Jesuspa Chaquita Catishpa Causashunchi Yachachishunchi tandanajuipi yachajungapaj hojapa referenciacuna
1-7 DE MARZO
BIBLIAPA VALISHCA YUYAICUNA | NÚMEROS 7, 8
“Jehová Dios israelitacunata imashna organizashcamandaca ¿imatata yachajupanchi?”
it-1-S 523 párr. 7
Israelitacuna
Israel llactapica ‘mandajcunami’ tucui israelitacunataca representan carca (Esd 10:14). Tabernáculo carpa huasita inaguranajujpica ‘israelitacunata mandajcunami’ Jehová Diosman carangapaj shuj shuj cosascunata aparca (Nú 7:1-11). Jehová Dios mandajpimi Moisés runaguca Israelmanda 70 ancianocunata agllarca. Paicunami israelitacunata ñaupaman pushachun Moisesta ayudana carca (Nú 11:16, 17, 24, 25). Levítico 4:15pica ‘israelitacunata mandaj’ ancianocunamandami parlajun. Israelitacunataca ancianocuna, juezcuna, mandajcunami representan carca (Nú 1:4, 16; Jos 23:2; 24:1).
it-2-S 874 párr. 1
Rubén
Rubenba aillucunaca Tabernáculo carpa huasi ura ladopimi causan carca. Paicunaca Simeonba y Gadpa chaupipimi causanajurca. Israelitacuna shuj pushtuman causangapaj rina tucujpica Judapa, Isacarpa y Zabulonba catimi Rubenba, Simeonba y Gadpa aillucunaca rin carca (Nú 2:10-16; 10:14-20). Tabernáculo carpata inaguranajuj horasca chai ordenbimi israelitacunaca Jehová Diosman ofrendacunata cararca (Nú 7:1, 2, 10-47).
w04-S 1/8 25 párr. 1
Números libropa valishca yuyaicuna
8:25, 26. Tabernáculo carpa huasipica levitacunami sirvin carca. Shinapash ña mayorlla levitacunaca Tabernáculo carpa huasipi sirvina obligaciondaca ñana charircachu. Shina rurashpami mayorlla levitacunata considerashcata ricuchin carca. Shinapash mayorlla levitacunaca Tabernáculo carpa huasipi sirvij levitacunataca imagupipash ayudaita ushanmi carca. Cunan punllacunapica tucuicunallatami masqui mayorllagu cashpapash Jehová Diospa Reinomanda o Gobiernomandaca villachishpa catipanchi. Shinapash mayorlla huauquipanigucunaca talvez ñana pundashnaca villachitaca ushangachu. Pero imagutapash rurashpami villachingapaca ninanda esforzarin.
Bibliapa Valishca Yuyaicunata Mascashunchi
it-2-S 717 párr. 3
Punda churi
Jehová Diosca Abrahán runaguhuan shuj tratota rurashcamandami tucui israelitacunaca Jehová Diospa ‘punda churi’ tucurca (Éx 4:22). Egipto llactapi israelitacunapa punda churicunata salvashcamandami Jehová Diosca, “punda huacharishca tucui jari huahuacunataca, ñucapajlla cachunmi shicanyachina canguichi. Israelpuracunapi maijan cashpapash, punda huahuata ungujpica, gentecunapaj cashpa, animalcunapaj cashpapash ñucapajmi” can nircami (Éx 13:2).
it-2-S 939 párr. 2
Jehová Diospalla shicanyachishca
Israelitacunaca Jehová Diospalla shicanyachishca llactami carca. Shinapash chai israelitapuracunamandami Jehová Diosca huaquingunata paitalla sirvichun agllarca. Tanto sacerdotecuna como sumo sacerdotepash Tabernáculo carpa huasipi Jehová Diosta sirvingapami shicanyachishca carca. Paicunami Taita Diospa ñaupajpi tucui israelitacunataca representanajurca. Chaimandami paicunaca aliguta causashpa Jehová Diostaca ali sirvina carca. Shina causajpimi paicunataca Jehová Diosca ali ricushpa chasquin carca (Le 21; 2Cr 29:34). Egipto llactapi israelitacunapa punda churicunata salvashcamandami Jehová Diosca, ‘israelitacunapa punda churicunaca ñucapami canga’ nirca (Nú 3:12, 13; 8:17).
