Ashtahuan aliguta villachishpa catishunchi
1. ¿Picunapa ejemplota ashtahuan aliguta villachichun ayudan?
1 Jesusta catijcunaca ashtahuan aligutami villachishpa catina canchi. Chaimandami punda tiempocunapica imashina ashtahuan ali villachishpa catinata Jesusca paipa catijcunaman yachachirca (Luc. 9:1-5; 10:1-11). Áquila, paipa huarmi Priscilapash Apolos ashtahuan aliguta villachichun munashpami paitaca ayudarca (Hech. 18:24-26). Apóstol Pablopa tiempopi Timoteopash ñami unaillata villachishpa purijurca. Shinapash apóstol Pabloca Timoteotaca animarcami, ashtahuan aliguta yachachijta ‘tucuicuna ricuchunmi’ esforzarishpa catina cangui nishpa (1 Tim. 4:13-15). Ñucanchicunapash esclavocunashna caimandami mashna tiempota villachishpa purinajushpapash ashtahuan aliguta villachingapaj esforzarina canchi.
2. Shuj publicadorcunashna aliguta villachingapaca ¿imatata rurana capanchi?
2 Shujcunata ricushpa yachajushunchi. Ashtahuan aliguta villachingapaca shujcuna imata rurajujtami ali ricuna canchi (Prov. 27:17). Chaimandami villachingapaj llujshishpaca ñucanchi cumba imata nijujtaca aliguta uyajuna canchi. Shinallata, ali villachij publicadorcunata ayudahuai nishpa, paicuna imata nijta ali uyashunchi (Prov. 1:5). Bibliata yachachina, revisitacunata rurana o villachina shinlli cajpica superintendente de grupo huauquihuan o ali villachinata yachaj huauquihuanmi parlaita ushanchi. Ashtahuangarin, Jehová Diospa espíritu santo ayudajpimi ashtahuan aliguta villachi ushanchi. Chaimandami Jehová Diostaca paipa espíritu santota cuchun mañana canchi (Luc. 11:13).
3. Na ayudahuai nijpita consejajpica ¿imatata rurana capanchi?
3 Na ayudahuai nijpita pipash ñucanchita consejajpica na nanarinachu canchi (Ecl. 7:9). Ashtahuangarin, Apolos cuendami humilde cashcata ricuchishpa consejajpica agradicishpa paicuna ima nishcata catina canchi. Shina rurashpami ali yuyaihuan purijushcata ricuchinchi (Prov. 12:15).
4. ¿Imamandata ashtahuan aliguta villachishpa catina capanchi?
4 Ashtahuan aliguta villachishpaca Jehová Diosta alicachichunmi ayudanajunchi. Paipa catijcuna ashtahuan aliguta villachichun munashpami Jesusca shuj chimbapuraita churarca. Chai chimbapuraipimi Jesusca yachachirca, ñucaca uvas yurashnami cani, ungidocunaca granocunata fucuchij malquicunashnami can nishpa. Ashtahuangarin, Jesús nishca shinaca chai malquicunatami ‘ashtahuan fucuchun’ nishpa paipa Taitaca cuchun (Juan 15:2). Imashinami uvas pamba dueñoca uvascuna ushashcata fucuchun munan, shinallatami Jehová Diosca ‘ñucanchi shimihuan’ ashtahuan aliguta tucuicunaman villachichun munan (Heb. 13:15). Ashtahuan aliguta villachijpica ¿imata pasanga? Jesusca nircami: “Aliguta fucujuj malquicunashna causajushpaca, ñuca Taitatami ninanda alicachinguichi” nishpa (Juan 15:8, Mushuj Testamento Quichua Imbabura).