Jesuspa Chaquita Catishpa Causashunchi Yachachishunchi tandanajuipi yachajungapaj hojapa referenciacuna
1-7 DE NOVIEMBRE
BIBLIAPA VALISHCA YUYAICUNA | JOSUÉ 18, 19
“Jehová Diosca tucui israelitacunamanmi alpacunataca igual cararca”
it-2-S 238 párr. 1
Alpacuna
Israelitacunaman alpacunata partingapaca primeromi ricun carca mashna familiacuna tiajta. Shinallata suerteta rurashpami alpacunataca familiacunaman cun carca. Cada familia maijan pushtupi causanataca talvez suerteta rurashpami ricushcanga. Chaimi jahua ladopi, ura ladopi o indi llujshijuj ladopi o indi huashajuj ladopi urmajpica chaipi causangapaj tiarina carca. Jehová Dios israelitacunaman alpacunata shina carachun mandashcamandami cada familia alpacunamanda na macanajushpa maipi causana cashpapash causanalla carca (Pr 16:33). Israelitacunamanda cada familia maipi causana alpacunata chasquishca jipaca ricunami carca mashnapuracuna familiapi tiajta. Chaita ricushpami alpacunatapash ali chaupirina carca.
it-1-S 1120 párr. 2
Herencia
Jehová Diosca cada israelita familiacunamanmi alpataca cararca. Chaimi Moisestaca, cada familiapa alpacunaca caimanda chaicamanmi canga nishpa Jehová Diosca villarca. Shinapash, imashinami Génesis 49:5, 7pi ricuchin tanto Simeón y Levica na alpacunataca aparte japircachu. Ashtahuangarin paicunamanga Judá llacta ucupillatami alpacunataca cararca (Jos 19:1-9). Jehová Diosca Jacobpa cada churicunamanmi alpacunataca cararca. Y chai alpacunapillatami paicunapa familiacunapash alpacunataca chasquirca.
it-2-S 238 párr. 2
Alpacuna
Shinallata Bibliapipash cashnami nijurca: “Alpacunataca, cangunapaj familiacuna mashna cashcashnallata, suerteta rurashpa chaupinguichi. Aillupurapi ashtacacuna cajpica, alpatapash ashtacata cunguichi. Ashalla aillu cajpica, ashatallata cunguichi. Maipi suerte urmajpipash, chaipimi alpata japinajunga” nishpa (Nú 33:54). Shinaca imashnami ricupanchi, cada familiaman alpacunata carangapaca suertetami ruran carca. Shinapash si familia ashalla cajpica ashalla alpatami carana carca. Ña cutin jatun, ashtaca familiacuna cajpica ashtaca alpatami carana carca.
Bibliapa Valishca Yuyaicunata Mascashunchi
it-2-S 238 párr. 5
Alpacuna
Israelitapuramanda 7 aillucunami, paicuna japina alpacunataca nara japishca carca. Chaimandami Josué runaguca paicunataca butarca (Jos 18:2, 3). Huaquin estudiashcacuna paicunamanda parlashpaca cashnami nishca, talvez chai siete jatun aillucunaca, ña shuj llactacunata atacashpa mishashcamandami, paicuna minishtishca cosascunataca charishcanga. Shinallata paicunaca cananeocunahuanga na cutin macanajushunllu yashpami, paicunaca tranquilo causanajushcanga. Chaimandami na uchalla chai alpacunamanga rishcanga. O denoca shuj llactacunamanda gentecunahuan na macanajungapaj munashcamandami paicunaca chai alpacunataca na uchalla japishcanga (Jos 13:1-7). O na cashpaca chai alpagucunamanda na cabal yachashcamandami talvez paicunaca na rishcanga.