8-14 DE MARZO
BIBLIAPA VALISHCA YUYAICUNA | NÚMEROS 9, 10
“¿Imashnata Jehová Diosca paita sirvijcunataca ñaupaman pushan?”
it-1-S 403 párr. 6
Israelitacuna
Israelitacunataca Taita Diosmi ñaupaman pushan carca. Chaimandami israelitacunaca organizashca carca. Shinallata israelitacunaca maiman rinajushpapash en ordenmi rin carca. ¿Imashinata Jehová Diosca israelitacunataca pushan carca? Shuj fuyuta utilizashpami Jehová Diosca israelitacunataca ñaupaman pushan carca. Chaimandami Bibliapica: “Mandaj Dios mandajpimi, carpacunata shayachishpa tianajurca. Shinallata Mandaj Dios mandajpillatami rinajurca” ninmi (Nú 9:15-23).
w11-S 15/4 4 párrs. 4, 5
Jehová Diosca ¿imashinata paipa sirvijcunataca ñaupaman pushajun?
Congregacionbi ñaupaman pushaj huauquicunata cazunaca huaquinbica na facilchu can. Chaimandami apóstol Pabloca, “cangunata michijcunataca, cazushpa causaichi. Paicuna mandajpi causaichi” nirca (Heb. 13:17). Por ejemplo, ashaguta pensaripashunchi. Israelitacunapa punllacunapi causanajushcanchiman. Chaimi Taita Diospa fuyu shuj pushtupi shayarijpica ñucanchicunapash ñucanchi carpa huasigucunata shayachingapaj chaipi quidapanchiman. Shinapash mashna tiempota quedanata na yachashpapash ñucanchi cosasgucunataca asha asha llujchi callarinchi. Shinapash ashtahuan cosasgucunata minishtishpami ñucanchi quipishca cosasgucunataca llujchinchiman. Pero ña tucui cosasgucunata llujchishca jipalla Taita Diospa fuyuca ña cutin cuyurin. Shina cuyurijpimi ñucanchicunapash cutin ñucanchi cosasgucunata quipishpa chai pushtumandaca rina tucunchi. Chaita ruranaca facilca na cashcangachu (Núm. 9:17-22).
Cunanbica ¿imashinata Jehová Diosta cazushcataca ricuchinchi? Cunan tiempocunapica Jehová Diospa organizacionba nishcacunata cazushpami Jehová Diosta cazushcataca ricuchinchi. Chaimandami imagutapash rurana cashpaca Jehová Diospa organizacionbi imata yachachijta catishpa ruranchi.
Bibliapa Valishca Yuyaicunata Mascashunchi
it-1-S 226 párr. 4
Asamblea
Tandanajuicunaman rinaca importantemi can. Tucui israelita jaricunami maimanda Pascuataca rurana carca. Na shina rurashpaca huañuchi tucunami carca. Solo si de viaje maimanbash rishca cajpillami Pascuataca na rurana carca. O Leypi nishcashna Jehová Diospa ñaupajpi mapa ricurijuimandami Pascuataca na rurana carca (Nú 9:9-14). Rey Ezequiasca Judá llactamanda, Israel llactamanda tucui israelitacunatami Pascuata rurangapaj Jerusalén llactapi tandanajuchun convocarca. Rey Ezequiasca, “Israelcunalla, [...] Mandaj Taita Diospajman tigrarichi. [...] Cunanga, cangunapaj taitacunashnaca na shinlliyashcapacha tucunachu canguichi. Ashtahuangarin Mandaj Diosta cazushpa, paipaj huasiman shamuichi. Chai huasitaca, Diosmi causaita causaicaman paipajlla cachun shicanyachishca. Cangunata Mandaj Taita Diosta servichi. Shina causajpimi, nina japirinshna fiñarishcamandapash, cangunahuanga ali tucunga. [...] Cangunata Mandaj Taita Diosca ninanda juyaj, ninanda llaquij Diosmi. Canguna paipajman tigrarijpica, paica cangunata cuidajungallami” nishpami villajurca (2 Cr 30:6-9). Cunan tiempocunapi Pascua fiestata na rurana cashpapash apóstol Pabloca tandanajunata na saquina cashcatami consejarca. Chaimi apóstol Pabloca, “shinallata caishujhuan, chaishujhuan ashtahuan juyarishpa, imata cashpapash alita ruranacunata yarichirishunchi. Tandanajunataca, na saquinachu canchi. Shujcunaca, tandanajunata saquijllacunami tian. Ashtahuangarin caishujmanda chaishujmanda aliguta yarichirishpami causana canchi. Jesús tigramuna punlla ña chayamujujta yachashpacarin, ashtahuanmi yarichirina canchi” nircami (Heb 10:24, 25; CONGREGACIÓN nishcatapash ricupangui).
