Jesuspa Chaquita Catishpa Causashunchi Yachachishunchi tandanajuipi yachajungapaj hojapa referenciacuna
4-10 DE ENERO
BIBLIAPA VALISHCA YUYAICUNA | LEVÍTICO 18, 19
“Tucuipi limpio cangapaj esforzaripashunchi”
Pornografiahuanmi Diabloca gentecunata umachin
Moab llactamanda gentecunapa nali ruraimandaca Jehová Diosca israelitacunamanga cashnami nishca carca: ‘Canaán llactapi causajcunashnapash na ruranachu canguichi. [...] Chai llactaca mapayashcami. Paicuna chashna jatun nalita ruranajujtaca ñucami ricurcani. Chaipi causajcunataca shungu tigrachinshnami shitarcani’ nishpa. Canaán llactamanda gentecunaca nalipacha, millanayai ruraicunatami rurashpa causanajurca. Chaipi causaj gentecunaca Jehová Diospa ñaupajpica nalipachami carca (Lev. 18:3, 25).
Jehová Diosmi paipa sirvijcunata ñaupaman pushajun
13 Shuj llactamanda reycunaca gentecunapa yuyaicunata catishpami mandan carca. Shuj ejemplota ricupashun. Canaán llactata mandajcunapash, gentecunapash jatun nali cosascunatami ruran carca. Paicunaca animalcunahuan huainayashpa, jarica jaripura, huarmipash huarmipura huainayashpa o familia ucupurahuanllata huainayashpami millanayai, jatun juchacunata ruran carca. Shinallata yanga dioscunata adorashpami, paicunapa huahuacunatapash chai yanga dioscunaman caranchi nishpa huañunchi carca (Levítico 18:6, 21-25). Ashtahuangarin, Babilonia llactamanda, Egipto llactamanda reycunaca israelitacunashna limpio caitaca na usharcachu. Israelitacunallami Jehová Diospa Leypi mandashcata catimandaca limpio caita usharca (Números 19:13). Shuj llactamanda reycuna shina cajpipash, Jehová Dios agllashca ñaupaman pushajcunaca Jehová Diosta ali adorachun, paicunapa cuerpopipash limpio cachunmi israelitacunataca ayudarca. Shinallata, millanai, jatun juchacunata ama rurachunmi ayudarca. Jehová Dios paicunata ñaupaman pushajushcataca cuenta japinallami carca.
Taita Diosmi llaquicunataca tucuchinga
Cutin na cazungapaj munashpa nalita ruraj gentecunaca ¿imata pasanga? Bibliapica ninmi, alita rurajcunami cai Alpapica causanga. Cutin, ‘Diosta na manllajcunaca anchuchi tucungami, sapimanda llujchinshnami shitai tucunga’ nishpa (Proverbios 2:21, 22). Shinaca nalita yachachij gentecunaca shujllapash na tiangachu. Chashna ali Alpagupimi Taita Diosta cazuj gentecunaca cushilla causanga. Juchapash asha ashami paicunamandaca chingarishpa catinga (Romanos 6:17, 18; 8:21).
Bibliapa Valishca Yuyaicunata Mascashunchi
w06-S 15/6 22 párr. 11
“Can mandashcataca, ninandami juyani”
11 Moisesman cushca Leypica Jehová Diosca tucui israelitacunamanda preocuparishpami granocunata cozechanajushpaca na tucuillatachu tandachina canguichi nishpa israelitacunataca mandarca. Shinami pobrella gentegucunaca saquishca granocunata japita ushana carca. Pambacunapi trabajaj israelitacunaca cosechashpa, shuj marcai trigota pambapi cungashpa saquishpaca, na cutin tigrashpa japigrinachu carca. Shinallata olivos yurata cuyuchishpa pallashca jipa, uvasta pallashpapash, na cutin tigrashpa pallanachu carca. Shinallata manñacamanbash na pallanachu carca. Jehová Diosca pobre gentegucunata, shuj llactamanda gentegucunata, taita mama illaj huahuacunata, viuda huarmigucunata ayudangapami shina mandarca. Saquishca granogucunata mascanaca shinllimi cashcanga. Shinapash minishtirishcaguta charichunmi Jehová Diosca shina mandarca (Levítico 19:9, 10; Deuteronomio 24:19-22; Salmo 37:25).
