Desanimachij pensamientocunata mishapashunchi

1, 2. Apóstol Pabloca ¿imashinata huaquinbica sintirin carca? ¿Imamandata apóstol Pabloshna sintirita ushapanchi? (Romanos 7:​21-24).

APÓSTOL Pabloca ¿imacunatallata rurarca? Apóstol Pabloca ashtaca llactacunapimi villachirca. Bibliapa ashtaca librocunatapashmi escribirca. Shinallata alipacha yachachijmi carca. Paica valientemi carca y Taita Diostapash tucuipimi cazurca. Shinapash apóstol Pabloca ñucanchicunashnallatami huaquinbica llaquilla, desanimado sintirin carca.

² (Romanos 7:​21-24​ta liipangui). Romanos libropica, imashina sintirishcatami apóstol Pabloca parlarca. Ñucanchicunapash apóstol Pablo sintirishcashnallatami sintirita ushapanchi. Apóstol Pabloca Taita Diosta ali sirvijmi carca. Shinapash, imperfecto caimandami Taita Diospa voluntadta rurangapaj munashpapash, paipaca Taita Diosta siempre cazunaca na fácil carca. Shinallata apóstol Pabloca punda nali cosascunata rurashcata yuyarishpami huaquinbica nali sintirin carca. Ashtahuanbash paipa causaipi shuj problemata charimandapashmi nali sintirin carca.

3. Cai temapica ¿imatata yachajupashun? (“Minishtirishca yuyai” nishcatapash ricupangui).

³ Apóstol Pabloca huaquinbica desanimadomi sintirin carca. Shinapash desanimachij pensamientocunataa ama charingapami ninanda esforzarirca. Cai temapica apóstol Pablo imamanda llaquilla sintirin cashcata, chai sentimientocunata mishangapaj imata rurashcatami yachajupashun. Shinallata desanimachij pensamientocunata ama charingapaj imata rurai ushashcatapashmi yachajupashun.

¿IMAMANDATA APÓSTOL PABLOCA HUAQUINBICA DESANIMADO SINTIRIN CARCA?

4. ¿Imamandata apóstol Pabloca desanimado sintirin carca?

⁴ Apóstol Pabloca punda nali rurashcacunata yarishpami desanimado sintirin carca. Apóstol Pabloca nara cristiano tucushpaca, ashtaca nali cosascunatami rurarca. Por ejemplo, apóstol Pabloca Estebanda huañuchichunmi apoyarca (Hech. 7:58; 8:1). Shinallata ashtaca cristianocunatami manllanaita maltratashpapash llaquichirca (Hech. 8:3; 26:​9-11).

5. Nali cosascunata rurashcata yarishpaca apóstol Pabloca ¿imashinata sintirin carca?

⁵ Apóstol Pabloca nara cristiano tucushpa, punda nali cosascunata rurashcata yarishpami huaquinbica culpable sintirin carca. Tiempo yalijpicarin nali cosascunata rurashcata yuyarishpami apóstol Pabloca ashtahuan nali sintirin cashcanga. Por ejemplo, huata 55​pica Corinto llactamanda cristianocunaman shuj cartata escribishpaca, “ñucaca Taita Diospa congregacionda catiriashpa llaquichishcamandami, apóstol nichunllapash na miricipani” nirca (1 Cor. 15:9). 5 huatacuna jipapash Efesiocunaman shuj cartata escribishpaca “Taita Diospa separashcacunamandapash ashtahuan menosmi capani” nircami (Efes. 3:8). Shinallata apóstol Pabloca punda pai imashina cashcata parlashpami Timoteomanga cashna nirca, ñucaca “Taita Diosta nalicachishpa o na ricunayachishpami riman carcani. Shinallata shujcunata catiriashpami llaquichircani, pitapash na respetanllu carcani” nirca (1 Tim. 1:13). Apóstol Pablopaca congregaciongunata visitagrishpa pai catiriashpa llaquichishca huauquipanicunata o paicunapa familiarcunata rijsinaca dificilmi cashcanga.

6. Apóstol Pabloca ¿imamandata ashtahuan sufrijushcanga? (Notatapash ricupangui).

⁶ Apóstol Pabloca shuj jatun problemata charimandami sufrijurca. Chai problemata charimandami apóstol Pabloca ‘ñuca cuerpopica tujsijuj shuj cashatashnami chasquishcani’ nirca (2 Cor. 12:7). Apóstol Pabloca chai problema imapacha cashcataca na nircachu. Talvez chai problemaca shuj ungui o imapash shuj preocupaciongunami cashcanga. Pero ima cashca cashpapash chai problemaca apóstol Pablotaca ninandami sufrichijurca.b

7. Apóstol Pablopaca ¿imamandata siempre alita ruranaca difícil carca? (Romanos 7:​18, 19).

⁷ Apóstol Pabloca pandarimandami desanimado sintirin carca. Apóstol Pabloca imperfecto caimandami shuj macanajuipishna causarca (Romanos 7:​18, 19​ta liipangui). Apóstol Pabloca alita rurangapaj munashpapash, alita ruraitaca na usharcachu. Chaimandami nalita ruranapa randica, alita rurangapami esforzarishpa catini nirca (1 Cor. 9:27). Esforzarishpapash pandarircami. Shinaca mejorangapaj o cambiangapaj esforzarijushpapash pandarishpaca apóstol Pabloca ninandami desanimado sintirishcanga.