15-21 DE MARZO
BIBLIAPA VALISHCA YUYAICUNA | NÚMEROS 11, 12
“¿Imamandata na quejarishpa causana capanchi?”
w01-S 15/6 17 párr. 20
Jehová Diostaca alimi sirvina capanchi
Apóstol Pabloca cashna nishpami ñucanchitaca consejan. Paica, israelitacuna “Jatun Diosta fiñachishcashnaca, ñucanchica na fiñachinachu canchi. Chashnacunaca, culebracuna canijpimi huañushca. Paicuna purapi huaquingunaca, Diosta fiñashpami nalicachishpa rimashca. Chashnaca, napacha rimanachu canchi. Chashnacunataca, huañuchij angelmi huañuchishca” ninmi (1 Corintios 10:9, 10). Israelitacunaca maná nishca micunagutalla charishcamandami Moisesmandapash, Aaronmandapash, ashtahuangarin Taita Diosmandapash quejarishpa nalicunata rimanajurca (Números 16:41; 21:5). Bibliapica nalicunata rimanajushcamandami ashtaca israelitacunaca culebracuna canijpi huañushcatami nin (Números 21:6). Nalicunata rimanajushcamandami 14 mil 700 shuj israelitacunapashmi nalicunata rimashcamanda huañuchi tucushcarca (Números 16:49). Shinaca Jehová Diospa carashca cosasgucunata na aliman chasquijushpaca Jehová Diostami culirachinajunchiman.
w06-S 15/7 15 párr. 7
‘Na quejarishpami imagutapash rurana capanchi’
Jehová Dios israelitacunata Egipto llactamanda llujchijpica israelitacunaca candashpami Jehová Diostaca ninanda agradicinajurca (Éxodo 15:1-21). Shinapash Jehová Dios israelitacunata salvashcamanda agradecido causanapa randica huaquin cosascunata na charimanda, cananeo gentecunata manllaimandapashmi israelitacunaca Jehová Diosmandaca quejarinajurca. Shina quejarishpa, murmurashpa parlashpami israelitacunaca Jehová Dios paicunaman imaguta carashcata na agradecido cashcata ricuchinajurca.
it-2-S 855 párr. 2
Quejarina
Murmurashpa parlana. Murmurashpa parlanaca nalichu can. Shina parlanaca shujcunatapashmi ninanda desanimachin. Egipto llactamanda llujshishca jipallami israelitacunaca Moisesmandapash, Aaronmandapash quejarinajurca. Shina quejarishpaca Jehová Diosmandapashmi quejarinajurca (Éx 16:2, 7). Israelitacuna shina quejarishpa parlanajujpimi Moisesca ninanda desanimarishpa huañungapaj munarca (Nú 11:13-15). Quejarishpa, murmurashpa parlanaca alica na canllu, huañuimanmi apan. Jehová Diosca israelitacuna shina Moisesmanda quejarishpa, murmurashpa parlachunga na gushtarcachu. Israelitacuna shina parlajpica Jehová Diosmanda israelitacuna quejarishpa, murmurashpa parlanajujtami Jehová Dios ricurca (Nú 14:26-30). Chaimandami ashtaca israelitacuna huañurca.