11-17 DE ENERO
BIBLIAPA VALISHCA YUYAICUNA | LEVÍTICO 20, 21
“Jehová Diosmi paipa sirvijcunataca shicanyachishca”
w04-S 15/10 11 párr. 12
Paraíso alpagupi causangapaca ¿imatata rurana capanchi?
12 Israelitacunataca Taita Diosca cashnami mandarca: “Cangunaman cunan ñuca villashca cai tucui mandashcacunataca pactachinami canguichi. Ali shinllicuna tucushpa, canguna japingapaj rinajuj llactata japingapajmi, chashna pactachina canguichi” (Deuteronomio 11:8). Levítico 20:22 y 24pica chashnallatami Taita Diosca nin: “Pactachinajuchun ñuca cushca tucui shimicunata, tucui ñuca mandashcacunata ruranacunataca, yariashpa tucuita pactachinguichi. Canguna na chashna rurajpira, canguna causachun ñuca carashca llactaca, cangunataca shungu tigrachinshna Ilujchishpa shitanman. Ashtahuangarin cangunataca, ñucami cashna nircani: Cangunami, paicunapaj llactata japinguichi. Lechepash, balun mishquipash ashtacapacha tiaj llactataca, ñucami canguna japishpa causanajuchun carasha”. Israelitacunaca Taita Dios carasha nishca alpacunapi causashpa catingapaca Taita Diosta tucuipi cazushpami causana carca. Pero Jehová Diosta na cazushcamandami Jehová Diosca babiloniocuna israelitacunata caru llactaman apachun saquirca.
it-1-S 1119
Herencia
Taitamamacuna huañujpi huahuacunaman saquishca cosascunatami herencia nin. Shinallata taitamamacunaca herencia cuendami paicunapa huahuacunamanga costumbrecunata, paicuna imashina cashcatapash yachachishpa saquin.
it-2-S 579 párr. 5
Pajarogucuna o pishcugucuna
Jatun manllanayai tamia tucurishca jipami Noé runaguca ‘micuna tucui animalcunamanda alasyu animalcunatapash’ Taita Diosmanga cararca (Gé 8:18-20). Chai punllamandapachami Taita Diosca gentecuna pishcugucunata micuchun saquirca. Shinapash yahuartaca na micunachu canguichi nishpami mandarca (Gé 9:1-4taca, Le 7:26; 17:13huan comparashpa ricupangui). Chai tiempopica Jehová Diosllatami maijan animalcuna ofrendapa limpio cashcata Noé runaguman villashcanga. Jehová Dios Moisesman cushca Leypimi chaira ricurin maijan animalcuna micungapaj limpio cashcata y maijan mapa cashcata (Le 11:13-19, 46, 47; 20:25; Dt 14:11-20). Bibliapica Taita Diosman ofrendata carangapaj huaquin pishcugucuna imamanda mapa cashcataca na villanllu.
Bibliapa Valishca Yuyaicunata Mascashunchi
it-1-S 562 párr. 1
Chugririna
Moisesman cushca Leypica Taita Diosca israelitacunataca pipash huañujpica cangunaca na chugririnachu canguichi nishpami mandarca (Le 19:28; 21:5; Dt 14:1). ¿Imamandata Jehová Diosca shina mandarca? Israelitacuna Jehovapa llacta cashcamandami chaita cazushpa, chai ruraicunapica na chapurina carca (Dt 14:2). Israelitacunaca huañushcacunahuan ima pasajta ali yachaimanda, shinallata cutin causarinata yachaimanda llaquiyashpa chugririnaca nalichu carca (Da 12:13; Heb 11:19). Taita Diosca na chugririnachu canguichi nishpa mandashpaca paicunapa cuerpoguta Taita Dios rurashcata yaipi charichun, respetotapash ricuchichunmi ayudarca.
