Taita Diosmanda yachajushpa catipashunchi

1. Gentecunaca ¿imacunatallata minishtipanchi? (Mateo 5:3).

JEHOVÁ DIOSCA gentecuna imata minishtijtaca alimi yachan. Por ejemplo, gentecunaca micunaguta, ropaguta, maipi causana pushtugutami minishtipanchi. Chai cosascunaca importantepachami can. Chai cosascunata na charishpaca, ñucanchi causaica shinllimi canman. Jehová Diosca ñucanchicuna imata minishtijta ali yachashpapash, ñucanchitaca paimanda yachajuna munaihuanmi rurashca (Mateo 5:3​ta liipangui). Ciertopacha cushilla causangapaj munashpaca, Taita Diosmanda yachajuna importante cashcatami reconocina capanchi. Shinallata Taita Diospa yachachishcacunamanda beneficiaringapapash esforzarishpami catina capanchi.

2. ¿Imamandata pobre runagushna capanchi?

² Griego shimipica “paicunapa espiritupi caridadta mañajcunashna cajcunataca” Taita Diosmanda yachajungapaj munajcuna nishpami traducin. Chai yuyaita aliguta intindingapaca, shuj pobre pobre runagupi pensaripashunchi. Chai pobre runaguca micunagupash illami punllacunaca ninan rupaipi tiajun. Tutacunapash chiri chiripimi pacarijun. Mapa mapagumi tiajun. Chaimi gentecunaca quimiringapallapash na munan. Paica shaijushca, llaquillagumi tiajun. Chai pobre runaguca causashpa catingapaca shujcunapa ayudata minishtijushcataca alimi yachan. Taita Diosmanda yachajuna munaita charijcunapash chai pobre runagu cuendami, Taita Dios paicunapa causaipi ayudachun minishtishcataca ali yachan. Chaimandami Taita Dios paicunata yachachichunga ansia shuyanajun.

3. Cai temapica ¿imatata yachajupashun?

³ Cai temapica Fenicia llactamanda huarmigupa ejemplotami primeroca ricupashun. Chai huarmiguca Jesustami ayudahuai nishpa rogarca. Chai huarmigu ima quimsa cualidadcunata charishcata y chai cualidadcunata ñucanchicuna imashina cati ushashcatami yachajupashun. Shinallata, Jehová Dios ayudanapi tucui shunguhuan confiashca apóstol Pedromanda, apóstol Pablomanda y rey Davidmandapashmi yachajupashun.

AYUDAHUAI NISHPA ROGASHCA HUARMIGUMANDACA ¿IMATATA YACHAJUPANCHI?

4. Fenicia llactamanda huarmiguca ¿imapata Jesuspamanga quimirirca?

⁴ Shuj punllaca Fenicia llactamanda huarmiguca, shuj demonio paipa ushiguta ninanda sufrichijujpimi Jesuspaman aparca (Mat. 15:​21-28). Chai huarmiguca Jesuspa ñaupapi cungurishpami, ñuca ushiguta ayudapai nishpa rogarca. Cunanga chai huarmigumanda ima quimsa cosascunata yachajui ushashcata ricupashun.

5. Fenicia llactamanda huarmiguca ¿ima quimsa cualidadcunata charishcatata ricuchirca? y Jesusca ¿imatata rurarca? (Dibujotapash ricupangui).

⁵ Fenicia llactamanda huarmiguca ciertopacha humilde cashcatami ricuchirca. ¿Imashinata humilde cashcataca ricuchirca? Jesusca chai huarmigutaca shuj alcuguhuanmi compararca. Shina comparajpipash chai huarmiguca na culirarcachu. Chai tiempopica na judío gentecunallami alcugucunataca charishca yarin. Ñucanchicunata shuj alcuguhuan comparajpica ¿imashinashi sintirinchiman carca? ¿Culirashca caimandachu na ayudahuai nishpa rinchimanlla carca? Fenicia llactamanda huarmiguca humilde caimandami na culirarca. Shinallata Jesús ayudanata segura cashpami, Jesustaca cutin cutin ayudahuai nishpa rogarca. Shina rogajpimi Jesusca chai huarmigu shinlli feta charishcata ricurca. Chaimi, aunque “chingashca llamagucunashna causanajuj Israel llactamanda gentecunatalla ayudachunmi, Taita Diosca cachamuhuashca” nishpapash, Jesusca chai huarmigupa ushita llaquichijushca demoniotaca llujchirca.