APÓSTOL PABLOCA DESANIMADO SINTIRISHPACA ¿IMATATA RURARCA?

8. Apóstol Pabloca paipa causaipi mejorangapaca ¿imacunatallata rurarca?

⁸ Apóstol Pablopa cartacunapi ricushca shinaca, apóstol Pabloca paita y shuj cristianocunatapash nali munaicunahuan luchachun y chai nali munaicunata mishachun Taita Diospa espíritu santo imashina ayudajtami pensarin carca (Rom. 8:13; Gál. 5:​16, 17). Apóstol Pabloca Taita Diospa ñaupapi ali ricuringapaj ima nali munaicunata, ima nali ruraicunata na rurana cashcatami cristianocunamanga parlan carca (Gál. 5:​19-21, 26). Chai cosascunata rurashpaca apóstol Pabloca imapi mejorana cashcatami pensarin cashcanga. Shinaca imapi, imashina cambianata yachangapaca Taita Diospa Shimitami ali ali estudian cashcanga. Shujcunaman consejajushpapash chai consejocunata paipa causaipillata apóstol Pablo pactachishcataca seguromi capanchi.

9, 10. Desanimachij pensamientocunata mishachunga ¿imata apóstol Pablotaca ayudarca? (Efesios 1:7; dibujotapash ricupangui).

⁹ Apóstol Pabloca huaquinbi desanimado sintirishpapash, ashtaca cosascunamandami cushilla sintirin carca. Por ejemplo, carulla congregaciongunamanda ali noticiacunata uyashpami cushilla sintirin carca (2 Cor. 7:​6, 7). Ali amigocunata charimandapashmi apóstol Pabloca cushilla sintirin carca (2 Tim. 1:4). Shinallata Jehová Diospa ñaupapi ali ricurimanda y Jehová Diosta “shuj limpio concienciahuan” sirvi ushashcamandapashmi cushilla sintirin carca (2 Tim. 1:3). Apóstol Pabloca Roma llactapi preso cashpapashmi huauquipanicunataca, “Taita Diosmandami siempre cushijuna capanguichi” nirca (Filip. 4:4). Desanimadolla yalijushca cashpaca apóstol Pabloca chai shimicunataca na ninmanllu carca. Apóstol Pabloca desanimachij cosascunapi pensari callarijushpaca, uchallami cushilla sintichij cosascunapi pensarin carca.

¹⁰ Apóstol Pabloca, Jehová Dios paipa Churipa causaita paimanda cushcapimi pensarin carca. Chaimi desanimachij pensamientocunataca mishaita usharca (Gál. 2:20; Efesios 1:7​ta liipangui). Shinami apóstol Pabloca Jesús paipa causaita cushcamandaca, Jehová Dios paipa pecadocunata perdonashcata y pandarijpipash Jehová Dios perdonashpa catinataca seguro carca (Rom. 7:​24, 25). Apóstol Pabloca punda pandarishca cashpapash, imperfecto cashpapashmi cushijushpa Jehová Diostaca ali adoraita usharca (Heb. 9:​12-14).

11. ¿Imamandata apóstol Pablopa ejemploca ñucanchitaca animan?

¹¹ Huaquinbica apóstol Pabloshnallatami, Jehová Dios gushtashca ali cosascunata rurangapaj, pensangapaj o ningapaca shinllitami esforzarina cani yanchi. Y hasta ‘ñucaca juyaipami causajuni’ nishpami pensanchiman. Elizac paniguca cashnami nin: “Apóstol Pablopa ejemplopi pensarishpaca ninandami animaripani. Apóstol Pablo charishca sentimientocunatallata ñucapash charishcata yachashpaca ninandami consolaripani. Chai cosascunami Jehová Diosca paipa sirvijcunapa sentimientocunamanda preocuparin cashcata yarichun ayudahuan” ninmi. Cati parrafocunapica desanimachij pensamientocunata charishpapash, apóstol Pabloshna shuj limpio concienciata charingapaj y cushilla cashpa catingapaj imata rurana cashcatami yachajupashun.

DESANIMADO SINTIRIJUSHPACA ¿IMATATA RURAI USHAPANCHI?

