Jehová Dios consolachun saquipashunchi

1. Babilonia llactaman prezo apai tucushca judiocunaca ¿imashinata causanajurca?

BABILONIA llactaman prezo apai tucushca judiocuna imashina sintirishcapi pensaripashunchi. Paicunaca Jerusalén llacta, imashina tucuchi tucujtami ricurca. Paicunapa pecadocunamanda y paicunapa taitacuna nalita rurashcamandami na rijsishca llactaman prezo apai tucurca (2 Crón. 36:​15, 16, 20, 21). Babilonia llactapica ali causaimi tiarca (Jer. 29:​4-7). Paicunapa causaica dificilmi carca. Babilonia llactamanga na paicunapa munaichu causangapaj rishcarca. Chaimandami shuj judioca imashina sintirishcata parlashpa cashna nirca: “Babilonia llacta jatun yacu manñacunapi tiarishpami, Sion shuti pueblota yarishpa huacanajurcanchi” nircami (Sal. 137:1). Babiloniaman prezo apai tucushcacunaca, pipash consolachunmi minishtinajurca. Shinapash paicunataca ¿pita consolaita ushagrijurca?

2, 3. a) Prezo apashca judiocunataca ¿imashinata Jehová Diosca ayudarca? b) Cai temapica ¿imatata yachajugripanchi?

² Jehová “Diosca tucuipi cushichij Taita Diosmi” can (2 Cor. 1:3). Jehová Diosca paipaman quimirijcunataca juyaimandami consolangapaj munan. Babiloniaman apai tucushca huaquin prezocuna paipa consejocunata uyashpa cutin ali adorana cashcataca Jehová Diosca alimi yacharca (Is. 59:20). Judiocunata Babilonia llactaman prezo apangapaca 100 yali huatacunami faltarca. Chai tiempopimi Jehová Diosca judiocunaman villangui nishpa profeta Isaiasmanga cashna nirca: “Cangunapaj Taita Diosca, cashnami nin: ‘Cushijuichi, ñuca agllashca gentecuna, cushijuichi’” (Is. 40:1). Babilonia llactaman prezo apai tucushca judiocunata consolangapaca Jehová Diosca Isaías escribishca shimicunatami utilizarca.

³ Ñucanchicunapashmi huaquinbica pipash consolachun minishtipanchi. Cai temapica, Babilonia llactaman prezo apashca judiocunata Jehová Dios imashina consolashcatami cai quimsa yuyaicunapi yachajupashun: 1) Arripintirijpica perdonanatami Jehová Diosca prometirca, 2) paipa sirvijcunamanga shuj ali causaiguta caranatami villarca y 3) ama manllachunmi ayudarca. Cada yuyaipimi ñucanchita consolangapaj Jehová Dios imata rurajta yachajupashun.

JEHOVÁ DIOSCA NINAN LLAQUIJ PERDONAJ DIOSMI CAN

4. Jehová Diosca ninan llaquij Dios cashcataca ¿imashinata ricuchirca? (Isaías 55:7).

⁴ “Taita Diosca ninanda llaquij” Diosmi can (2 Cor. 1:3). Jehová Diosca Babilonia llactaman prezo apai tucushcacuna arripintirijpica perdonashami nircami. Shinami ninan llaquij Dios cashcata ricuchirca (Isaías 55:7​ta liipangui). Jehová Diosca: “Causaita causaicaman llaquishpami, candaca juyasha” nircami (Is. 54:8). Judiocunaca Jehová Diosta na cazushcamandami llaqui apana carca. Shinapash Jehová Diosca paicunata ninanda llaquimandami Babilonia llactapica na para siempre saquishachu nishpa prometirca (Is. 40:2). Arripintirishca judiocunataca chai promesata yachanaca ninandami consolashcanga.

5. Jehová Dios ninan llaquij Dios cashcataca ¿imamandata ashtahuan seguro caita ushapanchi?

⁵ ¿Imatata yachajupanchi? Arripintirijcunata Jehová Dios perdonangapaj dispuesto cashcatami yachajupanchi. Babiloniaman prezo apai tucushca judiocunaca Jehová Dios perdonaj cashcataca alimi yacharca. Cunan punllacunapipash ñucanchita perdonangapaj imacunatalla rurashcata ricushpami, Jehová Dios perdonaj cashcataca ashtahuan seguro capanchi. Isaiasman escribichishca ashtaca huatacuna jipami, Jehová Diosca arripintirij gentecunapa pecadomanda huañuchun paipa Churitaca cai alpaman cachamurca. Jesús huañushcamandami Jehová Diosca ñucanchi pecadocunataca perdonan (Hech. 3:19; Is. 1:18; Efes. 1:7). Shinami Jehová Diosca ninan llaquij Dios cashcata ricuchin.