18-24 DE ENERO
BIBLIAPA VALISHCA YUYAICUNA | LEVÍTICO 22, 23
“Israelitacuna Jehová Diosta sirvingapaj rurashca fiestacunamandaca ¿imatata yachajupanchi?”
it-1-S 934
Levadura illaj tandata micuna jatun fiesta
Levadura illaj tandata micuna jatun fiestapa primer punllataca tucuicunami tandanajuna carca. Chai punllataca sabadotashnami israelitacunaca ricuna carca. 16 de Nisán punllapica Palestina llactapi primero cosechashca asha cebadatami sumo sacerdoteman carana carca. Levadura illaj tandata micuna jatun fiesta nara callarijpillataca chai huatapi fucushcataca ni pipash na micunachu carca. Sumo sacerdoteca primero cosechashca asha huatashca cebadatami Jehová Diosmanga caran carca. Shinallata shuj huatata charij jari llamagutapash rupachishpa, asha aceitehuan javishca granotapash, asha vinotapashmi caran carca (Le 23:6-14).
Imatata ricuchijurca. Israelitacunaca Jehová Dios Moisesman mandashcata cazushpami Levadura illaj tandataca micuna carca. Deuteronomio 16:3pica Levadura illaj tandataca ‘llaquilla causashcata yarichij tandami’ can ninmi. Chai tandata micushpami israelitacunaca paicuna Egipto llactamanda ligero llujshishcata yarin carca (Éx 12:34). Chai tandata micushpami paicunaca Egipto llactapi esclavo shina causanamanda Jehová Dios salvashcata yarin carca. Chaimandami Jehová Diosca ‘Egipto llactamanda Ilujshimushca punllataca, tucui causaipi yariashpa causangapajmi, chashna rurana canguichi’ nishpa mandarca.
it-2-S 631 párr. 1
Pentecostés nishca fiesta
Jehovaman carangapaca chai huatapi primero cosechashca trigotaca primero cebadatashnaca na ruranachu carca. Chai trigomanda chuscu kilo chaupi ashtahuan ali jacuta japishpami ishcai tandaguta rurana carca. Chaitaca levadurahuanmi rurana carca. Chai tandacunaca huasipi micungapaj rurashca tandacunashnami cana carca (Le 23:17). Chai tandacunataca Jehová Diosman tucuillata rupachishpa ofrendacunahuan, juchamanda ofrendacunahuan, Jehová Dioshuan ali cangapaj carana ishcai llamagucunahuanmi caran carca. Sacerdoteca chai tandacunata, llamapa aichatapash vichai cuyuchishpami Taita Diosman caran carca.
¿Jehová Diospa Organizacionhuan igual ñaupaman catinajunchichu?
11 Jehová Diospa organizacionga ñucanchicuna ali causachun munashpami apóstol Pablopa consejotaca cutin cutin yarichijushca. Apóstol Pabloca nircami: ‘Caishujhuan chaishujhuan ashtahuan juyarishpa, imata cashpapash alita ruranata yarichirishunchi. Tandanajunataca na saquinachu canchi. Shujcunaca tandanajunata saquinllami. Jesús tigramuna punlla ña chayamujujta yachashpacarin, ashtahuanmi yarichirina canchi’ nishpa (Heb. 10:24, 25). Jehová Diosta adorangapaj israelitacuna tandanajushpaca Jehová yachachijpimi cushilla tigran carca. Nehemiaspa punllacunapipash Chujllacunapa Fiestata o Fiesta de las Cabañas nishcata rurashpaca ninandami cushijurca (Éx. 23:15, 16; Neh. 8:9-18). Cunan punllacunapipash tucui tandanajuicunaman rishpami Jehová Diosman ashtahuan quimirinchi, ashtahuan cushijushpa paita sirvinchi (Tito 2:2).
