Yachajungapaj munajcunataca uchalla ayudapashunchi

1. Ali villaigucunata predicajpica ¿imatata gentecunaca ruran? (Hechos 13:​47, 48; 16:​14, 15).

PRIMER siglopica, ashtaca gentecunami ali villaigucunata uyashcandi Taita Diosmandaca yachajungapaj munarca (Hechos 13:​47, 48; 16:​14, 15​ta liipangui). Cunan punllacunapipash ali villaicunata uyashcandimi huaquin gentecunaca Taita Diosmanda cushijushpa yachajungapaj munan. Cutin huaquingunaca callaripi na uyangapaj munashca cashpapash, jipamanmi Taita Diosmanda yachajungapaj y paita adorangapaj munashca. Shinaca, Taita Diosmanda y Bibliamanda yachajungapaj munaj gentecunata tarishpaca ¿imatata ruraita ushapanchi?

2. ¿Imamandata predicanataca huertapi trabajanahuan comparapanchi?

² Shuj ejemplota ricupashun. Predicanataca huertapi trabajanahuanmi comparaita ushapanchi. Huertapi trabajajushpa plantacunapi frutacuna cozechangapaj listo cashcata ricushpaca, uchallami cozechapanchi. Shinapash cozechangapaj todavía faltanajuj plantagucunataca cuidashpa y yacuta churashpami catipanchi. Shina cuendallatami Bibliamanda yachajungapaj munajta personata tarishpaca chai personataca uchalla ayudana capanchi. Shinapash Bibliamanda nara yachajungapaj munaj gentecunataca Jehová Diosmanda yachajuchunmi ayudashpa catina capanchi (Juan 4:​35, 36). Gentecuna Bibliamanda yachajungapaj munajta o na munajta ali yachashpami, paicunataca ayudaita ushapashun. Cai temapica primera visitapillata Bibliamanda yachajungapaj munaj gentecunata tarishpa imashina ayudai ushashcatami yachajupashun. Shinallata cai personacuna Jehová Diosman ashtahuan quimirishpa catichun ayudangapaj imata rurai ushashcatapashmi yachajupashun.

ALI VILLAICUNATA CHASQUIJPICA ¿IMATATA RURAI USHAPANCHI?

3. Yachajungapaj munaj personata predicacionbi tarishpaca ¿imatata rurana capanchi? (1 Corintios 9:26).

³ Yachajungapaj munaj personata predicacionbi tarishpaca uchallami Jehová Diosmanda yachajuchun, Jehovaman quimirichun ayudana capanchi. Primera visitapillatami gentecunamanga shuj estudio biblicota ofrecina capanchi y reuniongunamanbash invitana capanchi (1 Corintios 9:26​ta liipangui).

4. Estudio biblicota ofrecishcandi yachajungapaj munaj gentecuna tiashcataca ¿imashinata yachapanchi? Shuj ejemplomanda parlapai.

⁴ Shuj estudio biblicota ofrecipangui. Huaquin gentecunaca shuj estudio biblicota ofrecishcandimi Bibliamandaca yachajungapaj munan. Canadá llactapi ima pasashcata ricupashunchi. Shuj jovencitaca shuj jueves punllapimi Cushilla causapashunchi folletota japingapaj predicación publicapa cocheman quimirirca. Chaimi predicación publicapi shayajuj shuj paniguca estudio biblicotapashmi gratis cupanchi nirca. Shina nijpimi chai jovencitaguca Bibliamanda yachajungapaj munaimanda paipa número celularta curca. Shinallata chai punllallatami estudio biblicomanda tapungapaca shuj mensajeta panigumanga cacharca. Paniguca fin de semanami jovenba huasimanga ringapaj munajurca. Pero chai jovencitaca “cayallata shamupai, cayaca huasipimi capasha” nircami. Cayandi punllallatami chai jovenga estudio biblicota callarirca y fin de semanataca reunionman rirca. Shinami Bibliamandaca ashtahuan yachajushpa catirca.

5. Estudio biblicota ofrecijushpaca ¿imatata yaipi charina capanchi? (Fotocunatapash ricupangui).

⁵ Shinapash na tucuicunachu chai jovencitashna can. Ashtaca casocunapica gentecuna Bibliamanda yachajungapaj munachunga primeroca paicuna munashca temamandami parlana capanchi. Shinapash nunca na yachajungapaj munangachu yashpaca na pensanachu capanchi. Ashtahuangarin paicunamanda preocuparishpami ayudashpa catina capanchi. Shina rurashpaca shuj estudio biblicotami talvez tarita ushapashun. Gentecunaman shuj estudio biblicota ofrecingapaca ¿imatata nita ushapanchi? Ashtaca experienciata charij huauquipanigucuna imata nijta ricupashunchi.