8-14 DE NOVIEMBRE
BIBLIAPA VALISHCA YUYAICUNA | JOSUÉ 20-22
“Yangata juchachinaca ¿alichu can?”
w06-S 15/4 5 párr. 3
Matrimonio ucupi ali causangapaj, ali consejocuna
Rubenba, Gadpa y Manasespa chaupi aillucunaca, Jordán yacu ladomanga shuj juyailla jatun altartami rurashca carca. Chaimandami Jordán chimba ladoman caj israelitacunaca, paicunaca Taita Diostami saquishpa nalita rurashca yashpa, paicunahuan macanajungapaj rinajurca. Shinapash paicunahuan nara macanajushpallatami, Jordán yacu chimba ladoman caj israelitacunaca, chaishuj ladopi caj israelitacunahuan parlachun huaquin representantecunata cacharca.
w08-S 15/11 18 párr. 5
Shujcunahuan “tranquilo, ali causanata mascashpa” catipashunchi.
Jordán yacu ladoman causaj israelitacunaca, chaishuj ladopi causaj Rubenba, Gadpa y Manasespa chaupi aillucunahuan parlachunmi, paicunapuramanda huaquin representantecunata cacharca. Chaimi cachashca representantecunaca cashnami tapurca: “¿Yachashpata na cazushpa, israelitacunapa Taita Diosta fiñachishpa, nalita rurashcacunaca, imata? ¿Cunanga, Mandaj Diosta catinata saquingapajchu canguichi?” nishpa. Shinapash paicunaca pandatami ninajurca. Porque paicunaca yanga dioscunata adorangapaca chai altartaca na rurarcachu. Shinapash chai representantecuna shina nijpica, ¿imashinata Rubenba, Gadpa y Manasespa chaupi aillucunaca respondirca? Talvez paicunaca ¿ñapashchu paicunahuanga culirarca? Na. Chaipa randica, paicunaca Jehová Diosta sirvingapami chai altartaca rurarcanchi nirca. Shina tranquilo parlashpami, paicunaca tanto Jehová Diospa ñaupajpi ali ricurirca y shinallata paicunapa huauquicunahuanbash, na macanajushpa ali tucurca (Jos. 22:13-34).
Bibliapa Valishca Yuyaicunata Mascashunchi
it-1-S 408 párr. 4
Canaán
Jehová Dios israelitacunaman carasha nishca alpacunapi tauca cananeo gentecuna causanajujpipash, Mandaj Diosca israelcunapa ñaupa taitacunaman llactata carashami nishpa juramentushcataca israelcunaman cararca. Shinallata tucui chai llactapi tranquilo, ali causaitami cararca. Shinami Mandaj Diosca israelcunaman alicunata carashapachami nishpa juramentushcataca shuj shimitallapash na saquishpami, tucuita pactachirca (Jos 21:43-45). Shinallata Canaán llactapi tiashca shuj llactacunamanda gentecunaca, israelitacunataca manllashpami ricun carca. Chaimandami israelitacunaca tranquilo causaita ushana carca. Shinallata Taita Diosca israelitacunamanga “asha ashami” cananeo gentecunataca cangunapa ñaupamandaca tucuchisha nishcarca. Porque shinami chai alpacunapica millai animalcunapash na mirana carca. Porque si de golpe cananeo gentecunata huañuchishpa tucuchishpaca, animalcunaca ñapashmi chai alpacunapica miranman carca (Éx 23:29, 30; Dt 7:22). Shinallata aunque cananeo gentecuna israelitacunata mishangapaj ashtaca armacunata charishpapash, Jehová Diospa nishcacunaca tucuimi pactarirca. Pero shinapash, imashinami Bibliapi ricuchin israelitacunaca huaquin guerracunatami, paicuna Jehová Diosta na cazushcamanda perdirca (Nú 14:44, 45; Jos 7:1-12).
15-21 DE NOVIEMBRE
BIBLIAPA VALISHCA YUYAICUNA | JOSUÉ 23, 24
“Josueca ña huañugrijujpimi, tucui israelitacunataca consejarca”
it-1-S 89
Alianza
Jehová Diosca israelitacunataca, Canaán llactamanda gentecunahuanga na chapurinachu canguichi nishpami mandarca (Éx 23:31-33; 34:11-16). Shinallata Jehová Diosca israelitacunataca chai llactacunamanda gentecunahuanga na cazaranachu canguichi nishpami mandarca. Porque si paicuna chai gentecunahuan cazarashpaca paicunapashmi yanga dioscunata adorashpa yanga nali ruraicunata rurashpami Taita Diosmandaca caruyaita ushanman carca (Dt 7:2-4; Éx 34:16; Jos 23:12, 13).
