Diostaca ¿imashinata adorana canchi?

1. Diosta ali adoranataca ¿pita yachachi ushan?

CASI tucui iglesiacunami Taita Diosmandaca cabalta yachachinchi nin. Shinapash chaica na ciertochu can. Taita Dios pi cashcata, paita imashina adoranamandaca shuj shuj yuyaicunatami iglesiacunaca yachachin. Shinaca Diosta ali adoranataca ¿imashinata yachajui ushanchi? Jehová Diosmi paita ali adorachun yachachin.

2. Diosta ali adoranataca ¿imashinata yachajui ushapangui?

² Jehová Diosca paita ali adoranata yachajuchunga Bibliatami cushca. Chaimandami Bibliata yachajuna canchi. Jehová Diosca pai yachachishcacunata yachajushpa ali causachunmi ayudanga. Paica ñucanchi ali cachunmi munan (Isaías 48:17).

3. Taita Diosca ¿imata rurachunda munan?

³ Huaquingunaca ninmi, Diosca tucui iglesiacunatami chasquin nishpa. Chaica na ciertochu can. Jesusca nircami: “Ñucataca: ‘Apunchi Jesús, Apunchi Jesús’ nishpami purinajun. Shina ninajushpapash, na tucuicuna jahua pachapi Dios mandajuj llactaman yaicui ushangachu. Ashtahuangarin jahua pachapi tiajuj ñuca Taita munashcata pactachijcunallami, yaicui ushanga” nishpa. Shinaca, Diospa munai ima cajta yachajushpa ñucanchi causaipi pactachinami canchi. Diospa munaita na pactachijcunataca, Jesusca ‘nalita ruraj’ gentecunahuanmi chimbapurarca (Mateo 7:21-23).

4. Taita Diospa munaita ruranamandaca ¿imatata Jesusca nirca?

⁴ Jesusca, Diospa munaita rurai callarijpi ima llaquicuna tianatapashmi villarca. Chaimandami nirca: “Quichiji pungutami, yaicuna canguichi. Chingaita chingachun pushajuj punguca anchomi, ñambash anchomi. Chaitaca, ashtaca gentecunami yaicushpa purinajun. Ashtahuangarin causaita causangapaj yaicuna punguca quichijimi, ñambash quichijimi. Chai ñandaca, huaquingunallami tarin” nishpa (Mateo 7:13, 14). Diosta ali adorashpa causana ñanga quichijimi, chai ñanmi para siempre causaiman apan. Cutin Diosta nali adorashpa causana ñanga anchomi, chai ñanga huañuimanmi apan. Shinapash Jehová Diosca nipi na huañuchun munanllu. Chaimandami tucuicuna paimanda yachajuchun shuyajun (2 Pedro 3:9, NM).

DIOSTACA ¿IMASHINATA ADORANA CANCHI?

5. Diosta ali adorajcunataca ¿imashinata rijsi ushapangui?

⁵ Jesusca nircami, Diosta ali adorajcunataca rijsinallami can nishpa. Diosta picuna ali adorajujta yachangapaca gentecuna imata crijta, imata rurajtami ricuna canchi. Shinallata nircami, gentecunataca “ima cajpipash grano fucunshna cajta ricushpami rijsinguichi.” ‘Tucui ali yurapica, juyaillami fucun’ nishpa (Mateo 7:16, 17). Cai shimicunaca, Diosta ali adorajcuna jucha illaj cashcataca na nijunllu. Shinapash, Taita Diosta ali adorajcunaca tucuita ali rurangapami esforzarin. Cai temapica, Taita Diosta ali adorajcunata imashina rijsinatami yachajushun.

6, 7. a) Taita Diosta ali adorangapaca ¿imatata rurana capanchi? b) Jesuspa ejemplomandaca ¿imatata yachajunchi?

⁶ Bibliapi nishca shinami Diostaca adorana canchi. Bibliapica ninmi: ‘Dios escribichishca Shimicunaca, paillata yarichishpa escribishcami. Chai Shimicunaca yachachingapaj, nalicuna ali purichun rimangapaj, shinallata imatapash cashcatapacha rurashpa causanata yachachingapami ali. Chaita yachajushpaca. Taita Diospajta ruraj runaca, ima pandatapash na rurashpa, tucui imata cashpapash aliguta rurangapami alichirishca canga’ nishpa (2 Timoteo 3:16, 17). Apóstol Pablopash Jesusta catijcunamanga nircami: “Ñucanchi villajpica, runacunapaj munaimanda villashcataca, na chasquircanguichica. Ashtahuangarin Taita Diospacha villachijuj Shimi cajpimi, aliguta uyashpa crircanguichi” nishpa (1 Tesalonicenses 2:13). Diosta ali adorangapaca gentecunapa yanga yuyaicunata, costumbrecunata catishpaca na adoranachu canchi. Bibliapi nishca shinami Taita Diostaca adorana canchi.

