Huaquin gentecunaca yanmi, Taita Diosca gentecuna paita rijsichunga na munanllu, caru carupimi can, millai millaimi can nishpa. Shinaca paicuna imata nijta ricupashun:

• Italia llactamanda Marcoca ninmi: “Taita Diosta mañashpapash Taita Diosca caru carupimi can, na rijsita ushashachu, gentecunataca na llaquinllu yanmi carcani” nishpa.

• Guatemala llactamanda Rosaca ninmi: “Taita Diosta sirvingapami munarcani. Shinapash Taita Diosca caru carupimi can, gentecunata castigangapallami munan. Taita Dios ali cajtaca na crircanichu” nishpa.

• Canadá llactamanda Raimundaca ninmi: “Huahua cashpaca yanmi carcani, Taita Diosca ñucanchita castigangapallami ricuriajun nishpa. Cutin jipamanga yanmi carcani, Taita Diosca gobiernocuna cuenda gentecunataca na llaquishpa mandaimandami mandan” nishpa.

Huata 500manda casi huata 1500​camanga ashtaca gentecunami Taita Diosta manllashpa Taita Diosta na mañan carian. Will Durant shuti historiadorpash ninmi: “Juchayu gentecunaca maitashi jahua cielopi tiajuj, millai Taita Diostaca mañaita ushanchiman” nishpa.

Ashtaca gentecunaca ¿imamandata shina yan? Bibliata yachajushpaca ¿Taita Diosta aliguta rijsita ushanchimanllu?

GENTECUNACA NINMI:

“Cutin cutin parlashpapash Taita Dios shutita charijtaca na yachanchichu. Shutita charijpipash ima shuti cajtaca na yachanchichu” nishpa (Profesor David Cunningham, libro Theological Studies).

BIBLIACA NINMI:

Taita Diosca nircami: “Ñucaca, Mandaj Dios shutimi cani” nishpa (Isaías 42:​8)a. Hebreo shimipi Jehová nishpaca “Ñucaca, ñuca munashca shinami tucusha” nijunmi (Génesis 2:​4, NM).

Jehová Diosca paipa shutita rijsichunmi munan. Bibliapica ninmi: ‘Paipa shutita cayaichi. Pai imatalla rurashcataca tucui gentecunaman villaichi. Paipa shuti jatunyachi tucushca cajta yarichi’ nishpa (Isaías 12:​4).

Jesusca paipa yachajujcunapash Taita Diospa shutita rijsichunmi munarca. Shuj punllaca Taita Diosta mañarcami, ‘ñucata juyanshna paicunapash juyarichunmi canba shutitaca rijsichircani’ nishpa (Juan 17:26).

¿IMAMANDATA TAITA DIOSMANDA CABALTA YACHANA CANCHI?

Religiongunamanda yachachij profesor Walter Lowrie shutica nircami: ‘Taita Diospa shutita na rijsijcunaca Taita Diostaca na rijsinllu, na juyanllu’ nishpa.

Victorca ninmi, ‘cada semana iglesiaman rishpapash Taita Diosmandaca na imatapash yachanllu cariani. Taita Diospa shuti Jehová cajta yachashpami Taita Diosta aliguta rijsishpa paipa amigo cuenda sintirircani’ nishpa.

Bibliapica ninmi: ‘Canba shutita rijsishpa causajcunataca napacha jichurcanguichu’ nishpa (Salmo 9:​10). Taita Diosca paipa shutipi parlajpica bendicianmi. Bibliapica ninmi: ‘Maijan cashpapash Jatun Diospa shutipi mañashpaca quishpiringami’ nishpa (Romanos 10:13).

GENTECUNACA NINMI:

“Taita Diosllatami Taita can, Churi can, Espíritu Santo can. Shujlla Taita Dios cashpapash imashina quimsa cajtaca na yachanchichu” nishpa (El Diccionario Akal crítico de Teología). Shuj diccionariopash ninmi: “Católico, ortodoxo, anglicano, protestante nishca religiongunapash Trinidadpimi crin” nishpa (Diccionario abreviado del cristianismo).

