¿Imashinata Jehová Diospa perdonmandaca beneficiarita ushapanchi?

1. Pipash perdonanimi nijpica ¿imatapachata ningapaj munan?

ÑUCANCHI llaquichishca persona shamushpa quiquindapash perdonanimi nijpica ñucanchicunaca cushilla, tranquilomi sintiripanchi. Shinapash chai persona perdonanimi nishpaca ¿imatapachata ningapaj munashcanga? Shuj persona perdonani nishpa imatapacha ningapaj munashcataca na cabalta intindita usharinllu. Porque huaquingunaca perdonmandaca shuj shuj yuyaitami charin. Huaquingunaca perdonanchi nishpaca talvez amigocunallata cashpa cati ushashcatami ningapaj munanga. Cutin huaquinguna perdonashpapash ñana pundashna llevarita usharingachu nishpami pensaringa.

2. Bibliapica Jehová Dios ñucanchita perdonajta ¿imashinata ricuchin? (Notata ricupangui).

² Gentecunaca Jehová Dioshnaca na perdonaita ushanllu. Bibliapica shuj salmistaca cashnami nirca: ‘Manllaihuan cambaj ñaupajpi cumurichunga, nalita rurashcata cunganaca [o ciertopacha perdonanaca, TNM] cambillami tian’ (Sal. 130:4).a Jehová Diosllami nalita rurashcataca cungaita y ciertopacha perdonaita ushan. Chaimandami ñucanchicunapash Jehová Dioshna perdonangapaj munashpaca, paipa ejemplota catita ushapanchi. Escrituras Hebreaspimi huaquinbica Jehová Dioslla ñucanchita ciertopacha perdonashca ningapaj shuj shimita utilizan.

3. ¿Imamandata Jehová Diosca gentecunashnaca na perdonanllu nipanchi? (Isaías 55:​6, 7).

³ Jehová Diosca pitapash perdonashpaca, paipa pecadocunataca para siempremi cungan. Shinami paihuan cutin amigo cachun saquin. Shinaca Jehová Diosca para siempremi perdonan. Chaita yachashpami ninanda agradicinchi (Isaías 55:​6, 7​ta liipangui).

4. Jehová Diosca pai ñucanchicunata ciertopacha perdonashcata intindichingapaca ¿imatata rurashca?

⁴ Jehová Diosca na gentecunashna perdonanllu. Chaimandami Jehová Dios imashapacha perdonajta intindinaca difícil can. Shinapash Jehová Diosca pai imashina perdonajta intindichingapaca Bibliapimi huaquin comparaciongunata utilizashpa yachachin. Cai temapimi huaquin comparaciongunamanda yachajupashun. Chai chimbapuraicunata yachajushpami Jehová Dios ñucanchi pecadocunata perdonajta y cutin paipa amigo cachun saquijta yachajupashun. Cai temapi yuyaicunami Jehová Dios ñucanchita imashina perdonajta ashtahuan aliguta intindichun y Jehová Diostapash ashtahuan juyachunmi ayudanga.

JEHOVÁ DIOSMI ÑUCANCHI JUCHACUNATACA PERDONAN

5. Jehová Dios ñucanchi juchacunata perdonashpaca ¿imata pasan?

⁵ Bibliapica ashtaca viajecunatami ñucanchi juchacunataca shuj llashaj quipihuan chimbapuran. Por ejemplo, rey Davidca: “Jatun nalita ñuca rurashcacunami, ñuca umapi shinllita llapimujun. Llasha quipishnami, ñuca jahuapi shinllita llapimujun” nircami (Sal. 38:4). Shinapash, Salmo 25:18 y 32:5​pica shuj persona juchata rurashcamanda arripintirijpica Jehová Diosca ‘cungan o perdonan’ ninmi. Hebreo shimipica “perdonana” shimica “anchuchina” o “apashpa rina” cashcatami intindichin. Cai versocunapi ricushcashnaca Jehová Dios shuj shinlli shinlli runashna ñucanchi juchacunataca llasha quipitashna paipa hombrospi apashpa rinshna cashcatami ricuchin.

