Perdonangapaca ¿imashinata Jehovapa ejemplota catita ushapanchi?

1, 2. a) ¿Ima pasajpita perdonanaca difícil caita ushan? b) Denise paniguca ¿imata rurashpata perdonashcataca ricuchirca?

PERDONANACA na facilchu can. Ashtahuanbachaca pipash ñucanchita llaquichijpimi perdonanaca shinlli ricurin. Shinapash ñucanchicunaca perdonaita ushapanchimi. Chaipaca Denisea panigu imashina perdonashcata yachajupashunchi. Huata 2017​pica Denise y paipa familiaca testigo de Jehovacunapa jatun Betelta visitangapami rirca. Huasiman tigranajujpimi shuj carroca paicunapa carrohuan chocarirca. Chaipica Denise paniguca inconcientemi quidarca. Chai accidentemanda juizu japishpaca paipa churigucuna herido cashcata y paipa cusagu huañushcatami yachaj chayarca. Y chai accidentemanda parlashpaca Denise paniguca ninmi: “Ñucaca ninan llaqui, nanarishcami sintirircani” nishpa. Jipamanga paicunata chocashca carro na culpata charishcata, yangata na manejajushcata, ni machashcapash na cashcatami yachaj chayarca. Chaimandami Denise paniguca chai jarihuan ama culira sintiringapaj y tranquila sintiringapaj ayudahuai nishpa Jehová Diostaca mañarca.

² Denise panigupa cusata accidentalmente huañuchishca jaritaca juiciomanmi aparca. Juzgadomandaca cai panigutaca paipa cusata huañuchishca jaritaca, carcelman churanata o na churanata ricungapami paipa declaracionda minishtinchi nishpa cayarca. Chaimandami paniguca: “Chai accidentepi ima pasashcata cutin parlanaca ñucapaca chugripi imapash tacarinshnami cahuarca” ninmi. Huaquin semanacuna jipallami paipa familiata llaquichishca jarimanda shuj declaracionda ningapaca tribunalpi carca. Denise paniguca chai jariguta llaquishpa tratachun nishpami jueztaca mañarca.b Chaita uyashpami juezca huacai callarishpa cashna nirca: “25 huatacunatami juez cashcani, shinapash culpata charij jarita llaquishpa tratachunga nunca na pipash mañahuashcachu. Primera vezmi shuj persona chashna perdonajtaca ricupani” nircami.

3. Panigu Denise perdonachunga ¿imata ayudarca?

³ Denise panigutaca perdonachunga Jehová Diospa ejemplota catinami ayudarca (Miq. 7:18). Tucui shungu agradicishpami shujcunata perdonana munaita charipashun.

4. Jehová Diosca ¿imata rurachunda munan? (Efesios 4:32).

⁴ Jehová Diosca ñucanchicunataca tucui shungumi perdonan. Y ñucanchicunapash paishnallata tucui shungu perdonachunmi munan (Efesios 4:32​ta liipangui). Ñucanchita llaquichijcunata perdonangapaj listo cachunmi munan (Sal. 86:5; Luc. 17:4). Cai temapica perdonanata yachajuchun imashina quimsa yuyaicuna ayudajtami ricupashun.

IMAPASH NA PASASHCAPISHNA YANGATA NA PARLASHPA NA SAQUINA

5. Imatapash nishpa o rurashpa llaquichijpica ¿imashinata sintirita ushanchiman? (Proverbios 12:18).

⁵ Shuj ali amigo o shuj familiar imatapash nishpa o rurashpa llaquichijpimi perdonanaca ashtahuan difícil caita ushan (Sal. 55:​12-14). Huaquinbica espadahuan chugrichijpishnami nanarishca sintirita ushapanchi (Proverbios 12:18​ta liipangui). Huaquinbica talvezpashmi imapash na pasashcatashna pensashpa saquingapaj munapanchiman. Chaica pipash cuchillohuan clavajpi chai cuchillota chaipillata, na llujchishpa saquij cuendami canman. Shinaca ñucanchicuna imashina sintirishcata na parlashpaca cutin ali sintirishpa ñaupaman catitaca na ushashunllu.

