Jehová Diosta sirvij angelcunapa ejemplota catipashunchi

1, 2. a) Angelcunahuanga ¿imapita diferente capanchi? b) Angelcunahuanga ¿imapita parecido capanchi?

JEHOVÁ DIOSCA Bibliamanda ñucanchicunata yachachishpaca paipa familiaman pertenicichunmi invitashca. Paipa familiapica na solo huauquipanicunallachu can. Sino ashtaca ashtaca millón angelcunapashmi can (Dan. 7:​9, 10). Angelcunapi pensarishpaca ñucanchimanda diferentepacha cashcapimi pensaripanchi. Por ejemplo, gentecunata nara rurashpallatami Jehová Diosca angelcunatara pundapica rurarca (Job 38:​4, 7). Angelcunaca poderoso, santo y justocunami can. Cutin gentecunaca imperfectocunami capanchi (Luc. 9:26).

² Ñucanchicuna angelcunamanda diferentepacha cashpapash huaquin cosascunapica igualmi capanchi. Por ejemplo, ñucanchicunaca angelcunashnallatami Jehová Dios charishca cualidadcunata ricuchi ushapanchi. Shinallata ima ali cajta, ima nali cajta decidingapapashmi libre capanchi. Cada unomi shuj shutita charipanchi. Comportamientocunapipash cada unomi diferente capanchi. Shinallata angelcunashnallatami ñucanchicunapash Jehová Diostaca cada uno diferente ruraicunata rurashpa sirvinajupanchi. Y paicunashnallatami Jehová Diosta adorana munaita charipanchi (1 Ped. 1:12).

3. Jehová Diosta cazuj angelcunamandaca ¿imatata yachajui ushapanchi?

³ Imashinami ña ricupashcanchi angelcunahuanga huaquin cosascunapica igualmi capanchi. Chaimandami paicunaca ñucanchipaca shuj alipacha ejemplo can. Shinallata paicunamandaca ashtacatami yachajui ushapanchi. Cai temapica angelcunashna imashina humilde canata, gentecunata juyanata, aguantashpa catinata, shinallata congregación limpio cachun imata rurai ushashcatami yachajupashun.

ANGELCUNACA HUMILDECUNAMI CAN

4. a) Angelcunaca ¿imashinata humilde cashcataca ricuchin? b) Angelcunaca ¿imamandata humildecuna can? (Salmo 89:7).

⁴ Jehová Diosta na saquishpa sirvinajuj angelcunaca humildecunami can. Angelcunaca experienciata charishpa, poderoso cashpa, ali yachaita charishpapash Jehová Dios cushca tucui instrucciongunatami cazun (Sal. 103:20). Paicunaca Jehová Dios mandashca cosascunata rurashpaca na jariyashpa ruranllu. Paicunapa shutita shujcuna nunca na rijsina cajpipash, Jehovapa voluntadta rurashpaca ninandami cushijun (Gén. 32:​24, 29; 2 Rey. 19:35).a Jehová Diostashna paicunata adorachunga na munanllu. Paicunaca Jehová Diosta tucui shunguhuan juyaimanda, respetaimandami humildecuna can (Salmo 89:7​ta liipangui).

5. Apóstol Juan pandarijpipash ¿imashinata angelca humilde cashcata ricuchirca? (Fototapash ricupangui).

⁵ Bibliapica angelcuna humilde cashcatami ricuchin. Más o menos huata 96​pica, shuj angelmi apóstol Juanmanga jipacunaman ima cosascunalla pasanata shuj visionbi ricuchirca (Apoc. 1:1). Cai cosascunata shuj visionbi ricuchijpica apóstol Juanga ¿imatata rurarca? Apóstol Juanga manllarishpami angelta adorangapaj ñapash cungurirca. Chaimandami angelca ñapash: “Cuidado ama shina ruraichu. Taita Diostami adorana cangui. Ñucaca quiquinshnallata y quiquinba huauquicunashnallata esclavollami capani” nirca (Apoc. 19:10). Cai shimicunahuanga angelca humilde cashcatami ricuchirca. Angelca paita alabashpa adorachunga na munarcachu. Ñapashmi Diostami adorana cangui nirca. Angelca ashtaca tiempota Jehová Diosta sirvishca cashpapash, poderoso cashpapash apóstol Juanmanda mejor cashcataca na pensarcachu. Chaimandami angelca: “Ñucaca quiquinshnallata esclavollami capani” nirca. Shinallata paita adorangapaj cungurijpipash apóstol Juan pandarishcamandaca na shinlli shimicunahuanga rimarcachu. Ashtahuangarin juyaihuanmi apóstol Juandaca parlarca. Angelca, apóstol Juan manllarimanda paipa ñaupapi cungurishcata intindishpami aliguman tratarca.

