BIBLIAPA ALIGUTA INTINDICHISHCA TEXTOCUNA
Proverbios 16:3 | “Can imatalla ruranatapash, Mandaj Diospaj maquipi mingangui”.
“Can imatalla ruranatapash, Mandaj Diospaj maquipi mingangui. Chashnami, can imata yarijushcapash ali llujshinga” (Proverbios 16:3, Diospaj Shimi. Biblia en Quichua de Imbabura [DS]).
“Pon en manos del SEÑOR todas tus obras, y tus proyectos se cumplirán” (Proverbios 16:3, Nueva Versión Internacional).
Proverbios 16:3pica ¿imatata ningapaj munan?
Cai textopi nishcashnaca, Taita Diospi tucui shunguhuan confiashpa, pai mandashcata catishpa imatapash rurajpica, tucui ali llujshinatami intindichin.
“Can imatalla ruranatapash, Mandaj Diospaj maquipi mingangui”. Jehováa Diosta sirvijcunaca, humildecuna caimandami ima decisionda nara japishpallata paipa ayudata mascan (Santiago 1:5). ¿Imashpa shina ruran? Gentecunaca paicunapa causaipi ima pasanataca na jarcai o controlai ushanllu (Eclesiastés 9:11; Santiago 4:13-15). Ashtahuanbash, ali yachaita na charimandami caita o chaitami rurasha nishpapash na pactachi ushan. Chaimandami Diosta sirvijcunaca imata rurana cashpapash, Jehová Diospi confiashpa paipa maqui saquishpa ali yuyaita charishcata ricuchin. Chaipaca Jehová Diostami imata ruranata yachangapaj ayudai nishpa oracionda ruran. Shinallata, Bibliapi yachachishcashnami imatapash ruran (Proverbios 3:5, 6; 2 Timoteo 3:16, 17).
“Can imatalla ruranatapash, Mandaj Diospajb maquipi mingangui” nishpaca, “tucui ñucanchi ruraicunata Mandaj Diospa maquipi saquina cashcatami” nisha nin. Shuj libropi nishcashnaca, “ñucanchicuna shuj llashaj quipita apajushpa, Taita Dios apachun mingajushcashnami can. Taita Diospaca imapash na llashaj canllu”. Humilde cashpa, Taita Diospi confiashpaca pai ayudanata, pai ricurianatami seguro cashun (Salmo 37:5; 55:22).
“Can imatalla ruranatapash” nishpaca, gentecunapa tucui ruraicuna Taita Diospa ñaupapi ali cashcata o tucui ima rurashcata bendicianataca na nijunllu. Ñucanchi ruraicunata Jehová Dios bendiciachunga, imata rurashpapash pai munashcashna, pai mandashcashnami rurana canchi (Salmo 127:1; 1 Juan 5:14). Shinapash Taita Diosca paita na cazujpica na bendicianllu. Chaipa randica, nali gentecunapa ruraicunataca tucuchingami (Salmo 146:9, TNM-S). Pero Jehová Diosca paita cazujcunata, shinallata Bibliapi pai imata mandashcata respetajcunataca ayudanmi (Salmo 37:23).
“Chashnami, can imata yarijushcapash ali llujshinga”. Huaquin Bibliacunapica ninmi: “Can imata yarijushcapash chashnapachami ruraringa o pactaringa” ninmi. Escrituras Hebreas o Antiguo Testamentopica rurana shimitaca, imatapash rurai callaringapaca cimientota churanami minishtirin nishpami traducishca. Shinallata ashtaca viajecunataca Taita Diospa alipacha rurashcacunamanda parlangapami chashna traducishca (Proverbios 3:19; Jeremías 10:12). Imashinami ricunchi, Taita Diosca paipa ñaupapi alita rurangapaj munajcunapa ruraicunataca tucui ali llujshichunmi ayudanga. Shinallata cushilla, tranquilo causachunbashmi ayudanga (Salmo 20:4; Proverbios 12:3).
Proverbios 16:3pa contexto
Cai textotaca rey Salomonmi escribirca. Paimi Proverbios libropa mayor partetaca escribirca. Taita Dios ali yachaita cushcamandami, Salomonga ashtaca ashtaca proverbios nishca yuyaicunata escribi usharca (1 Reyes 4:29, 32; 10:23, 24).
Capítulo 16pica, rey Salomonga Taita Diospa sabiduriatami alabai callarin. Shinallata orgulloso gentecunata Jehová Dios nimamanda na ricunayachishcatami nin (Proverbios 16:1-5). Ashtahuanbash chai capitulopica humilde cashpalla, Taita Diospa ayudata mascashpalla sabiduriata chari ushashcata, cushilla, ali causai ushashcatami cai librota liijcunamanga cutin cutin aliguta intindichin. Chai yuyaitaca tucui Proverbios libropipashmi yachachin (Proverbios 16:3, 6-8, 18-23). Chai alipacha yuyaica tucui Bibliapimi ashtaca viajecunata repitirin (Salmo 1:1-3; Isaías 26:3; Jeremías 17:7, 8; 1 Juan 3:22).
Proverbios librota ashtahuan aliguta intindingapaca cai videota ricupai.
a Bibliapica Taita Diospa shutica Jehovami can ninmi (Salmo 83:18, TNM-S). “¿Pita can Jehová?” temata ricupangui.
b Biblia de Estudio de la NVI (Nueva Versión Internacional) Bibliapa callari paginacunapica, “SEÑOR” shimitami Taita Diospa shutipa randica churashca. Señor shimica versalitas nishca letracunapi can. Bibliata liij gentecunata chai panda yuyai imamanda pandachijta yachangapaca, “Isaías 42:8 | Yo soy el SEÑOR” temata ricupangui.