6. Jehová Dios ninan llaquij Dios cashcapi pensarinaca ¿imamandata importante can? (Fotocunatapash ricupangui).

⁶ Juchacunata rurashcamanda arripintirishca jahuapash yapata culpable sintirijujpica, Isaías 55:7​pi shimicunami ñucanchitaca consolan. Huaquingunaca nalita rurashcamanda arripintirishpapash cunangamanmi culpable sintirin. Shinapash pecadomanda arripintirishpa y chai pecadota ñana rurajushpaca, Jehová Dios ñucanchita perdonashcataca seguromi caita ushapanchi. Jehová Dios ñucanchita perdonashpaca, ñucanchi pecadocunataca cungaitapachami cungan (Jeremías 31:34​ta chimbapurashpa ricupangui). Jehová Dios ñucanchi juchacunata perdonashca cajpica, ñana chai juchacunataca cutin cutin yuyarijunachu capanchi. Jehová Diosca ñucanchicuna cunanbi imata rurajujtami ricujun, punda rurashcacunataca na yarijunllu (Ezeq. 33:​14-16). Ñallami ninanda llaquij Jehová Diosca juchacunata rurashcamanda sufrichishca llaquicunataca para siempre tucuchinga.

7. Juchata rurashcata villachunga ¿imata ayudanga?

⁷ Pecadota na villashca caimanda culpable sintirijushpaca ¿imatata rurana capanchi? Bibliapica ancianocunapa ayudata mañachunmi animan (Sant. 5:​14, 15). Juchata rurashcata villana na fácil cajpipash, anciano huauquicunata ñucanchita ayudachun Jehová Dios churashcatami yuyarina capanchi. Arripintirishpa y Jehová Diospash, ancianocunapash ñucanchita juyaihuan llaquishpa, tratanata yaipi charishpaca juchata rurashcata villanaca ashtahuan facilmi canga. Arthur shuti huauquigu juchata rurashcamanda culpable sintirijujpi, Jehová Dios imashina paita llaquishpa consolashcata ricupashunchi. a Paica cashnami nin: “Más o menos shuj huatatami pornografiata ricujurcani. Shuj discursopica concienciamandami parlajurca. Chaimandami ñuca huarmiguman y ancianocunamanbash pornografiata ricujushcataca villarcani. Villashcamanda ali sintirishpapash pornografiata ricushcamandaca nalimi sintirijurcani. Shinapash ancianocunaca juyaihuanmi Jehová Dios ñucata na saquishcata, imata consejashpapash juyaimanda consejashcata ricuchihuarca. Paicunapa nishcacunami ama culpable sintirishpa tranquilo catichun ayudahuarca” ninmi. Cunanbica, Arthur huauquiguca precursor regular y siervo ministerialmi can. Arripintirijpi Jehová Dios perdonajta yachashpami ninanda consolarinchi.

JEHOVÁ DIOSCA SHAMUJ PUNLLAPI ALI CAUSAIGUTA CARASHA NISHPAMI PROMETIN

8. a) Prezo apai tucushca judiocunamanga Jehová Diosca ¿ima promesatata rurarca? b) Isaías 40:​29-31​pi nishcashnaca ¿imashinata Jehová Diospa promesacunaca judiocunata ayudagrijurca?

⁸ Babiloniaca ashtahuan jatun llactami carca. Prezo japishca gentecunata nunca na cacharishcamandami rijsishca carca. Gentecunapa ricuipica, Babiloniaman prezo apai tucushca judiocunaca paicunapa huasiman nunca na tigrai ushanashnami ricurirca (Is. 14:17). Shinapash Jehová Diosca paipa sirvijcunataca Babilonia llactamanda llujchisha nishpami prometirca. Chaitaca pipash na jarcai ushagrijurcachu (Is. 44:26; 55:12). Jehová Diospaca, Babilonia llactaca yanga polvoshnami carca (Is. 40:15). Chaimandami Babilonia llactata tucuchina y judiocunata Babiloniamanda llujchinaca Jehová Diospaca fácil cagrijurca. Chaita yachashpami Babiloniaman prezo apai tucushca judiocunaca ninanda consolarishcanga. Chaimandami Isaiasca: “Mandaj Diostalla shuyashpa causajcunaca, mushuj ushaitami japinga” nishpa escribirca (Isaías 40:​29-31​ta liipangui). Ali causaigu tianata yachashpami judiocunaca ‘jahuata rij jatun angashna jatarishpa calpashpapash, na shaijunshna fuerzata’ japirca.

9. Babiloniaman prezo apai tucushca judiocunaca Jehová Diospa promesacunapi confiangapaca ¿ima razongunatallata charirca?

