Levitacunapa oracionmandaca ¿imatata yachajunchi?

1. a) Israelitacunapa ¿maijan tandanajuimandata yachajugripanchi? b) ¿Ima tapuicunatata yachajupashun?

LEVITACUNACA tandanajushpa Jehová Diosta mañashunchi nishpami israelitacunataca nirca: ‘Cangunata Mandaj Taita Diostaca causaita causaicaman aligumari cangui ningapaj jatarichi’ nishpa. Tucuilla Bibliata ricujpica chai oracionmi ashtahuan largo can (Neh. 9:​4, 5). Levitacunaca Jesús shamungapaj 455 huatacuna faltajujpimi 24 de tisri nishca quillapi tandanajurca. (Ñucanchi calendariopica tisri quillaca septiembre/octubrepimi can). Shinaca chai jatun tandanajui imamanda tiai callarishcata pundapica yachajupashun. Chai jipami cai ishcai tapuicunata yachajupashun: Israelitacunaca ¿imashinata chai tandanajui ali llujshichun ayudarca? Levitacunapa oracionmandaca ¿imacunatata yachajuita ushanchi? (Sal. 141:​2.)

SHUJ ALI QUILLAMI TIARCA

2. Israelitacunaca ¿ima ali ejemplotata saquirca?

² Judiocunaca 52 punllacunapilla Jerusalenba pircacunata cutin shayachishpami, Taita Diosmanda ashtahuan yachajungapaj munanajurca (Neh. 6:15). Chaimandami tisri quilla callarijujpica jaricuna, huarmicuna, uchila huahuagucunapash ‘yurajlla punllayajuimanda chaupi punllacaman’ tandanajurca. Paicunaca levitacuna, Esdras Diospa Leyta liishpa intindichijta uyangapami plazapi tandanajushpa shayanajurca . Cunan punllacunapi pensarishpaca ali Tandanajui Huasicunatami charinchi. Shinapash ¿nachu huaquinbica imacunapipash pensarishpa nali uyashpa tianajupashcanchi? Shina cajpica israelitacunapa ejemplota catipashunchi. Paicunaca Esdrasta, levitacunata uyashpapash chai shimicuna shunguman chayajpimi, Jehovapa Leytaca na cazunajushcanchichu nishpa huacai callarirca (Neh. 8:​1-9).

3. Israelitacunaca ¿ima mandashcatata cazurca?

³ Shinapash chai punllaca juchacunata villana punllaca na carcachu. Jehovata adorashpa cushijuna punllami carca (Núm. 29:1). Chaimandami Nehemiasca israelitacunata nirca: ‘Cai punllaca ñucanchi Jatun Diospa punllami. Vira aichacunata micungapaj richi, ali mishqui vinotapash ufiaichi. Ima micuna yanushcata na charijcunamanbash ashaguta carashpa cachaichi. Na llaquirinachu canguichi. Mandaj Dios cushijuita cushcamandami ushaita charinguichi’ nishpa. Shina nijta cazushpami israelitacunaca ninanda chai punllaca ‘cushijunajurca’ (Neh. 8:​10-12).

4. a) Israelpa jatun mandajcunaca ¿imatata rurarca? b) ¿Imatata cuenta japinajurca? c) Fiesta de las Cabañas nishcapica ¿imata ruranata ashtahuan importante carca?

⁴ Cayandi punllaca Israelpa jatun mandajcuna tandanajushpami Diospa Leyta imashina ali pactachinata yachajurca. Chaipimi 15 de tisrimanda 22 de tisricaman Chujllacunapa fiestata o fiesta de las Cabañas nishcata rurana cashcata intindirca. Chaimandami chai fiestata rurangapaj ucha segurai callarirca. Chai fiestataca shuj jatun tandanajuihuanmi tucuchin carian. Josuepa punllacunamandapacha chai punllacunacamanga chai fiestami ashtahuan jatun ali fiesta carca. Tucuilla israelitacunami ‘ninandapacha cushijunajurca’. Ashtahuagarin fiesta de las Cabañas nishcapimi tucuicuna uyajta Diospa Leyta liina carca. Diospa Leyta tucuicuna uyajta liina importante cashcata intindishpami ‘callari punllamandapacha canchis punllacaman’ liinajurca (Neh. 8:​13-18).

JUCHACUNATA VILLANA PUNLLAMI TIARCA

5. Levitacuna Jehovata nara mañajpica ¿imatata israelitacunaca rurarca?

⁵ Fiesta de las Cabañas tucurishcamanda ishcai punllacuna jipaca  24 de tisri punllami carca. Chai punllapimi Diospa Leyta na cazushcanchichu nishpa tucuicuna villana carca. Chai punllaca cushijushpa micuna punllaca na carcachu. Llaquilla caimandami chai punllaca na micushpa, shagra shagra telata rurashca ropata churajurca. Tutamanda callarishpami quimsa horascaman Diospa Leytaca cutin liirca. Chishipica ‘paicunapa juchacunata villashpami Taita Diosta alicachinajurca’ . Chai jipami levitacunaca tucuilla israelitacunapa shutipi Jehovata mañarca (Neh. 9:​1-4).