w07-S 1/11 26 párrs. 19, 20
Jehová Diospa nishcacunaca siempremi pactarin
19 Josueca: “Cangunata Mandaj Taita Diosca, pai imashna aliguta rurasha nishcataca tucuitami pactachishca. Pai imashna nishcata tucuita pactachishcamandaca, tucui shunguhuan, tucui almahuanmi pashi nina canguichi. Tucuitami cangunaman pactachishca, imatallapash na saquishachu” nishpa. Ñucanchipashmi cai shimicuna cierto cashcata cuenta japipashcanchi (Josué 23:14). Jehová Diosca paipa sirvijcunataca siempremi cuidashca. Shinallata paipa nishcacunaca siempremi pactarishca. Chaimandami ñucanchicunaca tucui shunguhuan confiapanchi.
20 Jehová Diosca ashtaca gentecunamanmi shuj juyailla paraíso alpagupi causana esperanzatami carajun. Shinallata huaquin agllashca gentegucuna jahua cielopi Jesushuan mandachunmi esperanzata caran. Shinaca cieloman rina cashpa o cai alpapillata causana cashpapash, ñucanchicunaca Josué runagushnami Jehová Diostaca tucui shunguhuan sirvina capanchi. Porque Taita Dios carasha nishcaca pactaringami.
Bibliapa Valishca Yuyaicunata Mascashunchi
w04-S 1/12 12 párr. 1
Josué libropa valishca yuyaicuna
24:2. Abrahanba taita Tareca ¿yanga dioscunatachu adoran carca? Callaripica Taré runaca Taita Diostaca na sirvinllu carca. Porque Ur llactapi gentecunaca, luna Sin diostami adoran carca. Chaimandami paipash chai diosta sirvin cashcanga. Shinallata paipashmi talvez idolocunata ruran cashcanga. Shinapash Jehová Dios Abrahán runaguta Ur llactamanda llujshichun mandajpica, paipa taita Tarepashmi Abrahanda cumbashpa Harán llactaman rirca (Génesis 11:31).
22-28 DE NOVIEMBRE
BIBLIAPA VALISHCA YUYAICUNA | JUECES 1-3
“Na manllaj shuj jarimi tiarca”
w04-S 15/3 31 párr. 3
Ehúd runagumi israelitacunataca ayudarca
Ehúd runagu Taita Diospa favorta charimandami, israelitacunataca ayudarca. Shinami Jehová Diosca paipa sirvijcunata salvarca. Ehúd runaguca Jehová Dios israelitacunaman churashca juezmi carca. Y Jehová Dios israelitacunaman juezcunata cushpaca, chai juezcunahuanmi can carca (Jueces 2:18; 3:15).
w04-S 15/3 30 párrs. 1-3
Ehúd runagumi israelitacunata ayudarca
Ehúd runaguca filuyu espadatami rurashca carca. Paica guardiacuna ama cuenta japichunmi, pai churajushca ucuman chumbilirishpa, chai espadataca ali ladoman churashpa aparca. Shinami jatun mandaj Eglonba ñaupajpi presentarirca. Shinallata huaquin cosascunata carangapami apashpa rirca (Jueces 3:16, 17).
Bibliapica Ehúd runagu chai caranata Eglón shuti runaman cushca jipami chai caranata apamushca gentecunataca, cayacaman nishpa cacharca nijunmi (Jueces 3:18). Ehúd runaguca huaquin gentecunahuanmi Eglón shuti runaman huaquin cosascunata carangapaj rirca. Shinapash ña Eglón shuti runapa huasimanda llujshishpami paipa cumbacunataca richilla nishpaca cacharca. Chai jipami, Ehúd runaguca cutin Eglón shuti runapaman tigrarca.
Ehúd runaguca Guilgal shuti pueblopi yanga dioscuna tianajuj pambamandalla cutin tigrashpami, cashna nirca: “Jatun Mandajlla, pipash na yachanalla shuj villanatami canman villanata charipani” nishpa. Shinapash, Bibliapica Ehúd runagu Rey Eglonba ñaupapi cutin imashina presentarishcataca na villanllu. Pero Rey Eglonhuan parlangapaj yaicurcami (Jueces 3:19).
