Jehová Diosca paipajman quimirichunmi munan. Na ñavita ricushpalla agllanllu

1. a) Jehová Diospi pensarishpaca ¿imatata nipanguiman? b) Jehovata ashtahuan ali rijsishpaca ¿imatata rurangapaj munapashun?

JEHOVÁ DIOSPI pensarishpaca ¿imatata nipanguiman? ¿Jehová Diosca juyanmi, alitami ruran, ashtacatami yachan, tucui podertami charin nipanguimanllu? Jehová Diosca ali alimi can. Ñucanchi publicaciongunapica ashtaca ashtaca cosascunatami Jehová Diosmandaca yachajushcanchi. Estudio personalpipash o Familiahuan Adorana Tutapipash Jehovamanda yachajushpaca ashtahuan alimi paitaca rijsishun. Jehovata ali rijsishpaca paita ashtahuan juyashpami paipaman quimirishun. Ashtahuangarin Jehovata ali rijsishpami paipa ejemplotapash catingapaj munashun (Jos. 23:8; Sal. 73:28).

2. a) Jehovataca ¿imashinata ashtahuan juyashun? Shuj ejemplota churapai. b) Cai temapipash jipa ishcai temacunapipash ¿imatata yachajupashun?

² Jehová Diostaca ¿imashinata ashtahuan juyashun? Pensaripashunchi: Na rijsishca micunata alicachishpa micungapaca mishquilla ashnajujtarami primeroca mutijina canchi. Chai jipami asha asha malishpa chai micunata alicachishpaca ñucanchillata yanuita ushashun. Shinallata Jehovata ashtahuan juyangapaca Jehová imashina cajtami rijsina canchi. Chai jipaca Jehovamandaca imatata yachajushcani, imashinata paipa ejemplota catina cani nishpami pensarina canchi (Efes. 5:1). Cai temapipash jipa ishcai temacunapipash Jehová imashina cajta o paipa cualidadcunamandami cai quimsa tapuicunata yachajushun: 1) Chai cualidadta charijcunaca ¿imashinata can? 2) Jehová Diosca ¿imashinata chai cualidadta ricuchin? 3) Ñucanchi causaipica ¿imashinata chai cualidadta pactachishun?

JEHOVÁ DIOSCA PAIPAJMAN QUIMIRICHUNMI MUNAN

3, 4. a) Paicunapajman quimirichun munaj gentecunaca ¿imashinata can? b) Jehová Diosca ¿imashinata ricuchishca gentecuna paipajman quimirichun munashcata?

³ Paicunapajman quimirichun munaj gentecunaca cushillami parlan. Shujcunahuan parlangapajpash tiempota llujchinmi. Uyana munaihuan, ayudana munaihuanmi parlan. Paicunahuan parlashpaca alimi sintirinchi.

⁴ Jehová Diosca ¿imashinata ricuchishca paipajman quimirichun munashcata? Taita Diosca tucuita ruraj Dios cashpapash ñucanchi oraciongunata aliguta uyashpa contestangapami munan (Salmo 145:18; Isaías 30:​18, 19, liingui). Taita Diostaca ima horapash maipi cashpapash mañanallami canchi. Cutin cutin mañajujpipash paica na culiranllu (Sal. 65:2; Sant. 1:5). Taita Dioshuan parlashpaca alimi sintirishun. Rey Davidca nircami: ‘Mandaj Diosca [alita] rurajcunata ricuriajunmi’. Paipa ali lado maquihuanmi ñucanchitaca shinlliyachijun nishpa (Sal. 34:15; 63:8). Profeta Isaiaspash Jehová Diostaca llamata michijcunahuan comparashpami nirca: “Huahua llamagucunatapash, paipaj rigrapi churashpami, marcashpa apanga” nishpa (Is. 40:11). Imashinami llamata michijcunaca huahua llamagucunata marcashpa paipa pecho ladogupi churan, shinallatami Jehová Diospash gentecuna paipajman quimirichun munan. Shinaca ¿imashinata ñucanchi Taita Jehová Diospa ejemplota catishun?

