¿Salvaringapaca “Señor Jesuspi” crinallachu suficiente can?

Bibliapica caitami yachachin

Cristianocunaca Jesuspimi crin. Jesusca tucui gentecunapa pecadocunamandami huañurca ninmi (1 Pedro 3:18). Pero salvaringapaca, na solo ñucanchita salvangapaj shamuj Jesuspillachu crina capanchi. Aya demoniocunapashmi Jesús Taita Dios Churi cashcataca crin. Pero paicunaca na salvaringachu. Sino tucuchi tucungami (Lucas 4:41; Judas 6).

• Salvaringapaca ¿imatata rurana cani?

• Pecadorcunapa oracionda rurashpaca ¿salvarishachu?

• Pecadorcunapa oracionga ¿imashinata tiai callarirca?

Salvaringapaca ¿imatata rurana cani?

• Ñucanchi pecadocunamanda Jesús paipa causaita cushcatami crina capangui (Hechos 16:30, 31; 1 Juan 2:2). Shina nishpaca, Jesús ciertopacha tiashcata y Jesusmanda Biblia tucui imata nijtapash crinami capanchi.

• Biblia imata ciertopacha yachachijtami yachajuna capangui (2 Timoteo 3:15). Bibliapi nishcashnaca, apóstol Pablo y Silasca carcelta cuidaj runagutaca cashnami nirca: “Quiquindapash, quiquinba huasipi causajcunatapash Taita Dios salvachunga Señor Jesuspimi crina capanguichi” nirca. Shina nishca jipami paicunaca “Jehováa Diospa shimitaca” yachachi callarirca (Hechos 16:31, 32). Shinaca carcelta cuidaj runagu Jesuspi cringapaca, Taita Diospa shimipi minishtirishca yachachishcacunatami primeroca yachajuna carca. Taita Diospa shimipi imata nijujtami cabaltapacha yachajuna carca (1 Timoteo 2:3, 4).

• Arrepintirinami capangui (Hechos 3:19). Shinallata, imapash nali cosascunata rurashcamanda, pensashcamandaca llaquirishpami arripintirina capanchi. Ñucanchipa rijsicunaca, ñucanchicuna arripintirishcata, Taita Dios nalicachishpa ricuj cosascunata ladoman saquishcatami ricuna can (Hechos 26:20).

• Bautizarinami capangui (Mateo 28:19). Jesusca, paipa discipulocuna tucungapaj munashpaca, bautizarinami canguichi nircami. Apóstol Pablo predicashca carcelta cuidaj runaguca bautizarircami (Hechos 16:33). Apóstol Pedropash ashtaca gentecunamanmi Jesusmanda yachachirca. Chaimi gentecunaca bautizarirca. Bibliapica ‘Pedro imata nishcata aliguman chasquishca gentecunaca bautizarircami’ ninmi (Hechos 2:40, 41).

• Jesustaca cazunami capangui (Hebreos 5:9). Jesuspa discipulocunaca, Jesús tucui imata mandashcata cazushpami causan (Mateo 28:20). Na solo uyaitallachu uyan, sino imata mandashcataca pactachishpami causan (Santiago 1:22).

• Ultimocamanmi aguantana capangui (Marcos 13:13). Salvaringapaca Jesuspa discipulocunaca ‘aguantanami’ can (Hebreos 10:36). Por ejemplo, apóstol Pabloca, cristiano tucushca punllamanda huañungacamanmi Jesús imata yachachishcataca pactachishpa causarca. Taita Diostapash cazushpa paimanda na caruyashpami causarca (1 Corintios 9:27).

Pecadorcunapa oracionda rurashpaca ¿salvarishachu?

Huaquin religiongunapi gentecunaca, pecadorcunapa oracionda y salvaringapaj oraciondaca de memoriami yachajun. Chai oraciongunapica, paicuna pecadorcuna cashcata y Jesús paicunapa pecadocunamanda huañushcataca crinimi nishpami rezanata yachan. Shinallata Jesustapash ñuca shunguman yaicui, ñuca causaiman shamui nishpami rezanata yachan. Pero Bibliapica, pecadorcunapa oración tiajtaca na ninllu. Chashna oraciongunata cutin cutin repetishpa rezanatapash na ninllu.

Huaquin gentecunaca, pecadorcunapa oracionda cutin cutin repetishpaca, para siempremi salvarisha yanmi. Pero chai oracionda rurashpalla salvaritaca na usharinllu. Juchayu gentecuna caimandaca, siempremi imagupipash pandarinajunchilla (1 Juan 1:8). Chaimi Jesusca paipa discipulocunataca, pecadocunamanda perdonahuai nishpaca cutin cutinmi mañana canguichi nishpa yachachirca (Lucas 11:2, 4). Huaquin cristianocunaca salvarina esperanzata charishpapash, Jehová Diosta sirvinata saquimandami salvarina esperanzataca chingachirca (Hebreos 6:4-6; 2 Pedro 2:20, 21).

Pecadorcunapa oracionga ¿imashinata tiai callarirca?

Historiadorcunaca chai oración imashina tiai callarishcataca na seguro canllu. Huaquingunaca Reforma protestante religionguna tiai callarishca tiempopimi chai oracionda rurana costumbreta gentecunaca japirca ninmi. Cutin shujcunaca, 1.800, 1.900 huatacunapimi chai oracionga tiai callarirca ninmi. Ima horapacha chai oración tiai callarishca cajpipash, Bibliapica chai oracionda ruranami canguichi nishpaca na yachachijunllu.