Bibliapa Valishca Yuyaicunata Mascashunchi
it-2-S 288
Maná
Maná nishca micunaguca ¿imashinata carca? Maná nishca micunaguca ‘culantro muyushnallami’ cashca. Shinallata ‘mishqui mishqui tandagushnami’ cashca. Chaitaca cutashpami mangapi yanun cashca. Na cashpaca mishqui tandata rurashpami micun cashca (Éx 16:23, 31; Nú 11:7, 8).
22-28 DE MARZO
BIBLIAPA VALISHCA YUYAICUNA | NÚMEROS 13, 14
“Jehovapi tucui shunguhuan crishpallami na manllashun”
w06-S 1/10 17 párrs. 5, 6
Jehová Diospi crinami ama manllachun ayudan
Jehová Dios carasha nishca alpacunaman yaicungapami Josuepash, Calebpash ninanda munanajurca. Chaimandami Josué y Calebca, israelitacunataca, “paicunataca, tandata micunshnami tucuchishun. Paicunata ayudajca, pipash illanmi. Ashtahuangarin Mandaj Diosca ñucanchihuanmi. Paicunataca, napacha manllanachu canguichi” ninajurca (Números 14:9). Tucui israelitacunallatami Jehová Dios imashina Egipto llactata llaquichishcata ricurca. Shinallata paicunaca Jehová Dios imashina Faraondapash, paipa soldadocunatapash Mar Rojopi huañuchishcatami ricurca (Salmo 136:15). Chaimandami israelitacunaca na manllanachu carca. Chaimandami Jehová Diosca, “cai gentecunaca, ¿ima punllacamanda ñucataca fiñachigrihuanyari? Paicunapa chaupipi cai tucui rurashcacunata ricuchijujpipash, ¿ima punllacamanda ñucataca na crishpa causanajunyari?” nircami (Números 14:11).
Cunanbica jovenguna cashpa, mayorllagucuna cashpapash Josué y Caleb cuendami Jehová Diospica tucui shunguhuan cripanchi. Chaimandami na manllashpa Jehová Diospa Reinomanda o Gobiernomandaca villachishpa catipashcanchi. Shinallata Diospa Gobiernomanda ama villachichun ima jarcaicuna ricurijpipash villachishpami catipashcanchi (Romanos 8:31).
Bibliapa Valishca Yuyaicunata Mascashunchi
it-1-S 740
Jehová Dios israelitacunaman carashca alpacuna
Canaán llactapi alpacunaca juyaillata fucuj alpacunami carca. Moisesca Jehová Dios carasha nishca alpacuna imashina cajta ricuchunmi huaquin jaricunata cacharca. Chai alpacunaman rishpaca chai alpacuna juyaillata fucuj alpacuna cashcatami ricurca. Chaimandami paicunaca jigostapash, granadillastapash, uvastapash aparca. Uvastacarin ishcai tucushpami huandushpa apana tucurca. Alpacunata chapangapaj richun mandashca huaquin israelitacuna Taita Diospi na tucui shunguhuan crishpapash paicunaca, ‘chai alpacunapica, ashtaca lechepash, balun mishquipashmi tian’ nishpami villarca (Nú 13:23, 27).
29 DE MARZO—4 DE ABRIL
BIBLIAPA VALISHCA YUYAICUNA | NÚMEROS 15, 16
“Ñucanchipilla yapata confiarinapash, orgulloso canapash ¿imamandata nali can?”
w11-S 15/9 27 párr. 12
Jehová Diosca ¿ñucataca chasquihuanllu?
Jehová Dios carasha nishca alpacunaman rinajushpami Coré shuti runaca israelitacunataca Moisesca alica na ñaupaman pushajunllu nishpami nirca. Chaimandami Coré runaca 250 jaricunahuan israelitacunata imashina ñaupaman pushanata parlarinajurca. Paicunaca Jehová Diosca ñucanchihuanmi can yashpami Moisestaca na cazunajurca. Chaimandami Moisestapash, Aarondapash, “cangunaca, na ashtahuan ñucanchita mandanachu canguichi. Tucuilla tandanajushca israelcunapash, Diospajlla cachun shicanyachishcacunami. Mandaj Diosca, paicunapaj chaupipimi causajun” nishpa ninajurca (Núm. 16:1-3). Paicuna shina ninanda jariyanajujpipash Moisesca, “cayapajmi Mandaj Diosca, maijanlla paipaj cajtapash, maijandalla paipaj cachun shicanyachishcatapash ricuchinga” nircami (Números 16:5, liingui). Cayandipaca paita na cazujcunataca tucuillatami Jehová Diosca huañuchirca (Núm. 16:31-35).
w11-S 15/9 27 párr. 11
Jehová Diosca ¿ñucataca chasquihuanllu?
