Diabloca ¿maipita causan?

Bibliapica caitami yachachin

Diablo o Satanasca ñucanchishna shuj planetapica na causanllu. Shuj espiritual pushtupimi can. Porque paica na ricui ushanalla espiritumi can. Callari dibujopi ricunshnaca Diabloca nali gentecunata llaquichishpa infiernopica na causanllu.

“Jahua pachapi jatun macanajui”

Diabloca shuj tiempotaca jahua cielopimi causajurca. Shinallata shuj angelcunandimi Taita Diospa ñaupapipash ricurita usharca (Job 1:6). Shinapash Bibliapa profeciapi nishcashnaca “jahua pachapi jatun macanajui” tiajpimi Satanasca jahua pachamanda “cai alpaman shitai” tucuna carca (Revelación 12:7-9). Shinaca Bibliapi nishcashnaca cai guerraca ñami tiashca. Cai mundopi ashtaca llaquicuna tiajta ricushpami jahua pachapi jatun macanajui tiashcataca seguro caita ushanchi. Chaimi cunanbica Diabloca cai mundota mandajun.

Diablo cai mundota mandajushpapash ¿cai planetapa shuj pushtupichu causajun? Bibliapica punda tiempopi tiashca Pérgamo llactamanda parlashpaca Apóstol Juanga ‘Satanás tiajujtapash ricujuni’ nirca (Revelación 2:13). Shinapash Satanás Pérgamo llactapi causajushcataca na ningapaj munajunllu. Chaipa randica chai llactapi tiashca religiongunapa mapa nali ruraicunamandami parlajun yarin. Shinaca Diabloca ñucanchishna shuj planetapica na causajunllu. Bibliapi nishcashnaca Diabloca cai mundotallami mandajun. Paica cai pachapi ‘tiajuj tucui llactacunatallami’ mandajun (Lucas 4:5, 6).