Bibliapa Valishca Yuyaicunata Mascashunchi
Tucuipimi Jehovataca ali sirvina capanchi
3 Tucuipi Jehovata ali sirvina nishpaca Jehovatalla juyanata, paitalla tucui shunguhuan sirvinata, paipa mandashcacunata cazunatapashmi shina nin. Por ejemplo, Moisesman cushca leypi nishca shinaca israelitacunaca Jehovaman carangapami animalcunata huañuchishpa rupachina carca. Shinapash chai animalcunaca sanomi cana carca (Lev. 22:21, 22). Israelitacuna animalcunata apanajushpaca ñausa, imapash faqui, o irquilla animaltaca na apanachu carca. Jehová Diosca sano animalcunata cuchunmi munan carca (Mal. 1:6-9). Jehová Diosca ¿imamandata tucuipi paitalla ali sirvichun munan? Chaipaca shuj ejemplota ricupashunchi. Frutacunata randigrijushpaca ismushcata, cashtushcataimanga na randinchichu. Ashtahuangarin fucushca ali frutacunatami randipanchi. Shina cuendami Jehová Diosca paitalla juyachun, paitalla tucui shunguhuan sirvichun munan.
25-31 DE ENERO
BIBLIAPA VALISHCA YUYAICUNA | LEVÍTICO 24, 25
“Jubileo o cacharina nishca huatamanda yachajunaca ¿imamandata ñucanchipaca minishtirishca can?”
it-2-S 228
Libre quidana
Taita Diosmi libre saquichun mandarca. Shuj israelita paillata mantinirita o paipa familiata mantininata ñana ushashpaca paillata esclavo shina jaturita ushana cashcatami Moisesman cushca Leypica nijurca. Shinallata chai Leypica shuj israelita esclavo shina jaturishpaca 7 huatacuna jipaca ñacutin libre quidai ushana cashcatami nijurca (Éx 21:2). Cada 50 huatacunami Jubileo nishca fiestaca tian carca. Chai huatapica tucui israelita esclavocunami libre quidana carca. Shinallata chai fiestapica tucui alpacunatami dueñocunaman cutin tigrachina carca (Le 25:10-19; JUBILEO nishcatapash ricupangui).
it-1-S 1120 párr. 3
Herencia
Alpata jatushpapash arrendashca cuendallami can carca. Cozechapi mashna culquita llujchinata ricushpallami alpamanda culquitaca cun carca. Cutin tigrachina huata o Jubileo nishca fiestamanda chaishuj Jubileo fiestacaman mashna huatacuna yalishcata ricushpami alpacunamandaca preciota churana carca. Jubileo huatapimi tucui alpacunataca maimanda alpa dueñoman cutin tigrachina carca (Le 25:13, 15, 23, 24).
it-2-S 149 párr. 2
Jubileo
Cunan punllacunapi huaquin llactacunapica huaquin gentecunaca yapa pobre pobregucunami can. Cutin shujcunaca rico o charij charijcunami can. Shinapash Jubileota pactachinami tucui israelitacuna igual charichun ayudarca. Tucui israelitacuna imagutapash igual chari ushashpami nipipash na pobrella causana carca. Israelitacuna cazujpimi Jehová Diosca paicunapa alpacuna aliguta fucuchun bendician carca. Shinallata paicunata yachachishpa catin carca. Shinami Jehová Dios paicunata mandajuimanda israelitacunaca cushillapash causaita ushanman carca (Isa 33:22).
Bibliapa Valishca Yuyaicunata Mascashunchi
w09-S 1/9 22 párr. 4
¿Shujcunata tigrai llaquichinaca alichu can?
