Gentecunaca ¿imatata Diosmanda nin?

Taita Diospi na crij gentecunaca shuj letreropica escribircami: “Diospi na crishpapash ashtaca gentecunaca alimi causan” nishpa. Paicunaca Taita Diospi na crishcata, Diosta na minishtishcatami ricuchirca.

Cutin shuj gentecunaca Taita Diospi crinchimi nishpapash Diospi na crij gentecuna cuendami causan. Salvatore Fisichella shuti arzobispo catolicoca paipa religionda catijcunamandaca nircami: “Shujcuna ñucanchita ricushpaca, Taita Diospi na crijcuna cuendami causanguichi ninmanmi” nishpa.

Huaquingunaca ocupado caimandami Taita Diospica yaitallapash na yan. Paicunaca ninmi, carupi cashpaca Taita Diosca imashinata ñucanchitaca ayudanga nishpa. Paicunaca llaquipi cashpalla, paicuna munashca horaspi ayudachun minishtishpallami Diostaca yarin.

Shujcunaca religiongunapa yachachishcacunaca imapapash na valinllu ninmi o iglesiapi yachachishcataca na pactachinllu. Alemania llactamanda 76% catolicocunaca na cazarashpata parejo causanaca na imapash juchachu can ninmi. Shina causashpami paicunapa iglesiapi yachachishcata, Bibliapi yachachishcata na pactachin (1 Corintios 6:18; Hebreos 13:4). Paicunapa iglesiapi yachajushcata na pactachishpa causanajushcataca, catolicocunallaca na cuenta japishcachu. Shuj religiongunata ñaupajman pushajcunapashmi llaquirishpa cashna nin, ñucanchi iglesiapi purijcunaca “Diospi na crijcunashnallami causanajun” nishpa.

Shinaca ¿ciertopachachu Taita Diostaca minishtinchi? Punda tiempomandallatami gentecunaca chashna tapurishca. Cai tapuita yachajungapaca, Bibliapa Génesis libropi imata nishcata ricupashun.