Mayoriashpapash ¿imashinata cushilla cashpa catita ushapanchi?

1, 2. Mayorlla huauquipanicunamandaca ¿imatata Jehová Diosca yuyan? (Salmo 92:​12-14; callari paginapa fototapash ricupangui).

HUAQUIN llactapi gentecunaca mayorianaca alimi can ninmi. Cutin shuj llactapi gentecunaca ama mayorlla ricuringapami imacunatapash ruran. Por ejemplo, yura ajcha ricuri callarishcandimi pilarin. Shinapash na yura ajchata llujchishcamandallachu, gentecunaca mayoriashpa catinataca saquipanchi.

² Pero Jehová Diosca ¿imatata mayorlla huauquipanicunamandaca yuyan? (Prov. 16:31). Jehová Diosca mayorlla huauquipanicunataca ashtacata fucuj yuracunahuanmi comparan (Salmo 92:​12-14​ta liipangui). Jehová Diosca ¿imamandata mayorlla huauquipanicunataca ashtacata fucuj yuracunahuan comparan? Ashtaca huatata charij yuracunaca ashtaca hojacunata, ashtaca sisacunata charimandami juyailla yuracuna can. Por ejemplo, Japón llactapi y shuj llactacunapica juyailla sisacunata charij cerezo yurami tian. Chai yuraca mil huatacunata yalimi causaita ushan. Chai juyailla yuracunashnallatami, mayorlla huauquipanicunaca Jehová Diospa ñaupapica juyaillagucuna ricurin. Jehová Diosca mayorlla huauquipanicunapa juyailla cualidadcunataca valichishpami ricun. Paicunaca Jehová Diostaca ashtaca huatacunatami sirvinajushca. Alipi cashpa y llaquipi cashpapashmi Jehová Diostaca siempre cazushca.

3. ¿Imashinata Jehová Diosca paipa voluntadta pactachingapaca mayorllagucunatapash utilizarca?

³ Mayorianajushpapash Jehová Diospaca valishcami capanchi.a Chaimandami mayorllagucuna cajpipash paipa sirvijcunataca paipa voluntadta pactachingapaj Jehová Diosca utilizashca. Por ejemplo, Sara ña mayorllagupacha cajpimi Jehová Diosca shuj huahuatami charigringui nirca. Canba huahuamandami ashtaca llactacuna tianga nirca. Shinallata canba huahuamandami Mesiaspash shamunga nirca (Gén. 17:​15-19). Moisestapash ña mayorllagupacha cajpimi, Jehová Diosca israelitacunata Egipto llactamanda llujchichun mandarca (Éx. 7:​6, 7). Apóstol Juanbash ña mayorllagupachami carca. Shinapash Jehová Diosca paipa espíritu santota cushpami, Juandaca Bibliapa cinco librocunata escribichirca.

4. Proverbios 15:15​pi nishcashnaca, llaquicunata aguantangapaca ¿ima cualidadtata mayorlla huauquipanicunaca minishtin? (Fototapash ricupangui).

⁴ Mayoriashca gentecunaca ashtaca llaquicunatami charin. Chaimandami ashtaca gentecunaca mayorianaca shinllimi can nin. Shinapash ashtaca llaquicunata aguantai ushangapaca ¿ima cualidadtata mayorlla huauquipanicunaca minishtin? Cushilla cana cualidadtami minishtinb (Proverbios 15:15​ta liipangui). Cai temapica cushilla cashpa catingapaj mayorlla huauquipanicuna imata rurai ushashcatami yachajupashun. Shinallata mayorlla huauquipanicunata ayudangapaj congregacionmanda huauquipanicuna imata rurai ushashcatapashmi yachajupashun. Pero primeroca, huatacuna yalijpi imamanda cushilla cashpa catina difícil cashcatami yachajupashun.

MAYORIASHPACA ¿IMAMANDATA CUSHILLA CANACA DIFÍCIL CAN?

5. Mayoriashpaca ¿ima cosascunamandata desanimarinchiman?

⁵ Mayoriashpaca ¿ima cosascunamandata desanimarinchiman? Pundashna ñana imatapash rurai ushaimandami talvez desanimarinchiman. Shinallata joven cashca tiempota yarishpa o sano cashca tiempota yarishpami talvez desanimarinchiman (Ecl. 7:10). Ruby paniguca cashnami nin: “Cuyuritapash na ushaimandami mudaritapash na ushapani. Cuerpo enterotami nanahuan. Chaquita alzashpa mediascunata churajuitallapash na ushapanichu. Artrosis unguimandami maquicunataca ninanda nanahuan. Chaimandami dedogucunata cuyuchitallapash na ushapani. Facillla cosasgucunata ruranapash dificilmi can” ninmi. Betelpi sirvijushca Harold huauquiguca ninmi: “Ñuca gushtashca cosascunataca ñana pundashna ruraita ushanichu. Chaimi ñucahuanllata culirarini. Joven cashpaca shinllimi carcani. Deportecunata pugllanatami gushtan carcani. Pugllanajushpaca, ‘pelotataca Haroldman shitaichi, paica nunca na fallanllu’ nihuanmi carca. Pero cunanga pelotata shitaitallapash na valishachu yanimi” ninmi.

