Shuj jovenga, ishcai noviocuna shayanajujta ricushpa, ishcai jovenguna celularta ricunajujta ricushpa y shuj jovengu paihuan coquetiajujpimi tentacionbi can

JOVENGUNAPA TAPUICUNA

Tentaciongunapi ama urmangapaca ¿imatata rurai ushapangui?

Apóstol Pabloca “alita rurangapaj munajpica, nalita rurana munairami ñucapica tian” nircami (Romanos 7:21). ¿Ima horapash chashna sintirishcanguichu? Shina cajpica, cai temami nalita rurana tentacionbi ama urmachun ayudanga.

Caitami yachana capangui

Shujcuna atichijpimi huaquinbica tentaciongunapi urmanchi. Bibliapica “nali gentecunahuan llevarishpaca alita ruranajushcatapashmi cunganguichi” ninmi (1 Corintios 15:33). Huaquinbica compañerocuna atichinajujpi o internetpi ashtaca gentecuna nalicunata ruranajujta ricujpimi, quiquinba shungumanga nalita ruraicuna munaicuna shamun o paicunashna nalicunata rurai callaringui (Éxodo 23:2).

Jeremy shuti jovenga ninmi: “Shuj gentecuna ñucanchita alicachishpa ricuchun o paicunahuan llevarinamandallami huaquinbica paicuna imata ruranajujta ruranchi” ninmi.

Caipi yuyapai: Si shujcuna ñucanchita alicachishca ricuchun munanchica ¿tentaciongunamanda jarcaritaca usharingacha? (Proverbios 29:25).

¿Imatata yachajupanchi? Compañerocuna imata ninajujpipash alita ruranataca na saquinachu capangui.

Caitami rurai ushangui

Quiquinba creenciacuna ali cajtaca seguromi cana cangui. Na seguro cajpica, shujcunaca muñecotashnami quiquindaca caiman chaiman cuyuchinga. Ama shina pasachunga, Biblia ima nijtarapashmi rurana cangui. Bibliapica, “tucui cosascuna cabal cajta o na cabal cajtaca aligutami ricuna capanguichi” ninmi (1 Tesalonicenses 5:21). Quiquinba creenciacuna imamanda ali cajtaca seguromi cana capangui. Porque chaimi na cazuna tentacionguna shamujpipash quiquinba creenciacunataca na saquishpa, cazushpa catingapaj munapangui.

Caipi yuyapai: ¿Imamandata Taita Dios mandashcashna causashpaca alimi causasha nishpa pensapangui?

Kimberly shuti jovenguca ninmi: “Ñuca imata yachajushcata cazuimanda tentaciongunapi na urmajpica, shujcunaca ashtahuanmi respetahuan” ninmi.

Bibliapica Danielpa alipacha ejemplomandami parlan. Daniel joven cashpaca, “paipa shungupica” Taita Diospa leycunata cazuna munaitami charirca (Daniel 1:8).

Shuj jovendami cabiacunahuan huatashpa muñecotashna cuyuchinajun — Si quiquinba creenciacuna ali cashcata na seguro cajpica, shujcunaca muñecotashnami quiquindaca caiman chaiman cuyuchinga.

Ima debilidadcunata charishcataca yachanami cangui. Bibliapica ‘jovenguna charishca munaicunamandami’ parlan. Chai munaicunaca joven cashca tiempopimi ashtahuan fuertetapacha shamun (2 Timoteo 2:22). Jovenguna charishca munaicuna nishpaca, na solo relaciones sexualesta charina munaimandallachu parlajun. Sino shujcunahuan ali llevarina munaicunamanda o narapash listo cashpallata libre cana munaicunamandami parlajun.

Caipi yuyapai: Bibliapica, ‘cada unomi paicunapa propio munaicunata ninanda alicachimanda tentai tucun’ ninmi (Santiago 1:14). Quiquinga ¿imata rurana tentaciondata charipashcangui?

Sylvia shuti jovenguca ninmi: “Cada unomi honradamente ima tentacionda charishcata pensarina canchi. Chai jipaca, informaciondami mascana canchi y tentacionbi ama urmangapaj ali ideacunatapash anotanami canchi. Shinami, cutinba chai tentación ricurijpica, controlaringapaj imata rurana cashcata yachai usharin” ninmi.