⁹ Babiloniaman prezo apai tucushca judiocunaca, Jehová Diospa ashtaca profeciacuna pactarishcatami ricushcarca. Chaimandami paicunaca Jehová Diospi y paipa promesacunapi confiangapaca ashtaca razongunata charirca. Por ejemplo, Israel llactata Asiria llacta mishashcata y chai llactamanda gentecunata prezo apashcataca alimi yacharca (Is. 8:4). Shinallata babiloniocuna Jerusalenda tucuchishpa gentecunata prezo apajtapashmi judiocunaca ricurca (Is. 39:​5-7). Shinallata Babilonia llactamanda reyca, rey Sedequiasta ciego saquishcata y paita Babilonia llactaman apashcatapashmi judiocunaca yacharca (Jer. 39:7; Ezeq. 12:​12, 13). Jehovapa tucuilla profeciacunami pactarirca (Is. 42:9; 46:10). Chaimandami Babiloniamanda Jehová Dios llujchinataca judiocunaca seguro cashcanga.

10. Cai último punllacunapi Jehová Dios cushca esperanzata yaria cachunga ¿imata ayudanga?

¹⁰ ¿Imatata yachajupanchi? Llaquilla cashpaca, shamuj punllacunapi ali causaigu tiana esperanzata charimandami shinlli tucushpa ñaupaman catita ushapanchi. Cunan tiempopica ashtaca llaquicunami mirajun. Shinallata Jehová Diosta ama sirvishpa catichunmi Jehová Diospa contracunaca ashtaca jarcaicunata churan. Shinapash na desanimarinachu capanchi. Jehová Diosca shamuj punllacunapimi para siempre tranquilo ali causaiguta carasha nishpa prometishca. Jehová Dios cushca promesacunataca siempremi ñucanchi shungupi y ñucanchi yuyaipipash yaipi charina capanchi. Na shina rurashpaca shuj juyailla jardinguta mapa ventanamanda ricujunshnami capanchiman. Jehová Dios cushca esperanzata yaipi charichunga ¿imata ayudanga? Chaipaca paraisopi causai imashina canapimi pensaringapaj tiempota llujchina capanchi. Shinallata ali causaigu tianamanda parlaj publicaciongunata liingapaj, videocunata ricungapaj y canciongunatapash uyangapami esforzarina capanchi. Jehová Diosta mañajushpaca ñucanchi ashtahuan gushtashca promesacunamandami parlaita ushapanchi.

11. Grave unguita charij shuj paniguca ¿imashinata shinlli tucushpa ñaupaman catita usharca?

¹¹ Cunanga Joy shuti panigupa ejemplota ricupashun. Paica shuj grave unguihuanmi sufrijurca. Jehová Dios cushca esperanza imashina paita consolashcata y ayudashcatami parlan. Paica cashnami nin: “Ñana ushanshna sintirishpaca, Jehová Diosmanmi ñuca imashina sintirishcata parlani y pai ñucata intindijushcataca alimi yachani. Jehovata mañashpaca ‘gentecuna na chari ushashca ushaita’ carajtami sintipani” nin (2 Cor. 4:7). Shinallata paraíso alpagupi nipi ñana ungushca canapimi pensarin (Is. 33:24). Ñucanchicunapash Jehová Diosman imashina sintirishcata parlashpa y pai cushca esperanzapi pensarishpaca, shinlli tucushpami ñaupaman catita ushapashun.

12. Jehová Diospi y paipa promesacunapi confiangapaca ¿ima razongunatallata charipanchi? (Fotocunatapash ricupangui).

¹² Babiloniaman prezo apai tucushca judiocunashnallatami, ñucanchicunapash Jehová Diospi y paipa promesacunapi confiangapaca ashtaca razongunata charipanchi. Cunan punllacunapi imashina huaquin profeciacuna pactarijushcapi pensaripashunchi. Por ejemplo, Reino Unido y Estados Unidos llactacunaca Bibliapi nishcashnami ‘chaupica shinlli, chaupica urmanalla llacta can’ (Dan. 2:​42, 43). Shinallata ‘terremotocunapash shuj pushtucunapi tiajtami’ uyapanchi y ‘mundo enteropimi’ ali villaigucunataca predicanajupanchi (Mat. 24:​7, 14). Chai profeciacuna y shuj profeciacunapash imashna pactarijta ricunami ñucanchicunataca ninanda consolachin y shamuj punllacunapi shuj promesacunapash pactarinata crichun ayudan.

JEHOVÁ DIOSMI AMA MANLLACHUN AYUDAN

13. a) Libre quidana tiempo chayajujpica ¿ima llaquicunatata judiocunaca charigrinajurca? b) Isaías 41:​10-13​pi nishcashnaca Jehová Diosca ¿imashinata Babiloniaman prezo apai tucushca judiocunataca consolarca?