Bibliapa valishca yuyaicunata mascashunchi
w05-S 15/1 24 párr. 7
Jueces libropa valishca yuyaicuna
2:10-12. Jehová Diospa tucui rurashcacunata ama cungangapaca Bibliata estudiangapaj, shuj horariota charina capanchi (Salmo 103:2). Shinaca taitamamacunami paicunapa huahuacunata aliguta Bibliamanda yachachina can (Deuteronomio 6:6-9).
29 DE NOVIEMBRE—5 DE DICIEMBRE
BIBLIAPA VALISHCA YUYAICUNA | JUECES 4, 5
“Jehová Diosca israelitacunata salvangapaca ishcai huarmigucunatami utilizarca”
w15-S 1/8 12 párr. 6
“Ñucaca Israelcunapa mamashnami shayarircani”
Sísara shutita uyashpallami, israelitacunaca ninanda manllarin carca. Israelitacunapa punllapi causanaca, shinllimi cashcanga. Porque chai punllacunapica Sísara shuti runami, israelitacunataca ninanda llaquichijurca. Incluso Débora huarmigupash chai punllacunapi ñangunata purinaca, peligrosomi carca nin. Chaimandami ñangunapash jichushcashna quedarca nin (Jueces 5:6, 7). Shinallata, chai tiempocunapica israelitacunaca alpacunata na trabajashpa bosquecunapi pacajushpami causan cashcanga. Shinallata israelitacunaca, cananeocuna paicunapa huahuacunata shuhuanata o huarmicunata violanata manllashpami causanajushcanga.
w15-S 1/8 13 párr. 1
“Ñucaca Israelcunapa mamashnami shayarircani”
Jabín shuti jatun mandajca, israelitacunata 20 añoscunata llaquitapash na llaquishpa mandajujpimi Jehová Dios israelitacuna cambiashcata cuenta japirca. Débora y Barac candashca cancionbica, cashnami nin: “Débora ñuca shayaringacamanmi, chashna quedarca. Ñucaca, israelcunapaj mamashnami shayarircani” nishpa. Débora huarmiguca, Lapidot shuti runahuanmi cazarashca carca. Bibliapica paicuna huahuacunata charishcata o na charishcataca na villanllu. Shinapash Débora huarmiguca israelitacunapa mamashnami shayarirca nishpaca, es porque Jehová Dios paitaca agllarca israelitacunata salvachun. Chaimi Débora huarmiguca Sísara runagu macanajuchunmi, Barac runata cayachun mandarca (Jueces 4:3, 6, 7; 5:7).
w15-S 1/8 15 párr. 1
“Ñucaca Israelcunapa mamashnami shayarircani”
Jael huarmiguca, Sísara runataca caiman yaicumui nijpimi paica uchalla carpa huasimanga yaicurca. Chaimi paica Jael huarmigutaca, ñuca caipi cajtaca ama pimanbash villanguichu nishpa samangapaj siririrca. Shinapimi Jael huarmiguca jatachishpa saquirca. Jipamanga yacuta carahuai nijpimi Jael huarmiguca yacuta caranapa randica, tibiolla lecheguta cararca. Chaimi Sísara runaca puñushpa quidarca. Shina puñujujta ricushpami, Jael huarmiguca shuj estacata y mazota japishpa Sísara runapaman upalla quimirishpa, chai estacataca rinri jahua ladomanda alpaman yalijta tacarca. Shinami Jehová Diospa contrataca huañuchirca (Jueces 4:18-21; 5:24-27).