6. Gentecunahuan Bibliamanda parlashpa catingapaca ¿imatata rurai ushapanchi?

⁶ Chai huauquipanicunaca ninmi: “Huaquin llactacunapi gentecunaca, Bibliamanda claseta, cursota o estudio biblicocunatami ofrecinajunchi nijpica manllarinmi” ninmi. Chaipa randica, “Bibliamanda parlangapaj o Biblia imata nijta ricuchingapami munapani” ninami ashtahuan ali canman ninmi. Gentecunata cutin visitangapaj munashpaca: “Bibliapica gentecuna yachangapaj munashca temacunamandami yachachin” o “Bibliapica na solo religionmandallachu parlan sino ali consejocunamandapashmi parlan” nita ushapanchiman ninmi. Shinallata “10 o 15 minutocunapillami alipacha yuyaicunata yachajuita ushapangui” nitapashmi ushapanchiman ninmi. Shinaca gentecuna ama manllarichun o ama comprometido sintirichunga, “cada semanami shamusha” ninaca na minishtirinllu.

7. Huaquin gentecunaca ¿ima horata Taita Diosmanda cabalta yachajunajushcataca cuenta japin? (1 Corintios 14:​23-25).

⁷ Reunionman invitapangui. Apóstol Pablopa tiempopi gentecunaca, primera vez reunionman rishpallatami Taita Diosmanda cabalta yachajunajushcataca cuenta japishca yarin (1 Corintios 14:​23-25​ta liipangui). Cunan punllacunapipash, gentecunaca ñucanchi reuniongunaman ri callarishpami ashtahuan ñapash progresai callarin. Shinapash ¿ima horata gentecunataca reuniongunaman invitaita ushapanchi? Cushilla causapashunchi libropica, lección 10​pimi gentecunataca reuniongunaman invitachun animan. Shinapash chai leccionman chayangacamanga na shuyanachu capanchi. Primera vez parlai callarishpallatami fin de semana tandanajuiman invitaita ushapanchi. Invitangapaca talvez fin de semanapa discursopa titulota o Villajun revistapi imata yachajugrijushcatami nita ushapanchi.

8. Shuj personata reunionman invitashpaca ¿imatata explicaita ushapanchi? (Isaías 54:13).

⁸ Shuj personata invitashpaca, ñucanchi reunionguna y pai rijsishca religionba tandanajuicuna imapi diferente cashcatami explicaita ushapanchi. Shuj huarmiguca fin de semana tandanajuimanmi por primera vez rirca. Chaimi paiman yachachijuj panigutaca “¿ñaupapi yachachijca, tucuicunapa shutitachu yachan?” nishpami tapurca. Shina tapujpimi paniguca “congregacionbica tucuicunami shuj familia cuenda capanchi. Chaimandami tucuicunapa shutita yachajungapaj esforzaripanchi” nirca. Chaimi chai huarmiguca “ñuca iglesiapica casi nipi na shujcunapa shutitaca yachanchichu” nirca. Ashtaca gentecunaca ñucanchi reunionguna imapa cashcataca na yachanllu. Chaimandami ñucanchi reunionguna imapa cashcataca explicana capanchi (Isaías 54:13​ta liipangui). Ñucanchicunaca Jehová Diosta adorangapaj, paimanda yachajungapaj y randimanda animaringapami tandanajupanchi (Heb. 2:12; 10:​24, 25). Chaimandami ñucanchi reuniongunaca alipacha organizado can. Reuniongunapica ashtacatami yachajupanchi y na imapash ceremoniacunataca rurapanchichu (1 Cor. 14:40). Shinallata ñucanchi Salón del Reinocuna o tandanajuna huasicunaca sencillo y yachajungapapash aliguta segurashcacunami can. Politicacunapipash na chapuripanchichu. Chaimandami política cosascunamandaca na parlapanchi. Ni maijan partido politicotapash na apoyapanchichu. Shinallata reuniongunapica, ñucanchi propio yuyaicunamanda parlashpaca na pliturinajunchichu. Invitashca personata ayudangapaca Ñucanchi tandanajuicunaca ¿imashinata can? nishca videotami ricuchita ushapanchi.