6. a) Levitacunaca ¿imamandata shuj ali oracionda rurai usharca? b) ¿Imatata paicunapa ejemplomandaca yachajupanchi?

⁶ Levitacunaca Jehovapa Leyta liimandami ali oracionda rurashcanga. Callaripica Jehovamanda, Jehovapa rurashcacunamanda parlashpami mañarca. Chai jipaca, tauca juchacunatami rurashcanchi, perdonda mañana derechotaca na charinchichu nishpami oraciondaca rurarca (Neh. 9:​19, 27, 28, 31). Ñucanchicunapash ali oraciongunata rurangapaca levitacunapa ejemplota catishpami, cada punlla Diospa Shimita liishpa pensarina canchi. Shinami pundapica Taita Dios parlachun saquishpa ali oraciongunata rurai ushashun (Sal. 1:​1, 2).

7. a) Levitacunaca ¿imashinata Jehová Diostaca mañarca? b) ¿Imatata levitacunapa ejemplomandaca yachajupanchi?

⁷ Levitacunaca ña mañai tucuchinajushpami Israel llacta imashina sufrishcata yaripangui nishpa cashna mañarca: ‘Ñucanchi Taita Dioslla. Canga ushaita charij, jatun manllana Taita Diosmi capangui. Canga imatalla nishcatapash pactachij, ninanda llaquij Diosmi capangui. Ñucanchita jatun mandajcuna, curacuna, [profetacuna], ñucanchi punda taitacuna, tucuilla canba gentecuna llaquita apanajushcataca ama yanga saquipanguichu’ nishpa (Neh. 9:32). Shinaca ¿imatata levitacunamandaca yachajunchi? Jehová Diosta mañajushpaca paitara alabashpa agradicishpami mañai callarina canchi. Chai jipami ñucanchicuna imata minishtijushcata mañana canchi.

TAITA DIOSPA SHUTITAMI ALABARCA

8, 9. a) Jehovata mañai callarishpaca ¿imashinata levitacunaca humilde cashcata ricuchirca? b) Levitacuna rurashca oracionbica ¿imacunallata Jehovataca alicachishpa alabanajurca?

⁸ Levitacunaca aliguta pensarishpami Jehová Diostaca mañarca. Shinapash callarimandallatami nirca, Jehová Diosta ninanda alicachishpa mañanajushpapash paita aliguta alabanataca na pactachinajunchichu nishpa. Chaimandami levitacunaca tucuilla israelitacunapa shutipi Taita Diostaca cashna mañarca: ‘Alimari cangui nishpa alicachi tucunamandaca canba punchapamba shutigu’ ashtahuanga alicachi tucupachun nishpa (Neh. 9:5).

⁹ Shinallata mañarcami: ‘Canllami Mandaj Dios cangui. Canllami jahua pachatapash, ashtahuan jahuaman jahua pachatapash chaipi imalla tiajcunandi, cai pachatapash caipi imalla tiajcunandi, mama cuchatapash chaipi imalla tiajcunandi rurashcangui. Jahua pachapi causanajuj angelcunapashmi candaca ninanda alicachinajun’ nishpa (Neh. 9:6). Jehová Diosmi jahua pachapipash cai Alpapipash tucuita rurarca. Jehová Dios rurajpimi cai Alpapica juyailla plantagucuna, animalgucunapash tian. Ashtahuangarin jahua pachapi angelcunatapashmi Jehová Diosca rurarca (1 Rey. 22:19; Job 38:​4, 7). Chai angelcunaca humilde caimandami Jehovapa munaita pactachishpa gentecunataca ayudanajun (Heb. 1:14). Shinaca paicunapa ejemplota catishpa tucuicunallata tandanajushpa, humildadhuan Jehová Diostaca sirvishunchi (1 Cor. 14:​33, 40, NM).