Shuj israelitata pipash ñavi lulunda llujchijpica paica paipa munaica na chashnallata llaquichidorta o llaquichidorpa familiataca tigrai llaquichinachu carca. Llaquichidorta imashna castiganataca Moisesman cushca Leypimi ricuchijurca. Moisesman cushca Leypica shuj israelita llaquichi tucushpaca juezcunaman villashpa juezcunapa maquipi saquina can nijurcami. Pitapash llaquichishpaca shinallata llaquichi tucuna cashcataca israelitacunaca alimi yacharca. Chaimandami pitapash llaquichishpaca shinallata tigrai llaquichi tucunamanda jarcarichun israelitacunataca ayudarca.
1-7 DE FEBRERO
BIBLIAPA VALISHCA YUYAICUNA | LEVÍTICO 26, 27
“Jehová Dios bendiciahuachunga ¿imatata rurana capani?”
w08-S 15/4 4 párr. 8
‘Yanga cosascunata’ ladoman saquishunchi
8 ¿Imata rurashpata ñucanchi charishca cosascunataca yanga dioscunatashna ricunajunchiman? Pensaripashunchi. Israel llactapi purijushpa pipash shuj jatun rumita tarishcanman. Chai jatun rumita shuj pircata shayachingapaj o shuj huasita shayachingapaj utilizanaca alimi canman. Shinapash chai tarishca rumita diostashna sirvingapaj shayachishpaca nalichu canman. Pipash shina rurashpaca Jehová Diosta sirvijcunatami pandachijunman (Lev. 26:1). Cunanbica culquica causangapaca minishtirishcami can. Jehová Diosta sirvingapapashmi culquiguca ayudan (Ecl. 7:12; Luc. 16:9, TNM ). Shinapash Taita Diosta sirvinapa randi culquipira empeñarishpaca nalitami shinanajunchiman. Culquipira shina empeñarishpaca yanga dioscunata sirvijunshnami canchiman (1 Timoteo 6:9, 10, liingui). Cunanbi gentecunaca culquita charinapillami ashtahuanbachaca yuyan. Chaimandami ñucanchicunaca culquita charinapilla pensarinamandaca cuidarina capanchi (1 Tim. 6:17-19).
it-2-S 1096 párr. 8
Taita Diosta respetana
Jehová Dios israelitacunata ñaupaman pushachun Moisesta churashcata crijcunami Moisestaca respetan carca. Israelitacunaca Taita Diospa huasitapashmi respetohuan ricuna carca (Le 19:30; 26:2). Israelitacunaca Jehová Diospa mandashcacunata tucuita cazushpa, Jehová Diosta ali sirvishpami Taita Diospa huasita respetashcataca ricuchirca.
w91-S 1/3 17 párr. 10
Tranquilo “ali causaitaca Taita Diosmi caramunga”. Shinami “cangunapaj shungutapash” cuidanga
10 Jehová Diosca israelitacunataca cashnami nirca: “Imata rurachun ñuca mandashcacunata rurashpa causashpa, ñuca mandashca shimicunatapash yariashpa pactachinguichi. Shina pactachijpica, ñucami tamiachina punllapillata tamiachimusha. Chaimandami cangunapaj alpacunapica, granocuna fucunga. Shinallata pambacunapi shayanajuj quirucunapipashmi, granocuna fucunga. Ñucaca cangunapaj llactapica, casilla ali causaitami carasha. Chaimandami imatapash na manllashpa puñunguichi, cangunataca pipash na manllachingachu. Cangunapaj llactamandaca, millai animalcunatapashmi anchuchisha. Cangunapaj llactapica, espadahuan macanajuipash na tiangachu. Cangunahuanmi purijusha, ñucami cangunapaj Taita Dios casha. Cangunapash, ñuca agllashcacunami canguichi” (Levítico 26:3, 4, 6, 12). Jehová Dios contracunamanda cuidana cashcamanda, Jehová Diospa ali amigocuna caimanda y cosascunatapash charimandami israelitacunaca tranquilo causaita ushana carca. Shinapash shina ali causaiguta charingapaca Jehová Diospa mandashcacunatami cazuna carca (Salmo 119:165).
