LECCIÓN 81
Jesusca ashtaca gentecunaman yachachirca
Jesusca 12 apostolcunata agllashca jipaca, urcumanda urai shamushpami ashtaca gentecuna tandanajushca pushtuman rirca. Chai gentecunaca Galilea, Judea, Tiro, Sidón, Siria y Jordán yacu manñacunapi tiaj shuj llactacunamandapashmi shamushca carca. Paicunaca nanaicunahuan caj gentecunata, demoniocuna llaquichijpi sufrijuj gentecunatapashmi apanajurca. Chaipimi Jesusca tucuicunata jambirca. Shinallata chai urcu laderapimi gentecunaman Taita Diospa ali amigo cangapaj imatalla rurana cashcatapash yachachijurca. Ñucanchipash Jehová Diosta minishtishcata, paita tucui shunguhuan juyanataca alimi yachajuna canchi. Shinapash shuj gentecunata na juyashpaca, Jehová Diostaca na juyaita ushanchichu. Ñucanchicunaca tucuicunahuan ali cashpa, imatapash ali rurajcunami cana canchi. Ñucanchita na ricunayachij gentecunahuanbashmi shinallata cana canchi.
Jesusca: Cangunapa cumbacunata juyashpapash, cangunata fiñajcunatapash tucui shunguhuanmi perdonana canguichi. Pipash cangunahuan culirajpica uchallami perdonahuai nina canguichi. Shinallata “imashinami cangunata tratachun munanguichi, shinallatami cangunapash shujcunataca tratana canguichi” nirca.
Jesusca ñucanchi ima charishca cosascunamandapashmi ali consejocunata curca. Jesusca: Charij charij canapa randica Jehová Dioshuan ali canami ashtahuan importante can. Culquitaca shuacuna shuaita ushanmi, shinapash Jehová Dioshuan ali amigo canataca pipash na shuaita ushanllu. Chaimandami micunamanda, imatapash ufianamanda, ima ropata churajunamandaca na yapata preocuparijunachu cangui. Pajarogucunata ricui, Jehová Diosca paicuna micunaguta charichunbashmi cuidariajun. Yapata preocuparishpapash ashtahuan causaitaca na ushashunllu. Caitaca ama cunganguichu, Jehová Diosca can imata minishtijushcatapash alimi yachan nirca.
Jesús yachachishcatashnaca gentecunaca nunca na uyashcarcachu. Chai tiempopi religionda ñaupaman pushajcunaca Jesús yachachishcashnaca na yachachinllu carca. ¿Imamandata Jesusca shina alipacha yachachin carca? Paica Jehová Dios yachachishcatami yachachijurca.
“Ñuca yugota cangunapa rigrapi churanshna ñuca imata yachachishcata catichi. Shinami cangunaca fangalla sintiringuichi. Ñucaca ali ali, humildemi cani” (Mateo 11:29).