6. a) ¿Imacunamandata ashtahuan desanimarinchiman? b) Carrota manejanata saquinata o na saquinata decidingapaca ¿imatata mayorllagucunaca yaipi cana can? (“¿Manejanataca saquinachu capani?” nishca temataca cai revistapillata ricupangui).

⁶ Shinallata, pundashna imagutapash ñana rurai ushaimandami desanimarinchiman. Pero ashtahuanbachaca pipash cuidajpi causajushpa o huahuacunahuan causangapaj rina tucushpami desanimarinchiman. Shinallata nali saludta charimanda o ñana ali ricuita ushaimandami manejanata saquishpa o maicunamanbash ñana ñucanchilla rita ushashpaca desanimarinchiman. Shinapash ñucanchimandallata imagutapash ñana rurai ushajushpa, ñucanchilla causajushpa o ñana manejaita ushajushpa ama desanimaringapaca ¿imatata yarina capanchi? Jehová Diospapash y shujcunapapash ñucanchicuna valishcacunapacha cashcatami yarina capanchi. Shinallata ñucanchicuna imashina sintirishcata Jehová Dios intindishcatapashmi yaipi charini capanchi. Jehová Diosca ñucanchicuna paitapash y huauquipanicunatapash ninanda juyajtaca alimi yachan. Shinaca Jehová Diospaca juyaita ricuchinami ashtahuan importante can (1 Sam. 16:7).

7. Armagedón chayamujtaca na ricui ushashachu yashpa desanimarijushpaca ¿imatata yarina capanchi?

⁷ Shinallata Armagedón chayamujtaca na ricushachu yashpami desanimarita ushapanchiman. Shina sintirijushpaca, Jehová Dios nali gentecunata tucuchingapaj pacienciahuan shuyajushcatami yarina capanchi (Is. 30:18). ¿Imamandata Jehová Diosca pacienciahuan shuyajun? Jehová Diosca ashtaca millón gentecuna paita rijsichun, paita sirvichun munashpami pacienciahuan shuyajun (2 Ped. 3:9). Shinaca desanimado sintirijushpaca Jehová Diospa pacienciamanda ashtaca gentecuna y hasta ñucanchi familiacunapash beneficiarinatami pensarina capanchi.

8. Ungushca caimanda o jambicunata ufianajuimandaca mayorlla huauquipanicunaca ¿imatata huaquinbica ruran?

⁸ Joven cashpa o mayorlla cashpapash tucuicunallatami nali sintirijushpaca, imacunatapash nishpa o rurashpa jipacunamanga llaquirinchi (Ecl. 7:7; Sant. 3:2). Por ejemplo, Jehová Diosta sirvij Job runaguca llaquicunata charimandami “na aliguta yarishpa” imacunatapash ni callarirca (Job 6:​1-3). Mayorllagucunapash ungushca caimanda o jambicunata ufianajuimandami, huaquinbica imatapash nishpa o rurashpa llaquichin. Shinapash ñami mayorllagu cani nishpalla o ungushcami cani nishpalla shujcunata groserota tratana o exigente canaca nalichu can. Si imacunatapash nishpa pitapash llaquichishcanchica, uchallami disculpata mañana capanchi (Mat. 5:​23, 24).

CUSHILLA CASHPA CATINGAPACA ¿IMATATA RURANA CAPANCHI?

9. ¿Imamandata shujcunapa ayudata chasquinaca ali can? (Fotocunatapash ricupangui).

⁹ Shujcuna ayudachunmi saquina capanchi (Gál. 6:2). Shujcunapa ayudata chasquinaca callaripica dificilmi caita ushan. Shuj paniguca cashnami nin: “Shujcunata na molestangapaj munaimandami, huaquinbica shujcunapa ayudata chasquinaca difícil cahuan. Humilde cangapaj y shujcunapa ayudata minishtijushcata intindingapaca, ashtaca tiempotami minishtipashcani” ninmi. Pero shujcunapa ayudata chasquishpaca, ayudashcamanda paicunapash cushilla sintirichunmi ayudapanchi (Hech. 20:35). Shinallata shujcuna ñucanchita juyashcata, ñucanchimanda preocuparishcata cuenta japishpami ñucanchicunapash cushilla sintiripanchi.