6. Jehová Diosca ñucanchi juchacunahuanga ¿imatata ruran?

⁶ Jehová Diosca ñucanchi juchacunahuanga ¿imatata ruran? Chaita intindingapaca Salmo 103:12​pimi shuj comparacionda ricuita ushapanchi: Chaipica ‘indi llujshimuj ladoca, indi huashajuj ladomandaca carupimi. Chashnallatami ñucanchi pecadocunatapash, ñucanchimandaca caruyachirca’ nijunmi. Indi llujshimujuj ladoca, indi huashajuj ladohuanga caru carupimi can. Shinaca cai versopi yachajushcashnaca Jehová Dios ñucanchi juchacunata perdonashpaca ñucanchimanda carupi churajta na ricui ushanalla pushtupi saquijtami ricuchin. Caicunata yachajunaca ninandami animachin.

7. Bibliapica Jehová Dios ñucanchi pecadocunahuan ¿imata rurajtata yachachin? (Miqueas 7:​18, 19).

⁷ Jehová Dios ñucanchi juchacunata carupi saquishpaca ¿cutinllu chai juchacunataca yuyarin? Rey Ezequiasca: “Ñuca tucui juchacunataca, huashaman shitanshna cungashpami, chashna quishpichihuarcangui” nircami (Is. 38:​9, 17). Shinaca Jehová Diosca ñucanchi arripintirijpica, ñucanchi juchacunataca huashaman shitanshna churashpami cungaitapacha cungan. O shuj shimicunapi nishpaca “imapash juchata nunca na rurashcatashnami ricun”. Miqueas 7:​18, 19​ta (liipangui). Cai textopica Jehová Dios imashina ashtahuan perdonajta yachachunmi shuj chimbapuraitapash churan. Jehová Diosca ‘ñucanchi juchacunataca mama cucha ucu ucumanmi shitanga’ nijunmi. Punda tiempocunapica imapash mar yacuman urmajpica cutinga ñana taritaca usharinllu carca.

8. Caicamanga ¿imatata yachajupashcanchi?

⁸ Cai chimbapuraicunapica, Jehová Dios perdonashpaca ñucanchi juchacunata cungaitapacha cungan cashcata, ñucanchicuna tranquilo sintirichun ayudaj cashcatami yachajupashcanchi. Chaimandami David nishcashnaca: “Nalicunata rurashca cashpapash perdonai tucushcacunaca cushilla cachun. Shinallata, paicunapa pecadocunamanda perdonai tucushcacunapash cushilla cachun. Jehová Diospa ñaupapi jucha illanshna ricurij gentecunapash cushilla cachun” nircami (Rom. 4: 6-8).

JEHOVÁ DIOSCA ÑUCANCHI PECADOCUNATACA CUNGAITAPACHAMI CUNGAN

9. Jehová Diosca pai imashinapacha perdonajta intindichingapaca ¿ima chimbapuraicunatata utilizan?

⁹ Jehová Dios imashinapacha perdonajtaca Bibliapi ashtahuan shuj chimbapuraicunahuan yachajupashunchi. Jesusmandami Jehová Diosca pipash juchata rurashpa arripintirijpica juchataca cungaitapacha cungan. Bibliapica Jehová Diosca pecadocunataca maillanshna, limpianshnami saquin ninmi. Shinami shuj personaca pecadomandaca limpio quidaita ushan (Sal. 51:7; Is. 4:4; Jer. 33:8). Jehová Diosllatami pecadocunata maillanshna, limpianshna saquijpi ima pasajta ricuchin. Paica ninmi: “Cangunapaj juchacuna puca telashna cajpipash, razutashna yurajllagumanmi tigrachisha. Yanalla puca telashna cajpica, cangunataca yuraj yuraj milmagumanshnami tigrachisha” ninmi (Is. 1:18). Yura telapi, puca color mancharijpi llujchinaca dificilmi can. Shinapash Jehová Diosca cai yura telamanda puca manchata anchuchinshnami ñucanchi juchacunataca maillashpa, limpiashpa perdonaitapacha perdonan.

