CALLARI TEMA
¿Taita Diosca guerracunata alicachinllu?
Ashtaca gentecunaca, punda tiempo guerracunapi macanajuchun cachashcata Bibliapi liishpami nin, Taita Diosca guerracunataca alicachinmi nishpa. Cutin huaquingunaca ninmi, Taita Diospa Churica contracunataca juyachunmi mandarca nishpa (Mateo 5:43, 44). Chaimandami nin, Taita Diosca punda tiempopi guerracunata alicachishpapash, cunanbica cambiashpami guerracunataca nalicachin nishpa.
Shinaca ¿Taita Diosca guerracunataca alicachin o nalicachin? Guerracunapica ¿pipa ladoshi tucun? Cai tapuicunamanda ali yachajushpaca, guerracunamanda quiquin imata yashcatapashmi ali intindingui. Pensaripai, Taita Dios guerracunata alicachishpa, quiquin apoyajuj ladotallata apoyajujta yachashpaca, chai guerraca alimi can, ñucanchi ladomi mishanga nipanguichari. Shinapash, contracunatara apoyajujta yachashpaca ¿imatashi Taita Diosmandaca nipanguiman? ¿Chai guerraca alimi can nipanguimanllu?
Guerracunata Taita Dios imashina ricujta ali yachashpaca, quiquinba yuyaipashmi cambianga. ¿Imamandata shina ninchi? Ashtaca ashtaca gentecunashna quiquinbash guerracuna tiashcamanda sufrishpaca ¿Dioschu guerracuna tiachun saquishca? ¿Paipa culpamandachu gentecuna ninanda sufrinajun? ¿Guerracuna tiaimanda sufrinajuj gentecunataca Taita Diosca ricujunlla? nishpachari tapuripangui.
Bibliapica Taita Diosmi guerracunamandaca culpata charin nishpaca na nijunllu. Ashtahuanbash, Taita Diosca guerracunamanda imata pensashcataca nunca na cambiashcachu. Shinaca, punda tiempopi guerracunata, Jesuspa punllacunapi guerracunata Taita Dios imashina ricujta yachajupashun. Chaita yachajushpami cunanbi guerracunata Taita Dios imashina ricujta, jipa punllacunapi guerra tianata o na tianatapash intindishun.