6. Fenicia llactamanda huarmigupa ejemplomandaca ¿imatata yachajupanchi?

⁶ Taita Diospa yachachishcacunamanda beneficiaringapaca, Fenicia llactamanda huarmigushnami humilde cana capanchi. Shinallata cutin cutinmi Jehová Diostaca rogana capanchi. Shinlli fetapashmi charina capanchi. Humilde cashpallami Jehová Diostaca cutin cutin ayudahuai nishpa mañaita ushapashun. Jesuspi shinlli feta charinapash importantemi can. Shinallata paipa discipulocunata dirigingapaj Jesús churashca huauquicunapi confianapash importantemi can (Mat. 24:​45-47). Ñucanchicuna humilde cajpi, ayudahuai nishpa cutin cutin roganajujpi y shinlli feta charijpica Jehová Diospash y Jesuspash ninandami cushijun. Ñucanchicuna chai quimsa cosascunata rurajpimi Jehová Diospash y Jesuspash ñucanchicunataca ayudashpa imata ruranata ricuchin (Santiago 1:​5-7​huan comparashpa ricupangui). Cati parrafocunapica micunaguta, ropaguta, maipi causana pushtuguta caranshna Jehová Dios imashina ayudajtami ricupashun. Shinallata chai ayudacunamanda beneficiaringapaj imata ruranatapashmi yachajupashun. Chaicunata yachajungapaca apóstol Pedropa, apóstol Pablopa y rey Davidpa ejemplocunatami ricupashun.

APÓSTOL PEDROSHNAMI TAITA DIOSPA SHIMITACA YACHAJUNA CAPANCHI

7. Jesusca ¿imatata apóstol Pedromanga mandarca? Shinapash apóstol Pedroca ¿imatata rurana carca? (Hebreos 5:14–6:1).

⁷ Apóstol Pedropa ejemplopi pensaripashunchi. Apóstol Pedroca Jesús Mesías cashcataca alimi yacharca. Shinallata apóstol Pedroca para ‘siempre causaita caraj’ shimicunata judiocunaman yachachichun Jehová Dios paita utilizajushcatapash alimi yacharca (Juan 6:​66-68). Jesuspash nara jahua cieloman rishpallatami apóstol Pedromanga, “ñuca llamagucunaman micunaguta carapangui” nishpa mandarca (Juan 21:17). Apóstol Pedroca Jesús imata mandashcataca aligutami pactachirca. Ashtahuangarin Jehová Diosca ishcai cartacunata escribichunmi apóstol Pedrotaca utilizarca. Shinapash apóstol Pedroca Taita Diospa Shimita estudiana cashcataca alimi yacharca. Chaimi, apóstol Pablo escribishca cartacunata estudiarca. Shinapash chai cartacunapica “na ñapash intindi ushanalla yuyaicunami tian” nircami (2 Ped. 3:​15, 16). Shinlli cajpipashmi apóstol Pedroca chai yuyaicunataca yachajushpa catirca. Chai shinlli yuyaicunata intindichun Jehová Dios ayudanataca seguromi carca. Shinallata imata yachajushcata pactachichun Jehová Dios ayudanatapash seguromi carca (Hebreos 5:14–6:1​ta liipangui).