10. Jehová Dios ñucanchita imashina perdonajta ashtahuan aliguta intindichunga ¿ima chimbapuraitata utilizan?

¹⁰ Chaishuj temapica pecadocunataca dibicunahuan chimbapurajtami yachajuparcanchi (Mat. 6:12; Luc. 11:4). Shinaca cada pecadota rurashcami Jehová Dioshuan dibi tucujuj cuenda quidapanchi. Pero Jehová Diosca ñucanchi pecadocunata perdonashpaca chai ashtaca dibicunata tucuchishpa saquijuj cuendami can. Shuj shimicunapi nishpaca paica ñucanchita perdonashca jipaca ñana cutin ñucanchi pecadocunataca tigrashpa yarijunllu. Y Jehová Dios cashna ñucanchita perdonajta yachanaca ninandami consolachin.

11. Jehová Dios ñucanchi pecadocunata imasha perdonajtaca shuj chimbapuraihuan intindichipai (Hechos 3:19).

¹¹ Jehová Dios ñucanchi pecadocunata perdonashca jipaca paica cungaitapachami cungan (Hechos 3:19​ta liipangui). Caipi pensaripashunchi: Shuj personapa dibita hojamanda tachajpipash chai personapa dibijushcaca hojapica ricurinrami. Shinapash Jehová Diosca ñucanchi juchacunata perdonashpaca shuj hojamanda dibita tucuita borrashpa saquijuj cuendami can. Ashtahuan intindingapaca punda tiempocunapi escribingapaj tintapi pensaripashunchi. Chai tintacunaca carbonhuan, gomahuan y yacuhuanllami rurashca carca. Y cai tintahuan escribishcacunaca borrangapaca facilmi can carca. Chaimandami punda tiempocunapica hojacunamanda dibicunata fácil tucuita borrashpa limpio saquinlla carca. Nuncapash na dibita charishcashnami quidan carca. Shina cuendallatami Jehová Dios ñucanchi pecadocunata perdonashpaca shuj hojapi dibita tucuita borrashpa saquinshna ñucanchi pecadocunataca cungaitapacha cungashpa nunca más ñana yarin. Jehová shina perdonaj Dios cashcata yachaimandaca ninandami agradicipanchi (Sal. 51:9).

12. Bibliapi parlashca fuyumandaca ¿imatata yachajupanchi?

¹² Isaías 44:22​pica: Pecadocunataca ‘fuyutashnami chingachisha. Cangunapaj juchacunataca, yuraj fuyutashnami anchuchisha’ ninmi. Cai chimbapuraica Jehová Dios ñucanchi pecadocunahuan imata rurajta ashtahuan intindichunmi ayudan. Jehová Diosca ñucanchi pecadocunata perdonashpaca anchuchitapacha anchuchishpami nunca más ñana yarin.

13. Jehová Dios pecadocunata perdonajta yachashpaca quiquinga ¿imashinata sintiripangui?

¹³ Jehová Dios ñucanchi pecadocunata perdonajpica ñucanchicunaca ñana culparishpa catijunachu capanchi. Ashtaca dibicunata ñana cobrashpa perdonashpa saquishca cuendami Jehová Diosca Jesusmanda ñucanchitaca ña perdonashca. Y Jehová Diosca ñucanchi juchacunamanda arripintirijpi perdonashpaca cungaitapacha cungashpami nunca más ñana yarin.

JEHOVÁ DIOSHUANGA CUTINMI AMIGO TUCUITA USHAPANCHI

14. Jehová Dios ñucanchita perdonashcataca ¿imashinata seguro capanchi? (fotocunata ricupangui).

¹⁴ Jehová Dios ñucanchita perdonashpaca paica cutinmi ñucanchihuan ali amigo tucun. Chaita yachanami punda rurashca juchacunamanda ñana culparishpa tranquilo sintirichun ayudan. Shinallata Jehová Diosca ñucanchicunahuan ñana culirashca cashcata pensarichunbashmi ayudan. Jehová Diosca risintirishpa, culirashpa quidaj Diosca na canllu. ¿Imamandata chaitaca seguro caita ushapanchi? Jehová Diosllatami profeta Jeremiastaca nirca: ‘Nalita rurashcataca cungashami. Paicunapaj juchataca, napacha cutinga yarishachu’ nishpa (Jer. 31:34). Apóstol Pablopashmi: “Paicunapa pecadocunataca cutinga na yarishachu” nirca (Heb. 8:12). Cai shimicunaca ¿imata nisha nin?