Bibliapa Valishca Yuyaicunata Mascashunchi
it-2-S 657
Millai ungüicuna
Taita Diosta na cazuimandami millai ungüicunahuan japi tucurca. Ciertomi Taita Diosca huaquinbica millai ungüicunahuan castigarca. Por ejemplo Miriamda, Uziasta y Guehazitaca lepra ungüihuanmi castigarca (Nú 12:10; 2Cr 26:16-21; 2Re 5:25-27). Shinapash casi siempremi gentecunallata nalita ruraimanda imapash ungüitaca japin carca. Bibliapica “maijan imata tarpushpapash, chaitallatami japinga” nijunmi (Gál 6:7, 8). Mapa ruraicunapi urmashcacunamanda parlashpami apóstol Pabloca cashna nirca, “paicunapaj shungu munashca mapacunata rurashpa causanajuchun, Taita Diospash saquirca. Shinamandami, paicuna purallata paicunapaj cuerpocunata huaglichishpa causanajurca. [...] Chashna nalita ruranajushpami, cuna cashcata cujpi paicunallata chingagrinata japinajun” (Ro 1:24-27).
8-14 DE FEBRERO
BIBLIAPA VALISHCA YUYAICUNA | NÚMEROS 1, 2
“Jehová Diosca paita sirvijcunataca aligutami organizashca”
w94-S 1/12 9 párr. 4
Ñucanchi causaipica Jehová Diosta sirvinami primero cana can
4 Israelitacunaca 3 millón yali gentecunami cashcanga. Chaimandami israelitacuna causangapaj tiarishca pushtupica ashtaca ashtaca carpa huasicuna tiashcanga. Tabernáculo jahua ladopica quimsa aillucuna, cutin ura ladopica quimsa aillucuna, indi llujshijun ladopica quimsa aillucuna, cutin indi pacajun ladopica quimsa aillucunami carpa huasicunapi causangapaj tiarin carca. Tabernáculo carpa huasi tiajushca pushtumanda más ladollapica levitacunapa carpa huasicunami tiarca. Tabernáculo carpa huasica chaupipimi tiajurca. Tabernáculo carpa muyundipica shuj telahuanmi cerramientota cuenda rurashca carca. Chai Tabernáculo carpa huasitaca ‘ali yuyaita shungupi charij’ israelitacunami Jehová Dios mandashcashna rurarca (Números 1:52, TNM; 1:53; 2:3, 10, 17, 18, 25; Éxodo 35:10).
it-1-S 403 párr. 1
Israelitacuna
Israelitacunaca ashtacacunami carca. Israelitacunamandaca solo 603.550 guerracunaman ri ushana jaricunalla, shinallata 22 mil levitacunallami cuendashca carca. Pero chai jahuami huarmigucunapash, huahuagucunapash, mayorllagucunapash, discapacitado gentegucunapash, shuj llactamanda gentecunapashmi paicunahuanga carca. Gulpita cuendashpami 3 millón yali gentecuna carianga (Éx 12:38, 44; Nú 3:21-34, 39). Jericó llacta ñaupapi, Moab pambacunapi israelitacuna paicunapa carpacunata shayachishpaca ‘Bet-jesimot pueblomandaca, Abel-sitim shuti pueblocamanmi’ junda carca (Nú 33:49).
Bibliapa Valishca Yuyaicunata Mascashunchi
it-1-S 1231
Israelitacunata cuentana o censo
Censota rurashpaca cada familiatami censota ruran carca. Censotaca mashna israelitacuna tiashcatalla ricungapaca na carcachu. Censocunataca impuestocunata cobrangapaj, picuna guerraman ri ushana cashcata ricungapaj, cutin levitacunataca Tabernáculo carpa huasipi sirvichunmi cuentan carca.
