Testigo de Jehovacunaca paicunapa huaquin crishcacunata ¿imashpata cambiashca?

Ñucanchi crishcacunaca Bibliamandami japishca can. Chaimandami Bibliamanda ashtahuan intindishpa ñucanchi huaquin crishcacunata cambiashcanchi.a

Bibliaca caitami nin. Proverbios 4:18: “Ashtahuangarin imatapash cashcatapacha rurashpa causajcunapaj ñanga, yurajlla punllayamujuj michashnami. Ashtahuan ashtahuan punllayamushpa, alipacha punllayanshnami”. Imashina indi llujshishpa asha asha punllayachin, shinallatami Taita Diospash paita sirvijcunamanga Bibliamanda asha asha intindichishpa, yachachishpa catishca (1 Pedro 1:10-12). Bibliapica “tucurimui punllacunapica” shina pasanatami ña villashca carca (Daniel 12:4).

Shinaca ima cambiocuna tiajpipash na preocuparinachu, llaquiyanachu canchi. Punda Taita Diosta sirvijcunapash huaquinbica panda yuyaicunata, crishcacunatami charirca. Chaimi paicunapash huaquin cambiocunata rurana tucurca.

• Moisesca 40 huatacuna huashaman Taita Dios nara mandajpillatami israelitacunataca salvangapa munarca (Hechos 7:23-25, 30, 35).

• Apostolcunapash Jesús Mesías shina huañunata, causarinata profecía nishcataca na ali intindircachu (Isaías 53:8-12; Mateo 16:21-23).

• Punda huaquin Jesusta catijcunapashmi, “Jehová Diospa punlla” ima horapacha shamunataca nali intindirca (2 Tesalonicenses 2:1, 2).

Chaimi Taita Diostaca punda paita sirvijcunatapash asha asha intindichishpa ayudarca. Ñucanchipashmi cunan tiempocunapi shina ayudashpa catichun mañanchi (Santiago 1:5).