LECCIÓN 4

Jesusca ¿pita can?

1. ¿Maimandata Jesusca shamurca?

1. Jesusmi paita Taitahuan cielopi can; 2. Josehuan, Mariahuanmi Jesús huahuagu cajpi marcarianajun; 3. Jesusmi huahuacunaman yachachijun — Jesushuan parlashpaca ¿imamandata gulpi gentecuna cushijun carca? (MATEO 11:29; MARCOS 10:13-16)

Alpaman nara shamushpaca shuj angel caimandami Jesusca jahua cielopi causajurca (Juan 8:23). Jehová Diosca Jesustami punda rurarca. Chaimandami Jesusca Diosta ayudarca tucui cosascunata rurachun. Diosllata Jesusta rurashca cajpimi ‘Diospa Churi’ nin (Mateo 16:16). Diospa munaita rurachun agllashcamandami ‘Cristo’ nishpapash rijsin. Proverbios 8:22, 23, 30; Colosenses 1:15, 16, liipangui.

2. Jesusca ¿imapata cai Alpaman shamurca?

Diosmi Jesustaca Alpaman cachamurca. Chaipaca María shuti huarmigupa vijsapimi Jesuspa causaita churarca. Chaimandami aichayu taitataca Jesusca na charirca (Lucas 1:30-35). Jesusca ¿imapata cai Alpaman shamurca? 1) Diosmanda yachachingapaj, 2) llaquicunata charishpapash Diospa munaita rurashpa catichun gentecunata yachachingapaj, 3) jucha illa causaita cushpa gentecunata salvangapaj. Mateo 20:28, liipangui.

3. ¿Imamandata salvachun minishtinchi?

Jehová Diosca gentecuna rucuyachun, huañuchunga na munarcachu. Diosca Adandaca nircami, na cazushpaca huañunguimi nishpa (Génesis 2:16, 17; 5:5). Bibliapi nishcashnaca Adán na cazujpimi juchaca cai Alpapi tiai “callarirca”. Chaimandami gulpi gentecuna juchayu nacirishpa Adanshna huañuna canchi. Shinapash Jehová Diosca nircami gentecunata juchamanda, huañuimanda salvangapaca na juchayu runami huañuna can nishpa. Romanos 5:12; 6:23, liipangui.

Juchamanda, huañuimandaca ¿pita salvai ushan? Huañushpaca cada unopa juchacunamandallami huañunchi. Shujcunapa juchacunataca na anchuchi ushanchichu. Salmo 49:7-9, liipangui.

4. ¿Imamandata Jesusca huañurca?

Jesusca shuj racu caspipimi llaquinaita huañujun, causarishca jahua cielopimi Rey shina mandajun

Jesusca na juchayu carcachu. Chaimandami pai huañushpaca gentecunapa juchacunamanda huañurca. Jehová Diosca paipa Churiguta huañuchun cachamushpami gentecunata ninanda juyashcata ricuchirca. Jesuspash gentecunata juyarcami. Chaimandami Diosta cazushpa gentecunata juchamanda, huañuimanda salvangapaj huañurca. Juan 3:16; Romanos 5:18, 19, liipangui.

¿Imamandata Jesusca huañurca? nishca videota ricupangui.

5. Cunanbica ¿imatata Jesusca rurajun?

Jesús huañujpica jahua cielopi causachunmi Diosca causachirca (Efesios 1:20). Cai Alpata mandachun ningacamanmi Jesusca paipa Taitapa ali ladopi shuyajurca (Hebreos 10:12, 13). Cunanbica Jesusca ñami jahua cielopi mandajun. Chai ali villaigucunatami paita catijcunaca muyundi Alpapi villanajun. Daniel 7:13, 14; Mateo 24:14, liipangui.

Ñallami Jesusca nali gentecunatapash llaquicunatapash tucuchinga. Jesús Alpapi cashpaca ungüihuan cajcunata janbirca, huañushcacunata causachirca, llaquilla cajcunatapash ayudarca. Shinami jipa punllacunapi tucui shunguhuan Diosta sirvijcunata ayudangapaj imata ruranata ricuchirca (Mateo 15:30, 31; Juan 5:28). Gentecuna Jesuspi feta charishpa, Jesusta cazushpaca cushijushpami paraíso Alpapi causanajunga. Salmo 37:9-11, liipangui.

Ashtahuan yachajungapaj munashpaca, ¿Imatata Bibliaca yachachin? libropi 4, 5 capitulocunata ricupangui.