Bibliapa Valishca Yuyaicunata Mascashunchi
Sirvina munaita charishpa Jehová Diosta alabashunchi
9 Jueces capítulo 4pi imalla pasashcacunataca, Jueces capítulo 5pimi ashtahuan villajun. Jueces 5:20, 21pica ninmi: “Luzerocunapash jahua pachamandami macanajurca. Paicuna tianajuj pushtumandapachami, Sísara runahuan macanajurca. Ninanda jatarijuj Cisón shuti huaicu yacumi, fichanshna aparca” nishpa. Shinaca ¿angelcuna ayudajpichu israelitacunaca contracunata misharca? Na cashpaca ¿jahua cielomanda imapash rumicunata tamiachijpichu contracunataca misharca? Bibliapica na imatapash ninllu. Ima cashca cajpipash, Jehová Diosmi israelitacuna minishtijuj horaspipacha, minishtijuj pushtupipacha tamiachirca. Chaimandami Sisarapa 900 carretacunaca na ucha cuyuri usharca. Jueces 4:14, 15pica, quimsa viajecamanmi Jehová Diosmandami contracunataca misharcanchi nin. 10 mil runacunamandaca pipash na nita usharcachu, ñucanchimandami macanajuitaca misharcanchi nishpa.
6-12 DE DICIEMBRE
BIBLIAPA VALISHCA YUYAICUNA | JUECES 6, 7
‘Shinlli tucushpa’ Jehovata sirvipashunchi
w02-S 15/2 6 párr. 5
Bibliapa consejocunaca ñucanchipa alipallatami can
Gedeón runaguca humilde, ali gentemi carca. Por ejemplo, paica ñucami tucuita rurai ushani yashpaca na pensarcachu. Ashtahuangarin israelitacunata ñaupaman pushachun Jehová Dios mingajpica paica: “Ñucaca, chaitaca na rurai ushashachu, na mericinichu nishpami” Jehová Diostaca tigrachirca. Ashtahuangarin “ricui ñuca familiacunaca Manasespa aillupurapica, imagutapash na charijcunamari. Ñuca taitapa huasi ucupurapica, ñucami tucuicunapa jipa capani” nishpami tigrachirca (Jueces 6:12-16).
w05-S 15/7 16 párr. 3
‘Mandaj Diospa y Gedeonba espadamandami macanajugrinchi’
Mandaj Diospa y Gedeonba espadamandami macanajugrinchi nishpa caparijta uyashpami, Madianita soldadocunaca manllarishpa tucuilla pacajunajurca. Shinapash, Gedeonhuan caj 300 jaricunaca paicunata asignashca pushtucunapimi shayanajurca. Shinami madianita gentecunapurallata huañuchirinajurca. Shinapash paicunamanda huaquingunaca, pacajushpa llujshingapaj munajpipash, israelitacunaca na saquircachu. Ashtahuangarin paicunata catiriashpami huañuchirca. Shinami paicunaca tucui madianita gentecunata tucuchirca (Jueces 7:19-25; 8:10-12, 28).
Bibliapa Valishca Yuyaicunata Mascashunchi
w05-S 15/1 26 párr. 6
Jueces libropa valishca yuyaicuna
6:25-27. Gedeón runaguca, paipa contracunata ama yangamanda culirachingapami imagutapash ruragrijushpapash, aliguta pensarishpa ruran carca. Shinallatami ñucanchicunapash predicanajushpaca, gentegucunata na yangamanda culirachingapaj aliguta pensarishpa parlana capanchi.
13-19 DE DICIEMBRE
BIBLIAPA VALISHCA YUYAICUNA | JUECES 8, 9
“Humilde canami ashtahuan ali can”
w00-S 15/8 25 párr. 3
Shujcunahuan tranquilo, ali cangapaca ¿imatata rurana capanchi?
