Jehovami ciertopacha cushilla sintirichun ayudan

1, 2. a) Ashtaca gentecunaca ¿imashinata sintirin? b) Cai temapica ¿imatata yachajupashun?

ASHTACA gentecunaca cushilla sintiringapaca ashtaca cosascunatami ruran. Pero ashtaca cosascunata rurashpapash, ashtaca gentecunaca llaquillami sintirin. Shinallata paicunapa situacionga nunca na mejorangachu yashpami yuyan. Jehová Diosta sirvijcunapashmi ‘último punllacunapi’ causajuimandaca “na aguantai ushanalla” llaquicunata charipanchi. Chaimandami llaquilla y desanimado sintirita ushapanchi (2 Tim. 3:1).

² Cai temapica ima cosascunamandalla llaquilla sintiri ushashcata y cutin cushilla cangapaj imata rurai ushashcatami yachajupashun. Pero primeroca, Jehová Dioslla ciertopacha cushilla caita ushachun ayudai ushashcatami yachajupashun.

CIERTOPACHA CUSHILLA CACHUNGA JEHOVAMI AYUDAN

3. ¿Imamandata Jehová Diosca ashtaca cosascunata rurashca? (Fotocunatapash ricupangui).

³ Jehová Diosca cushilla Taita Dios caimandami, ñucanchicunapash cushilla cachun munan. Chaimandami ñucanchicuna cushilla cachunga ashtaca cosascunata rurashca. Por ejemplo, shuj juyailla planetaguta, ashtaca colorcunata, mishquilla micunacunatami rurashca. Shinallata cushilla sintirichunga animalgucunatapashmi rurashca. Chaimi Jehová Dios ñucanchita juyajta y ñucanchicuna cushilla causachun munashcatapash cuenta japipanchi.

Cría de elefante: Image © Romi Gamit/Shutterstock; polluelos de pingüino: Vladimir Seliverstov/500px via Getty Images; chivitos: Rita Kochmarjova/stock.adobe.com; dos delfines: georgeclerk/E+ via Getty Images

4. a) Gentecuna sufrinajujta ricushpapash ¿imamandata Jehová Diosca cushilla cashpa catin? b) ¿Imashinata Jehová Diosca ñucanchicunataca ayudan? (Salmo 16:11).

⁴ Jehová Diosca gentecuna sufrinajujta ricushpaca paipashmi ninanda llaquirin. Shinapash Bibliapi nishcashnaca Jehová Diosca ‘cushilla Taita Diosmi’ can ninmi (1 Tim. 1:11). Pero Jehová Diosca ¿imamandata cushilla cashpa catin? Porque Jehová Diosca problemacunata y llaquicunata para siempre tucuchingapami shuj punllata agllashcalla charin. Shinapash chai punlla chayangacamanga, Jehová Diosca ñucanchicuna imashina sintirishcatami pendiente ricujun y cushilla cachunbashmi ayudajun (Salmo 16:11​ta liipangui). Cunanga Jesús cushilla cachun Jehová Dios imashina ayudashcata ricupashun.

5, 6. ¿Imamandata Jesusca ashtahuan cushilla can nipanchi?

⁵ Jehová Diospa tucuilla rurashcacunamandaca ¿imamandata Jesusca ashtahuan cushilla can nipanchi? Primero, porque Jesusca ‘pipash na ricui ushanalla Taita Diosman parecidomi’ can y Jehová Diospa cualidadcunata alipacha ricuchijmi can (Col. 1:15; 1 Tim. 6:15). Segundo, porque Jesusca Jehová Dioshuan ashtaca tiempota yalimandami, ciertopacha cushijui ima cashcataca ali yachan.

⁶ Jesusca Jehová Dios imata rurachun munashcata siempre ruraimandami cushilla sintirishca (Prov. 8:​30, 31; Juan 8:29). Chaimandami Jehová Diosca Jesushuanga cushilla sintirin (Mat. 3:17).