10. Abrahanda imashina tratashcamandaca ¿imatata yachajupanchi?

¹⁰ Chai jipaca Abranda imashina cuidashcata yarishpami levitacunaca oracionda rurarca. Abranba huarmi Saraica na huahuata chari ushanllu carca. Shinapash 99 huatacunata charijpimi Jehová Diosca ‘ashtaca gentecunapa taitami’ tucungui nishpa Abrandaca Abrahán shutita churarca (Gén. 17:​1-6, 15, 16). Ashtahuangarin Abrahandaca nircami, canba huahuacunami Canaán alpacunata japinga nishpa. Cunanga, gentecunapi ashaguta pensarishunchi. ¿Nachu huaquinbica imata rurasha nishpapash cungashpa na pactachinchi? Shinapash Jehová Diosca pai imata rurasha nishcataca nunca na cunganllu. Chaimandami levitacunaca nirca: ‘Mandaj Dioslla canmi taita Abranda agllarcangui. Shinami Ur shuti pueblomanda llujchishpa, Abrahán shutita shutichishcangui. Tucui shunguhuan cazujpimi cananeo gentecunapa llactata, paipa miraicunaman carangapaj ari nishcangui. [Alita] ruraj cashpami, chaitaca pactachishcangui’ nishpa (Neh. 9:​7, 8). Shinaca imata rurasha nishpapash Jehovapa ejemplota catishpa tucuita pactachipashunchi (Mat. 5:37).

JEHOVÁ IMASHINA SALVASHCATAMI PARLARCA

11, 12. a) Jehová shutica ¿imatata nisha nin? b) Jehová Diosca ¿imashinata pailla chai shutita charina cashcata ricuchirca?

¹¹ Jehová shutica ‘Ñucaca, ñuca munashcashnami tucusha’ nisha ninmi. Shinaca imatapash rurasha nishpaca asha ashami Jehová Diosca pactachishpa rin. Shuj ejemplota ricupashun. Abrahanba huahuacuna Egipto llactapi cajpica, na crinashnalla uyarijpipash Jehová Diosca nircami, Egiptomanda llujchishpami Canaán alpacunata cusha nishpa. Chai shimicunata asha asha pactachishpa catishpami pailla Jehová shuti canata ricuchirca.

¹² Nehemías escribishcashnaca, levitacunaca cashna nishpami Jehovataca mañashpa catirca: ‘Ñucanchi ñaupa taitacunataca Egiptopi llaquinaita causanajujtami ricushcangui. Chaimandami Puca Cucha manñapi cashpa caparishpa mañajtapash uyashcangui. Faraondapash tucui paita sirvijcunatapash paipa llactapi causajcunatapash ninanda fiñashpami, jatun manllarinacunata rurashcangui. Chaita rurashpami tucuicuna rijsishca tucushcangui. Canga israelitacunata ninanda jariyashpa llaquichinajujta yachashpami chashna rurarcangui. Israelitacunapa ñaupajpi mama cuchatapash chaupijpimi chaquishca alpata yalinajurca. Ashtahuangarin paicunata llaquichingapaj catijcunataca, jatun rumita yacu ucuman shitanshnami yacu ucupi shitashcangui’ nishpa. Levitacunaca Jehová Dios paicunapa ñaupa taitacunata cuidashcata yarishpami nircapash: Israelitacunapa ‘ñaupajpimi cananeocunataca urai cumuchishcangui. Muyundi pircashca pueblocunata, ali fucuj alpacunata, huasicunatapashmi japinajushca. Yacuta tandachingapaj rurashca jatun utujucunata, uvas chagracunata, olivos yuracunata, shuj shuj yuracunatapashmi japinajushca. Shinami, vijsa pactajta micushpa, can juyashpa carashcamandaca cushijushpa causanajushca’ nishpa (Neh. 9:​9-11, 24, 25).

13. a) Egiptomanda llujchishca jipaca ¿imatata Jehová Diosca rurarca? b) ¿Imatata israelitacunaca rurarca?

¹³ Egiptomanda llujchishca jipaca paipa nishcacunata pactachingapami Jehová Diosca leycunata israelitacunamanga curca. Shinami israelitacunaca Jehovata aliguta adorai usharca. Levitacunaca Jehová Diostaca nircami: ‘Sinaí shuti urcuman uriajumushpami paicunamanga ali yachachishcacunata, na llullaj mandashcacunata cushcangui’ nishpa (Neh. 9:13). Jehová Diosca israelitacunata agllashpami paipa shutita paicunaman curca. Paipa shutita na mapayachinatapash yachachircami. Shinapash ñapashmi paicunaca Jehovapa mandashcacunata cungarca (Nehemías 9:​16-18, lingui).

DISCIPLINATA CUCHUNMI MINISHTIRCA

14, 15. a) Israelitacuna na cazujpipash ¿imashinata Jehová Diosca cuidashpa catirca? b) Israelitacunata Jehová Dios cuidashcamandaca ¿imatata yachajupanchi?