12. Ashtahuan cushilla sintiringapaca ¿imatata rurashpa catina capanchi?

¹² Taita Diosman quimirichun ayudaj cosascunata rurashpa catipashunchi. Ñucanchicunaca Jehová Diosman quimirichun ayudaj cosascunatami rurashpa catina capanchi. Pensaripashunchi: Sano, ali micunacunata micushpa, seguido ejerciciota rurashpa, suficienteta puñushpaca ñucanchillatami ali sintiripanchi. Shina cuendallatami Bibliata cada punlla liishpa, predicashpa, reuniongunapa prepararishpa, reuniongunaman rishpa y reuniongunapi comentashpaca ñucanchillata ali sintiripashun. Chai cosascunata rurashpami desanimachij cosascunapi pensarinapa randica, ali cosascunapi pensarishpa ashtahuan cushilla sintiripashun (Rom. 12:​11, 12).

13, 14. Jehová Diosman quimirichun ayudaj cosascunata ruranaca ¿imashinata huaquin huauquipanicunataca ayudashca?

¹³ Juan huauquipa ejemplota ricupashun. Paica cazadomi can y quimsa huatata charij huahuagutapashmi charin. Paica 39 huatacunatalla charishpami cáncer unguita charishcata yachaj chayarca. Callaripica manllaihuan, preocupadomi carca. Huauquiguca nircami: “Cáncer unguita charishcata yachashpaca nimamanda na crita usharcanichu” nircami. Tucui tiempo ama llaquilla sintirichunga ¿imata Juandaca ayudarca? Huauquiguca ninmi: “Shaijushca sintirishpapash cada semana ñuca familiahuan tandanajuicunaman ringapaj, predicacionman llujshingapaj y adoración en familiata rurangapami esforzarircani. Chai cosascunataca difícil cajpipashmi rurangapaj esforzarircani” ninmi. Shinallata huauquiguca ninmi: “Nali noticiata chasquishpa callaripi llaquilla sintirishpapash, Jehová Dios juyajpi, fuerzata cujpimi tranquilo sintiririn. Jehová Diosca ñucata ayudashcashnallatami quiquindapash ayudapanga” ninmi.

¹⁴ Párrafo 11​pi parlashca Eliza paniguca cashnami nin: “Reuniongunaman rishpa, estudio personalta rurashpaca Jehová Dios ñucata uyashcata, ñucata ninanda juyashcatami ashtahuan ashtahuan segura capani. Jehová Dios ñucata uyajta, ñucata ninanda juyajta yachashpaca cushillami sintiripani” ninmi. África llactamanda shuj superintendenteca paita y paipa huarmi Dianata ima ayudashcata parlashpami cashna nin: “Aunque desanimado cashpapash, Jehová Diosta mañashpa, Bibliata estudiashpa, reuniongunaman rishpa y predicashpami catipanchi. Chaimi Jehová Diosca ñucanchicunataca ashtahuan cushilla cachun siempre ayudajushca. Desanimado sintirinajushpaca Jehová Dios ñucanchita ayudanata, ñucanchita bendicianata yaringapami esforzaripanchi. Jehová Dios imashina ayudanata, imashinata bendicianataca na yachapanchichu. Shinapash Jehová Dios ñucanchita ayudanata, bendicianataca seguromi capanchi” ninmi.

15. Desanimachij pensamientocunata mishangapaca ¿imatata rurai ushapanchi? Shuj ejemplomanda parlapai.

¹⁵ Desanimado sintichij pensamientocunahuan catishpaca shuj cosascunatapashmi ruraita ushapanchi. Shuj ejemplopi pensaripashunchi. Huashata nanachinajushcanchiman. Cada punlla purijpica huasha nanaica talvez ashaguta bajaringami. Pero huashata imamanda nanajushcata yachangapaca, ashtahuan informaciondami mascana capanchi o doctorpamanmi rina capanchi. Shina cuendallata, desanimado sintichij pensamientocunata imamanda charishcata yachangapaj o chai pensamientocunata imashina mishanata yachangapaca, Bibliapi o ñucanchi publicaciongunapimi informaciongunata mascaita ushapanchi. Shinallata ali consejocunata cushpa ayudaj huauquihuan o paniguhuanmi parlaita ushapanchi. Chai cosascunata rurashca jahuapash shuj cosascunatapashmi ruraita ushapanchi.