7. Ciertopacha cushilla sintiringapaca ¿imatata rurana capanchi?

⁷ Ñucanchicunapash Jehová Diosman ashtahuan quimirishpami ciertopacha cushilla sintirita ushapanchi. Jehová Diosman quimiringapaca paimandami ashtahuan yachajuna capanchi. Shinami paipa ejemplota catishpa ashtahuan cushilla sintiripashun. Shinallata Jehová Diospa voluntadta ruraimanda y Jehová Diospa aprobacionda charishcata yachaimandapashmi cushilla sintiripanchi (Sal. 33:12).a Cai razongunamanda cushilla sintirishpapash, huaquinbica llaquillami sintirita ushapanchi. Llaquilla sintirimandami huaquinbica Jehová Diospa aprobaciondapash ñana charinchichu yashpa pensaita ushapanchi. Pero na shina pensanachu capanchi. Porque Jehová Diosca ñucanchicuna juchayucuna cashcamanda llaquilla sintiri ushashcataca alimi intindin (Sal. 103:14). Huaquin cosascunamandami llaquilla sintirita ushapanchi. Shinapash cutin cushilla cangapaj imata rurai ushashcatami cunanga yachajupashun.

CUSHILLA SINTIRINGAPACA ¿IMATATA RURAITA USHAPANCHI?

8. Llaquicunata charishpaca ¿imashinata sintirita ushapanchi?

⁸ Problemacunata charimandami llaquilla sintirita ushapanchi. Culqui illa caimanda, mayorlla caimanda, shuj unguita charimanda, catiriashpa llaquichinajushcamanda o shuj shuj llaquicunamandapashmi llaquilla sintirita ushapanchi. Especialmenteca charishca llaquicunata na cambiai ushaimandami ashtahuanbachaca llaquilla sintirita ushapanchi. Bibliapica “shungupi llaquilla cajpimi, yuyaipash llaquilla” can ninmi (Prov. 15:13). Shuj anciano huauquipa ejemplota ricupashun. Cai huauquigupa taitamamapash y paipa huauquipash 4 huatacunapillami huañurca. Paica ninmi: “Solollami sintirin carcani y pipash na ayudaita ushahuangachu yashpami pensarin carcani. Shinallata ñuca papitohuan ñuca mamitahuan y ñuca huauquihuan na ashtaca tiempota yalita ushashcamandami llaquilla sintirin carcani” ninmi. Imashina ricupanchi shinlli llaquicunata charimandami ñucanchicunapash shaijushca y desanimado sintirita ushapanchi.

9. Cutin cushilla sintiringapaca ¿imatata ruraita ushapanchi? (Jeremías 29:​4-7, 10).

⁹ Cutin cushilla sintiringapaca ¿imatata ruraita ushapanchi? Llaquicunata na cambiai ushashcatami intindina capanchi. Ashtahuangarin ali cosascunata charishcamandami agradecido cana capanchi. Mundopi gentecunaca llaquicunata na charishpallami cushilla causaita ushashun yanmi. Shinapash chaica na ciertochu can. Por ejemplo, Babilonia llactaman prezo apai tucushca judiocunatami Jehová Diosca chai llactapi causana difícil cajpipash, cushillami causana canguichi nirca (Jeremías 29:​4-7, 10​ta liipangui). Caimandaca ¿imatata yachajuita ushapanchi? Ñucanchi causaipi ali cosascunata charishcata ricungapaj esforzarina cashcata y chai ali cosascunata charishcamanda agradecido cana cashcatami yachajupanchi. Jehová Dios ñucanchihuan cashcata y ñucanchita ayudajushcatami seguro cana capanchi (Sal. 63:7; 146:5). Elisa panigupa ejemplota ricupashun. Shuj accidenteta charimandami paniguca na purita usharca. Paica ninmi: “Jehová Diospash, ñuca familiapash y turiñañagucunapash ñucataca ninandami ayudahuashca y animahuashca. Ñucata ayudashcamanda agradicishcata ricuchingapami cushilla cangapaj ninanda esforzarini” ninmi.

10. Llaquicunata charishpapash ¿imamandata cushilla sintiripanchi?

¹⁰ Problemacunata charishpapash o ñucanchi familiata ima pasajpipash ñucanchica cushillami caita ushapanchi (Sal. 126:5).b ¿Imamandata shina nipanchi? Porque ciertopacha cushilla cangapaca ñucanchi causaipi ali cosascuna pasachunllaca na shuyapanchichu. Por ejemplo, María precursora paniguca cashnami nin: “Problemacunata charishpapash Jehová Diospa promesacunata yuyarimandami cushilla sintiripanchi. Pero tucuicunashnallatami huacapanchi y llaquilla sintiripanchi. Shinapash ñucanchicuna ima llaquicunata charijpipash Jehová Diosmi cushilla sintirichun ayudan” ninmi. Por ejemplo, cunanbi charishca llaquicunaca alpapi sarushca huellacunashnami can. Pero sarushca huellacunaca shinllita tamiajpica ñapashmi chingan. Shina cuendallatami, Jehová Dios tucuilla llaquicunata tucuchijpica cunanbi charishca llaquicunataca nunca más ñana tianga.