¹⁴ Israelitacunaca Sinaí shuti urcupimi Jehová Diostaca canba tucui mandashcacunata pactachishunllami nirca. Shina nishpapash ishcai jatun juchacunatami rurarca. Chai chaquishca pambacunapi huañuchun saquinalla cashpapash Jehová Diosca paicunata cuidariajurcami. Chaimandami levitacunaca Jehovata alabashpa cashna mañanajurca: ‘Tucuillata ninanda juyashpami jichushca pambapica na saquishcangui. [40] huatacunatami cuidashpa charishcangui. Paicunapa churajunacunapash na maucashcachu, chaquicunapash na punguishcachu’ nishpa (Neh. 9:​19, 21). Cunan punllacunapipash Jehová cuidajpimi paita cazushpa aliguta sirvi ushanchi. Ñucanchicunapash na chai israelitacunashna cangapaj munanchichu. Paicunaca shinlli feta na charishpami chaquishca alpacunapi huañurca. Chaimandami Bibliapica nin: ‘Ñaupa taitacuna imashna tucushcata tucurimui punllacunapi causajcuna yachachunmi escribishpa’ saquirca nishpa (1 Cor. 10:​1-11).

¹⁵ Canaán alpacunapi causanajushpaca chai gentecunashnami israelitacunaca pinganai cosascunata rurashpa, huahuacunatapash huañuchishpa, yanga dioscunata adoranajurca. Chaimandami Jehová Diosca shuj llactacuna shamushpa israelitacunata llaquichichun saquirca. Israelitacuna nali ruraicunamanda arripintirijpica Jehová Diosca paicunata llaquishpami perdonarca, contra llactacuna llaquichichunbash na saquircachu. Nalita rurashcacunamanda cutin cutin arripintirijpica Jehová Diospashmi cutin cutin perdonarca (Nehemías 9:​26-28, 31, liingui). Levitacunaca nircami, Jehová Dioslla ñucanchicunataca ashtaca huatacunata llaquishcatami ricuchishcangui. Chaimandami canba [profetacunahuan] villachishcangui. Villachijpipash na uyanayachijpimi, shuj llactamanda gentecunapa maquipi churashcangui’ nishpa (Neh. 9:30).

16, 17. a) Paicunapa llactaman tigrashca jipa Jehovata na cazushpaca ¿imata israelitacunaca tucurca? b) Israelitacunaca ¿imatata minishtirca? c) ¿Imatata israelitacunaca rurashunllami nirca?

¹⁶ Babiloniamanda llujshishpa paicunapa llactaman tigrashca jipapash israelitacunaca cutinmi Jehovata na cazurca. Chaimandami levitacunaca nirca: ‘Cunanga ñucanchi ñaupa taitacunaman carashca llactapillatami sirvijcuna tucushcanchi. Ñucanchi juchacunamandallatami llactapi fucushca granocunatapash ñucanchita mandajcuna micunajun. Chaimandami ñucanchica jatun llaquipi causanajunchi’ nishpa (Neh. 9:​36, 37).

¹⁷ Na cazuimandami israelitacunaca Taita Dios disciplinachun minishtirca. Chaimandami levitacunaca nirca: ‘Canga [alita] ruraj cashpami, ñucanchitaca chashna llaquichishcangui. Canga aligutallami rurashcangui. Ñucanchimi nalita rurashcanchi’ nishpa (Neh. 9:33). Levitacunaca Diospa tucui mandashcacunata cazushun nishpami oraciondaca tucuchirca (Nehemías 9:​38, liingui; 10:29). Cazushunmi nishcata pactachingapami 84 ñaupajman pushaj judiocunaca paicuna ima nishcata escribishpa sellarca (Neh. 10:​1-27).

18, 19. a) Paraíso Alpagupi causangapaca ¿imatata rurana capanchi? b) ¿Imatata cutin cutin mañashpa catina capanchi? c) ¿Imamandata cutin cutin chaita mañana capanchi?

¹⁸ Paraíso alpagupi causangapaj munashpaca Jehová Dios ñucanchita disciplinachun, ayudachunmi saquina canchi. Apóstol Pabloca nircami: ‘¿Maijan churitata taitaca na llaquichishpa [“disciplinashpa”, NM] charin? nishpa (Heb. 12:7). Jehovapa disciplinata chasquishpa Jehovata aliguta sirvishpa, Jehová Dios ñucanchita yachachichun saquipashunchi. Cutin juchata rurashpaca shungumanda arripintirishpa Jehová Dios disciplinachun saquipashunchi.

¹⁹ Ñallami Jehová Diosca paipa shutita ashtahuan jatunyachishpa ñucanchicunataca israelitacunata cuenda salvanga (Ezeq. 38:23). Ashtahuangarin, imashinami israelitacunaca Canaán alpacunata chasquirca shinallatami ñucanchicunapash Jehová Diosta cazushpaca shuj juyailla paraíso Alpagupi causashun (2 Ped. 3:13). Shinaca cutin cutin mañapashunchi Jehová Diospa shutica jatunyachishca cachun nishpa. Cunanbipash shamuj punllacunapipash Diospa ñaupajpi ali ricurishpa catingapaca Bibliapa shuj oracionmandapashmi shamuj temapica yachajupashun.