6. ¿Imashinata angelcunashna humilde cashcata ricuchita ushapanchi?

⁶ ¿Imashinata angelcunapa ejemplota catishpa humilde cashcata ricuchipanchi? Ñucanchicunaca ñucanchipa asignaciongunata na jariyashpa pactachishpa, shujcunamanda na mejor cashcata pensarishpami angelcunapa ejemplota catita ushapanchi (1 Cor. 4:7). Jehová Diosta ashtaca tiempota sirvijushcamanda o imapash responsabilidadcunata charishcamandaca na shujcunamanda mejormi cani yashpa pensanachu capanchi. Ashtahuan responsabilidadcunata charishpapash ñucanchicunaca shujcunamanda menos cashcata, humilde cashcatami ricuchina capanchi (Luc. 9:48). Angelcunapa ejemplota catishpami, shujcunata sirvishpa ayudangapaj munapanchi. Ñucanchicunaca shujcunamanda ashtahuan yali importante cashcata ricuchingapaca na munapanchichu.

7. Pitapash consejana cashpaca ¿imashinata humilde cashcata ricuchita ushapanchi?

⁷ Huauquipanicunata o ñucanchi huahuacunata consejashpa corregingapapashmi, angelcunapa ejemplota catishpa humilde cashcata ricuchita ushapanchi. Huaquinbica pitapash shinllita consejanami minishtiringa. Shinapash angelca, apóstol Juanda shinllita consejangapaj randi y nali sintichingapaj randica juyaihuanmi consejarca. Pitapash consejagrijushpaca juyaihuan, respetohuanmi Bibliata utilizashpa consejana capangui. Shinami shujcunamanda na mejor cashcata ricuchipangui (Col. 4:6).

ANGELCUNACA GENTECUNATA JUYANMI

8. a) Lucas 15:10​pi nishcashnaca, ¿imashinata angelcunaca gentecunata juyashcata ricuchin? b) ¿Imashinata angelcunaca predicacionbica ayudanajun? (Callari paginapa fotota ricupangui).

⁸ Angelcunaca gentecunata juyaimandami paicunahuan ima pasajujtaca pendiente can. Juchata rurashca persona arripintirishpa Jehová Diosman cutin tigrajta ricushpaca, angelcunaca ninandami cushijun. Shinallata Jehová Diosmanda yachajushpa shuj persona paipa causaipi cambiocunata rurashpa Jehová Diosta sirvi callarijpica, angelcunaca ninandami cushijun (Lucas 15:10​ta liipangui). Angelcunaca predicacionbipashmi ñucanchitaca ayudanajun (Apoc. 14:6). Aunque paicunapacha, gentecunaman na predicanajushpapash Jehovamanda yachajungapaj munaj personacunata tarichunmi ayudanajun. Shinapash maijan personatapacha angelcuna Jehová Diosmanda yachajuchun ayudashcataca, na cabal yachaita ushapanchichu. Jehová Diosca gentecuna paimanda yachajuchun, paipa sirvijcunata ñaupaman pushangapaca paipa espíritu santotapashmi utilizan (Hech. 16:​6, 7). Shinapash Jehová Diosca ñucanchita ayudangapaca paipa angelcunataca ashtacatami utilizan. Chaimandami predicanajushpaca angelcuna ayudajushcataca seguro caita ushapanchi (“Jehová Diosca mañaicunataca uyanmi” nishca recuadrota ricupangui).b

9. ¿Imashinata angelcunapa ejemplota catishpa shujcunata juyashcataca ricuchipanchi?