Gedeonga madianita gentecunahuan macanajuj horasmi, Efraín aillu runacunataca ayudahuaichi nishpa mañarca. Chaimi Efraín aillu gentecunaca, Gedeonda ayudangapaj rishpa madianita gentecunataca misharca. Shinapash jipamanga Efrainita aillu gentecunaca Gedeondaca cashnami ninajurca: “¿Canga madianitacunahuan macanajungapaj rijushpatachu ñucanchitaca na cayarcangui?” nishpami shinllita rimanajurca. Shina nijpimi Gedeonga cashna nishpa tigrachirca: “Cangunahuan chimbapurashpa ricujpica, ¿ñucaca imatata rurashcani? ¿Nachu Efraín aillu runacuna pallajushca, Abiezer shuti runapaj miraicuna cozechashcataca ashtahuan yali ali? Madián llactata mandaj Oreb shuti, Zeeb shuti runacunataca Taita Diosmi cangunapaj maquipi churashca. Canguna cashna rurashcahuan chimbapurajpica, ¿ñucaca imatata rurashcani?” nircami (Jueces 8:1-3). Gedeón runaguca ama paicunapura macanajungapami Efraín aillu gentecunahuanga, ali shimicunata utilizashpa parlarca. Shinami paicunaca cutin ali tucurca. Shinaca Gedeón runagupa ejemplomandaca ¿imatata yachajupanchi?
¿Imamandata humilde canaca minishtirishca can?
15 Gedeonba ali ejemplotapash ricupashun. Paica na tucuita ari nishpa humildemi carca. Shuj punllaca Jehová Diosca Gedeondaca mandarcami, Madián llactamanda gentecuna israelitacunata ama llaquichichunmi ayudana cangui nishpa. Shina nijpimi Gedeonga nirca: “Ricui, ñuca familiacunaca, Manasespaj aillu purapica, imagutapash na charijcunamari. Ñuca taitapaj huasi ucu purapica, ñucami tucuicunapaj jipa capani” nishpa (Jueces 6:15). Shina nishpapash Gedeonga Jehová Diospi confiashpami Jehová Dios imata mingashcataca chasquirca. Ashtahuangarin, Jehová Dios imata mingajushcata ali intindingapaj munashpami Jehová Diosta ayudahuai nishpa Gedeonga mañarca (Jueces 6:36-40). Gedeonga macanajunata na manllashpapash seguro cangapami munarca (Jueces 6:11, 27). Jipamanga gentecuna paita mandachun churangapaj munajpipash Gedeonga na munarcachu. Shinami Jehová Dios mingashcata pactachishca jipaca, paipa huasiman Gedeonga tigrarca (Jueces 8:22, 23, 29).
w08-S 15/2 9 párr. 9
Jehová Dios causachun munashcashnami causana capanchi
9 Jehová Diospa amigo cangapaca na jariyashpa, humilde shungutami charina capanchi (1 Ped. 3:8; Sal. 138:6). Jueces capítulo 9pica, humilde canamandami parlan. Chaipica Gedeón runagupa churi Jotán, shuj chimbapuraita parlashcatami ricuchin. Chai chimbapuraimanda parlashpami Jotán runaguca cashna nirca: “Shuj punllaca quirucunaca, jatun mandajta charishun nishpami, parlarinajurca” nishpa. Chai chimbapuraipica olivos quirupash, jigos yurapash, uvas yurapash ali gentecunatami ricuchin. Shinallata paicunaca, paicunapura huauquicunata na mandangapaj munashca israelita jaricunatami ricuchin. Cutin casha yuraca, nali runatami ricuchin. Chai casha yuraca, jariyashca Abimélec runatami ricuchin. Chai Abimélec runaca israelcunataca ña quimsa huatatami cazuchishpa mandajurca. Shinapash jipamanga llaquinaitami huañurca (Jue. 9:8-15, 22, 50-54). Shinaca, chaimandami ali gente, humildemi cana capanchi.
Bibliapa Valishca Yuyaicunata Mascashunchi
it-1-S 763 párr. 6
Efod, I
Bibliapica Gedeón runagu chai efod nishcata adorashcataca na ninllu. Ashtahuangarin apóstol Pabloca nircami que Gedeón runaca Jehová Diosta ali pacha sirvij runagumi carca nishpa (Heb 11:32; 12:1).