Moisesca Jehová Diospa ñaupajpica alimi ricurin carca. Cutin Coré runaca Jehová Diosta na cazushcamandami Jehová Diospa ñaupajpica na ali ricurirca. Coré runagumanda ashaguta yachajupashunchi. Paica Qohatpa familiamanda levitami carca. Coré shuti runaca Jehová Dios imashina israelitacunata egipcio gentecunamanda quishpichishcatami ricurca. Shinallata Sinaí urcupi Jehová Dios imashina paita na cazujcunata huañuchishcatami ricurca. Ashtahuanbash paipashmi arca del pacto nishcata apana bendicionda charirca (Éxo. 32:26-29; Núm. 3:30, 31). Coré runaca Jehová Diostaca tauca huatacunatami ali sirvijushca carca. Chaimandami tauca israelitacuna paitaca ninanda respetashpa ricun carca.
Bibliapa Valishca Yuyaicunata Mascashunchi
w98-S 1/9 20 párrs. 1, 2
Importante cosascunatami en primer lugar churana capanchi
Jehová Diosca Moisés runagutaca cashnami nirca: “Chai runataca, na llaquishpami huañuchina canguichi” nishpa. Jehová Diosca ¿imamandata shuj runata huañuchichun mandarca? (Números 15:35).
Tucui israelitacunallatami paicuna minishtirishca cosasgucunata rurangapaca 6 punllacunata charirca. Por ejemplo, micunaguta charingapaj, ropaguta charingapaj, yamdangapapash. Pero canchis punllaca Jehová Diostalla sirvingapaj agllashca punllami carca. Yamdata japinaca imapash nalica na carcachu. Ashtahuangarin Jehová Dios paitalla sirvichun agllashca punllapi yamdata japinami nali carca. Aunque cunan punllacunapi Moisespa mandashca Leycunata na pactachina cashpapash ¿caimandaca imatata yachajupanchi? Caimandaca Jehová Diosta cazushpa, Jehová Diosta ñucanchi causaipi en primer lugar churana cashcatami yachajupanchi (Filipenses 1:10, TNM ).
5-11 DE ABRIL
BIBLIAPA VALISHCA YUYAICUNA | NÚMEROS 17-19
‘Ñucami can japina alpa herenciashna cani’
w11-S 15/9 13 párr. 9
Jehová Diosmi ñucanchi herencia cuenda can
Levitacunaca imapash alpa herenciataca na japircachu. Paicuna Tabernáculo carpa huasipi sirvijushcamandami Jehová Diosca paicunataca: ‘Ñucami can japina alpa herenciashna cani’ nirca (Núm. 18:20). Aunque cunan punllacunapi na levitacunashna shuj Tabernáculo carpa huasipi Jehová Diosta sirvinajunchi levitacunashna, sacerdotecunashnami ñucanchicunaca Jehová Dios ñucanchi imata minishtirishca cosasgucunata caranapi confiana capanchi.
w11-S 15/9 7 párr. 4
Jehová Diosmi ñucanchi herencia cuenda can
Levitacunaca ¿imagutapash na charishpachu pobrella causana carca? Na (Números 18:19, 21, 24, liingui). Jehová Diosca, Números 18:20pica cashnami levitacunamanga nirca: ‘Ñucami can japina alpashnallata cani’ nishpa. Levitacuna Tabernáculo carpa huasipi Jehová Diosta sirvinajushcamandami israelitacunaca paicunaman diezmota caran carca. Chai carashca diezmomandami levitacunaca ashtahuan alita agllashpa 10%ta sacerdotecunaman caran carca (Núm. 18:25-29). Sacerdotecunaca levitacuna carashca diezmotapash, shinallata israelitacuna Jehová Diosman shuj carashcacunatapashmi chasquin carca. Chaimandami sacerdotecunaca paicuna minishtishca cosasgucunata Jehová Dios caranapi tucui shunguhuan confiana carca.