Bibliapica Davidpa alipacha ejemplomandami parlan. Huaquinbica gentecuna imata nishcata o pai imata munashcatami Davidca rurarca. Pero Davidca, ña shuj viaje pandarishpaca, cutinga ña ama pandaringapaj, mejorangapami esforzarirca. Jehová Diostaca “Taita Dioslla, ñucapica ima mapapash illaj shunguta rurahuayari. Aligutalla ruraj espirituta, ñucapica cutin churahuayari” nishpami mañarca (Salmo 51:10).

Quiquinmi imata ruranataca decidina cangui. Bibliapica, “cangunata nalita rurajpipash, cangunaca alitami rurana capanguichi” ninmi (Romanos 12:21). Shinaca, tentacionbi urmanata o na urmanataca quiquinmi decidina cangui. Quiquinmi alita ruranataca decidi ushapangui.

Caipi yuyapai: Nalita rurana tentacionguna shamujpipash ali rurangapaca, ¿imatata rurai ushapangui?

Sophiaca ninmi: “Primeroca imashina sintirinatami pensarini. Tentacionbi urmashpaca ¿alicha sintirisha? nishpami pensarini. Shuj ratogutaca talvez alimi sintirisha. Pero jipamanga ashtahuan peormi sintirisha nishpami pensarini. Shinaca chai tentacionbi urmashpaca nima provechota na llujchinichu nishpami pensarinata yachani” ninmi.

Bibliapica Pablopa alipacha ejemplomandami parlan. Pabloca nali munaicunata charishpapash controlarircami. Paica ñuca cuerpotaca esclavotashnami cazuchini nircami (1 Corintios 9:27).

¿Imatata yachajupanchi? Tentacionbi urmanata o na urmanataca quiquinmi decidita ushangui.

Ama cungapanguichu, tentaciongunaca asha ratotallami paran. 20 añosta charij Melissaca ninmi: “Chaira viñajushpaca, jatun tentaciongunatami charircani. Pero cunanbica chai tentaciongunaca ñana ñucapica jatungunachu ricurin. Chaita yarishpami pensarini, cunanbi ricurishca tentaciongunaca, jipacunamanga ñana importantecunachu canga. Ima punllaca, cunan punllacunata yarishpami antsicarin chai tentacionbica na urmarcani nishpa pensarisha” ninmi.

Jovengunaca ¿imatata nin?

Olivia shuti jovenguca ninmi: “Imapash decisionda japishpa y chai decisionda pactachingapaj decidida canaca alipachami can, tentaciongunapi ama urmachunmi ayudahuashca. Por ejemplo, si imatapash na rurashachu nishpa decidishpaca, ñuca decisiondaca maimandami pactachini, na cambianichu, ni shujcuna imata ninajujpipash, chaicuna ñucata afectachunga na saquinichu” ninmi.

Jared shuti jovenga ninmi: “Jovengunataca jacu fiestacunaman nishpa, o fiestacunapi tragota ufiachun, drogacunata chupachun o relaciones sexualesta charichunmi atichin. Shuj jovenguna shina atichinajujpica, ñuca taitamamamanmi parlanata yachani. Paicunami ayudahuan. Ashtahuangarin, lugarlla cashca ratocunapipash ocupado canatami yachani. Ocupado canami nalicunata rurana tentaciongunapi ama urmachun ayudahuan” ninmi.

Mayan shuti jovenguca ninmi: “Huaquin cosascunaca shujcunapaca alimi ricurin. Pero ñucapa nalimi ricurin. Chai casocunapimi tentacionmanda caruyanaca difícil can. Chai tentaciongunapi ama urmangapaca, ñucanchi creenciacuna ali cashcatami seguro cana capanchi. Seguro cangapaca, tiempota llujchina y experienciami minishtirin” ninmi.

Julian shuti jovenga ninmi: “Tentaciongunamanda parlashpaca ñucanchillatami honrado cana capanchi. Internet paginacunapimi nali, pinganai fotocunata ricurinata yachan. Chai ratocunapi imata ruranataca ña decidishcallami cana canchi. Tentacionbi ama urmangapaca, ñami shuj planda pensarishcalla cana canchi” ninmi.