¿Gentecunaca shujcunata respetanllu?

**¿IMAMANDATA SHUJCUNATA RESPETANACA IMPORTANTE CAN?**

Shujcunata respetashpami, problemapi cashpaca calmarita ushashun y problematapash na ashtahuan mirachishun.

Bibliapica ninmi: “Aliguta parlashpa tigrachij shimica, ninanda fiñarishcatapash anchuchinmi. Ashtahuangarin shinllita rimashca shimica, ñapashmi ashtahuan fiñachin” ninmi (Proverbios 15:1). Na respetashpa imatapash nishpa o rurashpaca, ashtahuanmi problemacunataca mirachishun. Shuj llaquicunapipashmi urmashun.
Jesusca “gentecunaca shungupi imata charishcatami parlan” nircami (Mateo 12:34). Shuj llactamanda gentecunata, shuj culturata charijta o shuj raza gentecunata sin respeto tratashpaca, talvez ñucanchi shungu ucupi shuj problemata charishcata, cambiana cashcatami ricuchinajunchi.

Chairallami 28 llactacunapi 32 mil yali gentecunata shuj encuestata rurarca. Chai tucuicunamanda 65 por cientoca, cunanbimi gentecunaca ashtahuan sin respeto, sin educación parlanata yachan nirca.

¿IMATATA RURAI USHAPANGUI?

Pihuan parlajushpapash aunque na quiquinshna pensajpipash, tucuicunatami respetohuan tratana capangui. Chaipaca paicunahuan imapi de acuerdo cashcata mascashpami parlana capangui. Shinami shujcunata nalicachishpaca na parlanajushun, ni criticaitapash na criticanajushun.

“Cangunata Taita Dios ama juzgachunga, shujcunata criticanataca saquinami canguichi” (Mateo 7:1).

Quiquinda ali tratachun munashcashnami shujcunatapash ali tratana capangui. Shujcunata cushilla ali tratajpica, paicunapashmi quiquindaca talvez ali tratanga.

“Imashinami cangunata tratachun munanguichi, shinallatami cangunapash shujcunataca tratana canguichi” (Lucas 6:31).

Perdonana munaitami charina capangui. Na ñapash imacunatapash pensajunachu capangui. Pipash ashata groserolla imatapash nijpi o imatapash rurajpica mejor shina saquinallami capangui.

“Aliguta yarishpa causaj runaca, ñapash fiñarishpapash jarcarinmi. Fiñachijpipash upalla yalij runami, alicachi tucun” (Proverbios 19:11).

Reunión nara callarijpillatami testigo de Jehovacunapa Salón de Reinopica shuj shuj edadta charishpapash, shuj shuj llactacunamanda cashpapash cushijushpa saludarinajun y parlanajun.

¿IMATATA TESTIGO DE JEHOVACUNACA RURANAJUNCHI?

Maipi causashpa o maipi trabajashpapash testigo de Jehovacunaca tucuicunatami respetanchi y shujcunatapash respetachunmi animapanchi.

Tucui gentecunamanmi Bibliata gratis yachajuna oportunidadta cunchi. Pero nunca na ñucanchishna pensachun o ñucanchi creenciacunata catichunga na obliganchichu. Ashtahuangarin Bibliapi nishcashnami ‘aliguman y tucui shunguhuan respetashcata ricuchishpa’ ñucanchi imata crishcataca parlanchi (1 Pedro 3:15; 2 Timoteo 2:24).

Tucui laya gentecunatami igual tratanchi. Bibliata yachajungapaj munashpa ima laya gentecuna ñucanchi reuniongunaman shamujpipash, tucuicunatami cushijushpa chasquipanchi. ‘Tucui laya gentecunatami respetapanchi’ (1 Pedro 2:17).

Gobiernocunapa autoridadtapashmi respetanchi. Maipi cashpapashmi gobiernocunataca respetanchi (Romanos 13:1). Leycunatapash cazunchi, impuestocunatapashmi paganchi. Política cosascunapi nimamanda na chapurishpapash, política cosascunapi gentecunallata paicunapa decisiongunata japichunmi saquipanchi.