¿Imashinata Diospa amigo caita ushanchi?

1. ¿Tucui mañashcacunatachu Diosca uyan?

Diosca munanmi gulpi gentecuna paita mañashpa paiman quimirichun (Salmo 65:2). Shinapash na tucuicunapa mañashcata uyanllu. Bibliapica ninmi, cusa paipa huarmita nali tratajpica paipa mañashcataca Diosca na uyanllu nishpa (1 Pedro 3:7). Israelitacuna cutin cutin nalicunata ruranajujpimi Diosca na uyarca. Shinapash juchata rurashcamanda tucui shunguhuan arripintirishpa mañajpica Diosca uyanmi. Isaías 1:​15; 55:7, liipangui.

¿Tucui mañaicunatachu Taita Diosca uyan? nishca videota ricupangui.

2. ¿Imashinata mañana canchi?

Jehová Diosta mañashpaca paita adorajushcatami ricuchinchi (Mateo 4:​10; 6:9). Jesusmi ñucanchi juchacunamanda huañurca. Chaimandami Jesuspa shutipi mañana canchi (Juan 14:6). Diosca na munanllu chaitallata chaitallata nishpa mañachun. Tucui shunguhuan mañachunmi munan. Mateo 6:7; Filipenses 4:​6, 7, liipangui.

Shungu ucupilla mañajpipash Diosca uyanmi (1 Samuel 1:​12, 13). Diosca munanmi llaquicunata charishpa, ña puñugrijushpa, tutamanda jatarijushpa, micugrijushpapash paita mañachun. Salmo 55:22; Mateo 15:​36, liipangui.

3. Ñucanchi tandanajuicunaca ¿imashinata ayudan?

Cunanbica ashtaca gentecunami Diosta na cazushpa, shuj ali causaita Dios apamunataca na crin. Chai gentecunapurapi causanajushpami Diosmanda caruyai ushanchi (2 Timoteo 3:​1, 4; 2 Pedro 3:​3, 13). Diosta sirvijpuracuna tandanajushpami randimanda animarinchi. Hebreos 10:​24, 25, liipangui.

Diosta juyajcunahuan tandanajushpaca Diosmanmi ashtahuan quimirishun. Testigo de Jehovacunapa tandanajuicunaca Diosta ali sirvijcunapa ejemplota catichunmi ayudan. Romanos 1:​11, 12, liipangui.

4. ¿Imashinata Diospa amigo caita ushanchi?

Diospa amigo cangapaca Bibliamanda yachajushpami Diospa rurashcacunapi, consejocunapi, imata pactachisha nishcacunapi yuyana canchi. Diosta mañashpa, yachajushcapi yuyashpaca ninanda juyaj, alipacha yachaj Dios cajtami intindishun. Josué 1:8; Salmo 1:​1-3, liipangui.

Diosta na ricui ushashpapash Dios tiajtaca intindinchimi. Bendiciongunata cunatapash crinchimi. Chaimandami Diospa amigo canata mascana canchi. Feta charishpa catingapaca Diosmanda ashtahuan yachajungapami cada punlla Bibliata liina canchi, yachajushcapipash yuyana canchi. Mateo 4:4; Hebreos 11:​1, 6, liipangui.

5. Diospa amigo caimandaca ¿ima bendiciongunatata charishun?

Diosca paita juyajcunataca tucui shunguhuan crishpa catichun, para siempre causana bendicionda ama chingachichunmi ayudan (Salmo 91:​1, 2, 7-10). Sano, cushilla, aliguta causachunbashmi yachachin. Salmo 73:​27, 28; Santiago 4:​4, 8, liipangui.