LECCIÓN 11
Diospa mandashcacunaca ¿imashinata ayudan?
1. ¿Imamandata Dios ayudachun minishtinchi?
Ñucanchiman causaita Dios cujta intindishpaca ¿imatata rurashun? (SALMO 36:9).
Taita Diosca alipacha yachajmi can. Ñucanchita juyaimandami ninanda preocuparin. Paimanda caruyachunga na munanllu (Jeremías 10:23). Imashinami huahuacunaca taitacuna ayudachun minishtin, shinallatami gentecunaca Dios ayudachun minishtinchi (Isaías 48:17, 18). Gentecunata ayudangapami Diosca paipa mandashcacunata cushca. 2 Timoteo 3:16, liipangui.
Diospa mandashcacunaca cunanllata aliguta causachun, jipa punllacunapipash bendiciongunata charichunmi ayudan. Ñucanchita Dios rurashcamandami pai ayudachun saquina canchi. Salmo 19:7, 11; Apocalipsis 4:11, liipangui.
2. Bibliaca ¿imashinata ñucanchita ayudan?
Bibliapi yachachishcacunaca ñucanchi causaipi imata rurachun Dios munashcatami intindichin. Cutin Bibliapi mandashcacunaca imata rurunata, imata na ruranatami nin (Deuteronomio 22:8). Imatapash rurangapaca Bibliapi yachachishcacuna imashina ayudajtami ali pensarina canchi (Proverbios 2:10-12). Bibliaca yachachinmi, Diosmi ñucanchiman causaita cun nishpa. Shinaca chaita intindishpami trabajopipash huasipipash o maiman rijushpapash ali cuidarishun. Hechos 17:28, liipangui.
3. ¿Maijan mandashcacunata ashtahuan importante can?
Jesusca ishcai mandashcacuna importante cajtami intindichirca. 1) Diosta rijsishpa, juyashpa, tucui shunguhuan sirvina. Ñucanchi causaipi imata agllagrijushpaca chai mandashcapirami pensarina canchi (Proverbios 3:6). Chaica ayudangami Diospa ñaupajpi ali ricurichun, cushilla para siempre causachunbash. Mateo 22:36-38, liipangui.
2) Gulpi gentecunahuan ali aparina (1 Corintios 13:4-7). Gulpicunahuan ali aparishpaca Diospa ejemplotami catinajushun. Diosca tucuicunatami igual tratan. Mateo 7:12; 22:39, 40, liipangui.
4. Diospa mandashcacunaca ¿imashinata ayudan?
Diospa mandashcacunaca familiapi cushilla causachunmi ayudan (Efesios 4:32; Colosenses 3:12, 14). Familiacuna seguro sintirichunmi Bibliapica nin, cazarashcacunaca huañui punllacamanmi igual causana can nishpa. Génesis 2:24, liipangui.
Diospa mandashcacunaca cushilla sintirichun, trabajota charichunbashmi ayudan. Trabajo pushtucunapica tucuita ali ruraj, honrado trabajadorcunatami alicachin (Proverbios 10:4, 26; Hebreos 13:18). Bibliaca yachachinmi, minishtirishca cosascunahuanlla cushijushpa, Diospa munaitara pactachishpa causachun. Mateo 6:24, 25; 1 Timoteo 6:8-10, liipangui.
Diospa mandashcacunaca ñucanchi causaipipashmi ayudan (Proverbios 14:30; 22:24, 25). Na machanachu nishcata cazushpaca, ungüicunatapash shuj llaquicunatapash na charishunllu (Romanos 13:13). Bibliaca na ninllu ashalla tragota ufianaca juchami can nishpa (Salmo 104:15; 1 Corintios 6:10). Diospa mandashcacunaca imata yajushcata, imashina causajushcata ricuchunmi ayudan (Salmo 119:97-100). Jesusta ali catijcunaca Diospa mandashcacuna ñucanchita ayudajujpillaca na cazunchichu. Jehová Diosta jatunyachingapami cazunchi. Mateo 5:14-16, liipangui.