6. Ñucanchita imatapash nishpa o rurashpa llaquichijpica ¿imatata ruranchi?

⁶ Pipash imatapash nishpa llaquichijpica ñucanchicunaca culiraitami culirai ushapanchi. Bibliapica tucuicunatallatami chai pasaita ushashcata ricuchin. Shinapash Bibliapica chai nali sentimientocuna ñucanchita mishachunga na saquinachu canchi nishpami consejan (Sal. 4:4; Efes. 4:26). ¿Imamandata shina consejan? Porque huaquinbica culirashca caimandami nalita ruraita ushapanchiman (Sant. 1:20). Shinaca caitami yuyarina capanchi, llaquichijpica culiraita ushanchimi, pero culirashpa catinataca ñucanchimi decidinchi.

7. ¿Pipash imatapash nishpa o rurashpa llaquichijpica imashinata ashtahuan sintirita ushapanchi?

⁷ Imatapash nishpa o rurashpa llaquichijpica shuj llaqui sentimientocunatapashmi charita ushapanchi. Por ejemplo, Ann shuti paniguca cashnami nin: “Huahua cajpi ñuca papito ñuca mamitata saquishpa shuj huarmihuan causangapaj rijpica jichushcami sintirircani y ñuca papito paipa huarmihuan huahuacunata charijpica llaquillami sintirircani. Ñucataca pipash ñana juyahuangachu nishpami yuyan carcani”. Georgette shuti paniguca paipa cusa traicionajpi imashina sintirishcatami parlan. Paica cashnami nin: “Ñuca cusahuanga huahuamandapachami ali amigocuna carcanchi. Shinallata compañero de precursoradopashmi carcanchi. Chaimi ñuca cusa traicionajushcata yachaj chayashpaca llaquillapachami sintirircani”. Cutin panigu Naomica cashnami nin: “Ñuca cusa llaquichinataca nunca na yuyashcarcanichu. Pero pornografiata ricun cashcata villajpica traicionadami sintirircani”.

8. ¿Imamandata perdonana capanchi? (“Shuj persona llaquichishcata na cungai ushashpaca ¿imatata ruraita ushapanchi?” nishca recuadrota ricupangui).

⁸ Shujcuna imata nijta o imata rurajta na controlaita ushapanchichu, pero cada unomi imata ruranataca decidina capanchi. Shinapash perdonanami ashtahuan ali can. Porque Jehová Diosta juyaimandami perdonanchi. Culirashca cashpa y na perdonashpaca juizu illa runashnami imatapash ñapash ruranchiman. Shinallata ñucanchi saludtapashmi afectaita ushan (Prov. 14:​17, 29, 30). Panigu Christine ima nijta ricupashunchi: “Culirashca cashpaca na cushilla caita ushanichu, micuitapash y aliguta puñuitapash na ushanichu. Shinallata ñapashmi imamandapash culiranilla, chaimandami ñuca matrimoniopipash y shujcunahuan ali canatapash afectahuan” ninmi.

9. ¿Imamandata resentido cashpa catinaca nali can?

⁹ Ñucanchita llaquichishca persona ñucanchita nunca na perdonda mañajpica ¿imatata ruraita ushapanchi? Chai situación ñucanchita ama afectachunga ¿imatata rurai ushapanchi? Párrafo 7​pi parlashca Georgette paniguca cashnami nin: “Ñuca cusa cashcata perdonangapaca ashtaca tiempomi yalirca. Shinapash paita perdonashpaca tranquila alimi sintirircani” ninmi. Resentido canata saquinaca ñucanchillata tranquilo ali sintirichun ayudan. Shinallata perdonashpaca tucuita cungashpami cutin cushilla causaita ushapanchi (Prov. 11:17). Imashina quiquin sintirishcata intindishpapash talvez perdonangapaca nara listo cashpaca ¿imatata ruraita ushapangui? Cati yuyaita yachajupashunchi.

