Abrahanga na manllaj runagumi carca
Abrahanga paipa familiacuna y paipa sirvientecunapash Canaán llactaman ringapaj alistarinajujtami ricujun (Génesis 12:1-5). Paica shuj jatun responsabilidadtami charin tauca gentecunatami cuidana can. ¿Imashinata chai tucui gentecunataca na rijsishca llactapica mantininga? Granocunapash fucuj, yacupash y plantacunapash tiaj Ur llactapi paipa familiata cuidana ¿nacha ashtahuan fácil canman? Chai llactaman rinajujpi Abrahán huañujpi o imapash nanai japijpica ¿pishi paipa familiataca cuidanga? Abrahanga shinacunata pensarishpami preocupado cashcanga. Shinapash Jehovapa mandashcata cazuchun imapash jarcachunga na saquircachu. Abrahanga imatapash na manllaj runagumi carca.
¿IMATAPASH NA MANLLANACA IMATA CAN? Imatapash na manllaj personaca shinlli y decididomi can. Shinallata ima difícil situaciondapash chimbapuranllami. Ni cobarde, ni timidopash na canllu. Shinapash huaquinbica manllanmi. Pero manllajpipash Jehová Diosmi valorta charichun ayudan.
ABRAHANGA IMATAPASH NA MANLLASHCATACA ¿IMASHATA RICUCHIRCA? Abrahanga shuj gentecunamanda diferente cangapaj dispuestomi carca. Pai viñashca llactapi gentecunaca shuj shuj imagengunata y idolocunatami adoran carca. Shinapash Abrahanga, shujcuna imata nina cajpipash Jehovata cazushpami catirca. Chaimi paica “Jahua Cielopi” Jehová Diostalla adoranata decidirca (Génesis 14:21, 22).
Cosascunapi preocuparinapa randica Jehová Diosta adoranapimi ashtahuan preocuparirca. Abrahanga Ur llactapi tucui charishcacunata saquishpami Jehová Dios cuidanata confiashpa desiertopi causagrirca. Tiempo jipaca Ur llactapi imasha causashcataca yuyarishcangami. Shinapash paiman y paipa familiaman imata minishtishcata Jehová Dios caranataca nunca na dudarcachu. Abrahanbaca Jehová Diosca tucuita yali ashtahuan importantemi carca. Chaimandami na manllashpa tucuipi cazurca.
ABRAHANMANDACA ¿IMATATA YACHAJUPANCHI? Shuj gentecuna diferente cajpipash ñucanchicunaca na manllashpa Jehová Diosta cazungapami dispuesto cana canchi. Jehová Diospa lado tucujpica talvez amigocuna y familiacunapashmi ñucanchimanda preocuparishpa jarcangapaj munanga. Shina pasanatami Bibliapica nijun (Juan 15:20). Pero Jehovamanda yachajushcacuna cierto cashcata seguro caimandami ñucanchi crishcacunataca na manllashpa respetohuan difindinchi (1 Pedro 3:15).
Jehová Diosca paita sirvijcunataca ima minishtishcaguta carasha nishpami prometishca. Cai promesapi confiashpaca, ashtahuan cosascunata charinapi empeñarinapa randica Jehovata sirvinapimi ashtahuan empeñarishun (Mateo 6:33). Shuj familia imata rurashcata ricupashunchi.
Doug y Becky shuti cusahuarmica uchila ishcai huahuacunata charishpapash publicadorcuna minishtirijuj paismanmi sirvigringapaj munarca. Paicunaca Jehová Diosta mañashpa parlarishca jipami chaiman ringapaj tucuita alistai callarirca. Huauquiguca ninmi, “huahuacunandi chaiman rishpa ima pasanata na yachaimandami valorta minishtircanchi. Chaimandami Abrahanba y Sarapa ejemplota yachajurcanchi. Paicunaca Jehovapimi confiarca y Jehovaca nunca na saquircachu. Chaipi pensarinami ñucanchitaca ninanda ayudarca” ninmi.
Chai familiaca shuj paisman sirvigrishcamandaca ¿ima bendiciongunatata charirca? Doug shuti huauquiguca “achica bendiciongunatami charishcanchi” ninmi. Paica caitapashmi nin: “Cunanga ashtahuan sencillogutami causanchi. Chaimandami predicangapaj, parlaringapaj y huahuacunahuan pugllangapapash ashtahuan tiempota charinchi. Familia enteromi beneficiarishcanchi y cushillami causanajunchi”.
Na tucuicunachu chai familiashna ruraita ushanchi. Pero tucuicunallatami Abrahanba ejemplota catishpa Jehová Dios cuidanata confiashpa paita sirvinata en primer lugar churaita ushanchi. Shina rurashpami tucui shunguhuan “Jehová Diosmi ñucataca ayudahuanga. Ñucaca na manllashachu” nita ushashun (Hebreos 13:5, 6).
[Comentario]
Jehová Diosca manllaita mishachunmi ayudanga
[Recuadro/Imagen]
Jehovata ali sirvij huarmigu
Saraca shinlli feta charij jarihuanmi cazarashca carca. Paipash shinlli feta charij huarmi caimandami, Bibliapica quimsa viajeta paimandaca parlan carca. Chaimandami Jehovata ali sirvij huarmigucunapa shuj ali ejemplo can (Isaías 51:1, 2; Hebreos 11:11; 1 Pedro 3:3-6). Bibliapi Saramanda achica cosascunata na parlajpipash shuj ali huarmigu cashcatami yachapanchi.
Por ejemplo, Jehová Dios Abrahanda Ur llactamanda rinami cangui nijpica Saraca ¿imatashi pensashcanga? Talvez ¿maiman rinata y imamanda chaiman rina cashcata? Y imasha causanatapashmi pensashcanga. Shinallata amigocunata, familiarcunata cutinga ricushacha nishpapashmi llaquirishcanga. Chai cosascunamanda preocuparishpapash Jehovata cazujpi Jehovallata bendicianata confiaimandami ringapaj dispuesta carca (Hechos 7:2, 3).
Saraca Jehovata ali sirvishca jahuapash, Abrahanbapash shuj alipacha huarmigumi carca. Saraca, Abrahanba randi paira familiata mandanataca pensaitallapash na pensarcachu. Shinallata Abrahandaca ninandami respetarca y ima decisionda agllajpipash tucui shungumi apoyarca. Imashami ricupanchi Saraca ali cualidadcunata charimandami shuj alipacha huarmigu caita usharca (1 Pedro 3:1-6).
Sarapa ejemploca ¿cunanbipashchu cazada huarmicunataca ayudan? Más de 30 huatacunata cazarashca cushilla causajuj Jill shuti huarmiguca cashnami nin: “Sarapa ejemplota ricushpami imata pensashcata ñuca cusaguman nita ushashcata yachajushcani. Shinapash ñuca cusa familiata mandana cashcata y pai decidina cashcatapash yaipimi charini. Chaimandami pai imata decidijpipash paita tucuipi apoyangapaj esforzarini”.
Saramandaca ¿imatata ashtahuan yachajupanchi? Saraca juyala huarmigu cashpapash nunca na jariyarcachu (Génesis 12:10-13). Saraca humilde caimandami Abrahandaca siempre tucuipi apoyarca. Abrahán y Saraca humildecunami carca y randimanda juyarishpa, cuidarishpami causarca.