15. Jehová Dios ñucanchi pecadocunata ñana yarishachu nishpaca ¿imatata ningapaj munan?

¹⁵ Bibliapica yarina shimica punda imatalla rurashcata pensarinallaca na canllu. Huaquinbica yarina shimica imatapash yarishpa rurana cashcatapashmi ricuchin. Por ejemplo, Jesuspa ladopi huarcuriajushca shua runaca Jesustaca: “Quiquin ña rey shina mandajushpaca ñucata yarihuangui” nircami (Luc. 23:​42, 43). Cai shimicunahuanga chai runaguca chai rato paipi pensarichunllaca na mañajurcachu. Sino jipa punllacunapi paita yarichunmi chai runaguca mañajurca. Shinallatami Jehová Diosca ñana yarisha nishpaca, ñucanchi pecadocunata cungaitapacha cungasha y nunca más ñana yarishachu nin.

16. Bibliapi nishcashnaca Jehová Dios perdonajpica ¿imashinata sintiripanchi?

¹⁶ Jehová Dios ñucanchi pecadocunata perdonajpica cushillami sintiripanchi. Chaita ashtahuan aliguta intindingapaj Bibliapi shuj comparacionda ricupashun. Tucuicuna pecadorcuna caimandami ‘pecadopa esclavocunashna’ canchi. Pero Jehová Dios ñucanchita perdonajpimi ‘pecadomandaca libre quidarcanchi’ (Rom. 6:​17, 18; Apoc. 1:5). Shuj esclavo libre quidaimanda cushilla sintirinshnami ñucanchicunapash Jehová Dios perdonajpica cushilla sintiripanchi.

17. Jehová Dios ñucanchita perdonajpica ¿imamandata millai unguimanda jambirinshna can nita ushapanchi? (Isaías 53:5).

¹⁷ (Isaías 53:5​ta liipangui). Cutin último comparacionda yachajupashunchi. Bibliapica pecadotaca shuj millai unguihuanbashmi chimbapuran. Jehová Diosmi paipa Churita utilizashpa cai millai unguimanda jambinshna ñucanchi pecadocunataca perdonashca. Shinallata paipa ali amigo cutin caita ushachunbashmi ayudashca (1 Ped. 2:24). Por ejemplo shuj persona shuj millai unguimanda sanoyashpaca ninandami cushijun. Shina cuendami Jehová Dios ñucanchi juchacunata perdonajpi y paihuan “cutin ali” amigo tucuchun saquishcamandaca ninanda cushijupanchi.

JEHOVÁ DIOSPA PERDONMANDACA ¿IMASHINATA BENEFICIARIPANCHI?

18. Bibliapi yachachishca comparaciongunahuanga Jehová Diospa perdonmandaca ¿imatata yachajupashcanchi? (“Jehová Diospa perdonga ¿imashinata can?” nishca recuadrota ricupangui).

¹⁸ Cai comparaciongunahuanga Jehová Dios ñucanchicunata perdonashpaca tucui pecadocunata borranshna, chingachinshna y nunca más ñana yarina cashcatami yachajupashcanchi. Chaimandami Jehovahuan cutin ali amigo tucushpa catita ushapashcanchi. Shinapash Jehová Diosca ñucanchicunata juyaimanda, llaquimanda perdonashcatami yarina capanchi (Rom. 3:24).

19. a) Jehová Diostaca ¿imamandata agradicina capanchi? (Romanos 4:8). b) Cati temapica ¿imatata yachajupashun?

¹⁹ (Romanos 4:8​ta liipangui). Jehová Diosmanda parlashpaca Salmo 130: 4​pi nishcashnaca: ‘Nalita rurashcata cunganaca [o ciertopacha perdonanaca, TNM] cambillami tian’ ninmi. Jehová Dios cashna perdonaj Dios cashcamandaca ninandami agradicipanchi. Shinaca Jehová Dios ñucanchita perdonachun munashpaca Jesús nishca consejotami cazuna capanchi. Jesusca: “Shujcunata canguna perdonajpica, jahua cielopi cangunapa Taitapashmi cangunataca perdonanga” nircami (Mat. 6:​14, 15). Shinaca Jehová Dios perdonanshnami ñucanchicunapash perdonana capanchi. Cati temapica Jehová Dioshna shujcunata perdonangapaj imata rurana cashcatami yachajupashun.