Ali villaicunata villachishpa cushijupai

¿Villachingapaj rinata alicachipanguichu? Huaquinbica gentecuna na uyangapaj munajpi, culiralla contestajpi o na rijsishca gentecunahuan na parlaita ushashpami villachinaca tucuicunapallata shinlli ricurin. Villachina cushijuitapash huaquinbicarin na charinchichu. Shinapash ñucanchicunaca cushilla taita Diostami sirvinchi. Paica cushijushpa paita sirvichunmi munan (Sal. 100:2; 1 Tim. 1:11, NM). Shinaca ¿imamandata cushijushpa villachita ushapanchi? Quimsa yuyaicunata ricupashun.

Pundapica, shamuj punllacunapi ali causai tianatami villachinajunchi. Cunanbi gentecuna ashtahuan ashtahuan llaquilla causajpipash, ‘alicunata villashpami’ cushichinchi (Is. 52:7). Diospa Reinopa ali villaicunaca ñucanchitapashmi cushichita ushan. Chaimandami nara villachingapaj llujshishpallata, Taita Diospa Reino cai Alpata mandajpi ima bendicionguna tianata pensarina capanchi.

Shinallata, ali villaicunata villachishpami gentecunataca ali causachun, Taita Diospa ñaupajpipash ali ricurichun ayudanajunchi. Shina ayudajpimi, gentecunaca nali ruraicunata saquin, para siempre causaitapash ushanga (Is. 48:17, 18; Rom. 1:16). Pensaripashun. Imapash llaqui tiashca jipa, pitapash salvangapaj munanajushcanchiman. Huaquin gentecuna salvachun na munajpipash, salvaringapaj munaj gentecunataca mascashpa catishunmi (Mat. 10:11-14).

Ashtahuangarin, ali villaicunata villachishpami Jehová Diosta alabanajunchi. Villachijta ricushpaca Jehová Diosca ninandami cushijun (Is. 43:10; Heb. 6:10). Ashtahuangarin villachichunmi Jehová Diosca paipa espíritu santotaca na mitsashpa caran. Chaimandami cushijuita charingapaca, espíritu santota carahuai nishpa Jehová Diosta mañana canchi (Gál. 5:22). Jehová Dios ayudajpimi na manllashpa villachishpa catishun (Hech. 4:31). Shinami gentecuna uyajpi o na uyajpipash, cushijushpa villachishun (Ezeq. 3:3).

JEHOVÁ DIOSTA CUTIN CUSHILLA SIRVINGAPACA ¿IMATATA RURAPARCANI? NISHCA VIDEOTA RICUSHCA JIPACA, CAI TAPUICUNATA CONTESTAPANGUI:

• Cada quilla tauca horascunata villachishpapash ¿imamandata Jehová Diosmanda ali yachajunata pundapi churana capanchi?

• ¿Imashinata Mariapa ejemplota cati ushapanchi?

• ¿Ima ratocunapita Diospa shimipi pensaripangui?

• Ali villaicunata villachinamandaca ¿imatata ashtahuan alicachipangui?