Jesusca ¿pita can?

Ashtaca gentecunami Jesuspa shutitaca rijsin. Pero paipa shutita rijsishpapash Jesús pipacha cashcataca na ali yachanllu. Gentecunaca, Jesusmandaca shuj shuj yuyaicunatami charin. Pero Bibliapica ¿imatata Jesusmandaca nin?

1. Jesusca ¿pita can?

Jesusca cielopi causaj, ninan ushaita charij shuj espiritumi can. Jehová Diosca Jesustami primero rurarca. Jesusca “Tucui rurashcacunamandaca, paimi primero rurashca can” (Colosenses 1:15). Jehová Diospacha Jesusta rurashca cajpimi, Bibliapica Taita Diospa ‘único Churimi’ can nin (Juan 3:16). Jesusca paipa Taitata ayudashpami tucui ima tiashcatapash rurarca (Proverbios 8:​30, liipangui). Jesusca cunangamanmi paipa taitahuanga alipacha llevarin. Paica Taita Diospa nishcacunata, mandashcacunatapashmi yachachin. Chaimi Bibliapica Jesustaca Taita Diospa ‘Shimi’ nishpa rijsin (Juan 1:14).

2. Jesusca ¿imamandashi cai alpamanga shamurca?

Más o menos 2 mil huatacuna huashamanmi Jehová Diosca shuj milagrota rurarca. Paica paipa espíritu santota utilizashpami María huarmigupa vijsapi Jesuspa causaita churarca. Shinami Jesusca cai alpapi nacirirca (Lucas 1:​34, 35, liipangui). Jesusca, Cristo o Mesías cangapami cai alpamanga shamurca. Shinallata gentecunata salvangapapashmi shamurca.a Bibliapi Mesiasmanda parlashca profeciacunaca Jesuspimi pactarirca. Chaicuna pactarijpimi pai ‘causajuj Taita Diospa Churi, Cristo’ cashcata gentecunaca cuenta japina carca (Mateo 16:16).

3. Cunanbica Jesusca ¿maipita can?

Jesús jahua cielopi causangapami shuj espíritu shina causachi tucurca. Chaipimi “Taita Diosca shuj ashtahuan importante cargota paimanga curca” (Filipenses 2:9). Chaimandami cunanbica Jesusca ashtaca autoridadta charin. Shinapash Jehová Diosllami Jesusta yali autoridadtaca charin.

4. Jesusca tucui ushaita charij Taita Diosca na canllu

Bibliapica Jesús ushaita charij espiritu cashpapash, paipa Taita Jehová Diosta cazuj cashcatami ricuchin. ¿Imamandata shina nipanchi? Cai VIDEOPIMI Bibliapi Jesús tucui ushaita charij Taita Dioshuan na igual cashcata ricupangui.

VIDEO: ¿Jesusca Taita Dioschu can? (3:22)

Cai cati textocunaca Jehová Diospash, Jesuspash picuna cashcatami intindichin. Textocunata liishca jipaca tapuicunatapash contestapangui:

Lucas 1:30​manda 32​caman liipangui.

• Ángel nishcashnaca, tucui ushaita charij Jehová Diosca ¿Jesuspaca imata can?

Mateo 3:16 y 17​ta liipangui.

• Jesús bautizarishca jipaca cielomandaca ¿ima nijta uyarimurca?

• ¿Pita chai shimicunataca nirca?

Juan 14:28​ta liipangui.

• ¿Pita ashtahuan autoridadtaca charin: shuj taita o shuj churi?

• Jehová Diosta ‘Ñuca Taita’ nishpaca ¿imatata Jesusca ningapaj munarca?

Juan 12:49​ta liipangui.

• ¿Jesusca paillata Taita Dios cashcatachu nirca? ¿Imata nipanguiman?

5. Jesusmi Mesías carca

VIDEO: Jesuspi pactarishca profeciacuna (3:​03)

Cai cati profeciacunata liishpa, tapuicunatapash contestapangui:

Mesías maipi nacirina cashcata yachangapaca, Miqueas 5:2​ta liipangui.b

• Cai textopi parlashca profeciaca ¿Jesús nacirijpichu pactarirca? (Mateo 2:1).

Mesías huañujpi imacunalla pasana cashcata yachangapaca, Salmo 34:20 y Zacarías 12:10​ta liipangui.

• Cai textopi parlashca profeciacunaca ¿maipita pactarirca? (Juan 19:​33-37).

• Cai profeciacuna pactarichun munashpachu ¿Jesusca imacunatapash rurarca?

• Cai profeciacunamanda yachajushpaca ¿imatata Jesusmandaca yuyapangui?

YARINGAPAJ

Jesusca ninan ushaita charij shuj espiritumi can. Shinallata Taita Diospa churi, Mesiaspashmi can.

¿Imatata yachajupashcanchi?

• ¿Imamandata Jesusca “tucui imatapash nara rurajpillatami, pundallata ña tiashca” nipanchi?

• Cai alpaman nara shamushpaca, Jesusca ¿imatata ruran carca?

• ¿Imamandata Jesús Mesías cashcataca yachapanchi?

CAITAPASH RICUPAI

Jesús Mesías cashcata imamanda yachai ushashcata ricupai.

“¿Bibliapi parlashca profeciacunaca Jesús Mesías cashcatachu ricuchin?” (jw.org paginapi ricupangui)

Taita Diosmandapacha Jesús nacirishcata Bibliapi yachachijta o na yachachijta ricupai.

“¿Imamandata Jesustaca Taita Diospa churimi nishpa rijsin?” (jw.org paginapi ricupangui)

Trinidadmanda ciertopacha Bibliapi yachachijta o na yachachijta ricupai.

“Jesusca ¿Taita Dioschu can?” (Villajun revista, 1 de abril de 2009)

Jesusmanda Bibliapi imata nijta yachajushpa imashina shuj huarmigupa causai cambiashcata ricupai.

“Shuj judía huarmiguca imamanda paipa crishcacunata cambiashcatami parlan” (Rijcharipaichi revista, mayo de 2013)