Mayor gentecunapa ayudata mascachun yachachipai

HUAHUACUNATACA ¿PICUNATA YACHACHINA CAN?

Tucui huahuacunami mayor gentecuna yachachichun, consejachun minishtin. Ashtahuanbachaca taitamamacunami chaitaca ruranapacha can. Shinapash huahuacunataca mayorlla gentecunapashmi ashtaca cosascunata yachachishpa ayudai ushan.

¿IMAMANDATA MINISHTIRISHCA CAN?

Tauca llactacunapimi, jovengunaca paicunata yali mayorlla gentecunahuanga asha tiempotalla yalin. Caipi yuyapai:

• Huahuacunaca casi punlla enteromi escuelapi yalin. Chaicunapica mayorlla gentecunaca na yapa tianllu.

• Escuela jipa huasiman tigrajpipash taitamamacuna trabajangapaj rishca cajpimi huahuacunaca paicunalla yalin.

• Estados Unidospi rurashca shuj informepica nircami 8 a 12 huatacunata charij huahuacunaca, 6 horascunatashnami telepi, celularpi, computadorapilla yalin nishpa.a

Hold On to Your Kids (Aférrese a sus hijos) nishca libropica: “Jovengunaca ñana paicunapa taitacunata, profesorcunata, o shuj mayorlla gentecunataca consejocunata mañangapaj mascanllu. Chaipa randica [...] paicunapa edadtallata charij jovengunatami consejocunataca mañan” ninmi.

¿IMASHINATA YACHACHI USHAPANGUI?

Huahuacunahuan tiempota yalipangui

BIBLIAPICA NINMI: “Huahuataca, ali causaita yachachingui. Shina yachachijpica rucuyashpapash, napacha cungangachu” nishpa (Proverbios 22:6).

Huahuacunaca siempremi taitamamacunapa ayudata mascan. Ali estudiashcacunaca ninmi: “Huahuacuna ña solteroyajushpaca taitamamacunapa consejashcatami amigocuna consejashcatapash yali ashtahuan alicachin” nishpa. Psicologiata yachachij Laurence Steinberg shuti jarica, You and Your Adolescent (Su hijo adolescente y usted) nishca libropica nircami: “Ña solteroyajuj tiempomanda mayor de edad callari tiempocamanga taitamamacunapa rurashcacuna, nishcacunami huahuacunapa causaipica ashtahuan ayudan” nishpa. Shinallata “huahuacuna na tucuipi de acuerdo cashpapash quiquin imata nishcata, yuyashcataca siempremi yaipi charin” nircami.

Tucui huahuacunallatami paicunapa taitamamacunataca ninanda alicachishpa ricun. Chaita aprovechashpami huahuacunahuan tiempota yalingapaj, imagutapash yachachingapaj, imapash experienciacunamanda parlangapaj, ima minishtirishca cashcata parlangapapash esforzarina capangui.

Shujcunapa ayudatapash mañapangui

BIBLIAPICA NINMI: “Alipacha yachajushca runacunahuan tandanajuj runaca, alipacha yachajushcami canga” nishpa (Proverbios 13:20).

¿Quiquinba jovenlla huahuacunata ayudangapaj, paicunata yali mayorlla gentecuna tianllu? Quiquinba huahuacuna paicunahuan yalichunga ¿imagutapash rurapashcanguichu? Paicunahuan yalijpipash quiquinllatami taita caimandaca imagutapash yachachishpa catina capangui. Shinapash huahuacunata na llaquichij ali gentecunaca ali viñachichunmi ayudai ushan. Bibliapica Timoteo shuti jovenmandami parlan. Paica apóstol Pablohuan tandanajuimandami tauca cosascunata yachajurca. Pablohuan tandanajunami, ñana jovenlla cangacamanbash ashtacata ayudarca. Ishcandimandami ashtacata ayudarirca (Filipenses 2:20, 22).

Tauca familiacunaca abuelocunahuan, shuj familiarcunahuanga ñana ladolla causanllu. Quiquinbash familiacunata carupi charishpaca, quiquinba solteroyajuj huahuacuna paicunata yali mayorlla gentecunahuan tandanajuchunmi animana capangui. Paicunahuan tandanajunami huahuacunataca, mayorlla gentecuna charishca ali cualidadcunata charichun ayudanga.