8. Jehová Dios mushuj instrucciongunata cujpica ¿imatata apóstol Pedroca rurarca?

⁸ Apóstol Pedroca Jehová Dios imata mandashcata cazushpami, Jehová Diospi feta charishcata ricuchirca. Shuj punllaca apóstol Pedroca shuj muscuipishnami shuj angelta ricurca. Chai angelca Moisesman Cushca Leypi na micunachu can nishca animalcunata micuchunmi apóstol Pedrotaca mandarca. Pedroca judío caimandami ángel imata nishcata cazunaca nalimi can yajurca. Chaimandami apóstol Pedroca “ñuca Señor, chaitaca nimamanda na rurapashachu. Na micuna nishca prohibido animalcunataca nunca na micupashcanichu” nirca. Apóstol Pedro shina nijpimi angelca “Taita Dios ña limpiomi can nishcataca, canga ñana mapami can nijunachu cangui” nirca (Hech. 10:​9-15). Chai ángel shina nijpimi apóstol Pedroca intindirca. ¿Imashinata apóstol Pedro intindishcataca yachapanchi? Muscuipishna ricushca jipallami quimsa jaricunaca apóstol Pedropaman chayarca. Paicunaca, ‘ñucanchi amo Cornelioca paipa huasiman richunmi cayajupan’ nircami. Pero Cornelioca na judiochu carca. Judiocunaca shuj llactamanda gentecunataca mapami can nishpami ricun carca. Chaimandami apóstol Pedroca judío caimandaca Corneliopa huasimanga nunca na rinman carca (Hech. 10:​28, 29). Shinapash Jehová Dios shuj llactamanda gentecunamanbash predicachun munashcata intindishpami, apóstol Pedroca chai rato Corneliopa huasiman rirca (Prov. 4:18). Shinami apóstol Pedroca Corneliomanbash y Corneliopa huasipi cashca familiacunamanbash y amigocunamanbash villachirca. Chaimi paicunaca Jesuspi cri callarirca, espíritu santotapash chasquirca y bautizarirca (Hech. 10:​44-48).

9. Bibliapa shinlli yachachishcacunata intindingapaj esforzarishpaca ¿ima ishcai beneficiocunatallata charipashun?

⁹ Ñucanchicunapash apóstol Pedroshnami Taita Diospa Shimitaca seguido estudiana capanchi. Estudianajushpaca facillla intindina cosascunatami liipashcanchi. Shinapash shinlli cosascunatapashmi cushijushpa estudiana capanchi. Bibliapa shinlli yachachishcacunata aliguta intindi ushangapaca tiempota y esfuerzotami minishtipanchi. Si tiempota llujchinchi y esforzarinchica ashtaca beneficiocunatami charipashun. Por ejemplo, ishcai beneficiocunata ricupashun. Primer beneficio, Jehová Diosmanda ashtahuan yachajushpami paitaca ashtahuan juyashun y ashtahuan respetashun. Segundo beneficio, ñucanchi Taita Jehová Diosmanda imapash alipacha yuyaita yachajushpaca shujcunaman compartina munaitami charipashun (Rom. 11:33; Apoc. 4:11). Apóstol Pedropa ejemplomandaca shuj yuyaitapashmi yachajupanchi. Por ejemplo, Jehovapa organización Bibliamanda imapash mushuj entendimientota yachachijpica ñapashmi aceptana capanchi. Shina rurashpallami Jehová Diospa yachachishcacunamandapash beneficiarishpa catita ushapashun y Jehová Diosta aliguta sirvishpa catitapash ushapashun.

APÓSTOL PABLOSHNAMI ALI CUALIDADCUNATA CHARINGAPAJ ESFORZARINA CAPANCHI

10. Colosenses 3:​8-10​pi nishcashnaca Jehová Diosta cushichingapaca ¿imatata rurana capanchi?

¹⁰ Jehová Diosta cushichingapaca apóstol Pablo nishcashnami ‘punda causaita saquishpa Taita Dios carashca mushuj causaitaca ropata churajunshna churajuna capanchi’ (Colosenses 3:​8-10​ta liipangui). Ali cualidadcunata charingapaca “ninandami” esforzarishpa catina capanchi. Apóstol Pablopa ejemplopi pensaripashunchi. Paica jovenmandapachami Jehová Diospa ñaupapi ali ricuringapaca ninanda esforzarirca (Gál. 1:14; Filip. 3:​4, 5). Shinapash Jehová Diosta imashina ali adoranataca nara aliguta intindircachu. Jesuspa yachachishcacunatapash apóstol Pabloca na yacharcachu. Shinallata orgullosomi carca. Jehová Dios munashcashnapash na comportarinllu carca. Chaimandami apóstol Pabloca ‘ñucaca, pitapash na respetaj runami carcani’ nirca (1 Tim. 1:13).