ANCIANOCUNACA ¿IMASHINATA CANA CAN?

5. Ancianocunaca ¿imamandata shujcuna paicunapajman quimirishpa parlachun saquina can?

⁵ Chairallami ashtaca llactamanda Testigo de Jehovacunataca tapurca: “Anciano huauquicunaca ¿imashina cachunda munanguichiman? nishpa. Shina nijpimi ashtacacunaca nirca: “Ancianocunapajman quimirishpa parlangapami munanchiman” nishpa. Tucuicunallatami shujcuna ñucanchipajman quimirichun saquina canchi. Shinapash ancianocunami ashtahuanbachaca shujcuna paicunapajman quimirishpa parlachun saquina can (Is. 32:​1, 2). Chaimandami shuj paniguca nirca: “Ancianocuna paicunapajman quimirishpa parlachun saquijpica, paicunata ashtahuan ali rijsishpami animarishpa cushijuiman” nishpa. Shinaca, huauquicuna panicuna ñucanchicunahuan parlashpa ali sintirichunga ¿imatata rurana canchi?

6. Huauquipanicuna ñucanchipajman quimirichunga ¿imatata rurana capanchi?

⁶ Huauquipanicuna ñucanchipajman quimirichunga tucui shunguhuan paicunamanda preocuparishcatami ricuchina canchi. Ancianocuna tucui shunguhuan preocuparijpica huauquicuna, panicuna, jovengunapash chushilla, alimi sintiringa (Mar. 10:​13-16). Carlos huambraguca 12 huatacunatami charin. Paica ninmi: “Ancianocuna tandanajuicunapi cushijushpa tucuicunata saludajujta ricushpaca, ninandami cushijuni” nishpa. Ancianocunaca na shimillachu nina can, shujcuna ñucapajman quimirichunmi munani nishpa (1 Juan 3:18). Shujcuna paicunapajman quimirichun munashcataca ¿imashinata ricuchina can?

7. Tarjeta de solapacunaca ¿imashinata shujcunahuan parlachun ayudan? ¿Imatata yachajupanchi?

⁷ Shuj huauquica quimsa punlla jatun tandanajui jipami tarjeta de solapata churajushca avionbi paipa llactaman tigrajurca. Chaipimi avionbi ayudadorca huauquipa solapapi liirca, “Diospa Reino shamuchun” nijujta. Chaita liishpami avionbi ayudadorca “ari Diospa Reino shamushpami ali canman. Chaimanda parlanami canchi” nirca. Shinami jipaman ashaguta parlashca jipaca revistacunatapash cushijushpa japirca. Ashtacacunami chashna ali experienciacunata charishcanchi. Tarjeta de solapata churajushpaca, “shamui parlapashun, tapuchihuai nijuj cuendami can”. Shinallata, huauquicunapash ancianocuna paicunahuan parlangapaj munashcatami sintina can.

8. Huauquipanicunamanda preocuparishpaca ¿imatata ancianocunaca rurana can? Huauquipanicunapash ¿imashinashi sintiringa?

⁸ Tucui llactacunapillatami shuj shuj costumbrecunata charinchi. Shinapash cushilla, tucui shunguhuan saludashpaca ñucanchi huauquicunamanda preocuparijushcatami ricuchinchi. Shina cashpapash ¿pita pundapica saludana can? Paipa catijcunahuan tandanacushpaca Jesusmi ‘paicunapajman quimirishpa villajurca’ (Mat. 28:18). Cunan punllacunapipash, ancianocunami pundapica huauquicunapajman quimirishpa parlachina can. Ancianocuna shina cajpica ¿imashinata huauquipanicunaca sintiringa? 88 huatacunata charij precursora paniguca nircami: “Ancianocuna Tandanajui Huasipi cushijushpa chasquijpi, ali shimicunata nishpa cushichijpica ashtahuanmi anciano huauquicunataca alicachini” nishpa. Shuj panigupash ninmi: “Anciano turigu tandanajuipi cushilla chasquijpica ninandami cushijuni” nishpa.