11. Apóstol Pablopa ejemplomandaca ¿imatata yachajuita ushapangui?

¹¹ Jehová Diospa ñaupapi nali ricurimandami llaquicunataca charinchi yashpami pensaita ushapanchi. Chashna pensai callarijushpaca ¿imatata ruraita ushapanchi? Shinlli llaquicunata charishca Jehová Diospa sirvijcunapa ejemplopimi pensarita ushapanchi. Por ejemplo, apóstol Pablopa causaipi pensaripashunchi. Jesusca apóstol Pablomanga shuj importante asignaciondami mingarca. Apóstol Pabloca ‘na judío gentecunaman, reycunaman, Israel llactamanda gentecunamanmi’ ali villaigucunata villachina carca (Hech. 9:15). Shinapash, apóstol Pabloca ashtaca llaquicunatami charirca (2 Cor. 11:​23-27). ¿Ashtaca llaquicunata charimandachu apóstol Pabloca Jehová Diospa ñaupapica nali ricurirca? Na, na shinachu carca. Más bien, Jehová Dios ayudajpimi apóstol Pabloca llaquicunataca aguantaita usharca (Rom. 5:​3-5). ¿Quiquinbashchu llaquicunata charishpapash Jehová Diosta sirvishpa catijupangui? Chashna rurajushpaca Jehová Dios quiquinhuan contento cashcatami seguro cana capangui.

12. Ñucanchi munashcashna imapash na pactarijpica ¿imashinata sintirita ushapanchi?

¹² Ñucanchi munashcashna imapash na pactarijpimi llaquilla sintirita ushapanchi (Prov. 13:12). Jehová Diosta sirvijcunaca Jehová Diosta juyashcata ricuchingapaj y agradicishcata ricuchingapami metacunataca churaripanchi. Shinapash, chai metacunaca ñucanchi causaipi pactachi ushanalla metacunami cana can. Na pactachi ushanalla metacunata churarishpaca ñucanchillatami desanimarishun (Prov. 17:22). Yolandac precursora paniguca cashnami nin: “Escuela para Evangelizadores del Reinoman ringapaj, shuj llactapi sirvigringapaj o Ramapo construccionba proyectopi ayudangapami munarcani. Pero ñuca causaipimi huaquin cambiocuna tiarca. Chaimandami chai metacunata na pactachi ushashcamandaca ninanda llaquirircani. Huaquin cosascunata rurangapaj munashpapash, chai cosascunata na pactachi ushashpaca llaquillami sintiririn” ninmi. Ashtaca huauquipanicunapashmi paicuna munashcashna Jehová Diosta na ashtahuan sirvita ushashcamandaca llaquilla sintirishca.

13. Ñucanchi munashcashna imagutapash na rurai ushashpaca ¿imatata ruraita ushapanchi?

¹³ Cutin cushilla sintiringapaca ¿imatata ruraita ushapanchi? Ñucanchi na rurai ushashca cosascunata rurachunga Jehová Diosca na obliganllu. Jehová Diosca ñucanchi responsabilidadcunamandaca na juyanllu, sino ñucanchi cualidadcunamandami juyan. Jehová Diosca ñucanchicuna humilde cachun y paipa mandashcacunata aliguta pactachichunmi munan (Miq. 6:8; 1 Cor. 4:2). Shinaca ñucanchi usharishcagutalla rurachun Jehová Dios mañajpica ñucanchicunaca na yapata exigirinachu capanchi.d Quiquinba circunstanciacunamanda Jehová Diosta ashtahuan na sirvi ushashpaca imata rurai ushashcapimi ashtahuan concentrarita ushapangui. Por ejemplo, shuj jovenlla huauquita o panitami Jehová Diosta ashtahuan sirvichun ayudaita ushapangui. O mayorlla huauquipanigucunata ayudangapami esforzarita ushapangui. Shinallata shujcunata animangapaj metatami churarita ushapangui. Usharishcagupi shujcunata ayudangapaj esforzarijpica, Jehová Diosca ninandami bendicianga. Paraíso alpagupi cashpa Jehová Diosmanda ashtaca cosascunata rurai ushashcapimi pensarita ushapangui. Párrafo 12​pi parlashca Yolanda paniguca cashnami nin: “Llaquilla sintirijushpaca, paraíso alpagupi causashpaca Jehová Diostaca ñuca munashcashnami huaquin cosascunata rurashpa sirvita ushasha yashpami pensarini. Chaitaca Jehová Diospa ayudahuanmi pactachita ushasha” ninmi.