20-26 DE DICIEMBRE
BIBLIAPA VALISHCA YUYAICUNA | JUECES 10-12
“Jefté runaguca Taita Diosta alipacha sirvij runagumi carca”
Jehová Diosca paipi crishpa feta charijcunataca alicachishpami chasquin
9 Jeftetaca Josepa ali ejemplopashmi ayudashcanga. Joseca paipa huauquicunamanda na ricunayachishca cashpapash llaquishpami paipa huauquicunataca tratarca (Génesis 37:4; 45:4, 5). Jefteca chaita yarishpami Jehová munashcashna paipash rurashcanga. Jefteca paipa huauquicuna ninanda llaquichijpi sufrishca cashpapash na paipilla pensarijurcachu. Paipaca Jehovapa llactata difindina, Jehovapa shutita difindinami ashtahuan minishtirishca carca (Jueces 11:9). Jehovapi confiashcata ricuchingapami tucui shunguhuan munarca. Chaita ricushpami Jehová Diosca Jeftetapash paipa llactatapash bendiciarca (Hebreos 11:32, 33).
it-2-S 25 párr. 5
Jefté
Jefté runaguca, ammonitacunata jatun mandaj runata cashna nichunmi huaquin gentecunataca cacharca, “canga ¿imamandata ñucata fiñashpa, ñuca llactapi causajcunahuan macanajungapaj shamujungui?” nishpa. Shina nijpimi ammonitacunata jatun mandajca “israelitacunami ñuca llactata quichurca” nishpa tigrachirca (Jue 11:12, 13). Shinapash Jefté runaguca Jehová Dios imacunatalla rurashcata, shinallata paipa llactata imashina tratashcataca alimi yacharca. Chaimandami ammonitacunata jatun mandajtaca cashna nishpa tigrachirca, israelitacunaca ni Ammón gentecunapa alpacunatapash, ni Moab llactapi alpacunatapash, ni Edom llactapi alpacunatapash na japishcachu nishpami tigrachirca (Jue 11:14-18; Dt 2:9, 19, 37; 2Cr 20:10, 11). Shinallata Jefté runaguca cai alpacunaca ammonita gentecunapaca na canllu nishpami tigrachirca. Ashtahuangarin Canaán llactamanda amorreo gentecunami chai alpacunapica causanajurca nircami. Shinapimi Jehová Diosca chai alpacunapi jatun mandaj Sehón shuti runataca, israelitacunapa maquipi churarca. Shinami chai alpacunaca israelitacunapa quidarca nircami. Shinallata ña 300 huatacunatami ammonita gentecunaca, israelitacunataca alpacunamandaca nimata na nishpa causan carca. Shinaca cunan chaira shina alpata reclamanataca na charircachu (Jue 11:19-27).
it-2-S 25 párr. 6
Jefté
Jefté runaguca, Jehová Diosmi cai alpacunataca israelita gentecunaman cararca nishpami villarca. Chaimandami yanga diosta sirvij gentecunamanga Jehová Dios carashca alpataca na cushachu nishpa tigrachirca.
Bibliapa Valishca Yuyaicunata Mascashunchi
it-2-S 24
Jefté
Jefté runaguca, propio churimi carca. Jefté runagupa mamaca, nara Galaad runahuan cazarashpaca culquimanda huainayaj huarmimi carca. Shinaca Jefteca Galaad shuti runapa propio churimi carca (Jue 11:1; Jos 2:1; Mt 1:5, TNM). Shinapash Galaad runaca nara Jeftepa mamahuan cazarashpaca, ñami shuj huarmihuan cazarashca carca. Chaimandami Jefteca lahuauquicunata charirca. Y chai lahuauquicunaca, Jeftepash paicunapa taitapa herenciata ama japichunmi, Jeftetaca huasimanda calpachirca. Y shina rurashpami, paicunaca Jeftepash, paicunapa taita Galaadpa propio churi cashcata ricuchirca (Jue 11:2). Shinapash, tiempohuanga Jefté runaguca Galaad llactata Mandajmi tucurca (Jue 11:11). Shinallata, Jefté runaguca tabernáculo carpa huasipimi Jehová Diosmanga shuj sacrificiota curca (Jue 11:30, 31). Shinaca Jefteca, Galaad shuti runapa propio churi cashcamandami chai tucui cosascunataca rurai usharca, denoca na ruraita ushanmanllu carca. Porque Moisesman Cushca Leypica cashnami nijurca: “Huainayashpa charishca churipash Mandaj Diospa tandanajuipica na yaicui ushangachu. Paipa miraicunaca chunga miraicamanmi, Mandaj Diospa tandanajuipica na yaicui ushanga” nijurcami (Dt 23:2).