⁷ Jesús yachachishcacunaca tucuimi Diospa Shimimanda yuyaicunalla carca (Juan 17:17, liipangui). Paica siempremi Diospaj Shimimanda villachin carca (Mateo 4:4, 7, 10). Cunanbipash Jesuspa ejemplota catishpami Diosta sirvijcunaca siempre Bibliamanda yachachin.

8. Jehovata adoranamandaca ¿imatata Jesusca yachachirca?

⁸ Jehová Diostallami adorana canchi. Bibliapica ninmi: ‘Gentecuna yachachun canba shuti Jehová cajta, canllami tucui Alpamanda Ashtahuan Jatun Dios cangui’ nishpa (Salmo 83:18, NM). Jesusca gentecuna Taita Diosmanda cabalta yachajuchunmi munarca. Chaimandami Diospa shutita yachachirca (Juan 17:6, liipangui). Shinallata Jesusca nircami: “Canda Mandaj Taita Diostalla [“Jehovatalla”, NM] ninanda alicachingui. Paitalla servishpa causangui” nishpa (Mateo 4:10). Chaimandami Jesuspa ejemplota catishpa testigo de Jehovacuna canchi, Jehovatalla adoranchi, paipa shutimanda villachinchi, pai imata ruragrijujtapash gentecunaman yachachinchi.

9, 10. ¿Imashinata caishujmanda, chaishujmanda juyaita ricuchinchi?

⁹ Caishujmanda, chaishujmanda juyaita charishunchi. Jesusca paipa catijcunataca caishujmanda, chaishujmanda juyaita charichunmi yachachirca (Juan 13:35, liipangui). Shinaca shuj shuj llactacunamanda cashpa, ima costumbrecunata charishpa, pobre o charij cashpapash ñucanchi huauquipanicunahuanga tucui shunguhuanmi juyaita charina canchi (Colosenses 3:14). Chaimandami, guerracunaman na rinchi, na huañuchinchi. Bibliapica ninmi: ‘Maijanlla Taita Diospa huahuacuna cajta, Diablopa huahuacuna cajtapash rijsinallami: Maijambash imatapash cashcatapacha na rurajcuna, crijcunata na juyashpa causajcunapash, napacha Taita Diospa huahuacunachu’ nishpa. Shinallata ninmi: “Caishujhuan chaishujhuan juyarishpami causana canchi.” ‘Caín runashnaca na causanachu canchi. Paica, Diablopa cashpami paipa huauquita huañuchishca’ nishpa (1 Juan 3:10-12; 4:20, 21).

¹⁰ Ñucanchi tiempota, fuerzata, charishca cosascunatapash ñucanchipura animaringapaj shujcunata ayudangapami ocupanchi (Hebreos 10:24, 25). Shinaca, “ima aliguta maijanman rurai ushashpapash, tucuicunaman rurashunchi” (Gálatas 6:10).

11. ¿Ñucanchitaca pita quishpichi ushan?

¹¹ Jesuslla quishpichi ushashcatami crinchi. Bibliapica ninmi: “Quishpirinaca, maijan runapipash na ashtahuan tianllu. Ñucanchi quishpiri ushachun, cai pachapi runacunaman cushca, ashtahuan shuj shutica na tianllu” nishpa (Hechos 4:12). Capítulo 5​pica ñami yachajurcanchi, Jehová Diosca cazujcunata quishpichingapaca Jesuspa causaita cushcata (Mateo 20:28). Jehová Diosca paipa Churitami cai Alpata mandachun agllashca. Para siempre causangapaj munashpaca Bibliapi nishca shinami Jesusta cazuna canchi (Juan 3:36, liipangui).

12. ¿Imamandata politicapica na chapurinchi?

¹² Politicapica na chapurinchichu. Jesús cai Alpapi cashpaca politicapica na chapurircachu. Roma llactata mandaj Pilatotaca Jesusca nircami: “Ñuca mandana llactaca, na cai pachapi tiajunllu” nishpa (Juan 18:36, liipangui). Jesuspa ejemplota catishpami, maipi causashpapash politicapica na chapurinchi. Shinami Jehová Diospa Reinotalla tucui shunguhuan apoyashcata ricuchinchi. Shinapash Bibliapi mandanmi, “jatun mandajcunataca” cazunami canguichi nishpa (Romanos 13:1). Ñucanchi causaj llactacunapi leycunata cazushpapash, chai leycuna Jehovapa mandashcata pactachichun jarcajpica, apostolcuna shinami ñucanchicunapash ninchi: “Taita Diostami, runacunatapash yali ashtahuan cazunapacha canchi” nishpa (Hechos 5:29; Marcos 12:17).

13. ¿Imatata Diospa Reinomandaca villachinchi?

¹³ Diospa Reino llaquicunata tucuchinatami crinchi. Jesusca nircami: “Taita Dios mandajujmanda cai ali villaitaca” cai pachapi tiaj tucui llactacunapimi villachinajunga nishpa (Mateo 24:14, liipangui). Diospa Reino imatalla ruranataca, cai Alpapi gobiernocunaca nimata na rurai ushashcachu (Salmo 146:3). Jesusca Diospa Reinomanda mañachun yachachishpaca nircami: “Can mandanaca, ucha chayamuchunmi munanchi. Imashnami jahua pachapica can munashcashna ruranajun, chashnallata cai pachapipash, can munashcashna ruranajushpami ali canman” nishpa (Mateo 6:10). Bibliapica ninmi, Diospa Reinoca tucui cai alpapi gobiernocunata tucuchishpami, ‘Diosca causaita causaicaman mandajungalla’ nishpa (Daniel 2:44).

