Cientificocunapa investigacionguna

ESPAÑOL shimipi ciencia nishpaca shuj diccionariopica ninmi, cai mundo cosascuna ima cashcata, imashina tiai callarishcata estudianata, investiganatami ciencia nin nishpa. Cientificocunaca ashtaca semanacunata, quillacunata, huatacunata investigashpa huaquin cosascunata yachaj chayashpapash huaquinbica na imatapash yachaj chayashcachu. Cientificocuna investigashca huaquin cosascunaca gentecunata ayudashcami. Imashina ayudashcata ricupashun.

Europa llactamanda shuj jatun companiaca yacuta limpiangapami shinlli plasticohuan shuj jatun filtrota rurarca. 2010 huatapi Haití llactapi llaqui tiajpica chashna filtrocunahuanmi yacutaca limpiarca.

Ñucanchi causanajunchi Alpaca shuj jatun bola cuendami can. Alpa bolamanda jahuamanga satélite nishcacunami churashca tiajuj. Chai satelitecunataca maipi cashcata ricuchichun, maiman ringapaj munashca ñanda ricuchinmi cientificocunaca rurarca. Callaripica soldadocunallami ocupan carca. Shinapash cunanbica pilotocunapash, carropi, barcopi rijcunapash, urcuman rijcunapashmi ocupan.

Cientificocunapa investigaciongunamandami celularcuna, computadoracuna, avionguna, jambicuna, Internetpash tian. Chai cosascunaca ñucanchi ashtahuan ali causachunmi ayudashca.

¿MASHNATATA INVESTIGASHCA?

Cunan punllacunapi cientificocunaca Alpa jahuaman imalla tiashcacunata, cai Alpapi shuj cosascunatapash ashtahuan ashtahuan investigashpami ashtaca cosascunata yachashca. Físico nuclear nishcacunapash ashtahuan yachajungapaj munashpami átomo nishcacunata ashtahuan ashtahuan investigan. Astrofísico nishcacunapash cai Alpapash Alpa jahuapi ima tiashcacunapash imashina tiai callarishcata yachangapami punda punda huatacunapi ima pasashcata investigan. Huaquingunaca yanmi, na ricushca cosascunatapash ushashcata investigashpaca cunangamanga Bibliapi yachachishca shina Taita Dios tiajtaca ña ricuchi ushanami can nishpa.

Cientificocunapash filósofo nishcacunapash shuj shuj yuyaicunatami charin. Amir Aczel shuti famoso escritorca ninmi, cientificocunapash filosofocunapash cienciamanda parlashpami Taita Dios na tiajta ricuchingapaj munan nishpa. Mundo enteropi alipacha rijsishca shuj físico runaca ninmi, ushashcata investigashpapash Taita Dios tiashcata ricuchingapaca pruebacunaca na tianllu. Taita Diosca ima horapash na tiashcachu nishpa. Cutin shujcunaca ninmi, Bibliapi nishca shina Taita Dios tiajta crinaca magiapi crijuj cuendami can. Cientificocuna rurashca investigaciongunaca na pandarinllu nishpa.a

Shinapash ¿cientificocunaca tucuita investigashpa tucuita alipacha yachashpachu shina ninajun? Na. Huaquin cientificocunaca ninmi, ashtacata investigashpa, mushuj cosascunata rurashca cashpapash huaquin cosascunataca nara yachanchichu, nunca na yacharingachu nishpa. Premio Nobel de Física nishcata ganashca Steven Weinberg fisicoca ninmi: “Tucuita alipacha yachaitaca nunca na usharingachu” nishpa. Gran Bretaña llactamanda Martin Rees astronomoca escribircami: “Huaquin cosacunataca nunca na gentecunaca intindi ushashunllu” nishpa. Shinaca ashtaca cosascunata yachanarami cashcanchi. Huaquin ejemplocunata ricupashun:

• 

  Biologocunaca gentecunapa, animalcunapa, plantacunapa cuerpopi celulacuna imashina fuerzata cuj, imashina proteína nishcacunata rurajta imashina shujlla celulamanda ashtaca celulacuna tucujtaca na intindi ushanllu. Ashtaca investigaciongunata rurashpapash na tucuita ali yachai ushashcachu.

• 

  Gravedad nishca tiashcamandami gentecunaca saltashpapash ucuman saltanchi, na juahuanmanga rinchi. Shinallata, gravedad nishcamandami Lunaca ñucanchi Alpa bola ladota siempre muyujun. Shinapash cientificocunaca imamanda gravedad tiashcataca nali intindinllu.

• 

  Cosmologocunaca ninmi, jahua cielomanda ashtahuan jahuaman imalla tiajtaca mushuj alipacha telescopiocunahuanbash na ricuita ushanchichu. Shuj 95%taca na ricui usharinllu ninmi. Na ricui ushashcacunatami cientificocunaca materia oscura, energía oscura nin. Chaicuna imashina funcionajtaca pipash na yachanllu.

Cientificocuna na investigai ushashca cosascunaca ashtacacunami can. Shuj famoso neurologoca ninmi: ‘Ñucanchi umaca ashtaca cosascunatami yachan. Shinapash ashtaca ashtaca cosascunataca nara yachanllu. Cientificocunaca ñami tucuita yachanchi yuyaitaca na pundapi churanachu can. Ashtahuan yachajuna munaitami pundapi churana can’ nishpa.

Cientificocunaca ñami tucuita yachan nishpa Taita Diostapash Bibliatapash ladoman saquinallami yashpaca yaripanami cangui, cientificocunaca ashtacata yachashpapash ashtaca ashtaca cosascunataca nara yachanllu. Estrellacuna, planetacuna imashina tiashpa catishcata parlashpaca Gran Bretañamanda shuj enciclopedia libroca ninmi: “Gentecunaca casi 4 mil huatacunatami planetacunamanda, estrellacunamanda investiganajushca. Shinapash punda babilonio gentecunashnallatami casi nimata na yachanchi” nishpa. Shinaca cientificocuna na yachai ushashca cosascunahuanga ¿imatata rurana canchi?

Testigo de Jehovacunaca, Bibliapi consejashca shinami, tucui gentecunapa yuyaita respetanchi (Filipenses 4:5, NM ). Gentecunaca cada unomi imata cringapaj munashpapash crita ushan. Shinapash cai revistapica invitapanchimi, Bibliapa yuyaicuna cientificocunapa investigashcacunahuan imapilla igual cashcata ricupachun.