10. ¿Imamandata shujcunata agradicinataca na cungana capanchi? (Fototapash ricupangui).

¹⁰ Agradicishcataca ricuchinami capanchi (Col. 3:15; 1 Tes. 5:18). Shujcuna ñucanchimanda imagutapash rurajpica agradecidomi sintiripanchi. Shinapash huaquinbica agradicinataca cunganchillami. Cushilla “pagui” nijpica ñucanchita ayudashca huauquipanicunaca alimi sintiringa. Betelpi mayorlla huauquipanigucunata cuidajuj Leah shuti paniguca cashnami nin: “Shuj ñañaguca agradicishpami papel hojagucunapi huaquin shimigucunata escribihuan. Huaquin shimigucunatalla escribishpapash shungumandami escribihuan. Chai notagucunataca ninandami valorapani y agradicijpica shungumandami cushijupani” ninmi.

11. Huauquipanicunataca ¿imashinata ayudaita ushapanchi? (Fototapash ricupangui).

¹¹ Shujcunataca ayudanami capanchi. Shujcunapi pensarishpa paicunata ayudangapaj esforzarishpaca, ñucanchi problemacunapica na yapata concentrarishunllu. Mayorlla gentecunataca ashtaca ali cosascunata yachachij librocunahuanmi comparaita ushapanchi. Ali cosascunata yachachij librocunata na liishpaca, gentecunaca na beneficiarita ushangachu. Shinallata si ñucanchicunapash ima ali yachashca cosascunata y experienciacunata jovengunaman na parlanchica, jovengunapash ali cosascunata yachajushpa beneficiaritaca na ushangachu. Tapuicunata rurashca jipaca, paicuna imata nijtami uyana capanchi. Shinallata Jehová Dios ñucanchita imashina ayudashcata y paicuna Jehová Diosta cazuimanda imashina cushilla cai ushashcatapashmi parlana capanchi. Joven huauquipanicunata consolashpa animashpaca ñucanchipashmi cushilla sintiripashun (Sal. 71:18).

12. Isaías 46:4​pi nishcashnaca mayorllagucunamanga ¿imatata Jehová Diosca prometishca? (Fototapash ricupangui).

¹² Jehová Diostami fuerzata mañana capanchi. Huaquinbica shaijushca, ushai illanshnami sintiripanchi. Pero Jehová Diosca ‘ushai illaca’ na canllu, “na shaijunllu” (Is. 40:28). Jehová Diosca ashtaca podertami charin. Chai poderhuanmi mayorlla huauquipanigucunataca ayudan (Is. 40:​29-31). Jehová Diosca mayorlla huauquipanicunataca cuidashami nishpami prometin (Isaías 46:4​ta liipangui). Y Jehová Diosca imata prometishpapash siempremi pactachin (Jos. 23:14; Is. 55:​10, 11). Jehová Diosta ayudahuai nishpa mañajpica paica ayudangami. Shina ayudajpimi Jehová Dios ninanda juyashcata cuenta japishpa cushilla sintiripashun.

13. 2 Corintios 4:​16-18​pi nishcashnaca mayorllagucunaca ¿imatata yarina capanchi? (Fototapash ricupangui).

¹³ Cutin joven y sano canatami yarina capanchi. Llaquicuna ratopalla cashcata yarishpami, llaquicunata aguantaitaca ushapashun. Bibliapica nipi ñana mayoriangachu, nipi ñana ungushcami cani ningachu ninmi (Job 33:25; Is. 33:24). Shinaca shamuj punllacunapi ashtahuan sano, ashtahuan shinlli canata yachashpami mayorlla huauquipanigucunaca cushilla caita ushapanchi (2 Corintios 4:​16-18​ta liipangui). Pero mayorlla huauquipanigucunataca ¿imashinata ayudaita ushapanchi?

MAYORLLAGUCUNATACA ¿IMASHINATA AYUDAITA USHAPANCHI?

14. ¿Imamandata mayorlla huauquipanigucunata cayana, visitanaca importante can?

¹⁴ Seguidomi visitaita y cayaita ushapanchi (Heb. 13:16). Mayorlla gentecunaca solollami sintirinata yachan. Camiloc shuti huauquiguca cashnami nin: “Huaquinbica punlla entero huasimanda na llujshi ushaimanda, imatapash na ruranata charimandami aburrido, culira sintirini” ninmi. Mayorllagucunata visitashpami paicunata valorashcata, paicunata juyashcata ricuchipanchi. Huaquinbica tucuicunallatami shuj mayorlla huauquipaniguta visitangapaj o cayangapaj munapashcanchi. Shinapash huaquinbica cungapashcanchimi. Tucuicunallatami ocupado yalipanchi. Shinapash mayorllagucunata visitanaca importantemi can. Shinaca “importante cosascunata” en primer lugar churangapaca ¿imatata rurana capanchi? (Filip. 1:10). Shuj mayorlla huauquiguta o paniguta cayanata o mensajeta cachanata yaringapaca, calendariopimi shuj notaguta escribita ushapanchi. Shinallata huasipi visitagringapami shuj punllaguta agllashpa, aliguta organizarina capanchi.