ÑUCANCHICUNATA LLAQUICHISHCATA CUNGASHPA ÑAUPAMAN CATIPASHUNCHI

10. Ñucanchita llaquichishcata cungangapaca ¿imamandata tiempota minishtipanchi? (Dibujocunata ricupangui).

¹⁰ Ñucanchita llaquichishcata cungachunga ¿imatata ayudaita ushan? Primeroca tiempomi minishtirin. Shuj accidenteta charishca personapi pensaripashunchi. Doctorpaman rishca jipaca ali tucungapaca tiempotami minishtin, shinallata ñucanchi sentimientocuna ali tucuchunga tiempotami minishtipanchi. Shina rurashpami perdonangapaca listo capashun (Ecl. 3:3; 1 Ped. 1:22).

11. Jehová Diosta mañanaca ¿imapata ayudan?

¹¹ Catipica perdonaita ushangapaca Jehová Diostami mañana capangui.c Párrafo 7​pi parlashca Ann paniguca Jehová Diosta mañana imashina perdonachun ayudashcata parlashpami cashna nin: “Jehová Diostaca familiapi tucuicunallata imagutapash na aliguta pensarishpa rurashca cosascunamanda perdonahuai nishpami mañarcani. Chai jipaca ñuca papitoman y paipa huarmigumanga ñucaca perdonanimi nishpami shuj cartaguta escribishpa cacharcani” ninmi. Ann panigupa chaita rurana na fácil cashcata parlashpami cashna nin: “Cashna rurashpa Jehová Dioshna perdonangapaj esforzarishcamandaca shuj punlla ñuca papitopash y paipa huarmigupash Jehová Diosmanda yachajungapaj munanga yanimi”.

12. ¿Imamandata ñucanchi sentimientocunapi confianapa randica Jehová Diospi confiana capanchi? (Proverbios 3:​5, 6).

¹² Ultimopica ñucanchi sentimientocunapi confianapa randica Jehová Diospimi confiana capanchi (Proverbios 3:​5, 6​ta liipangui). Jehová Diosca ñucanchipa ima ali cajtaca alimi yachan (Is. 55:​8, 9). Paica ñucanchita llaquichij cosascunata rurachunga nunca na mañangachu. Chaimandami ñucanchicunata Jehová Dios perdonachun mañashpaca ñucanchipa alipallata cashcata cuenta japipanchi (Sal. 40:4; Is. 48:​17, 18). Cutin ñucanchi sentimientocunapi confiashpaca shujcunata nunca na perdonai ushashunllu (Prov. 14:12; Jer. 17:9). Párrafo 7​pi parlashca Naomi paniguca cashnami nin: “Ñuca cusa pornografiata ricushcamandaca ama perdonangapaca razonda charinimi, nunca na perdonashachu yarcanimi. Perdonajpica cutinllatami ñucataca llaquichihuanga yarcanimi. Jehová Diospash ñuca cusata na perdonajpica intindihuangami yashpami pensarcani. Pero tiempohuanga ñuca imashina sintirishcata intindishpapash Jehová Diosca na ñucahuan de acuerdo cashcatami intindircani. Jehová Diosca ñuca imashina sintirijtaca alimi intindin. Shinapash paica perdonachunmi munan”.d

SHUJCUNAPA ALI CUALIDADCUNATA RICUNGAPAJ ESFORZARIPANGUI

13. Romanos 12:​18-21​pi nishcashnaca ¿imatata rurana capanchi?

¹³ Perdonanaca imapash na pasashcapishna yangata na parlashpa saquinaca na canllu. Ashtahuangarin parlanami minishtirin. Y shuj huauqui o pani cajpica paicunahuan parlashpa cutin ali tucunatami mascana capanchi (Mat. 5:​23, 24). Culiranapa randica llaquishpa tratapashunchi. Y resentido quidanapa randica perdonapashunchi (Romanos 12:​18-21​ta liipangui; 1 Ped. 3:9). Perdonachunga ¿imata ayudanga?

