Huañuimanda salvachunmi minishtinchi

Gentecunaca callarimandapachami para siempre joven causangapaj munashcanchi. Shinapash tucuicunallatami huañunchi. Cai página callaripi shimicunata 3 mil yali huatacuna huashaman escribishca cajpipash cunangamanmi shina llaquipi causanchi.

Bibliapi nishca shinaca, Taita Diosmi gentecunapa shungupica para siempre causana munaita churarca (Eclesiastés 3:11). Chaimandami gentecunaca na huañushpa para siempre causangapaj munanchi. Shinapash pensaripai, gentecuna na para siempre causai ushana cajpica ¿Taita Diosca chai munaita gentecunapa shungupi churanmanllu carca? Na. Bibliapica ninmi, huañuica ñucanchipa shuj millai contra cuendami can. Shinapash huañuica tucuringami ninmi (1 Corintios 15:26).

Huañui contra cuendami cajpipash ali cashcapi huañunataca pipash na mascanchichu. Chaimandami ñucanchi causai peligropi cajpica imashinapash salvaringapaj munanchi. Ungushca cashpaca uchami doctorpaman rinchi. Na huañungapaj munashpami imatapash ruranchi.

Gentecunaca ashtaca huatacunatami huañunajushca. Shinapash huañuica tucuringami. ¿Imamandata shina ninchi? Ñucanchicunata Ruraj Jehová Diosca, huañui tiachunga na munarcachu. Paica cai Alpapi para siempre causachunmi gentecunataca rurarca. Paipa munaitaca siempremi pactachin (Isaías 55:11).

Shinapash ¿imashinata Taita Diosca huañuita tucuchinga? Gentecunaca imata rurashpapash huañuita tucuchitaca na ushashcachu. Huaquin cientificocunaca ungüicuna ama ñapash huañuchichunmi jambicunata, vacunacunata rurashca. Gentecuna imashina cashcata yachangapajpash ashtaca investigaciongunatami rurashca. Huaquin llactacunapi gentecunacarin punda huatacunahuan ricujpica cunanbimi ashtahuan huatacunata causan. Shinapash huañuica na tucurishcachu. Bibliapi nishca shinaca, ‘tucuicunallatami ñutu alpaman tigranajun’ (Eclesiastés 3:20).

Huañuita gentecuna na tucuchi ushajpipash Jehová Diosca paipa Churi Jesusta cachamushpami ñucanchicunataca huañuimanda salvanga. Chaita yachashpaca ninandami cushijunchi.