15-21 DE FEBRERO
BIBLIAPA VALISHCA YUYAICUNA | NÚMEROS 3, 4
“Levitacunaca ¿imatata ruran carca?”
it-2-S 890 párr. 1
Sacerdote
Moisesman cushca Leypi. Egipciocunapa punda churicunata huañuchishpami Jehová Diosca israelitacunapa primero churicunata paipalla cachun agllarca (Éx 12:29; Nú 3:13). Israelitacunapa punda churicuna Jehová Diospalla cashcamandami Jehová Diosca israelitacunapa punda churicunataca Tabernáculo carpa huasipi sacerdote cuenda sirvichun o sacerdotecunata ayudashpa sirvichun churanalla carca. Pero shinapash Leví runagupa miraicunatami paita shina sirvichun agllarca. Jehová Diosca Aaronba miraicunatami Israel llactapi sacerdote shina sirvichun primerollata ña agllashca carca (Nú 1:1; 3:6-10).
it-2-S 213
Levitacuna
Shuj shuj ruraicuna. Leví runapa churicunapa shuticunaca Gersón, Coat y Merarimi carca (Gé 46:11; 1Cr 6:1, 16). Tabernáculo carpa huasita shayachingapaj, shinallata apangapaca solo levitacunallami chaitaca rurana carca. Tabernáculo carpa huasita shuj ladoman apana horasca Aarón y paipa churicunami santisimoman yaicunapi churashca telataca uriajuchin carca. Chaihuanmi arca del pactota, altarcunata, Tabernáculo carpa ucupi tiashca tucui cosascunata, trastecunata quilpashpa saquin carca. Chaicunata apachunga Coat runapaj mirai familiacunami encargado carca. Gersonba mirai familiacunaca Tabernáculo carpa telacunata, chaipi tiashca telacunata, huatana cabiacunatapash apachun encargado carca. Cutin Meraripa mirai familiacunaca carpa tablacunata, caspicunata, pilarcunata, pilarcunata shayachina basecunata, estacacunata, chai estacacunapi huatana cabiacunatapash apachun encargado carca (Nú 1:50, 51; 3:25, 26, 30, 31, 36, 37; 4:4-33; 7:5-9).
it-2-S 214 párr. 2
Levitacuna
Moisespa tiempocunapica 30 huatacunata charishpami levitacunaca Tabernáculo carpa huasita shuj ladoman apangapaj, chai ucupi tiashca cosascunata apangapapash encargado carca (Nú 4:46-49). Shinapash huaquin cosascunapaca 25 huatata charishpallatami levitacunaca Tabernáculo carpa huasipi ayudaita ushan carca. Pero Tabernáculo carpa huasita shuj ladoman apana shinlli cajpimi chaipica nara ayudaita ushana carca (Nú 8:24). Rey David mandajuj tiempocunapica 20 huatamanda vichaimi levitacunaca Tabernáculo carpa huasipi sirvi callarin carca. Chaitaca Tabernáculo huasita ñana shuj ladocunaman apana cashcamandami rey Davidca shina mandarca. Tucui levitacunami Tabernáculo carpa huasipi sirvinataca 50 huatacunata charishpa saquina carca (Nú 8:25, 26; 1Cr 23:24-26; EDAD nishcatapash ricupangui).