Bibliapa Valishca Yuyaicunata Mascashunchi
g02-S 8/6 14 párr. 2
Cachica minishtirishcapachami can
Pundaca cachitaca imapash na tucurinahuan, shinallata imapash na huaglinahuanmi comparan carca. Chaimandami Bibliapica tratota rurajcuna de acuerdo cashcata ricuchingapaj cachihuan rurashca micunaguta micungapaj tandanajun carca nin. Chai rurashca tratotami ‘ricuchij cachishna’ o “pacto de sal” nishpa rijsin cashca (Números 18:19). Jehová Dios Moisesman cushca Leypica pipash Jehová Diosman shuj ofrendata caragrijushpaca chai ofrendaca cachihuan salashcami cana can nishpami mandajurca. Shina rurashpami chai caragrijushca ofrenda ali cashcata ricuchin carca.
12-18 DE ABRIL
BIBLIAPA VALISHCA YUYAICUNA | NÚMEROS 20, 21
“Nali tratai tucushpapash humildecuna cashunchi”
Humilde cashpa Jehovata cushichishunchi
Ama pandaringapaj esforzarishun. Cutin Moisesmanda yaripashunchi. Moisesca ashtaca huatacunatami humilde, Jehovata cazushpa causarca. Shinapash 40 huatacuna jipa Jehová Dios carasha nishca alpacunaman israelitacuna ña chayagrinajujpica Moisesca pandarircami. Chai jipallami Míriam huañujpi Qadés pambapi Moisesca pambarca. Chai tiempopillatami Israelitacunaca cutin quejari callarirca. Bibliapica ninmi: ‘Israelitacunaca, Moisesta fiñashpami’ yacu illan nishpa rimanajurca nishpa. Israelitacunaca ashtaca milagrocunata Jehová Dios rurashcata, Moisés ashtaca huatacunata ñaupaman ali pushajushcatapashmi paicunaca ricurca. Chaicunata ricushpapash israelitacunaca cutinmi quejari callarirca. Yacuta na charishcamandaca Moisestarami juchachinajurca (Núm. 20:1-5, 9-11).
Humilde cashpa Jehovata cushichishunchi
Israelitacuna shina quejarinajujpimi Moisesca ninanda culirarca. Jehovapa mandashcata na cazushpa chai rumita rimanapa randica Moisesca israelitacunata shinllita tacurishpami shuj milagrota ruragrini nirca. Shina nishca jipallami paipa varahuan ishcai viajeta chai rumita huajtarca. Shina huactajpimi ashtaca yacu llujshirca. Moisesca jariyashca, culira caimandami chai ratoca pandarirca (Sal. 106:32, 33). Chaimi Jehová Diosca pai carasha nishca alpacunaman yaicuchunga Moisestaca na saquirca (Núm. 20:12).
Moisesmandaca ¿imatata yachajupanchi? Primero, humilde cashpa catingapami esforzarina capanchi. Chaita na rurashpaca nali pensarishpa parlashun o nalicunata rurai callarishun. Segundo, yapata preocuparishca cashpaca na humilde caita ushashunllu. Shinaca llaquicunata o problemacunata charishpapash humilde cangapami esforzarina capanchi.
w09-S 1/9 19 párr. 5
Jehová Diosca alita rurachunmi mañan
Primero, Jehová Diosca Moisés runagutaca israelitacunata tacurishpa, cangunaca na cazuj gentecunami canguichi nishpa tacurichunga na mandarcachu. Segundo, Moisés y Aaronga israelitacunataca: “¿Cai jaca rumimandachu yacuta llujchina canchi?” nishpami nirca. Shina nishpami paicuna chai rumimanda yacuta llujchinatami ricuchinajurca y na Taita Dios. Shinami paicunaca Jehová Diosta na respetashcata ricuchirca. Chaimandami Jehová Diosca, ‘ñuca carasha nishca alpacunamanga na yaicugringuichichu’ nishpami paicunataca nirca (verso 12). Tercero, Jehová Diosca paita na respetajcunata castigashcashnallatami paicunatapash castigarca. Por ejemplo Jehová Diosca paita na cazujcunata, na respetajcunataca Canaán llactaman yaicuchunga na saquishca carcachu (Números 14:22, 23). Cuarto, Moisespash, Aaronbash israelitacunata ñaupaman pushanajushcamandami Jehová Diosca alita rurachun ashtahuanbachaca paicunata mañan carca (Lucas 12:48).
