LECCIÓN 8

Diosca ¿imamandata llaquicuna tiachun saquishca?

1. ¿Imashinata llaquicunaca tiai callarirca?

1. Adanga na micunachu cangui nishca frutatami ricujun; 2. Punda tiempopi llactacunata mandajcuna; 3. Jatun macanajuicuna — Gobiernocunaca gentecunapa llaquicunataca cunangaman na tucuchi ushashcachu

Diablo llullaimandami Alpapica llaquicuna tiai callarirca. Callaripica jucha illaj, ali angelmi carca (Juan 8:44). Diostalla adorana cajpipash, chai angelca paitapash adorachunmi munarca. Diabloca llullashpami Evata pandachirca Diosta ama cazuchun. Adanbashmi Diosta na cazurca. Chaimandami llaquipash huañuipash tiai callarirca. Génesis 3:1-6, 19, liipangui.

Diosta ama cazuichu nishpaca, Diabloca Dioslla mandana derechota charishcatami na valichijurca. Ashtaca gentecunapashmi Dioslla mandana derechota charishcata na valichishpa Diablopa lado tucushca. Shinami ricuchin ‘Diablo tucuicunata mandajujta’. Juan 14:30; 1 Juan 5:19, liipangui.

2. Diospa rurashcacunaca ¿imashinata can?

Diosca tucuitami ali rurarca. Angelcunapash gentecunapash Diosta tucuipi cazunallami carca (Deuteronomio 32:4, 5). Alita o nalita ruranata cada uno agllachunmi Diosca saquirca. Alita ruranata agllashpaca Diosta juyaimanda cazujushcatami ricuchinchi. Santiago 1:14, 15; 1 Juan 5:3, liipangui.

3. Diosca ¿imamandata llaquicuna tiachun saquishca?

Llaquicuna tiachun saquishpami Jehová Diosca ricuchishca, gobiernocuna Diospa ayudata na charishpaca, gentecuna cushilla cusachun na ayudai ushashcata (Eclesiastés 7:29; 8:9). Maijan gobiernopash guerracunata, shuhuacunata, ungüicunatapash na tucuchi ushashcachu. Jeremías 10:23; Romanos 9:17, liipangui.

Dios mandajpica cushijushpami causanajushun (Isaías 48:17, 18). Diosca ñallami gobiernocunata tucuchinga. Diospa Reinota apoyajcunallami cai Alpapica causanajunga (Isaías 11:9). Daniel 2:44, liipangui.

¿Imamandata Diosca llaquicuna tiachun saquishca? nishca videota ricupangui.

4. Llaquicunata Dios na ñapash tucuchishcamandaca ¿imatata ricuchi ushanchi?

Diabloca nircami, bendiciajujpillami gentecunaca Diosta sirvinajun nishpa. Llaquicunata Dios na ñapash tucuchijpimi, ñucanchi aliguta causashpaca Diablo llulla cajta ricuchinchi. Gobiernocunapa lado tucunapa randica, Diospa Reinota apoyajushcatami ricuchinchi. Job 1:8-12; Proverbios 27:11, liipangui.

5. Diosta apoyajushcataca ¿imashinata ricuchishun?

Bibliamandami yachajunajun — Alita ruranata agllashpaca Dios mandachun munashcatami ricuchinchi

Bibliapi yachachishcacunata pactachij religionda catishpa, Dios munashcashna adorashpami Diosta apoyajushcataca ricuchishun (Salmo 25:5). Ashtahuanbash Jesuspa ejemplota catishpami politicapipash guerrapipash na chapurishpa na Diablopa lado cashtaca ricuchishun. Juan 17:14, liipangui.

Diablomi gentecunata pandachijun nali, mapa cosascunata rurachun. Chaicunata ña na rurajpimi amigocuna, familiacunaca ñucanchimanda burlarin (1 Pedro 4:3, 4). Shina pasajpica Diosta ali sirvijcunahuanmi llevarina canchi. Llaquicunata charishpapash Diospa mandashcacunata cazushpami, Diablo llulla cajta ricuchishun. Proverbios 13:20; 1 Corintios 6:9, 10, liipangui.

Gentecunata Dios juyajta yachashpami llaquicunata tucuchinata crinchi. Shinami Diospa lado cashcata ricuchishpa cai Alpa paraíso tucujpica na huañushpa causanajushun. Juan 3:16, liipangui.

Ashtahuan yachajungapaj munashpaca, ¿Imatata Bibliaca yachachin? libropi capítulo 11ta ricupangui.