibliapi imata yachajushcataca familiaman, amigocunaman y shuj gentecunamanbashmi cushijushpa villachinajurca. Shina rurashcamandami paicunaca más de 70 gentecuna Jehová Diosta rijsishpa bautizarichun ayudarca.

7. Bibliapa yachachishcacunata juyashpaca ¿imata rurangapata munapashun? (Lucas 6:45).

⁷ Bibliapa yachachishcacunata ninanda juyashpaca de seguromi shujcunaman villachingapaj munapangui (Lucas 6:45​ta liipangui). Punda tiempopi apostolcunaca “imata uyashcata, imata ricushcata parlanataca nimamanda na saquita ushanchichu” nircami. Ñucanchicunapash paicunashnami sintiripanchi (Hech. 4:20). Bibliapa yachachishcacunata ninanda juyaimandami ñucanchicunapash tucui gentecunaman villachingapaj munapashun.

GENTECUNATA JUYAIMANDAMI PREDICAPANCHI

8. Gentecunaman villachina munaita charichunga ¿imata ayudanga? (“Juyaimandami: Bibliamanda Yachachipanchi” nishca recuadrota ricupangui) (Fotota ricupangui).

⁸ Jehová y Jesushnami ñucanchicunapash gentecunata ninanda juyapanchi (Prov. 8:31; Juan 3:16). ‘Taita Diosta’ y esperanzata na charij gentegucunamandaca ninandami llaquiripanchi (Efes. 2:12). Paicunata llaquimandami problemacunahuan llaquillapacha sintirinajujta ricushpaca, Jehovapa Gobiernomanda ali villaigucunata villachishpa ayudapanchi. Gentecunata juyana y llaquinami tucui usharishcaguta rurashpa paicunaman ali villaigucunata villachichun ayudanga. Bibliata yachajunami shuj esperanzata charichun y cunanmandallata “ciertopacha ali” y cushilla causaita charichun ayudanga. Shamuj punllacunapicarin para siempre causaita ushachunmi ayudanga (1 Tim. 6:19).

9. Gentecunamanga ¿ima nishpata advirtinajupanchi? (Ezequiel 33:​7, 8).

⁹ Gentecunata juyaimandami cai mundopa nali ruraicunaca ñapachami tucuringa nishpa advirtichun ayudanga (Ezequiel 33:​7, 8​ta liipangui). Mateo 24:21​pica: ‘Ninan manllanai llaqui tiempomi tianga. Chashna llaqui tiempoca, cai mundota rurashca punllacunamandapacha cunangamanbash nunca nara tiashcachu. Y cutinbash na tiangachu’ ninmi. Gentecuna y ñucanchi na Testigo familiacuna cai punlla chayamujujta na cuenta japishpa causanajujta ricushpami llaquilla sintiripanchi. Jehová Diospa juicio punllapi imapacha pasanata gentecuna yachachunmi munapanchi. Chai punllapica panda religiongunami tucuchitapacha tucuchi tucunga. Jipaca Armagedón punllapica cai mundopa nali ruraicunami para siempre tucuchi tucunga (Apoc. 16:​14, 16; 17:​16, 17; 19:​11, 19, 20). Jehová Diostaca tucui gentecuna ali villaigucunata uyachun y paicunahuan tandanajushpa Jehová Diosta sirvingapami mañapanchi. Pero villachijpipash na uyangapaj munaj familiacunahuan y shuj gentecunahuanbash ¿imashi pasanga?

10. ¿Imamandata gentecunaman predicashpa catinaca importantepacha can?

¹⁰ Imashinami caishuj temapi yachajuparcanchi Importante Babilonia Llacta o panda religión tucuchi tucujta ricushpami gentecunaca cambiocunata rurashpa Jehová Diosman quimiringa. Chaita ruraimandami Jehová Diosca paicunata talvez salvanata decidinga. Shina pasanata yachaimandami predicana ninan urgente cashcatami ali intindipanchi. Caita yaipi charina capanchi: Cunan imata villachishcataca talvezpashmi gentecunaca jipaman yaripanga (Ezequiel 33:33​huan comparashpa ricupangui). Cunanbi villachishcacunataca jipa punllacunapichari yarishpa Jehová Diosta sirvinata decidinga. Y salvaritapash salvaringa. Filipos llactamanda carcelta cuidaj runaguca terremoto tiajta ricushpami ali villaigucunataca chasquirca. Cunanbi ali villaigucunata gentecuna na uyashpapash Importante Babilonia Llacta o panda religión tucuchi tucujta ricushpami talvez ali villaigucunataca uyanga (Hech. 16:​25-34).

JEHOVÁ DIOSTA Y PAIPA SHUTITA JUYAIMANDAMI PREDICAPANCHI

11. Jehová Diostaca ¿imashinata ‘jatunyachishcata y respetashcata’ ricuchi ushapanchi? (Apocalipsis 4:11) (Fotocunata ricupangui).