Bibliapa Valishca Yuyaicunata Mascashunchi
Na ushanajujcunataca ¿imashinata ricuna canchi?
Jehová Diosca Aarondaca ñapash castiganallami carca. Shinapash Aaronga pandarimandami shina nijun, gentecunapa shimita uyaimandami shina nijun yashpami Jehová Diosca Aaronda intindirca. Aaronbash nalitami rurashcangui nijpica pandarishcanimi nishpami arripintirirca (Éx. 32:26; Núm. 12:11; 20:23-27). Jehová Diosca Aaronba pandarishcacunata ladoman saquishpami paipa shinlli feta ricushpa perdonarca.
19-25 DE ABRIL
BIBLIAPA VALISHCA YUYAICUNA | NÚMEROS 22-24
“Jehová Diosca ¿imashnata israelitacunataca salvarca?”
bt-S 53 párr. 5
‘Jesusmandami ali villaigucunataca villachirca’
Apostolcunapa punllacunapica ashtacacunami Jehová Diosmanda ama villachichun jarcan carca. Cunan punllacunapipash lo mismomi can. Shinapash cunangamanga Jehová Diosmanda villachichunga nipipash na jarcai ushashcachu. Cunan punllacunapi ñucanchi huauquipanicunata shuj carcelmanda shuj carcelman cachashpa, na cashpaca shuj llactamanda shuj llactaman cachashpapash Jehová Diosmanda villachishpa catichunga na jarcaita ushashcachu. Ashtahuangarin Jehová Diosmanda shuj shuj pushtucunapi ashtahuan villachichunmi ayudashca. Por ejemplo, Segunda Guerra Mundial tiashca tiempopimi shuj judío jariguca campos de concentración nazi nishcapi Jehová Diosmanda yachajurca. Chai jariguca, “testigo de Jehovacunaca na manllashpami Jehová Diosmandaca villachin carca. Chaimi paicunaca ciertopachami Bibliamandaca yachachinajun yashpa ñucapash testigo de Jehová tucurcani” nircami.
it-2-S 250
Juizu illaj
Jehová Diosta na cazurca. Moab llactamanda Balac shuti reyca israelitacunata llaquichichunmi Balaamman culquita ofricirca. Chaimi profeta Balaamga chai culquimandalla israelitacunataca llaquichingapaj munajurca. Pero shina pasachunga Jehová Diosca na saquircachu. Balaam runamanda parlashpami apóstol Pedroca cashna nirca: “Nalita rurangapaj juizu illanshna rijujpimi, na rimaj burroca, genteshna rimashca. Shina rimashpami Dios ima nishcata villaj runataca jarcashca” nishpa (2Pe 2:15, 16; Nú 22:26-31).
Bibliapa Valishca Yuyaicunata Mascashunchi
w04-S 1/8 27 párr. 2
Números libropa valishca yuyaicuna
22:20-22. Jehová Diosca ¿imamandata Balaam jarihuanga culirarca? Profeta Balaammanga israelitacunataca na maldicinachu cangui nishpami Jehová Diosca mandarca (Números 22:12). Shinapash Jehová Diosta na cazushpami profeta Balaamga Moab llactamanda reypa ñaupajpi ali quidangapaj munashpa Balac runapa gentecunahuan israelitacunataca maldicingapaj rirca. Chaitaca culquita charina munaimandallami rurarca (2 Pedro 2:15, 16; Judas 11). Shinapash profeta Balaamga israelitacunataca na maldici usharcachu. Ashtahuangarin na munashpapash bendiciaitami bendiciarca. Chaimandami profeta Balaamga Baal diosta sirvij huarmicunatami israelitacunata tentachun cachana cangui nishpa Moab llactamanda reytaca nirca (Números 31:15, 16). Shinaca imashinami ricupanchi, Balaam runaca culquimandallami Jehová Diostaca na cazushpa yalirca. Chaimandami Jehová Diosca paihuanga ninanda culirarca.