9, 10. Reunionman rinata ama manllachunga ¿imacunatallata nita ushapanchi? (Fototapash ricupangui).

⁹ Huaquin gentecunaca Testigo tucuchun obligahuangami yashpami reuniongunaman rinataca manllan. Chaimandami paicunataca nita ushapanchi: “Na Testigo gentecunapashmi reuniongunaman rishpa uyaita ushan. Reuniongunapi participachun y Testigo tucuchunbash pipash na obligapashunllu” nishpami nita ushapanchi. Huahuacunapaca na reuniongunata separado charipanchichu. Chaimandami familia entero rishpa, igual tiarishpa yachajuita ushapanguichi. Shinami taitamamacunaca, huahuacuna maipi cajta y imata yachajujtapash ali yachaita ushapanguichi nita ushapanchi (Deut. 31:12). Reuniongunapica limosnacunata, diezmocunatapash na mañapanchichu. Porque Jesusca “gratismi chasquircanguichi y gratismi cuna canguichi” nircami (Mat. 10:8). Shinallata, valishca ropata churajunapash na minishtirishcachu can nitapashmi ushapanchi. Jehová Diosca gentecuna valishca ropata churajushcataca na ricujunllu sino gentecunapa shungutami ricujun (1 Sam 16:7).

¹⁰ Invitashca persona reunionman rijpica, ali sintirichunmi ayudana capanchi. Ancianocunata y shuj huauquipanicunatami presentaita ushapanchi. Invitashca personata aliguta tratajpi, paimanda preocuparijpica talvez cutinmi reunionmanga tigramunga. Reunionbi cashpa Bibliata na charijpica, ñucanchi Bibliapimi textocunataca ricuchita ushapanchi. Shinallata maijan publicaciongunata yachajunajushcata ricuchunmi, ñucanchi publicaciongunata compartita o cuita ushapanchi.

ESTUDIO BIBLICOTA CALLARISHPACA ¿IMATATA RURAI USHAPANCHI?

11. ¿Imashinata gentecunapa tiempota respetashcataca ricuchipanchi?

¹¹ Bibliata shuj personahuan estudiai callarishpaca ¿imacunatallata ruraita ushapanchi? Chai personapa tiempotaca respetanami capanchi. Por ejemplo, aunque gentecunapa puntual cana na importante cajpipash, ima horas risha nishcataca cumplinami capanchi. Shinallata primera visitapica na yapata parlanachu capanchi. Experienciata charij huaquin huauquipanicunaca shuj persona parlashpa catingapaj munajpipash, mashna tiempota parlasha nishcatallami parlana capanchi ninmi. Ñucanchira yapata parlanapa randica, estudiante parlachunmi saquina capanchi (Prov. 10:19).

12. ¿Imatata primeromandapacha yachachina capanchi?

¹² Bibliata shuj personaman yachachi callarishpaca, primeromandapachami Jehová Diosta y Jesusta rijsichun y juyachun ayudana capanchi. Jehová Diosta y Jesusta juyachunga, na ñucanchi yuyaicunatachu yachachina capanchi sino Biblia imata nijtami yachachina capanchi (Hech. 10:​25, 26). Apóstol Pabloca Jesusmandami gentecunamanga yachachirca. Jehová Diosca ñucanchicuna paita rijsichun y juyachun ayudangapami Jesustaca cai alpaman cachamurca (1 Cor. 2:​1, 2). Apóstol Pabloca mushuj discipulocunata ali cualidadcunata charichun ayudanaca importantemi can nircami. Ali cualidadcunaca oroshna, culquishna, juyailla rumicunashnami can (1 Cor. 3:​11-15). Por ejemplo, feta, ali yachaita, ali yuyaita, Taita Diosta manllanaca alipacha cualidadcunami can (Sal. 19:​9, 10; Prov. 3:​13-15; 1 Ped. 1:7). Ñucanchicunapash apóstol Pablopa ejemplota catishpami, estudiantecunataca shinlli feta charichun y Jehová Dioshuan ali amigocuna tucuchunbash ayudana capanchi (2 Cor. 1:24).

13. ¿Imashinata intindishpa, pacienciahuan yachachita ushapanchi? (2 Corintios 10:​4, 5; fototapash ricupangui).