11. Apóstol Pabloca ¿imapita cambiana carca? Explicapai.

¹¹ Apóstol Pablo nara cristiano tucushpaca ninandami culiranlla carca. Bibliapi nishcashnaca apóstol Pabloca Jesuspa discipulocunataca na ricunayachinllu carca. Chaimandami paicunataca catiriashpa llaquichijurca y ‘huañuchingapapash munajurca’ (Hech. 9:1). Shinapash cristiano tucushpaca ama culirangapami apóstol Pabloca ninanda esforzarishcanga (Efes. 4:​22, 31). Shina esforzarishca jahuapash, shuj punllaca Bernabehuan na de acuerdo cashpami apóstol Pabloca ‘Bernabehuanga ninanda culirarca’ (Hech. 15:​37-39). Chai ratopi Jehová Dios munashcashna na comportarishpapash apóstol Pabloca na desanimarircachu. Chaimandami Jehová Dios munashcashna comportaringapaca ninanda esforzarishpa catirca (1 Cor. 9:27).

12. Apóstol Pabloca ¿imashinata punda causaitaca saquita usharca?

¹² Apóstol Pabloca paipa punda causaita saqui ushangapaca na paipa fuerzapillachu confiarca (Filip. 4:13). Sino apóstol Pedroshnallatami ‘Taita Diospa fuerzapi’ confiarca (1 Ped. 4:11). Huaquinbi pandarishpapash na desanimarircachu. Desanimado sintirijushpaca Jehová Dios paimanda imacunatalla rurashcatami apóstol Pabloca yarin carca. Y agradicishcata ricuchingapami cambiocunata rurashpa catirca. Jehová Diosta cushichishpa catingapapashmi esforzarirca (Rom. 7:​21-25).

13. ¿Imashinata apóstol Pablopa ejemplotaca catita ushapanchi?

¹³ Ashalla o ashtaca huatacunata Jehová Diosta sirvijushpapash, tucuicunallatami apóstol Pablopa ejemplotaca catina capanchi. Apóstol Pablopa ejemplota catingapaca punda causaita saquishpami Taita Dios carashca mushuj causaitaca ropata churajunshna churajungapaj esforzarishpa catina capanchi. Esforzarishpapash huaquinbica culiranchillami o imatapash nishpa o rurashpami nalita ruranchilla. Shina pasajpica, Jehová Diospa ñaupapica nunca na ali ricurita ushashachu yashpaca na pensanachu capanchi. Shina pensajunapa randica, cambiashpa catingapami esforzarina capanchi (Rom. 12:​1, 2; Efes. 4:24). Ñucanchi mushuj causaipi mejorashpa catingapaca, Jehová Dios ñucanchita yachachichunmi saquina capanchi. Y paita ali rijsingapapashmi esforzarina capanchi.

REY DAVIDSHNAMI JEHOVÁ ÑUCANCHITA CUIDACHUN SAQUINA CAPANCHI

14, 15. Cunan punllacunapica ¿imashinata Jehová Diosca paipa sirvijcunataca cuidajun? (Salmo 27:5; callari paginapa fototapash ricupangui).

¹⁴ Ciertopacha cushilla causangapaca Jehová Dios ñucanchita cuidachunbashmi minishtipanchi. Shinapash ¿imashinata Jehová Diosca ñucanchita cuidan? Ñucanchita cuidachunga ¿imatata rurana capanchi?

