LECCIÓN 34
Jehová Diosta tucui shunguhuan juyashcataca ¿imashinata ricuchi ushapanchi?
Bibliata yachajui callarishca horasmandaca ¿ashtahuanllu Jehová Diosmanga quimiripashcangui? ¿Jehová Dioshuan ashtahuan ali amigo tucungapaj munanguimanllu? Quiquin Jehová Diosta ashtahuan juyashpa catijpica, paipashmi quiquindaca ninanda juyashpa, cuidashpa catinga. Pero ¿imashinata Jehová Diosta tucui shunguhuan juyashcata ricuchi ushapangui?
1. Jehová Diosta tucui shunguhuan juyashcataca ¿imashinata ricuchi ushapanchi?
Jehová Diosta cazushpami paita juyashcata ricuchipanchi (1 Juan 5:3, liipangui). Jehová Diosca paita cazuchunga pitapash na obliganllu. Chaipa randica, paita cazunata o na cazunata cada uno decidichunmi saquin. ¿Imamandata shina nipanchi? Porque Jehová Diosca paita ‘tucui shunguhuan cazuchunmi’ munan (Romanos 6:17). Shuj shimicunapi parlashpaca, Jehová Diosca obligacionmandalla cazuchunga na munanllu. Chaipa randica, paita juyaimanda cazuchunmi munan. Cai libropa parte 3 y 4ca, Jehová Diosta juyashcata ashtahuan ricuchichunmi ayudanga. Chaipaca pai gushtashca cosascunata rurana cashcata, shinallata pai na gushtashca cosascunamanda caruyana cashcatapashmi yachajupashun.
2. Jehová Diosta juyashcata ricuchinaca ¿imamandata difícil caita ushan?
Alita rurajcunataca “ashtaca llaquicunami japin” (Salmo 34:19). Tucuicunallatami ñucanchi propio defectocunahuan macanajunshna causapanchi. Y chaipa jahuapash huaquinbica culquigu faltalla capanchi, shujcuna ñucanchita llaquichin y shinallata shuj jarcaicunapashmi ñucanchitaca llaquichin. Shina situacionguna ricurijpimi Jehovata cazunaca difícil caita ushan. Shinapash chai situaciongunapi Jehovata cazungapaj esforzarishpaca, tucuita yali paita ashtahuan juyashcatami ricuchipashun. Shinallata paitalla sirvingapaj munashcatapashmi ricuchipashun. Quiquin shina rurajpica, Jehová Diospash quiquindaca nunca na saquingachu (Salmo 4:3, liipangui).
ASHTAHUAN YACHAJUPASHUNCHI
Cunanga ñucanchicuna Jehová Diosta cazujpi pai imamanda cushijujtami yachajupashun. Shinallata paita cazushpa catichun ima ayudajtapashmi ricugripanchi.
3. Satanasca quiquinmandapashmi huasha rimashca
Bibliapi Job libropica, Satanasca Job runagumanda y tucui Jehovata sirvijcunamandapash llullacunata nishpa huasha rimashcatami ricuchipan. Job 1:1 y 1:6manda 2:10caman liishpa, cai tapuicunata contestapangui:
Según Satanasca, Job runaguca ¿imamandata Jehová Diostaca cazujurca? (Job 1:9manda 11caman ricupangui).
Satanasca ¿ima nishpata ñucanchitaca juchachijun? (Job 2:4ta ricupangui).
Job 27:5 segunda parteta liishpa, cai tapuita contestapangui:
Jehová Diosta ciertopacha juyashcataca ¿imashinata Jobca ricuchirca?
Jehová Diosta tucuipi cazushpami Job runaguca paita juyashcata ricuchirca
Ñucanchipash Jehová Diosta tucuipi cazushpami Jehová Diosta juyashcata ricuchipanchi
4. Jehová Diospa shunguta cushichipai
Proverbios 27:11ta liishpa, cai tapuita contestapangui:
Jehová Diosta cazushpa ali decisiongunata agllajpica ¿imashinata Jehová Diosca sintirin?
5. Jehová Diostalla cazuitaca ushapanguimi
Jehová Diosta juyaimandami paimanda shujcunaman parlangapaj munapanchi. Y paitalla cazuna munaimi, difícil cajpipash shujcunaman parlashpa catichun ayudan. VIDEOTA ricushpa, cai tapuicunata contestapangui:
Jehová Diosmanda shujcunaman parlanaca ¿quiquinbaca dificilchu can?
Videopi ricushcashnaca, huauqui Graysonga ¿imashinata paipa manllaicunata mishai usharca?
Jehová Dios na ricunayachishca cosascunata na ricunayachishpa y pai gushtashca cosascunata rurashpami paitaca ashtahuan facillla cazuita ushapashun. Salmo 97:10ta liishpa, cai tapuicunata contestapangui:
Cunangaman yachajushcashnaca ¿ima cosascunatallata Jehová Diosca na ricunayachin? Shinallata ¿ima cosascunatallata gushtan?
¿Imashinata nali cosascunata na ricunayachinata y ali cosascunata ruranatapash yachajuita ushapangui?
6. Jehová Diosta cazushpaca ñucanchillatami beneficiarinchi
Jehová Diosta cazunaca tucuita yali alimi can. Isaías 48:17 y 18ta liishpa, cai tapuicunata contestapangui:
Ñucanchipa ima ali cajta Jehová Dios yachajtaca ¿cripanguichu? ¿Imamandata chaita cripangui?
Bibliata yachajuna y Jehová Diosta ashtahuan rijsinaca ¿imashinata quiquindaca ayudashca?
HUAQUINGUNACA, “Ñuca imata rurajpipash Taita Diospaca na importanllu” ninmi.
Ñucanchi ruraicunahuan Jehová Diosta cushichita o llaquichita ushashcataca ¿ima textohuanda intindichipanguiman?
YARINGAPAJ
Jehová Diosta tucuipi cazushpa y shinallata jarcaicuna ricurijpipash paita sirvishpa catishpami paita juyashcata ricuchipanchi.
¿Imatata yachajupashcanchi?
Jobpa ejemplomandaca ¿imatata yachajupangui?
Jehová Diosta juyashcataca ¿imashinata ricuchi ushapangui?
Jehovata cazushpa causachunga ¿imashi quiquindaca ayudanga?
CAITAPASH RICUPAI
Jehová Diostapash y congregaciondapash tucui shunguhuan cazushcata imashina ricuchinata yachajupai.
“Tucui shunguhuan cazushpa canda na saquij runataca canbash na saquishcatami ricuchingui” (16:49)
Ñucanchita ima llullacunahuanlla Satanás juchachijujta yachajupai.
Huahuacunapash Jehová Diosta juyai ushashcata yachajupai.
Shuj jovenguna nalita rurachun ninanda atichinajujpipash ¿imashinata joven huauquipanigucunaca Jehová Diosta cazushpa catita ushan?