¹³ Jesuspa ejemplota catishpami gentecunataca intindishpa, pacienciahuan yachachina capanchi. Estudiantetaca pingaichi tapuicunataca na ruranachu capanchi. Shuj leccionba yuyaita na intindijujpica, chai leccionda yachajushpami catina capanchi y jipamanmi na intindishca puntomanga tigraita ushapanchi. Shinallata Bibliapa yachachishcacunata na aceptangapaj munajpica, aceptachunga na obliganachu capanchi. Chaipa randica Taita Diospa cabal yachachishcacuna shunguman chayachunmi shuyana capanchi (Juan 16:12; Col. 2:​6, 7). Bibliapica panda yachachishcacunataca alipacha shayachishca pircacunahuanmi comparan. Chaicunataca urmachinami can ninmi (2 Corintios 10:​4, 5​ta liipangui). Estudiantecuna paicunapa shungupi tarpushcashna charijuj panda yachachishcacunata saquichunga, primeroca Jehová Diospi tucui shunguhuan confiachunmi yachachina capanchi (Sal. 91:9).

REUNIONMAN RIJPICA ¿IMATATA RURAI USHAPANCHI?

14. Reunionman shamujcunataca ¿imashinata tratana capanchi?

¹⁴ Reunionman shamujcunataca, maijan llactamanda cajpipash, pobre o rico cajpipash tucuicunata juyaihuan, igual tratachunmi Jehová Diosca munan (Sant. 2:​1-4, 9). Reuniongunaman shamujcunata imashina juyaihuan tratai ushashcata ricupashunchi.

15, 16. Reunionman primera vez shamujcuna ali sintirichunga ¿imatata rurai ushapanchi?

¹⁵ Huaquingunaca curiosidadmanda o shuj ladopi pipash reuniongunaman richun invitashcamandami reuniongunamanga rin. Shinaca pipash por primera vez reunionman shamujujta ricushpaca cushilla chasquipashunchi. Cushilla saludashpapash na yapata exageranachu capanchi. Ñucanchihuan tiarichunmi invitaita ushapanchi. Shinallata ñucanchi Bibliata o publicaciongunatami compartina capanchi o shuj Bibliata o shuj publicaciongunatami paiman cuita ushapanchi. Reunionbi ali sintirichunga ¿imatata ashtahuan ruraita ushapanchi? Shuj ejemplota ricupashun. Shuj runaguca nali vistirishcami cani yashpami Salón del Reinopi cashpaca nervioso sintirijurca. Chaimi chasquijuj huauquiguca, “ama preocuparipaichu, Testigocunaca normal gentecunami capanchi” nirca. Tiempohuanga chai runaguca bautizarircami. Chai huauquigu imashina tratashcataca paica nunca na cungarcachu. Reunionman shamuj gentecunamanda preocuparishpapash na paicunapa vidapica satirinachu capanchi (1 Ped. 4:15).

¹⁶ Reunionbi ali sintirichunga ¿imatata ashtahuan ruraita ushapanchi? Salón del Reinopi parlanajushpa, comentariocunata cujushpa o asignaciongunata cujushpaca na Testigo gentecunamanda y paicunapa crishcacunamandaca respetohuanmi parlana capanchi. Reuniongunaman shamujcunata mal sintichingapaca na munapanchichu. Porque mal sintichijpica tandanajuicunaman cutin shamungapaca na munangachu (Tito 2:8; 3:2). Por ejemplo, shuj gentecunapa crishcacunata na valichishpa parlanaca nalichu can (2 Cor. 6:3). Discursota cuj huauquicunapash na testigo gentecunapa crishcacunata na valichishpa parlanamandaca cuidadotami charina can. Shinallata na Testigo gentecunata yaipi charishpami, Testigocunalla utilizaj palabracunatapash discursante huauquicunaca explicana can.

17. Yachajungapaj munaj gentecunata tarishpaca ¿imatata ruraita ushapanchi?

¹⁷ Jesuspa discipulocuna tucuchun gentecunata ayudanaca cada punllami ashtahuan importante can. ‘Para siempre causaita cuj yachachishcacunata paicunapa shungupi chasquina munaita charij’ gentecunataca todaviami tarishpa catipanchi (Hech. 13:48). Shinaca ali villaigucunata chasquingapaj munaj gentecunata tarishpaca, estudio biblicota ofrecipashunchi y tandanajuicunamanbash invitapashunchi. Shinami paicunataca ‘causaiman apaj ñanbi’ purichun ayudapashun (Mat. 7:14).