¿Gentecunaca causaita respetanllu?

**¿IMAMANDATA CAUSAITA RESPETANACA IMPORTANTE CAN?**

Ñucanchi saludta y seguridadta peligropi churaj cosascunata rurashpaca, ñucanchipa y shujcunapa causaitapash na respetashcatami ricuchinajunchi.

Tabacota fumajcunaca cáncer unguitami japin. Ña cancerhuan cashpaca, tabacota fumajcunapa cuerpoca chai unguitaca na aguantai ushanllu. Ashtaca ashtaca gentecunaca, tabacota fumaimanda o tabaco cushnita respiraimandami cáncer al pulmón unguihuan huañushca.
Cada huatami ashtaca gentecunaca disparocuna tiashcamanda sufrin. Estados Unidosmanda Universidad de Stanfordca ninmi: “Disparocunamanda salvarishpapash estudiantecunaca ashtaca huatacunatami emocionalmente afectado quidashca” ninmi.
Machashca o drogarishca manejaj gentecunaca, chaishuj manejadorcunatapash y ñanda yalijcunatapashmi peligropi churan. Causaita na respetaj gentecunapa culpamandami ashtaca gentecunaca llaqui apashca.

¿IMATATA RURAI USHAPANGUI?

Saludta cuidanami capangui. Fumashpa, tabaco samaita shuj aparatocunahuan chupashpa, yapata ufiashpa o drogarishpami ñucanchi cuerpotaca huaglichinchi. Shinapash chaicunataca saquita ushanchimi. Chaicunaca ñucanchi saludtami huaglichin. Shinallata, ñucanchi ladopi gentecunata y ñucanchi familiapa causaita na respetashcatami ricuchin.

‘Ñucanchi cuerpota mapayachij cosascunamandaca limpiarinami capanchi’ (2 Corintios 7:1).

Quiquinbi y shujcunapimi pensarina capangui. Quiquinba huasipi ama imapash accidente tiachunmi, huasi ali estadopi cachun ricuriana capangui. Cuidadohuanmi manejana capangui y carropash ali estadopi cachunmi ricuriana capangui. Imapash peligro tiaj o hasta huañuna peligro tiaj cosascunata rurachun shujcuna atichinajujpipash na ruranachu cangui.

“Mushuj huasita huasichishpaca, huasi jahua muyundipi patata rurangui. Shina rurashpami, maijambash chai jahuamanda urmashpa huañujpipash, na juchachi tucungui” (Deuteronomio 22:8).a

Shujcunata llaquishcataca ricuchinami capangui. Shuj raza, shuj llactamanda gentecunata, pobrecunata, charijcunata, estudiashcacunata o na estudiashcacunataca ¿imashinata tratanchi? Paicunata ali tratashpaca paicunapa causaita respetashcatami ricuchinchi. Cutin nali tratashpaca paicunapa causaita na respetashcatami ricuchinchi. Shujcunata odiaimanda, na ricunayachimandami cai mundopica ashtahuan llaquicuna, guerracunapash miranajun.

“Ima resintirinacunatapash, culiranatapash, caparishpa rimajunatapash, groserota rimanatapash y tucui nali ruraicunatapash saquinami capanguichi. Ashtahuangarin, caishujhuan chaishujhuanmi ali shungu cana capanguichi” (Efesios 4:31, 32).

¿IMATATA TESTIGO DE JEHOVACUNACA RURANAJUNCHI?

Testigo de Jehovacunaca ñucanchi saludta cuidanatami yachachinchi. Bibliata yachachijpimi gentecunaca paicunapa saludta huaglichij costumbrecunata, ruraicunata saqui ushashca.

Ñucanchi proyecto de construcciongunapica, seguridad tiachunmi ricurianchi. Tandanajuna huasicunata y shuj edificiocunatapash ruranajushpaca, ama imapash accidentecuna tiachunmi capacitaciongunata charinchi. Llactapi tiashca normas de seguridadta pactachijujta ricungapami, ñucanchi edificiocunataca seguido inspecciongunata ruranchi.

Llaqui apashcacunatapashmi ayudanchi. Chairallami 200 jatun llaquicuna shuj huatapilla mundo enteropi tiarca. Ñucanchi organizacionga chaicunapi llaqui apashca gentecunata ayudangapami organizarirca. Llaqui apashca gentecunata ayudangapaj donashca casi 12 millón dolarcunatami ocuparcanchi.

Año 2014pica Ébola unguimi África Occidental llactata afectai callarijurca. Cutin 2018pica República Democrática del Congo llactatami Ébola unguica ninanda afectai callarijurca. Chaimi testigo de Jehovacunaca, ama contagiaringapaj imata ruranata yachachircanchi. Shinallata, “La obediencia salva vidas” nishca discursota ashtaca gentecunaman cuchunmi huaquin Testigocunata cacharcanchi. Shinallata ñucanchi tandanajuna huasi entradacunapimi maquita maillangapaj pushtucunata segurarcanchi. Shinallata maquicunata maillanaca importante cashcatami yachachircanchi y ama contagiaringapaj imacunatalla rurana cashcatapashmi yachachircanchi.

Sierra Leona llactapi shuj estación de radioca shuj testigocunata y shuj gentecunatapash Ébola unguihuan ama contagiarichun ayudashcamanda testigo de Jehovacunata felicitashca comentariotami yalichirca.

Salón del Reinoman nara yaicushpallatami testigo de Jehovacunaca maquita maillangapaj filapi pacienciahuan shuyanajun. — Liberia llactapimi año 2014pi Ébola ungui jatarijpimi testigocunaca Salón del Reinoman yaicunapi maquita maillangapaj shayanajun.

a Oriente Medio llactacunapimi chai mandamientotaca pactachin carca. Porque shinami paicunapa familiamanda y shuj gentecunamandapash preocuparina importante cashcata ricuchinajurca.