15. Jovengunaca ¿imacunatata mayorlla huauquipanigucunahuanga ruraita ushan?

¹⁵ Jovengunaca mayorllacunahuanga “¿imatashi parlasha? Paicunahuanga ¿imatashi rurashun?” yashpami preocuparin. Shinapash na yapata preocuparijunachu capangui. Ali amigocuna imata rurajtami pensarina capangui (Prov. 17:17). Por ejemplo, tandanajui nara callarijpi o tandanajui tucurishca jipami paicunahuanga parlaita ushapangui. ¿Maijan textotata ashtahuan gushtapangui? O joven cashpaca ¿ima chistoso experienciatata charipashcangui? nishpami paitaca tapuita ushapangui. JW Broadcasting^® programata ricungapapashmi mayorlla huauquipanigucunataca invitaita ushapangui. Shinallata tabletta o celularcunata actualizashpa o reunionba mushuj publicaciongunata descargashpami ayudaita ushapangui. Jovengunaca canguna gushtashca cosascunata rurangapami mayorlla turiñañagucunataca invitaita ushapanguichi. Carol shuti mayorlla paniguca cashnami nin: “Ñucaca mayorllagu cashpapash randingapaj rinata, micungapaj llujshinata y Jehová Dios rurashca cosasgucunata ricunatapashmi gushtapani” ninmi. Maira shuti paniguca cashnami nin: “Ñucapa shuj amigaguca 90 huatacunatami charin. Cutin ñucaca 33 huatacunatami charipani. Pero ñuca amiga mayor cajtaca yaritallapash na yaripanichu. Ishcandillatami asishpa peliculacunata ricushpa yalipanchi. Consejota minishtishpaca ishcandillatami consejota cushpa ayudaripanchi” ninmi.

16. ¿Imamandata mayorllagucunata doctorpaman cumbanaca ali can?

¹⁶ Doctorpamanmi cumbaita ushapanchi. Mayorlla huauquipanigucunata doctorpaman apashpapash, doctorcuna paicunata aliguta tratajta, paicunata aliguta ayudajujta ricungapami quidaita ushapanchi (Is. 1:17). Shinallata doctor imata nijtapashmi anotaita ushapanchi. Ruth paniguca cashnami nin: “Solalla rijpica, doctorcunaca ñuca imata nishcataca na crihuanllu. Huaquinbicarin ‘na ungushca canguichu, ungushca cashcataca imaginaritallami imaginarijungui’ nihuanmi. Pero cumbahuan rijpica, doctorca ashtahuan alimi tratahuan. Ñucata cumbashpa rij turiñañagucunataca ninandami agradicipani” ninmi.

17. Mayorllagucunahuan predicangapaca ¿imacunatallata ruraita ushapanchi?

¹⁷ Paicunahuan predicapashunchi. Mayorlla huauquipanigucunaca huasin huasin rishpa predicangapaca, huaquinbica ñana fuerzata charinllu. Paicunataca ñucanchihuan predicación publicaman llujshichunmi invitaita ushapanchi. Paicuna tiarichunga shuj sillagutapashmi apaita ushapanchi. O shuj estudio biblicomanbashmi invitaita ushapanchi. Hasta paicunapa propio huasipimi estudio biblicotaca cuita ushapanchi. Mayorlla huauquipanigucuna predicacionman ashtahuan facillla llujshita ushachunmi, ancianocunaca mayorlla huauquigucunapa huasipi predicacionman llujshina grupotaca ruraita ushan. Shinami mayorllagucunata valorashcata ricuchipanchi (Prov. 3:27; Rom. 12:10).

18. Shamuj temapica ¿imatata yachajupashun?

¹⁸ Cai temapica Jehová Diospash, huauquipanigucunapash mayorlla huauquipanigucunata juyajta, valorajtami yachajupashcanchi. Mayorianaca dificilmi can. Shinapash Jehová Diospa ayudahuanmi, mayorlla huauquipanigucunaca cushilla cashpa catita ushapanchi (Sal. 37:25). Mayorlla huauquipanigucunaca shamuj punllacunapi ninanda cushilla cana tiempocunapi pensarishpami animarina capanchi. Pero shuj mayorlla familiarta o ungushca churita o ungushca amigota cuidajushpaca ¿imatata cushilla cashpa catingapaca ruraita ushapanchi? Chai tapuitaca shamuj temapimi yachajupashun.