¹¹ Ali villaigucunataca Jehová Diosta y paipa shutiguta juyaimandami gentecunamanga predicapanchi. Predicashpami Jehová Diosta tucui shunguhuan juyashcata ricuchinajupanchi. Ñucanchicunaca: “Ninan poderta charij ñucanchi Jehová Dioslla, quiquinmi jatunyachi tucuna derechotapash y respetai tucuna derechotapash charipangui” ningapami munapanchi (Apocalipsis 4:11​ta liipangui). Jehová Dios tucuita rurashcata y causaita carashcata, gentecunaman ali ali intindichishpami Jehovata jatunyachishcata y respetashcata ricuchinajupanchi. Ñucanchi tucui usharishcaguta rurashpa predicangapaca ñucanchi tiempota y fuerzatami utilizana capanchi (Mat. 6:33; Luc. 13:24; Col. 3:23). Ñucanchicunaca Jehová Diosta tucui shunguhuan juyaimandami predicapanchi. Shinallata Jehová Diospa shutimanda y paipa shuti ima significadota charin cashcatapashmi parlangapaj munapanchi.

12. ¿Imata rurashpata Jehovapa shutiguta santificaita ushapanchi?

¹² Jehová Diosta tucui shunguhuan juyaimandami paipa shutigu santificado cachun munapanchi (Mat. 6:9). Diabloca llullacunata nishpami Jehovapa shutita mapayachishca. Shina cajpipash ñucanchicunaca Jehová Diospa shutigu limpio cachun munaimandami predicapanchi (Gén. 3:​1-5; Job 2:4; Juan 8:44). Predicanajushpaca Jehová Diospa shutimanda y imashina Dios cashcata ricuchishpa predicangapaj munapanchi. Shinallata tucui gentecunaman Jehová Dios juyaj, justo Dios cashcata y paipa Gobierno shamujpi tucui sufrimientocunata tucuchishpa, tranquilo cushilla causaiguta apamunatami parlangapaj munapanchi (Sal. 37:​10, 11, 29; 1 Juan 4:8). Predicangapaj tucui usharishcaguta rurashpaca Jehová Diospa shutigu santificado cachunmi ayudanajupanchi. Ashtahuanbash predicana responsabilidadta pactachinajushcamandami cushilla sintiripanchi.

13. Testigo de Jehová cashcamandaca ¿imamandata cushilla sintiripanchi? (Isaías 43:​10-12).

¹³ Jehová Diosca ñucanchicunataca paipa testigocuna cachunmi agllashca (Isaías 43:​10-12​ta liipangui). Huaquin huatacuna huashamanga Cuerpo Gobernantemanda huauquicunaca: “Testigo de Jehová canaca shuj jatun bendicionmi can” nishpami escribirca.c Caita intindingapaca cai ejemplopi pensaripashun: Pipash llullacunata nishpa ñucanchita juiciojushcanman. Chaimandami ñucanchipa lado tucushpa shayarichun, shuj testigota minishtipanchiman. Y cai testigoca ñucanchi rijsishca, de confianza personami cana can. Shinallata ali, honradopashmi cana can. Shina persona caimandami juiciopica paipa nishcacunataca valichinga. Shina cuendallatami Jehová Diosca ñucanchita rijsimanda y confiaimandami paimanda predicachun agllashca. Ñucanchicunapaca Jehová Diospa Testigocuna canaca shuj jatun bendicionmi can. Chaimandami Jehovapa shutiguta tucui gentecunaman villachingapaj y Diablopa nishcacuna llulla cashcata ricuchingapapashmi predicapanchi. Shina rurashpami testigo de Jehová cashcata ricuchipanchi (Sal. 83:18; Rom. 10:​13-15).

JEHOVAPA PUNLLA CHAYAMUNGACAMANMI PREDICASHPA CATIPASHUN

14. Shamuj punllacunapi ¿ima pasachunda munapanchi?

¹⁴ Ninan Manllanai Llaqui Tiempocuna nara callarijpillata Jehová Diospa ayudahuan ashtaca gentecuna Bibliamanda yachajui callarichunmi munapanchi. Ashtahuanbash Ninan Manllanai Llaqui Tiempo ña chayamushca cajpipash ashtaca gentecuna cai mundopa nali ruraicunata saquishpa, ñucanchihuan igual Jehová Diosta alabachunmi munapanchi (Hech. 13:48).

15, 16. ¿Imatata rurashpa catipashun? ¿Ima horacamanda shina rurashpa catipashun?

¹⁵ Jehovapa punlla chayamungacamanga mundo enteromanda tucui gentecunaman Jehovapa Gobiernomanda villachina bendiciondami charipanchi. Ashtahuanbash cai mundopi ashtaca nali ruraicunaca ñapachami tucuchi tucunga nishpa gentecunamanga advirtishpa catina capanchi. Jehová Diospa juicio punlla chayamujpimi ñucanchicuna Jehová Dios munashcashna predicanajushcata gentecunaca cuenta japinga (Ezeq. 38:23).

¹⁶ Ñucanchicuna ali villaigucunata, gentecunata, Jehová Diosta y paipa shutiguta juyaimandami uchalla predicashpa catingapaj munapanchi. Ñucanchicunaca Jehová Dios caicamanlla predicachun ningacamanmi cushijushpa predicashpa catingapaj munapanchi.