27 DE DICIEMBRE—2 DE ENERO
BIBLIAPA VALISHCA YUYAICUNA | JUECES 13, 14
“Manóah runagumanda y paipa huarmigumandaca ¿imatata taitamamacunaca yachajuita ushan?”
w13-S 15/8 16 párr. 1
Taitamamacuna, huahuacunataca uchillamandapachami yachachina capanguichi
Manóah shuti runagupa huarmiguca, huahuacunataca na charita usharcachu. Chaimandami shuj punllaca Jehová Diospa ángel, paipa huarmiguman ricurishpa “canga shuj jari huahuagutami charigringui” nishpa villarca (Juec. 13:2, 3). Chaita yuyashpaca Manóah shuti runagupash y paipa huarmigupash ninandami cushijushcanga. Shinapash huahuata imashina viñachinata na yachashpami Taita Diostaca cashna nishpa mañarca: “Ñuca Jatun Dioslla, can Taita Dios cachamushca, cambaj runagutaca ñucanchipajman cutin cachamupangui. Pai shamushpaca, chai huacharina huahuaguta imashna viñachinata ñucanchiman yachachijuchun cachamupangui nircami” (Juec. 13:8). Paicunaca, paicunapa churi Sansón Jehová Dios munashcashna viñashpa causachun munaimandami, huahuamandapacha Jehová Diospa leycunata yachachishpa viñachirca. Chaimandami tiempohuanga “Mandaj Diospa espirituca, Sansón shuti runapajman shamui callarirca”. Chaimandami Sansonga, Jehová Dios ayudajpi israelitacunataca juez shina mandajurca. Shinallata ashtaca manllarina jatun cosascunatami rurarca (Juec. 13:25; 14:5, 6; 15:14, 15).
w05-S 15/3 25 párr. 5
Jehová Dios ayudajpimi, Sansón runaguca misharca
Shuj punllaca Sansonga paipa taitamamamanga cashnami nirca: ‘Timnat shuti pueblopimi filisteocunapaj ushi puracunamanda, shuj huarmita ricurcani. Chai huarmihuan cazarachihuaichi nipanimi’ nircami (Jueces 14:2). Sansonga israelitacunata paicunapa contracunamanda quishpichinapa randica, contracunahuanrami familiapura tucungapaj munajurca. Aunque Taita Dios cushca Leypica, yanga dioscunata sirvij gentecunahuanga na cazaranachu canguichi nishpa mandajujpipash, Sansonga chaitarami rurangapaj munarca (Éxodo 34:11-16). Chaimandami Sansonba taitapash, mamapash cashna ninajurca: “Circunsición nishcata na rurashca filisteo huarmicunahuan cazarangapaj ringapaca, ¿nachu canba familia purapillata, na cashpaca, tucui cai ñucanchi purapillata huarmicuna tian?” ninajurca (Jueces 14:3).
Bibliapa Valishca Yuyaicunata Mascashunchi
w05-S 15/3 26 párr. 1
Jehová Dios ayudajpimi, Sansón runaguca misharca
¿Imamandata Sansón runaguca chai filistea huarmihuan cazarangapaj munarca? Sansonga talvez chai huarmi juyaillagu caimanda, ali shungu huarmigu caimandaca na paihuan cazarangapaj munarcachu. Ashtahuangarin shuj razonmandami paihuan cazarangapaj munarca. Imashinami Jueces 14:4pi ricuchin, ninmi que Sansón runaguca, ‘filisteocunahuan macanajungapami, chashna rurajurca’ nin. Shinaca chaimandami chai filistea huarmihuan cazarangapaj munarca. Shinallata Sansón asha asha viñashpa catijpimi, ‘Mandaj Diospa espirituca, paipaman shamui callarirca’ ninmi. Shina nishpaca, pai imata ruranata Jehová Dios ricuchijushcatami ningapaj munan (Jueces 13:25). Shinaca Sansón runagu israelitacunata juez shina mandajujpica, Jehová Diosmi siempre imata ruranataca ricuchijurca.