14. Shujcunata perdonangapaca ¿imata rurangapata esforzarina capanchi?

¹⁴ Llaquichishca personataca Jehová Dios ricunshnami ricuna capanchi. Jehová Diosca gentecunapa ali cualidadcunatami ricun. Chaimandami llaquichishca personataca Jehová Dios ricunshna ricungapaj esforzarina capanchi (2 Crón. 16:9; Sal. 130:3). Shinaca ali cosascunata mascashpaca ali cosascunatami tarishun. Pero nali cosascunata mascashpaca chaitallatami tarishun. Ali cualidadcunata ricunaca shujcunata ashtahuan facillla perdonachunmi ayudanga. Por ejemplo, Jarrod shuti huauquiguca cashnami nin: “Shuj huauquita perdonana fácil cachunga pai nali cosascunata rurashcata ricunapa randica ali cualidadcunata ricungapami esforzarini” ninmi.

15. ‘Perdonanimi’ ninaca ¿imamandata importante can?

¹⁵ Shinallata chai personataca perdonanimi nitami ushapangui. Imamanda chaita rurana importante cashcata ricungapaca panigu Naomi ima nijta ricupashunchi: “Ñuca cusa ‘¿perdonahuashcanguichu?’ nishpa tapujpica ‘perdonashcanimi’ nitaca na usharcanichu. Chaipimi ñuca cusaguta nara tucui shungu perdonashcata cuenta japircani ninmi. Tiempohuanmi ñuca cusagutaca ‘perdonanimi’ nita usharcani. Y cai shimicunata nina ñucanchi cazarashca causaipi ninan importante cashcatami cuenta japishcani. Perdonanimi nishca jipaca ñuca cusagu ninanda cushijushpami casi huacarca y ñucapash tranquila alimi sintirircani. Y chai punllamandami ñuca cusagupi ashtahuan confiashpa catircani. Y cunanga cutinmi alipacha amigocuna cashpa catinchi”.

16. Perdonanamandaca ¿imata yachajupashcangui?

¹⁶ Jehová Diosca perdonachunmi munan (Col. 3:13). Shinapash huaquinbica perdonanaca dificilmi caita ushan. Shinapash cai temapi yachajushca yuyaicunata catishpaca ushashunmi. Por ejemplo, imapash na pasashcapishna yangata na parlashpaca na saquinachu capanchi. Ñucanchicunata llaquichishcata cungashpami ñaupaman catina capanchi. Y shujcunapa ali cualidadcunata ricungapami esforzarina capanchi. (“Perdonachunga cai quimsa yuyaicunami ayudaita ushan” nishca recuadrota ricupangui).

PERDONANACA ÑUCANCHIPALLATAMI ALI CAN

17. Perdonanaca ¿imamandata ali can?

¹⁷ Perdonangapaca ashtaca razongunatami charipanchi. Pundapica perdonashpaca Jehová Diospa ejemplotami catipanchi, shina rurashpami paita cushichinchi (Luc. 6:36). Catipica Jehová Dios ñucanchita perdonashcamandami agradicishcata ricuchinchi (Mat. 6:12). Ultimopica ali saludta y ali amigocunatami charishun.

18, 19. Perdonashpaca ¿ima beneficiocunatata chari ushapanchi?

¹⁸ Llaquichishca personacunata perdonashpaca na yashca beneficiocunatami chasquita ushapanchi. Callaripi parlashca Denise paniguhuan ima pasashcata yaripashunchi. Paipa carrota chocashca jariguca juicio tucurishca jipaca huañungapami munashcarca. Shinapash Denise panigu paita perdonashcata yachaj chayashpami Bibliamanda yachajui callarirca.

¹⁹ Huaquinbica pitapash perdonanami ñucanchi causaipica ashtahuan difícil caita ushan. Shinapash perdonanami ñucanchi causaipaca ashtahuan importante caita ushan (Mat. 5:7). Chaimandami Jehová Dioshna shujcunata tucui shungu perdonangapaj esforzaripashunchi.