BIBLIACA NINMI:

Diospa Churi Jesusca nircami: ‘Ñuca Taitapaman rigrinimi. Ñuca Taitaca, ñucata yali ushaitami charin’ nishpa (Juan 14:28). Ashtahuangarin nircami: ‘Ñuca Taitaca cangunapapash Taitami. Ñuca Taita Diosca cangunapapash Taita Diosmi. Paipamanmi vichai rini’ nishpa (Juan 20:17). Jesusca nunca na nircachu, ñuca Taitashnallatami cani nishpa.

Espíritu santoca na Taita Dioschu can. Jesusta punda catijcunaca ‘Diospa jucha illaj espiritutami’ chasquirca. Jehová Diospash nircami: ‘Tucuicunamanmi espirituta talinshna cachamusha’ nishpa (Hechos 2:​1-4, 17). Espíritu santoca Taita Diospa podermi can.

¿IMAMANDATA TAITA DIOSMANDA CABALTA YACHANA CANCHI?

Católico biblistacunaca ninmi: “Taita, Churi, espirítu santo shujlla cajta ricushpami Trinidad tiajtaca crinchiman. Shinapash Trinidadmanda aliguta intinditaca na ushanchimanllu” nishpa. Shinaca pitapash nali rijsishpaca ¿imashinata juyaita ushanchiman? Trinidadpi crijcunaca Taita Diosta juyaitaca na ushanllu.

Callari temapi Marcoca ninmi, Trinidadpi crimandami Taita Diosman quimiritaca na usharcani. Taita Diosca paimanda yachajuchun, paipaman quimirichunga na munanllu yanmi carcani nishpa. Shinapash Bibliaca ninmi, Taita Diosca ‘ñucanchimandaca na carupi canllu’ nishpa (Hechos 17:27). Taita Diosca paita rijsichunmi munan. Jesusca nircami: ‘Ñucanchica paita rijsishpami mañanchi’ nishpa (Juan 4:22).

Marcoca ninbashmi: “Taita Dios na quimsa cashcata o na shuj Trinidad cashcata yachashpami Taita Diosman quimiritaca usharcani” nishpa. Shinaca Jehová Diosta rijsinalla cashcata yachashpaca paipaman quimirita ushanchimi. Bibliaca ninmi: ‘Na juyashpa causajca Taita Diostaca na rijsinllu. Taita Diosca ninandapacha juyajmi’ can nishpa (1 Juan 4:​8).

GENTECUNACA NINMI:

“Juchata rurajcunapa almaca huañushcandimi unai unaicaman rupachi tucungapaj rin” nishpa (Catecismo de la Iglesia Católica). Huaquin religiongunapipash yachachinmi, infiernoman rishpami gentecunaca Taita Diosmanda separarin nishpa.

BIBLIACA NINMI:

“Huañushcacunaca imatapash na yachanllu” nishpa (Eclesiastés 9:​5). Shinaca huañushcacuna na imatapash yachashpaca ¿imashinashi unai unaicaman rupanajunga?

Bibliaca ‘azufrehuan rupajuj nina cuchamandami’ parlan (Apocalipsis 20:​10). Shinapash chai pushtumanda parlashpaca Bibliaca ninmi: ‘Chaiman shitai tucunaca jipa huañuimi’ can nishpa (Apocalipsis 20:14; 21:8). Shinaca “azufrehuan rupajuj nina” nishpaca na ninapi rupana pushtumandachu parlajun, jipa huañui tianamandami parlajun. Jipa huañui nishpaca na causaringachu nijunmi.

¿IMAMANDATA TAITA DIOSMANDA CABALTA YACHANA CANCHI?

Taita Diosca millai millai can yashpami gentecunaca Taita Diosmanda caruyan. México llactamanda Rocioca ninmi: “Ñucamanga uchilamandapachami yachachirca infierno tianmi nishpa. Chaimandami Taita Dios ali cajtaca na crircani. Taita Diosca millai millai can yashpami causarcani” nishpa.