14. ¿Picunata Taita Diostaca ali adoran?

¹⁴ Cai yuyaicunata yachajushca jipaca tapuripai. ¿Picunata Bibliapi nishca shina yachachin? ¿Picunata Diospa shutimanda yachachin? ¿Picunata caishujmanda, chaishujmanda juyaita ricuchin? ¿Picunata Dios paipa Churita cachamushpa gentecunata salvashcata crin? ¿Picunata politicapi na chapurin? ¿Picunata Diospa Reinomi llaquicunata tucuchinga nishpa villachin? Testigo de Jehovacunallami caicunataca pactachin (Isaías 43:10-12).

¿IMATATA QUIQUINGA RURAGRINGUI?

15. Taita Diosta ali adorangapaca ¿imatata rurana capanchi?

¹⁵ Taita Diospi crishcataca shimihuanllaca na ninachu canchi. Ayacunapash Dios tiashcataca crinmi. Shinapash paicunaca na cazunllu (Santiago 2:19). Ñucanchi adoracionda Dios chasquichunga pai tiashcata crishpallaca na quedanachu canchi. Diospa mandashcacunata cazunami canchi.

16. ¿Imamandata panda religionda saquina capanchi?

¹⁶ Taita Diosta ali adorajushcata ricuchingapaca panda religionmandami llujshina canchi. Profeta Isaiasca nircami: “Chaimanda llujshichi. Imapash mapataca, na tacarinachu canguichi” nishpa (Isaías 52:11; 2 Corintios 6:17). Shinaca, panda religionba yachachishcacunatapash saquinami canchi.

17, 18. Babilonia jatun puebloca ¿imata can? ¿Imamandata chai pueblomandaca uchalla Ilujshina capanchi?

¹⁷ Maijan religión cashpapash Bibliapi nishca shina Diosta ali adoranata na yachachijcunaca panda religionmi can. Panda religiongunataca Bibliapica ninmi: ‘Babilonia jatun pueblo’ nishpa (Apocalipsis 17:5). ¿Imamandata Babilonia jatun pueblo nin? Noepa punllacunapi ushashcata tamiashca jipaca, Babilonia jatun pueblopimi panda religiongunapa yachachishcacuna tiai callarirca. Chai panda yachachishcacunaca cai Alpapi tucui ladocunamanmi chayarca. Babiloniamanda gentecunaca, quimsa dioscuna shujlla nishpami chai dioscunata adoran carca. Cunanbica casi tucui religiongunami trinidadpi crin. Shinapash Bibliapica shujlla Dios tiajta, Diospa shuti Jehová cajtami yachachin. Shinallata Jesuspash Diospa Churi cajtami yachachin (Juan 17:3). Babilonia llactapi causaj gentecunaca shuj almata charinchi nishpami crin carca. Chaimandami huañushca jipaca alma causashpa catinrami, infiernopi sufringapami rin nin carca. Shinapash chai crishcacunaca na ciertochu can. (Página 213-215​pi nota 14, 17, 18​tapash ricupangui.)

¹⁸ Panda religionguna tucuchi tucunataca Diosca ñami villashca (Apocalipsis 18:8). Shinaca panda religionmanda uchalla llujshina cashcataca ¿intindinguichu? Jehová Diosca tiempo tiajpillata quiquinbash panda religionmanda uchalla llujshichunmi munan (Apocalipsis 18:4).

19. Jehovata sirvi callarijpica ¿imashinata cuidanga?

¹⁹ Panda religionmanda llujshishpa Jehovata sirvi callarijpica huaquin familiacuna, amigocunaca na ali yachaimandami imacunatapash yangata nishpa llaquichinga. Shinapash Jehová Diosca ima horapash na saquingachu. Jehovata sirvi callarishpaca mundo enteropi ashtaca ashtaca tucui shunguhuan juyaj huauquipanicunahuanmi familia shina tucungui. Shinallata cai Alpa shuj juyailla paraíso tucujpi para siempre causana esperanzatapashmi charingui (Marcos 10:28-30). Quiquinba huaquin amigocuna, familiacunaca Jehovata sirvi callarijpi nalicachishca cashpapash jipamanga Bibliata yachajungapaj munangapashchari.

20. ¿Imamandata Diostaca pai munashcashna adorana canchi?

²⁰ Ñallami Taita Diosca tucui nalicunata tucuchishpa, cai Alpata paipa Reino mandachun churanga (2 Pedro 3:9, 13). Chai punllacunaca juyailla punllacunami canga. Chaipica tucuicunami Jehová munashcashna paitalla adoranajunga. Chaimandami, uchalla Jehová munashcashna paita adorangapaj agllana cangui.