HUAUQUICUNAHUAN PARLANGAPAJ TIEMPOTA SURCUNAMI CANCHI

9, 10. a) Jehová Diosca ¿imashinata shuj ali ejemplota saquishca? b) Ancianocunaca ¿imashinata Jehovapa ejemplota catina can?

⁹ Shujcuna ñucanchihuan parlachunga tiempota llujchinami canchi. Jehová Diosca ali ejemplotami cushca. Bibliapica ninmi: “Paica, ñucanchimandaca na carupi canllu” nishpa (Hech. 17:27). Ancianocunaca tandanajui nara callarijpillata o tandanajui jipa huauquicunahuan, panicunahuan, jovengunahuanpash parlangapaj tiempota llujchishpaca alimi canman. Shuj precursor huauquica ninmi: “Ancianocuna alillachu capashcangui nishpa, ñuca imata nijta aliguta uyajpica alimi sintirini” nishpa. 50 huatacunata Jehovata sirvijuj panigupash ninmi: “Tandanajui jipa ancianocuna ñucahuan parlajpica ninandapachami cushijuni” nishpa.

¹⁰ Ancianocunaca ashtaca responsabilidadcunata charishpapash, tandanajuicunapica tucuicunahuan parlangapajmi tiempota surcuna can.

JEHOVÁ DIOSCA NA ÑAVITA RICUSHPALLA AGLLANLLU

11, 12. a) Na ñavita ricushpalla agllajcunaca ¿imashinata can? b) Bibliaca ¿imashinata ricuchin Jehová Diosca na ñavita ricushpalla agllashcata?

¹¹ Jehová Diosca na ñavita ricushpalla agllanllu (Hech. 10:34) Na ñavita ricushpalla agllajcunaca tucuicunatami igual tratangapaj munan. Shinallata runa cashcata, mishu cashcata, pobre cashcata o charij cashcataca na ricunajunllu. Gentecuna paicunapa shungupi imashina cashcatami ricun.

¹² Jehová Diosca shuj ali ejemplotami cun. Bibliapica ninmi: “Taita Diosca na pitapash ñavita ricushpalla chasquinllu” o “llaquichinllu” nishpa (Hechos 10:​34, 35; Deuteronomio 10:17 liingui). Cunanga Moisespa punllacunapi ima tucushcata ricupashun.

13, 14. a) Zelofehadpa picha ushicunaca ¿ima jatun llaquipita carca? b) Tucuicunata igual tratashcamandaca ¿imatata Jehová Diosca rurarca?

¹³ Canaán alpacunaman ña yaicugrijushpaca picha israelita cuitsacunami shuj jatun llaquipi carca. Israelitacuna cashcamandaca paicunapa familiapashmi herenciata japina carca (Núm. 26:​52-55). Chai punllacunapica jari churicunallami taitapa herenciata japin carca. Shinapash, chai picha israelita cuitsacunapa taita Zelofehadca huarmi ushicunatalla charishpami huañurca (Núm. 26:33). Huarmi ushicunalla cajpimi paicuna japina herenciataca shuj familiacunaman cuna carca. Shinaca ¿imatata Zelofehadpa picha ushicunaca rurarca?