Bibliapa Valishca Yuyaicunata Mascashunchi
w06-S 1/8 23 párr. 13
Taita Diosta manllashpa ali sirvishunchi
13 Rey David ashtaca llaquicunata charijpimi Jehová Diosca ayudarca. Chaimandami Rey Davidca tucui shunguhuan crishpa Jehová Diospi ashtahuan confiarca (Salmo 31:22-24). Shinapash quimsa viajetami rey Davidca pandarirca. Y chaimandami ashtaca llaquicunata charirca. Por ejemplo, rey Davidca Taita Diospa arca de pactotami Jerusalenman apajurca. Shinapash Leypica levitacunami Taita Diospa arca del pactota huandushpa maiman cashpapash apana can nishpa mandajurca. Chaita yachashpapash rey Davidca Taita Diospa arca del pactotaca shuj mushuj carretapi churashpa Jerusalenman apachunmi mandarca. Taita Diospa arca del pactota shuj carretapi Jerusalenman apanajujpimi Uzah shuti runaca arca del pacto urmanata manllashpa japirca. Shina japijpimi Jehová Diosca paitaca chai rato huañuchirca. Taita Diospa arca del pactota tacarishpaca Uzah runaca nalitami rurarca. Shinapash rey David Taita Diospa mandashcata na cazushcamandami shina pasarca. Shinaca imashinami yachajupanchi Taita Diosta manllashpaca, pai imata mandashcatami cazushun (2 Samuel 6:2-9; Números 4:15; 7:9).
22-28 DE FEBRERO
BIBLIAPA VALISHCA YUYAICUNA | NÚMEROS 5, 6
“¿Imashinata nazareo nishcacunashna caita ushapanchi?”
it-2-S 467; 468 párr. 1
Nazareo
Nazareo shina sirvijcunaca cai quimsa cosascunatami paicunapa causaipi pactachina carca. 1) Imapash tragocunataca na ufianachu carca. Shinallata chaira pallashca uvastapash, chaquichishca uvastapash, uvasmanda rurashca vinotapash o uvasmanda imapash rurashcacunatapash na ufianachu carca. 2) Ajchatapash na ruturinachu carca. 3) Huañushcacunapamanbash ni quimirita ni tacarita na ushanachu carca. Masqui taita o mama o huauqui o pani huañujpipash na quimirinachu carca (Nú 6:1-7).
Rurashapacha nishcacuna. Nazareo tucushpa sirvijcunaca Taita Diospallami shicanyachishca cana carca.
Taita Diospalla shicanyachishca cashcamandami tanto nazareocuna como sumo sacerdotepash huañushcapamanga nimamanda na quimirinachu carca. Familiacuna huañujpipash ni quimirita ni tacarita na ushanachu carca. Shinallata vinotapash o imapash tragocunataca na ufianachu carca (Le 10:8-11; 21:10, 11).
Nazareo tucushca punllacunapica ajchataca na ruturinachu carca. Shinami gentecunaca paicuna nazareo tucushcata ricushpa Taita Diospalla shicanyachishca cashcata ricui ushanalla carca (Nú 6:5). Shinaca nazareo tucushcacuna chai requisitocunata cumplishpami Jehová Diostalla sirvingapaj shicanyachishca cashcata ali intindishpa Jehová Diostaca ali sirvin carca (1Co 11:2-16; CABELLO; COBERTURA PARA LA CABEZA; NATURALEZA nishcatapash ricupangui).
Bibliapa Valishca Yuyaicunata Mascashunchi
w05-S 15/1 30 párr. 2
Gentecunaca tapunmi
Sansón shuti runaguca Jehová Dios agllajpimi nacirishca punllamandapacha nazareo shina agllai tucurca. Bibliapica Taita Diospa ángel Sansón runagupa mamaman cashna nishcatami ricuchin. “Ricui, canga vijsayu tucushpami, shuj jari huahuata ungungui. Paitaca, ajchatapash na muchunachu. Chai huahuaca, pai huacharishca punllamandapachami, Taita Diospajlla causaj nazareo nishca runa canga. Paimi israelcunataca, filisteocunapaj maquimanda quishpichi callaringa” nishpa (Jueces 13:5). Shinaca Taita Diosmi Sansón runagutaca nacirishca punllamandapacha nazareo shina tucui vida sirvichun agllarca. Chaimandami Sansonga huañushcacunapamanga na quimirinachu can nishcataca na pactachina carca. Solo paicunapa munai nazareo shina Taita Diosta sirvingapaj munajcunallami chai mandashcataca pactachina carca.