CALLARI TEMA | ¿INVESTIGACIONGUNACA BIBLIATA MISHASHCACHU?

Na tucuita yachai ushashcachu

Cunanbica Nuevo Ateísmo nishcamanda parlaj ashtaca librocunami llujshishca. Chai librocunata liimandami gentecunaca shuj shuj yuyaicunata charin. Chai gentecunamanda parlashpami David Eagleman shuti neurologoca escribirca: “Huaquingunaca chai librocunata liishpami yan, cientificocunaca ashtacata investigashpami tucuita yachan nishpa. Shinapash ali cientificocunaca na tucuita yachai ushashcataca alimi intindin” nirca.

Cunangamanga ashtaca jaricuna, huarmicunami na yachanalla cosascunata investigashpa ashtaca cosascunata yachashca. Shinapash huaquinbica ninandami pandarishca. Huaquin ejemplocunata ricupashun. Isaac Newton cientificoca rijsishcapachami carca. Paica ashtaca investigaciongunata rurashpami ricuchirca, gravedad nishca tiashcamanda planetacunapash, estrellacunapash, galaxiacunapash paicuna cana pushtupi cuyurinajushcata. Ashtahuangarin, chai cientificomi calculocunata imashina ruranata investigarca. Chaimandami jipamanga computadoracunata, jahua cielomanda ashtahuan jahuaman imashina rinata, átomo imashina cajta calculai usharca. Ashtaca ali investigaciongunata rurashca cashpapash Isaac Newtonga crinmi carca, estrellacuna, planetacuna imashina cuyurijta yachashpa, o imapash formulacunata combinashpaca plomo nishca materialtaca oroman cambiai usharingami nishpa.

Isaac Newton causashca punllacunamanda 1.500 huatacuna pundamanga Tolomeo nishca astronomomi tiarca. Tolomeoca imapash instrumentocunata na ocupashpallatami planetacuna imashina cuyurijtapash, mapacunata alipacha ruranata yachajurca. Shinapash paica crinmi carca, ñucanchi Alpa bola mundoca tucui estrellacunapa, planetacunapa chaupipimi tiajun nishpa. Carl Sagan shuti famoso astrofisicoca Tolomeomanda parlashpaca ninmi: “Gentecunaca 1.500 huatacunatami crirca, Alpa bola mundoca tucui estrellacunapa, planetacunapa chaupipimi can nishpa. Shinaca yachajungapaj alipacha cashpapash gentecunaca ninanda pandarinllami” nishpa.

Cunanbipash shinallatami can. Cientificocunaca ashtacata yachashpapash, tucuita yachaitaca na ushashcachu. ¿Ima punllapash tucuita yacharingacha? Paul Davies shuti fisicoca nircami, tucuita alipacha yachangapaj munashpa caita chaita investigashpapash yangami investigaringa nishpa. Jahua cielomanda ashtahuan jahuaman, cai Alpapi imalla tiajtaca nunca nali intindi ushashunllu. Shinaca, cientificocunapa investigaciongunahuanga tucuitami yacharinga nishpaca cuidadota charinami canchi.

Bibliaca cientificocunapash na rurai ushashcatami ruran

Bibliapica cai Alpapi animalcunamanda, plantacunamanda tucui ima tiashcacunamanda parlashpaca ninmi: “Ricuichi, cai rurashcacunaca ashata callaricunallami. ¡[Taita Diosmanda] parlajtaca, asha ashallami uyashcanchi” nishpa (Job 26:14). Jahua cielomanda ashtahuan jahuapi tiashcacunamanda, cai Alpapi tiashcacunamanda parlashpaca ashtaca cosascunatami na yachanchi, na intindi ushanchi. Chaimandami apóstol Pabloca nirca, Taita Diosca tucui imatapash charij, ali yuyaita charij, aligutapacha yachajmi. Chaitaca pipash na yachai ushanllu. Imamanda pai chashna rurajujtapash na yachanllu nishpa (Romanos 11:33).

Cienciaca ¿ima consejocunatata na cui ushan?

Cientificocunapa investigashcacuna cai Alpa imashina cajta intindichi ushajpipash Bibliaca shujcunahuan ali llevarichun, cushilla causachunmi yachachin. Huaquin ejemplocunata ricupashun.

Nalicuna ama tiachunga

shujcunapa causaitami respetana can

“Ama huañuchinguichu.” (Éxodo 20:13.)

‘Shujta millanayachijcunaca huañuchij runashnami.’ (1 Juan 3:15.)

tranquilo causanatami mascana can

“Nalita ruranamandaca anchurishpa, alitalla rurangui. Casilla ali causaita mascashpa, chaitalla catingui.” (Salmo 34:14.)

“Casilla ali causajcunaca [alita] rurashpami, tarpushcata tandachinshna casilla aliguta causanajun.” (Santiago 3:18.)

nali ruraitaca millanayachinami can

‘Mandaj Diosca [alita] ruraj runataca imashina cajta ricuriajunmi. Ashtahuangarin nalita ruraj runataca tucui shunguhuanmi millanayachin.’ (Salmo 11:5.)

‘[Nalita] ruraj runata ricushpapash, ama chashna cashcaiman yanguichu. Pai imata rurashpa causajujtapash ama catinguichu. Mandaj Diosca jatun nalita rurajtaca millanayachinmi.’ (Proverbios 3:31, 32.)
Familiahuan ali causangapaca

taitamamatami cazuna can

‘Huahuacuna taitata, mamataca Jesusta cazunshna cazunguichi. Mandashca shimipica: “Taitata, mamataca ninanda alicachingui” nijunmi. Cazushpaca cai pachapipash unai unaicamanmi causangui.’ (Efesios 6:1-3.)

huahuacunata yachachinami can

‘Taitamamacuna huahuacunataca na yangamanda fiñachinachu canguichi. Nalita rurajpica shinlli tacurishpami aliguta yarichina’ canguichi. (Efesios 6:4.)

‘Huahuacunataca na yapata llaquichinachu canguichi.’ (Colosenses 3:21.)

huarmita, cusataca juyana, respetanami can

‘Tucuicunami quiquinllata juyarinshna cangunapa huarmitaca juyana canguichi ninimi. Huarmipash cusataca alicachishpa cazuchun.’ (Efesios 5:33.)
Cai Alpata cuidana

Cai Alpata huaglichijcunataca Bibliaca ninmi: ‘Cai pachaca chaipi causajcunapa juchahuanmi mapayarca. Shinamandami cai pachapi causajcunaca tucuchi tucurca’ nishpa (Isaías 24:5, 6). Taita Diosca cai Alpata tucuchinajujtaca na yangata saquingachu. Bibliapica ninmi: ‘Cai pachata tucuchijcunata tucuchinami pactamushca’ nishpa (Apocalipsis 11:18).