Shuj jarihuan, shuj huarmihuan pacta puñunamanda taitamamacuna huahuacunahuan parlapaichi

Bibliapa tapuicuna

Bibliapica ninmi shuj jarihuan, shuj huarmihuan pacta puñunamandaca taitamamacunami huahuacunamanga yachachina can nishpa. Ashtaca taitamamacunatami cai cati consejocuna ayudashca:

• Ama pinganayachishpa parlapaichi. Bibliapica shuj jarihuan, shuj huarmihuan pacta puñunamanda, huarmipa o jaripa cuerpopi charishca partecunamandaca na pacashpami parlan. Punda tiempopi israelitacunataca Taita Diosllatami ‘huahuacunamanbash’ caicunamanda yachachichun mandarca (Deuteronomio 31:12; Levítico 15:​2, 16-​19). Shinaca taitamamacunaca, cusahuarmi pacta puñunamanda, huarmipa o jaripa cuerpopi charishca partecunamanda parlajushpaca na pinganayachishpami shutipi parlanalla can. Shina parlajpica huahuacunaca chaicunamanda parlanaca na pinganayai cashcatami intindinga.

• Asha asha yachachipangui. Taitamamacunaca, huahuacuna ña viñajpira shuj jarihuan, shuj huarmihuan pacta puñunamanda parlanapa randica uchillamandapachami asha asha chaicunamanda intindichina capanguichi (1 Corintios 13:11).

• Huasipi ali yachachipangui. Huaquinbica escuelapi o colegiopica shuj jarihuan, shuj huarmihuan pacta puñunamandami huahuacunamanga yachachin. Shinapash Bibliapica ninmi, taitamamacunami huahuacunapa cuerpopi charishca partecuna imapa cashcata paicunamanga yachachina can nishpa. Shinallata cusahuarmi pacta puñuna ima cashcata huahuacunaman intindichina cashcatami nin. Shina yachachishpapash taitamamacunaca cusahuarmi pacta puñunamanda Biblia imata nijtami huahuacunamanga yachachina can (Proverbios 5:​1-​23).

• Huahuacunata ali uyapanguichi. Shuj jarihuan, shuj huarmihuan pacta puñunamanda huahuacuna tapujpica taitamamacunaca na manllarinachu capanguichi. Taitamamacunaca imamandata chaicunatara tapujungui ninapa randica ‘aliguta uyajcuna, aliguta yarishpara rimajcunami’ cana capanguichi (Santiago 1:​19).

Nali gentecunamanda huahuacunata cuidapaichi

• Imashina cuidanata yachajupangui. Huahuacunata huaglichingapaj, violangapaj munaj gentecuna imashina umachijtami taitamamacunaca yachana capanguichi (Proverbios 18:15; Lo que los jóvenes preguntan. Respuestas prácticas volumen 1 nishca libropi, capítulo 32ta ricupangui).

• Huahuacunata ali cuidapaichi. Huahuacunata pimanbash mingagrijushpaca chai gentetaca ali alimi rijsina capanguichi. Shinallata taitamamacunaca huahuacuna “imata rurachumbash” na yangata saquinallachu capanguichi (Proverbios 29:15).

• Na tucuicunata cazuna cashcata yachachipanguichi. Huahuacunaca taitamamacunata cazunami can (Colosenses 3:​20). Shinapash mayor gentecunata siempremi cazuna cangui nishpa huahuacunaman taitamamacuna yachachijpica, tal vez nali gentecunaca huahuacunata huaglichishpa o violashpa llaquichita ushan. Jesusta ali catij taitamamacunaca huahuacunamanga cashnami nita ushan: “Taita Dios na munashca ruraicunata rurachun pipash nijpica, ama ruranguichu” nishpa (Hechos 5:​29).

• Imashina cuidarinata yachachipanguichi. Pipash huaglichingapaj o violangapaj munajpi huahuacuna imata ruranatami taitamamacunaca yachachina capanguichi. Istacuna o nali gentecuna tacaringapaj munajpi huahuacuna cashna nichun yachachi ushapanguichi: “Ama tacarihuaichu, ñuca taitamamacunaman villashami” nishpa. Shinallata chaimanda ucha richunmi yachachina capanguichi. Taitamacunaca nali gentecunamanda huahuacuna imashina cuidarinatami huasipillata imata ruranata ricuchina capanguichi. Shinami huahuacunaca paicunallata cuidarita ushanga. Huahuacuna caicunata ama cungachunmi taitamamacunaca “cutin cutin” yarichina capanguichi (Deuteronomio 6:7).