⁹ ¿Imashinata angelcunapa ejemplota catishpa gentecunataca juyana capanchi? Congregacionman shuj huauqui o shuj pani tigramujpica angelcunashnami paicunamanda cushijuna capanchi. Paicunataca juyaihuan chasquishpami ali sintichina capanchi (Luc. 15:​4-7; 2 Cor. 2:​6-8). Shinallata tucui shunguhuan predicashpami angelcunapa ejemplota catijushcata ricuchinajupanchi (Ecl. 11:6). Angelcuna ñucanchicunata predicacionbi ayudanajunshnallatami, ñucanchicunapash huauquipanicunata predicacionbi ayudangapaj esforzarina capanchi. Por ejemplo, mushuj publicadorhuan o mayorlla huauquipanicunahuanmi predicacionman llujshingapaj invitaita ushapanchi.

10. Sara panigupa ejemplomandaca ¿imatata yachajuita ushapanchi?

¹⁰ Ñucanchi situaciongunamanda ñucanchi munashcashna na predicai ushashpaca ¿imatata ruraita ushapanchi? Ñucanchica ñucanchi usharishcaguta rurashpami angelcunataca predicacionbi apoyaita ushapanchi. India llactamanda Sara paniguhuan ima pasashcata ricupashunchi.c Paica casi 20 huatacunatami precursora carca. Jipaca ungushca caimandami predicacionmanga ñana llujshita usharca. Chaimi llaqui llaqui sintirijurca. Shinapash huauquipanicuna juyaihuan ayudajpi y Bibliata cada punlla liishpami asha asha ali sintirirca. Ungushca caimanda na purita ushashpapash, na tiarita ushashpapash telefonopi cayashpami villachi callarirca. Punda pai visitashca personacunatami telefonopi cayai callarirca. Chaimi paicunaca “shuj gentecunapashmi Bibliamandaca ashtahuan yachajungapaj munan” nishpa villarca. Chashna villachi callarishcamandami Sara paniguca 70 personacunaman Bibliamanda yachachi callarirca. Tucuicunaman Bibliamanda na paillata yachachi ushashpami, shuj huauquipanicunaman Bibliamanda yachachichun mingarca. Huaquin estudiantecunaca reuniongunaman shamunajunmi. Sara panigushna villachingapaj esforzarij huauquipanicunata ayudashpaca angelcunaca cushillami sintiringa.

ANGELCUNACA AGUANTASHPAMI CATISHCA

11. Aguantashpa catichunga ¿imashinata angelcunapa ejemploca ayudaita ushan?

¹¹ Angelcunaca shuj alipacha ejemplomi can. Paicunaca ashtaca ashtaca huatacunatami nali ruraicunata ricushpapash aguantana tucushca. Jehová Diosta ali sirvij angelcunaca, Diablo y ashtaca angelcunapash Jehová Diospa contra tucujtami ricurca (Gén. 3:1; 6:​1, 2; Jud. 6). Bibliapica shuj ali ángel, shuj nali angelta jarcashcatami parlan (Dan. 10:13). Angelcunaca ashtaca huatacunatami huaquin gentecunalla Jehová Diosta sirvinata decidishcata ricushca. Shinapash angelcunaca, Jehová Diosmanda na caruyashpami cushijushpa, tucui shunguhuan sirvishpa catinajushca. Angelcunaca Jehová Dios shamuj punllacunapi tucui nali cosascunata tucuchinataca seguromi can.

12. Aguantashpa catichunga ¿imata ayudanga?

¹² Aguantashpa catingapaca ¿imashinata angelcunapa ejemplota catita ushapanchi? Cunan punllacunapica talvezpashmi ñucanchicunapash nali cosascunata ricuna tucushun o ñucanchicunata catiriashpa llaquichijpi aguantana tucushun. Shinapash ñucanchicunaca angelcunashnallatami shamuj punllacunapi Jehová Dios tucui nali cosascunata tucuchinataca seguro capanchi. Chaimanda Jehová Diosta ali sirvij angelcunashnallatami “alita ruranataca na saquinachu capanchi” (Gál. 6:9). Jehová Diosca aguantachun ayudashami nishpa prometishca (1 Cor. 10:13). Pacienciata charingapaj, cushilla sintiringapami Jehová Diostaca paipa espíritu santota mañaita ushapanchi (Gál. 5:22; Col. 1:11). Jarcaicunata charishpaca ama manllangapami Jehová Diospi confiana capanchi. Jehová Diosca siempremi fuerzata cushpa ñucanchitaca ayudanga (Heb. 13:6).

