Ali amigo capashunchi

HUAQUINBICA imapash problema ricurijpimi sololla sintiripashcanchi. ‘Shinlli, na aguantai ushanalla tiempocunapi’ causanajushpapash ñucanchi problemacunataca na solollachu aguantana capanchi (2 Tim. 3:1). Bibliapica ali amigocunami ‘llaqui punllacunapica’ ayudan ninmi (Prov. 17:17).

ALI AMIGOCUNACA ¿IMASHINATA AYUDAITA USHAN?

Apóstol Pabloca ali amigocunatami charirca. Paicunami villachingapaca cumbashpa rin carca. Shinallata imacunapi ayudana cajpipashmi ayudan carca (Col. 4:​7-11). Apóstol Pablo Roma llactapi preso cajpica, paipa amigocunami Pablo na rurai ushashca cosascunataca rurarca. Por ejemplo, Epafrodito runaguca Filipos llactamanda huauquipanicuna cachashca cosascunata entregashpami ayudan carca. Shinallata apóstol Pablo minishtijushca cosascunatapash entregashpami ayudan carca (Filip. 4:18). Cutin Tíquico runaguca, apóstol Pablo escribishca cartacunatami shuj shuj congregaciongunaman entregashpa ayudan carca (Col. 4:7).a Apóstol Pabloca paipa amigocuna ayudajpimi huasipi vichariajushpa y carcelpi preso cashpapash congregaciongunata animashpa catita usharca. Ñucanchicunapash ¿imashinata ali amigocuna cashcataca ricuchita ushapanchi?

Ashtaca huauquipanicunami ali amigocuna cashcata ricuchin. España llactamanda panigu Elisabetpa ejemplota ricupashun. Paipa mamita cáncer terminalta charijpica, shuj panigumi cada punlla Bibliapa textocunata cachashpa animan carca. Elisabetca ninmi: “Chai ñañagu mensajecunata cachamujpimi na solalla sintirircani. Chai mensajecunami aguantashpa catichun ayudahuan carca” ninmi (Prov. 18:24).

Espiritual cosascunata rurashpami ashtahuan ali amigocunata chari ushapanchi. Por ejemplo, shuj mayorlla huauquiguta o panigutaca reuniongunaman, predicacionmanmi apaita ushapanchi. Shinami randimanda animarita ushapanchi (Rom. 1:12). Shinapash huaquin huauquipanicunaca na paicunapa huasicunamanda fácil llujshita ushanllu. ¿Imashinata paicunataca ayudaita ushapanchi?

HUASIMANDA NA LLUJSHI USHAJCUNAHUANBASH ALI AMIGOCUNA CAPASHUNCHI

Huaquin huauquipanicunaca ungushca caimanda o shuj problemacunamandami reuniongunaman en persona ritaca na ushan. Davidpa ejemplota ricupashun. Paica cáncer de linfoma nishcata charimandami 6 quillacunata yali quimioterapiata rurajurca. Chaimandami reuniongunaman en persona ritaca na ushashpa videoconferenciapi conectarishpalla uyan carca.

Chaimi salonman rishca huauquipanicunaca reunión tucurishca jipaca, paicunapash por videoconferencia conectarishpa Davidhuan y Lidiahuan parlan carca. Shinallata David y Lidia reuniongunapi comentajpica, animashpami mensajecunata escribin carca. Chaimi David y Lidiaca ali amigocunata charishcata, paicunata ninanda juyashcata cuenta japirca.

Huasimanda na llujshi ushanajuj huauquipanicunata juyashcata ricuchingapaca shuj cosascunatapashmi ruraita ushapanchi (Prov. 3:27). Por ejemplo, chai huauquipanicunahuanga cartagucunata escribishpa o telefonopi cayashpami predicaita ushapanchi. Cutin ancianocunaca, predicación grupocunaman llujshingapaj conectarichunmi arreglocunata ruraita ushan. Ancianocuna chashna arreglocunata rurashcamandaca David y Lidiaca tucui shunguhuanmi agradicirca. Davidca ninmi: “Bibliamanda shuj yuyaiguta ningapaj y oracionda rurangapaj predicación grupoman conectarishpaca ninandami animarin carcanchi” ninmi. Pero seguro y ali cana cajpica, huasimanda na llujshi ushajuj huauquipa o panipa huasimanmi Bibliamanda yachajujtaca apaita ushapanchi.

Huasimanda na llujshi ushanajuj huauquipanicunahuan ashtahuan tiempota yalishpaca, paicunapa ali cualidadcunata ricushpami paicunahuanga ashtahuan ali amigocuna tucuita ushapanchi. Por ejemplo, Bibliata aliguta utilizashpa gentecunapa shunguman chayajta ricushpaca, paicunataca ashtahuanmi valichipanchi. Huauquipanicunata shina ayudashpami ashtahuan ali amigocunata charipashun (2 Cor. 6:13).

Apóstol Pabloca paipa ali amigo Tito cumbajpimi animarirca (2 Cor. 7:​5-7). Tucuicunami Titopa ejemplota catita ushapanchi. Ali amigocuna cangapaca ali shimicunata nishpa o imapash cosasgucunata rurashpami ayudana capanchi (1 Juan 3:18).

CATIRIASHPA LLAQUICHIJPIPASHMI ALI AMIGOCUNA CASHCATACA RICUCHINA CAPANCHI

Rusia llactamanda huauquipanicunaca paicunapura apoyarishpami ñucanchimanga shuj ali ejemplota cun. Serguéi y paipa huarmigu Tatianapa ejemplota ricupashun. Policiaca paicunapa huasiman yaicushpami revisarca. Chai jipami paicunataca tapuchingapaj aparca. Primeroca Tatianata libre saquishpami, huasiman tigrachirca. Serguéi huauquiguca ninmi: “Ñuca huarmigu huasiman chayashcandimi shuj paniguca na manllashpa ñucanchi huasiman chayamushcarca. Chai jipaca, shuj huauquipanicunapashmi ñucanchi huasita arreglashpa ayudangapaj shamushcarca” ninmi.

Huauquiguca ninbashmi: “Proverbios 17:17​taca siempremi yaripani. Chaipica ‘ali cumbaguca paipaj cumbataca, tucui causaipimi juyajun. Llaqui punllacuna japijpipash, quiquin huauquitashnami llaquin’ nijunmi. Chai shimicunataca cunanbi catiriashpa llaquichi tucujushpami ashtahuan intindini. Cashna llaquicunataca Jehová Dios y ali amigocuna ayudajpillami aguantaita ushapashcani” ninmi.b

Cunan punllacunapica ashtaca llaquicunatami charinajupanchi. Chaimi ali amigocunata minishtipanchi. Ninan Manllanai Llaqui Tiempo chayamujpicarin, ali amigocunataca ashtahuanmi minishtipashun. Chaimandami ñucanchicunapash cunanmandallata ali amigocuna cangapaj esforzarina capanchi (1 Ped. 4:​7, 8).