¹³ Babiloniaman prezo apai tucushca judiocunamanga shuj esperanzata cushpami Jehová Diosca consolarca. Shinapash judiocunaca libre quidana tiempo chayajujpica llaquicuna tianataca alimi yacharca. Jehová Diosca Babilonia llactata y Babilonia llactapa muyundi llactacunata shuj rey mishanatami ña villarca (Is. 41:​2-5). Chai profecía nara pactarijpillatami, Jehová Diosca judiocunata consolangapaca cai shimicunata Isaiasmanga escribichishcarca: ‘Na manllanachu canguichi, ñucami cangunahuan cani. Na shaijunachu canguichi, ñucami cangunaman ushaita cuj Taita Dios cani’ nishpa (Isaías 41:​10-13​ta liipangui). Ñucami cangunapa ‘Taita Dios cani’ nishpaca paita adorachunga Jehová Diosca na chashna nijurcachu. Sino paicunata ayudangapaj chaipi cashcata ama cungachunmi shina nirca (Sal. 118:6).

14. Babiloniaman prezo apai tucushca judiocuna ama manllachunga ¿imatata Jehová Diosca ashtahuan rurarca?

¹⁴ Jehová Diosca Babiloniaman prezo apai tucushca judiocunataca pai ninan ushaita charishcata y ali yachaita charishcata yarichishpami, paicuna ama manllachun ayudarca. Jehová Diosca judiocunataca jahua cielopi tiaj estrellacunata ricuichi nircami. Estrellacunataca tucuitami shutipi rijsini nircami (Is. 40:​25-28). Shinaca estrellacunapa shutita yachashpaca paipa sirvijcunapa shutitapashmi yachan. Estrellacunata rurangapaj poderta charishca cashpaca, Jehová Diosca paipa sirvijcunata ayudangapapashmi poderta charin. Shinaca judiocunaca na manllanachu carca.

15. Judiocuna listo cachunga Jehová Diosca ¿imashinata ayudarca?

¹⁵ Jehová Diosca paipa sirvijcuna listo cachunga huaquin instrucciongunatami curca. Jehová Diosca Isaías libropica judiocunamanga: ‘Ñuca llactapi causajcunalla, cangunaca ucucunaman yaicushpa, punguta vicharichi. Dios fiñarishcata yalichingacaman, ashaguta pacajuichi’ nircami (Is. 26:20). Callaripica rey Ciro Babilonia llactata mishajpimi chai shimicunaca pactarishca yarin. Jenofonte shuti historiador griegoca ninmi, Rey Ciroca Babilonia llactaman yaicushpami, paipa soldadocunataca “canllapi cajcunataca huañuchichun mandashca” nin (Ciropedia, traducción de Ana Vegas Sansalvador). Chaita ricushpaca Babilonia llactapi causajcunaca manllarishcami cashcanga. Shinapash Babiloniaman prezo apai tucushca judiocunaca, Jehová Diospa instrucciongunata cazushcamandami paicunapa causaitaca salvashcanga.

16. Ninan manllanai llaqui tiempo chayamunataca ¿imamandata na manllana capanchi? (Fototapash ricupangui).

¹⁶ ¿Imata yachajupanchi? Ñallami ninan manllanayai llaqui tiempoca chayamunga. Chai tiempopica gentecunaca ninanda manllarishcami canga. Pero ñucanchicunaca Jehová ñucanchihuan cajta yachashpami na manllashun. “Salvarina tiempoca ñami chayamujun”. Chaimandami shamuj punllacunapi ima pasanataca na manllashun (Luc. 21:28). Shinallata ñucanchicunata Gog de Magog llaquichijpipash, Jehová Dios ayudanapimi confiapashun. Jehová Diosca paipa angelcunahuan y instrucciongunata cushpami ñucanchitaca cuidanga. Ninan manllanai llaqui tiempopica Jehová Diosca paipa sirvijcunamanga talvez congregaciongunata utilizashpami instrucciongunataca cunga. Ninan manllanai llaqui tiempopa preparado cangapaca, ñucanchi huauquipanicunahuanmi ali llevarina capanchi. Jehovapa organización cushca instrucciongunatapashmi cazuna capanchi. Shinallata Jehová Dios paipa organizacionda ñaupaman pushajujtapashmi seguro cana capanchi (Heb. 10:​24, 25; 13:17).

17. ¿Imashinata Jehová Dios consolachun saquita ushapanchi?

¹⁷ Babiloniaman prezo apai tucushca judiocunapaca chai llactapi causana na fácil cajpipash, Jehová Diosca paicunataca consolashpami ayudarca. Shamuj punllacunapi ima pasanata yachashpapash, Jehová Diospa ayudatami mascashpa catina capanchi. Jehová Dios llaquij Taita Dios cashcatami siempre yaria cana capanchi. Shinallata Jehová Dios shamuj punllacunapi ali causaiguta carasha nishca promesatami yaria causana capanchi. Jehová Dios ñucanchi Taita Dios cashcata yaipi charishpami, llaquicunata charishpapash na manllapashun.