14. ¿Imamandata ashtahuan llaquilla sintirita ushapanchi?

¹⁴ Ñucanchipilla y ñucanchi munaicunapilla yapata pensarimandami llaquilla sintirita ushapanchi. Huaquingunaca redes socialescunata utilizashpami cushilla causangapaca de vacación rina, randingapaj rina, gushtashca cosascunata rurana ali can nin. Ñucanchi gushtashca cosascunata ruranaca na malochu can. Porque Jehová Diosca ñucanchicuna cushilla causachunmi munan. Pero ñucanchi munashcatalla rurashpa causashpaca, na ciertopacha cushilla causaita ushapashunllu. Eva precursora paniguca cashnami nin: “Ñucanchipilla yapata pensarishpa y ñucanchi munaicunatalla ashtahuan rurangapaj munashpaca, nunca na contento sintirishpami llaquilla sintirishun” ninmi.

15. Rey Salomonmandaca ¿imatata yachajupanchi?

¹⁵ Rey Salomonba ejemplopi pensaripashunchi. Rey Salomonga cushilla causangapaj munaimandami ali micunacunata micushpa, musicata uyashpa y pai munashca shuj shuj cosascunata rurashpa causai callarirca. Shinapash rey Salomonga llaquillami sintirirca. Chaimandami cashna escribirca: “Ñavica ricunataca, ima horapash na shaijunllu. Rinripash, uyanataca na shaijunllu” nircami (Ecl. 1:8; 2:​1-11). Cushilla causangapaj cai mundopa yachachishca yuyaicunaca shuj falso billeteshnami can. Alishnalla ricurishpapash imapapash na valinllu.

16. Shujcunamanda imagutapash rurashpaca ¿imamandata cushilla sintiripashun? (Fotocunatapash ricupangui).

¹⁶ Cutin cushilla sintiringapaca ¿imatata ruraita ushapanchi? Jesusca “imagutapash carashpami, carajpi japishcatapash ashtahuan yalita cushijurin” nishpami yachachirca (Hech. 20:35). Alex ancianoca huauquica cashnami nin: “Shujcunamanda imagutapash rurangapami esforzaripani. Shinami ñucapi yapata pensaringapaj randica, shujcunata ayudaimanda cushilla sintiripani” nin. ¿Imatata shujcunamandaca ruraita ushapanchi? Shuj huauqui o shuj pani llaqui apajushcata yachashpaca, paita animangapami esforzarita ushapanchi. Huauquipa o panipa charishca llaquicunata na tucuchi ushashpapash, paita ali uyangapaj, paita juyashcata ricuchingapami esforzarita ushapanchi. Shinallata imashina sintirishcata Jehová Diosman tucuita villai ushashcatapashmi yarichita ushapanchi (Sal. 55:22; 68:19). Ashtahuanbash Jehová Dios paita na saquishcatami yuyachita ushapanchi (Sal. 37:28; Is. 59:1). Imagutapash yanungapaj o maigumanbash paihuan llujshingapami ofrecirita ushapanchi. Predicacionman ñucanchihuan llujshichunmi invitaita ushapanchi. Chaita rurajpica de seguromi animaringa. Ñucanchicunapi yapata preocuparinapa randica, shujcunata ayudangapami esforzarina capanchi. Shinami ciertopacha cushilla sintiripashun y Jehová Dios ñucanchita utilizachunbash saquipashun (Prov. 11:25).

17. Ciertopacha cushilla sintiringapaca ¿imatata rurana capanchi? (Salmo 43:4).

¹⁷ Ñucanchi Taita Jehová Diosman ashtahuan quimirishpami ciertopacha cushilla sintirita ushapashun. Bibliapica Jehová Diosmi “ninanda cushichij” ninmi (Salmo 43:4​ta liipangui). Shinaca, ima llaquicunata charishpapash tranquilomi sintirita ushapanchi. Jehová Diosmanda nunca na caruyajpica, Jehová Diosllatami cushilla sintirichun ayudanga (Sal. 144:15).