¹⁴ Picha ñañapuracunaca Moisespajman rishpami tapurca: “¿Imashpata ñucanchi taitapa shutica, churita na charishcamandalla, paipaj familiapuramanda chinganga?”. ‘Ñucanchimanbash [taitapa] alpata chaupishpa carahuayari’ nirca. Shina nijpica ¿imatata Moisesca rurarca? Moisesca nircachu ¿cangunamandaca na imatapash rurai ushanichu? nishpa. Shina ninapaj randica Moisesca Jehová ‘Diostami tapurca’ (Núm. 27:​2-5). Moisés tapujpica Jehová Diosca nircami: ‘Zelofehadpa ushicunaca, paicuna japinatallatami mañanajun. Paicunapa familiapurapi paicunamanbash alpata chaupishpa cuilla’ nishpa. Ashtahuangarin chai punllamandami Jehová Diosca shuj mushuj leyta churashpa Moisestaca mandarca: ‘Maijambash jari huahuata na charishpa huañujpica, [paipa] charishcacunaca ushipajmi canga’ nishpa (Núm. 27:​6-8; Jos. 17:​1-6). Chai ley llujshishca punllamandapachami israelita ushicunapash herenciata japi usharca.

15. a) Jehová Diosca paita sirvijcunata, llaquipi cajcunatapash ¿imashinata tratan? b) Tucuicunata Jehová Dios igual tratashcata ricuchingapaca ¿ima ejemplocunata Bibliapica tian?

¹⁵ Jehová Diosca cai picha israelita ñañacunatapash ninanda llaquishpami chaishuj israelicunatashna igual tratarca (Sal. 68:5). Caipi yachajushcashnaca Taita Jehová Diosca tucuicunatami igual tratan. Tucuicunata igual tratashcata ricuchingapaca ¿ima ejemplocunata Bibliapica tian? (1 Sam. 16:​1-13; Hech. 10:​30-35, 44-48).

JEHOVÁ DIOSPA EJEMPLOTA CATIPASHUNCHI

16. Jehovapa ejemplota catishpa tucuicunata igual tratangapaca ¿imatata rurana capanchi?

¹⁶ ¿Imashinata Jehovapa ejemplota catishun? Imashinami ña yachajuparcanchi, na ñavita ricushpalla agllajcunaca shungu ucumandami tucuicunata igual tratan. Tucuicunami huaquinbica nishcanchi, ñucaca gulpi gentecunatami igual tratani nishpa. Shinapash, ñucanchillata imashina cajtaca nali yachai ushanchichu. Shinaca ñucanchicuna imashina cashcata ali yachangapaca ¿imatata rurana canchi? Jesusta yaripashunchi. Jesusca paihuan ali llevarij amigocunataca tapurcami, gentecunaca “¿maijan yashpashi ricuhuan?” nishpa (Mat. 16:​13, 14). Ñucanchipash Jesuspa ejemplota catishpami ñucanchihuan ali llevarij amigotaca tapunalla canchi ¿ñucaca imashinata cani? nishpa. Canga agllashpami gentecunataca ali tratangui nijpica, Jehovatami mañana canchi: Quiquinba ejemplota catishpa, charij cajpi, pobre cajpi, runa cajpi o mishu cajpipash tucuicunata igual tratangapaj ayudahuai nishpa (Mat. 7:7; Col. 3:​10, 11).

17. ¿Imashinata tucuicunata ali tratashcata ricuchipanchi?

¹⁷ Congregacionbica Jehovapa ejemplota catishpami tucui huauquipanicunata llaquishpa igual tratangapaj munanchi. Chaimandami pobrecunatapash taitamama illajcunatapash viudacunatapash tucuicunata ñucanchi huasiman invitanalla canchi (Gálatas 2:10; Santiago 1:​27, liingui). Diospa Shimita villachijushpapash na ñavita ricushpallachu villachina canchi, shuj llactamanda gentecunamanbash villachinallami canchi. Chaimandami Jehovapa organizacionga casi 600 shimicunapi revistacunata, librocunata llujchishca.

18. Jehovapa ejemplota catishpaca ¿imatata rurana capanchi?

¹⁸ Imashinami yachajupashcanchi, Jehová Diosca gentecuna paipajman quimirichunmi munan, na ñavita ricushpallachu ali tratan. Chaimandami Jehová Diosta ashtahuan juyashpa, paipa ejemplota catishpa, tucui huauquicunata panicunata shuj gentecunatapash ali tratana capanchi.