Shinapash Bibliata yachajushpaca Rocioca nircami: “Taita Diosmanda cabalta yachajushpaca shuj llashaj quipita ñuca huashamanda uriajuchijpishnami fangalla sintirircani. Shinallata Taita Dios ñucanchita juyajta, ñucanchipash paita juyanalla cashcatami yachajurcani. Cunanbica ñucanchi taita cuenda ñucanchita juyashpa aliguta causachun munashcatami yachajushcani” nishpa (Isaías 41:13).

Ashtacacunaca infiernota manllaimandallami imapash religiongunata catinajun. Shinapash Taita Diosca paita manllaimanda sirvichunga na munanllu. Jesusca nircami: ‘Canba Jatun Taita Diostaca juyanmi’ cangui nishpa (Marcos 12:​29, 30). Ashtahuangarin, Taita Dios llaquij Dios cajta intindishpaca shamuj punllacunapipash gentecunata llaquinata crishunmi. Profeta Elihú cuendami ñucanchipash tucui shunguhuan confiashpa nina capanchi: “Nalita ruranaca, Tucui Ushaita Charij Diosmanda carupi cachun” nishpa (Job 34:​10).

Shuj punllaca Jehová Diosmanda Jerusalenbi yachachijushpami Jesusca chai punllacunapi yachachijcunataca panda yachachijcunami canguichi nishpa rimarca (Juan 8:​12-30). Chaimandami tapurina canchi, gentecunaca cabaltachu Taita Diosmandaca yachachinajun nishpa. Jesusca nircami: ‘Ñuca yachachishca shimicunata cazushpa catishpaca, ñucapa yachajujcunapachami canguichi. Na llullashpa villashcami, cangunataca cacharichinga’ nishpa (Juan 8:​31, 32).

‘Cazushpa catina’ nishpaca ima cierto cashcata ima na cierto cashcata ricuichi nijunmi. Shinaca imatapash Jehová Diosmanda yachachijpica tapuripaichi: “¿Cai yachachishcacunaca Jesuspa yachachishcacunahuan o Bibliapi yachachishcacunahuanga igualchu can? nishpa”. Apóstol Pablopa tiempopi gentecunashnallatami imatapash yachajushcandi cierto cashcata o llulla cashcataca Bibliapi ricuna canchi (Hechos 17:11).

Callari temapi Marco, Rosa, Raimundapash testigo de Jehovacunahuanmi Bibliata yachajui callarirca. Paicunaca ¿imatata nin?

Marcoca ninmi: “Ñucanchita yachachij Testigoca ñuca huarmi o ñuca imatapash tapujpica Bibliahuanmi contestan carian. Shinami asha asha Jehová Diosta juyai callarircanchi, aliguta causaitapash usharcanchi” nishpa.

Rosaca ninmi: “Bibliapica gentecunapa pensamientocunahuanllami Taita Diosmanda yachachingapaj munan yanmi carcani. Shinapash jipamanga aligutami Bibliataca intindi callarircani. Cunanbica Jehová Dios tiajta yachashpami paipi ashtahuan confiani” nishpa.

Raimundaca ninmi: “Taita Diostaca quiquinda rijsingapaj ayudahuai nishpami mañarcani. Chai jipallami ñuca cusahuanga Bibliata yachajui callarishpa Jehová Diosmanda cabalta yachajurcanchi. Taita Dios ali cashcata yachajuimandami ninanda cushijushpa causanajunchi” nishpa.

Bibliami Taita Diosmanda cabalta yachachishpa, Taita Diosca ali Diosmi can nin. Ashtahuangarin, Bibliapimi ‘Taita Dios imaguta ñucanchiman carashcata’ yachachin (1 Corintios 2:12). Shinaca Taita Diosmanda, pai imata ruranamanda, jipa punllacunapi imashina causanamanda quiquinllata yachajungapaj munashpaca www.pr418.com/es direccionman yaicushpa sección “Enseñanzas bíblicas > Preguntas sobre la Biblia” nishcata ricupangui. Testigo de Jehovacunahuan Bibliata yachajungapaj munashpapash Internetpi chai direccionman yaicunallami capangui. Bibliata yachajushpaca Taita Diosta juyai ushapanguimi.