Ali villaigucunaca ¿imata can?

1. ¿Ima ali villaigucunatata Diosca charin?

Taita Diosca gentecunata juyaimandami cai Alpatapash tucui ima tiashcatapash rurarca. Gulpi gentecuna ali causaiguta charichunmi, Diosca llaquicunata ñalla tucuchinga. Jeremías 29:​11, liipangui.

Macanajuicunata, ungüicunata, huañuicunataca maijan gobiernopash na tucuchi ushashcachu. Shinapash ali villaigucunami tian, Diosca ñallami gobiernocunata tucuchishpa, paipa Churi cai Alpata mandachun churanga. Taita Diosta sirvijcunaca ima ungüitapash na charishpami cushilla causanajunga. Isaías 25:8; 33:​24; Daniel 2:​44, liipangui.

2. Ali villaigucunata yachanaca ¿imamandata minishtirin?

Alpapi llaquicuna ama tiachunga, nali gentecunatami Diosca tucuchina can (Sofonías 2:3). Chaitaca ¿ima horashi ruranga? Llaquicuna tianataca Bibliapimi ñaupa punllacunapillata villarca. Chai llaquicunata ricushpami, nalicunata Dios ñalla tucuchinata yachanchi. 2 Timoteo 3:​1-5, liipangui.

3. ¿Imatata rurana canchi?

Bibliatami yachajuna canchi. Bibliapica juyaj taitashnami Diosca ñucanchita consejan. Cunanbipash jipa punllacunapipash imashina cushilla causanatami yachachin. Bibliamanda quiquin yachajujujpica na tucuicuna cushijungachu. Shinapash yachajunata na saquishpaca bendiciongunatami chasquingui. Proverbios 29:25; Apocalipsis 14:​6, 7, liipangui.