26 DE ABRIL—2 DE MAYO
BIBLIAPA VALISHCA YUYAICUNA | NÚMEROS 25, 26
“Alita rurashpami shujcunatapash ayudanchi”
Huainayana juchamanda caruyapangui
SHUJ pescadorca pescadocunata japingapaj munashpami, shuj uchilla alambre anzuelopica imapash micunaguta churashpa, yacuman shitashpa shuyan. Shuj pescado chai anzuelota japijta sintishpaca, pescadopa shimipi clavarichunmi, anzuelotaca chai rato chutashpa, yacumanda llujchin.
Gentecunapash pescadocunashnami anzuelo trampapi urmaita ushanchiman. Chaita ali intindingapaca israelitacunata yaripashun. Jehová Dios carasha nishca alpacunaman ña chayagrinajushpaca, Moab llacta pambacunapimi israelitacunaca quedarca. Chaimi chai llactamanda reyca, Balaam nishca runataca nirca, israelitacunata maldicijpica ashtaca culquitami pagasha nishpa. Chaimi Balaambash pensarirca, israelitacuna Jehovata na cazujpica, Jehovallatami paicunataca llaquichinga nishpa. Shina pensarishpami, israelita jaricunata inguitachun, Moab llactamanda joven huarmicunata paicunapaman cacharca (Números 22:1-7; 31:15, 16; Apocalipsis [Revelación] 2:14).
Huainayana juchamanda caruyapangui
Israelitacunaca paicunapilla pensarimanda, shinallata Jehová Dios paicunata imashina ayudashcata cungaimandami, Balaamba trampapi urmarca. Jehová Diosmi paicunataca libre cachun Egiptomanda llujchirca. Chaquishca pambacunapi purinajujpipash, Jehovami micunata cararca. Pai carasha nishca alpacunaman ama imapash pasashpa chayachunbash, Jehovallatami cuidariajurca (Hebreos 3:12). Shina cajpipash, israelitacunaca huainayana juchapimi urmarca. Apóstol Pabloca nircami, shujcuna ‘huainayana’ juchapi urmashcashnaca na urmanachu canchi nishpa (1 Corintios 10:8).
Bibliapa Valishca Yuyaicunata Mascashunchi
it-2-S 238 párrs. 1, 2
Alpacuna
Israelitacunaman alpacunata partingapaca primeromi ricun carca mashna familiacuna tiajta. Shinallata suerteta rurashpami alpacunataca familiacunaman cun carca. Cada familia maijan pushtupi causanataca talvez suerteta rurashpami ricushcanga. Chaimi jahua ladopi, ura ladopi o indi llujshijuj ladopi o indi huashajuj ladopi urmajpica chaipi causangapaj tiarina carca. Jehová Dios israelitacunaman alpacunata shina carachun mandashcamandami cada familia alpacunamanda na macanajushpa maipi causana cashpapash causanalla carca (Pr 16:33). Israelitacunamanda cada familia maipi causana alpacunata chasquishca jipaca ricunami carca mashnapuracuna familiapi tiajta. Chaita ricushpami alpacunatapash ali chaupirina carca.
Shinallata Bibliapipash cashnami nijurca: “Alpacunataca, cangunapaj familiacuna mashna cashcashnallata, suerteta rurashpa chaupinguichi. Aillupurapi ashtacacuna cajpica, alpatapash ashtacata cunguichi. Ashalla aillu cajpica, ashatallata cunguichi. Maipi suerte urmajpipash, chaipimi alpata japinajunga” nishpa (Nú 33:54). Shinaca imashnami ricupanchi, cada familiaman alpacunata carangapaca suertetami ruran carca. Shinapash si familia ashalla cajpica ashalla alpatami carana carca. Ña cutin jatun, ashtaca familiacuna cajpica ashtaca alpatami carana carca.