ANGELCUNACA CONGREGACIONGUNA LIMPIO CACHUNMI AYUDAN

13. Cai tucurimui punllacunapica ¿ima trabajotata angelcunaca ashtahuan ruranajun? (Mateo 13:​47-49).

¹³ Cai tucurimui punllacunapica, Jehová Diosca angelcunamanga shuj alipacha trabajota rurachunmi saquishca (Mateo 13:​47-49​ta liipangui). Ashtaca millón gentecunami ali villaigucunataca chasquinajun. Shinapash huaquingunallami cristiano tucun. ‘Nali gentecunata, ali gentecunamanda separangapaca’ angelcunami encargado can. Shina rurashpami angelcunaca congregacionguna limpio cachun ayudanajun. Shinaca ¿limpio cachun angelcuna ayudajushcamandallachu congregacionmanda caruyashcacunaca ñana congregacionman tigramungachu nishpa pensarina capanchi? Shinallata ¿angelcuna ayudajushcamandallachu congregacionbica na imapash problemacuna tianga nishpa pensarina capanchi? Angelcunaca congregacionguna limpio cachun ayudangapami ninanda esforzarinajun.

14, 15. Congregación limpio cachunga ¿imashinata angelcunapa ejemplota catita ushapanchi? (Fotocunata ricupangui).

¹⁴ ¿Imashinata ñucanchicunapash angelcunashnallata congregacionguna limpio cachun munashcata ricuchita ushapanchi? Ñucanchi causaipi y espiritualmente limpio cangapami esforzarina capanchi. Jehová Dioshuan ali cangapaca cada unomi ali amigocunata agllana capanchi. Shinallata Jehová Diosmanda caruyachij cosascunamandami caruyana capanchi. Shina rurashpami congregación limpio cachunga ayudapanchi (Sal. 101:3). Shinallata tucui huauquipanicunallata Jehová Diosta na saquishpa sirvichunmi ayudana capanchi. Por ejemplo, shuj huauqui o shuj pani juchata rurashcata yachaj chayashpaca ¿imatata rurai ushapanchiman? Cai huauquiguta o paniguta juyaimandaca ancianocunahuan parlachunmi animana capanchi. Ancianocunahuan parlachun animashca jahua na parlajpica, ñucanchicunami ancianocunaman villana capanchi. Ñucanchicunaca cai huauquigu o panigu ayudata chasquishpa espiritualmente ali cachunmi munapanchi (Sant. 5:​14, 15).

¹⁵ Huaquingunaca juchata rurashcamandami congregacionmanda llujchi tucun. Chaimandami paicunahuanga ñana tandanajupanchi (1 Cor. 5:​9-13).d Juchata rurashca personata llujchinaca, congregacionguna limpio cachunmi ayudan. Paicunahuan na tandanajushpaca, paicunata juyashcatami ricuchipanchi. Shina rurashpami Jehová Diosman tigrana minishtirishca cashcata cuenta japichun ayudapanchi. Congregacionman cutin tigrajpica, Jehová Dioshna y angelcunashnami ninanda cushijupanchi (Luc. 15:7).

16. ¿Imashinata angelcunapa ejemplota catita ushapangui?

¹⁶ Angelcunapa ejemplota catina y paicunahuan trabajanaca shuj jatun bendicionmi can. Angelcunashna humilde cangapaj, gentecunata juyashcata ricuchingapaj, aguantashpa catingapami esforzarina capanchi. Congregación limpio cachun ayudangapapashmi esforzarina capanchi. Ali angelcunapa ejemplota catishpaca, ñucanchicunapashmi Jehová Diosta cazujcunahuan tandanajushpa para siempre paita adorashun.