16. Desanimachij pensamientocunata charishcata cuenta japingapaca ¿imatata rurai ushapanchi? (Salmo 139:​1-4, 23, 24).

¹⁶ Imatapacha minishtijushcata intindingapaj ayudahuai nishpami Jehová Diostaca mañana capanchi. Rey Davidca Jehová Dios paita ali rijsijtaca alimi yacharca. Chaimandami rey Davidca imamanda llaquilla sintirijushcata yachangapaca ‘ñuca yuyaicunatapash imasha cajta rijsichihuayari’ nishpa Jehová Diostaca mañarca (Salmo 139:​1-4, 23, 24​ta liipangui). Ñucanchicunapashmi desanimachij pensamientocunata imamanda charishcata intindingapaj y chai pensamientocunata imashina mishanata yachangapaca, Jehová Diosta ayudahuai nishpa mañaita ushapanchi. Shinallata cashna nishpapashmi pensarita ushapanchi: “¿Imamandapachata preocupado sintirini? ¿Ima situacionmandata siempre desanimado sintirini? ¿Desanimachij pensamientocunata rechazanapa randica chai pensamientocunapichu cutin cutin pensarijuni? Ñuca situacionbi ayudachunga ¿ima temacunatata ñucanchi publicaciongunapica mascaita ushani?” nishpa.

17. Cushilla sintiringapaca ¿ima temacunatata yachajuita ushapanchi? (Fototapash ricupangui).

¹⁷ Ñucanchi situacionbi ayudaj temacunatami estudiaita ushapanchi. Huaquinbi huaquinbica, Jehová Diospa cualidadcunamandami yachajuita ushapanchi. Por ejemplo, apóstol Pabloca Jehová Dios paipa Churipa causaita cushcapi pensarishpami animarirca. Shinallata Jehová Dios perdonaj cashcapi pensarishpapashmi animarirca. Ñucanchicunapash apóstol Pabloshnallatami ñucanchi situacionbi minishtishca temacunata estudiaita ushapanchi. Por ejemplo, jw.org paginapica Jehová Dios llaquij Dios cashcata, perdonaj cashcata y amor lealta charishcatami yachajuita ushapanchi. Ñucanchita ayudana publicaciongunatami shuj listata rurashpa anotana capanchi. Y chai listataca maipi ñapash tarinalla pushtupimi churaita ushapanchi. Shinami desanimachij pensamientocuna shamujpica chai temacunata cutin yachajuita ushapanchi. Shinallata, ñucanchi causaipi imashina pactachinatapashmi pensarita ushapanchi (Filip. 4:8).

18. Huaquin huauquipanicunaca ¿ima temacunamandata yachajushca?

¹⁸ Párrafo 11​pi parlashca Eliza paniguca, Job runagupa causaimandami yachajurca. Eliza paniguca ninmi: “Ñucaca shuj shuj problemacunata charimandami Jobpa causaimanda yachajurcani. Jobca ashtaca problemacunata charimandami desanimado carca. Imamanda sufrijushcata na yachashpapash, Jobca Jehová Dios ayudanapimi confiarca” ninmi (Job 42:​1-6). Párrafo 14​pi parlashca Diana paniguca cashnami nin: “Ñuca cusaguhuanga Acerquémonos a Jehová libropimi Jehovapa cualidadcunamanda yachajunajupanchi. Paipa ejemplota catichun ayudajushcamandaca Jehová Diostaca ninandami agradicipanchi. Pandarishcacunamanda desanimado sintirinajushpaca, ñucanchicuna ali personacuna cachun Jehová Dios ñucanchita yachachijushcata y ayudajushcatami pensaripanchi. Shinami Jehová Dioshuan ashtahuan ali amigocuna tucupashcanchi” nin (Is. 64:8).

JEHOVÁ DIOS AYUDANATA, BENDICIANATACA SEGUROMI CAITA USHAPANCHI

19. Huaquinbica ¿imashinata sintiripanchi? Shinapash ¿imatata seguro caita ushapanchi?

¹⁹ Cai temapi yachajushca tucuilla yuyaicunata pactachishpapash, apóstol Pabloshnami huaquinbica llaquilla o desanimado sintirishun. Shinapash Jehová Diospa ayudahuanga, desanimado sintichij pensamientocunataca mishaita ushapashunmi. Aunque huaquinbi desanimado sintirishpapash, Jehová Diospa amigo caimanda y Jehová Diosta shuj limpio concienciahuan sirvita ushaimandami ashtahuan cushilla cangapaj razonda charipanchi.

20. ¿Imatata rurashpa catina capanchi?

²⁰ Shinaca ñucanchi punda nali rurashcacunamanda, shuj problemacunamanda o imperfectocuna caimanda, desanimachij pensamientocunata charishpaca, chai pensamientocunata mishangapami esforzarina capanchi. Desanimachij pensamientocunata charijpica Jehová Diosmi tranquilo sintirichun ayudanga (Sal. 143:10). Paraíso alpagupi cashpaca, desanimachij pensamientocunataca ñana charipashunllu. Chaipa randica cushilla sintichij pensamientocunatalla charishpami, Jehová Diostaca cushijushpa sirvipashun.