¹⁵ Rey Davidca Jehová Dios shuj pacajuna pushtugushna paita cuidanataca seguromi carca (Salmo 27:5​ta liipangui). Jehová Diosca cunan punllacunapipashmi paipa sirvijcunataca cuidajun. ¿Imashinata cuidajun? Jehová Diosca paipa sirvijcunata pipash o imapash ama llaquichichunmi cuidajun. Chaimandami Jehová Diosca contracuna shinlli macanajunacunahuan shayarijpipash canda mishachunga na saquishachu nishpa prometin (Sal. 34:7; Is. 54:17). Diablopash, demoniocunapash y ñucanchita catiriashpa llaquichijcunapash ninan ushaitami charin. Shinapash Jehová Diosca paicunata ashtahuan yali ushaitami charin. Ñucanchita huañuchijpipash Jehová Diosca ñucanchita causachingami (1 Cor. 15:​55-57; Apoc. 21:​3, 4). Shinallata llaquicunata charishpapash paita sirvishpa catichunmi Jehová Diosca ñucanchita ayudanga (Prov. 12:25; Mat. 6:​27-29). Shinallata ñucanchicunata juyaimandami Jehová Diosca huauquipanicunata cushca. Huauquipanicunami ñucanchicunataca shinlli tiempocunapica animashpa ayudan. Ashtahuanbash ñucanchicunata juyaimandami Jehová Diosca anciano huauquicunatapash cushca. Ancianocunami ñucanchitaca yachachin y shinlli feta charichunbash ayudan (Is. 32:​1, 2). Tandanajuicunaman rishpami, Jehová Dios ñucanchicunata imashina ayudajujta, imashina cuidajujtaca ashtahuan yachajuita ushapanchi (Heb. 10:​24, 25).

16. ¿Imashinata Jehová Diosca Davidtaca cuidarca?

¹⁶ Cazushcamandami Davidtaca ali decisiongunata japichun Jehová Diosca ayudarca. Y ali decisiongunata japichun ayudashpami, llaquicunapi ama urmachunbash Jehová Diosca cuidarca (Proverbios 5:​1, 2​huan comparashpa ricupangui). Shinapash Jehová Diosta na cazushcamanda rey David llaquicunapi urmajpica, Jehová Diosca chai llaquicunapica na ayudarcachu (2 Sam. 12:​9, 10). Shinapash shujcuna llaquichijpi David sufrijujpica ¿imashinata Jehová Diosca Davidtaca cuidarca? Imashina sintirishcata Jehová Diosman villajpica Jehová Diosca ‘juyashcata ricuchishpa, cuidashami’ nishpami rey Davidtaca consolarca (Sal. 23:​1-6).

17. Davidpa ejemplotaca ¿imashinata catita ushapanchi?

¹⁷ Davidshnami imapash decisionda japigrijushpaca Jehová Diosta mañana capanchi. Y si nali decisiongunata japimanda llaqui apanchica, Jehová Dios ñucanchita na ayudanataca yaipimi charina capanchi (Gál. 6:​7, 8). Shinallata shujcuna llaquichijpi sufrinajushpaca, Jehová Dios ñucanchi shunguta y pensamientocunata cuidanata seguro cashpami Jehovata mañana capanchi (Filip. 4:​6, 7).

TAITA DIOSMANDA YACHAJUSHPA CATINATACA NA SAQUINACHU CAPANCHI

18. a) ¿Imamandata Jehovamanda yachajuna importante cashcataca reconocina capanchi? b) Jehovamanda yachajungapaca ¿imacunatata rurashpa catina capanchi? (Fotocunatapash ricupangui).

¹⁸ 2026 huatapa textoca Mateo 5:3​mandami can. Chaipica: “Taita Diosmanda yachajungapaj munajcunaca ninandami cushijun” ninmi. Jehová Diosmanda yachajuna importante cashcataca reconocinami capanchi. Porque cunanbi ashtaca gentecunaca Jehová Diosmanda yachajunaca na importantechu can yashpa causaimandami na cushilla causan. Shinallata Taita Diospi crishpapash paicuna munashcashnami Taita Diostaca adoran. Gentecunapa yuyaicunapi confiashpami causan. Pero ñucanchicunaca chai gentecunashna cangapaca na munapanchichu. Chaipa randica, micunaguta micunshnami Taita Diospa Shimitaca yachajushpa catina capanchi. Shinallata mushuj ropaguta churajunshnami ali cualidadcunata charingapaj esforzarishpa catina capanchi. Ashtahuanbash shuj pacajuna pushtugupi pacajunshnami, Jehová Diosta cazushpa pai ñucanchita cuidachun saquina capanchi.