Taita Diospa Gobiernopica ¿pita mandajun?

• Taita Diosmi agllashca carca. Bibliapica ninmi: “Ñucapajlla shicanyachishca, ñucapaj jatun mandajta churarcani [...] llactacunatapash cambaj cachun cushallami. Cai pacha callari manñacunapi tiaj llactacunatapash, cambajlla cachun cushallami” nishpa (Salmo 2:6, 8).

• David mandashpa tiajushcapimi tiaringa. Bibliapica ninmi: “Ñucanchipaca, shuj jari huahuagumi huacharimushca, churigutami ñucanchiman caramushca [...]. Paica, David mandashpa tiajushcapimi tiaringa. Pai mandanapi mandajujpica, casilla ali causanapash na tucuringachu. Paitaca, callarimandapacha pipash na cuyuchingachu” nishpa (Isaías 9:6, 7).

• Belén pueblopimi nacirina carca. Bibliapica ninmi: “Belén pueblolla, [...]. Canmandami, llactata Mandajca ñucapaj ali cachun Ilujshinga. [...] Chai Mandajca tucui cai pachata mandajunga” nishpa (Miqueas 5:2, 4).

• Na ricunayachi tucushpami, huañuchi tucuna carca. Bibliapica ninmi: “Paitaca, yangapi churashpami na ricunayachircanchi. [...] Diosta ñucanchi na cazushcamandami, paica chugrichi tucurca. Ñucanchi juchacunamandami, cutai tucunshna llaquichi tucurca” nishpa (Isaías 53:3, 5).

• Cutin causarishpami Taita Diospa ñaupapi jatunyachi tucuna carca. Bibliapica ninmi: “Ñuca almataca, na Seolpi saquihuanguichu. Cambajlla cashcamandaca, ñuca cuerpo ismuchumbash na saquihuanguichu. [...] Cambaj ali ladopimi, causaita causaicaman juyailla cushijuica tiapan” nishpa (Salmo 16:10, 11).

Jesusmi ali mandaj can

Caipica Jesusmanda parlajushcatami cuenta japipanchi. Ashtahuanbash shuj ángel María huarmiguman ricurishpami cashna nirca: “Mandaj Taita Diosca paimanmi, paipaj ñaupa taita David mandashpa tiajushcataca cunga [...]. Pai mandanaca, napacha tucuringachu nijurcami” (Lucas 1:31-33).

Jesús cai alpapi cashpaca gentecunataca na mandai callarircachu. Ashtahuangarin Jesusca Taita Diospa Gobiernopi Rey shinami, jahua cielomanda gentecunataca mandanga. Shinapash ¿imamandata Jesusca ali mandaj can? Chaita yachangapaca Jesús cai alpapi cashpa imata rurashcata ricupashunchi.

• Jesusca gentecunataca llaquishpami tratarca. Paica na ñavita ricushpami jaricunata, huarmicunata, huahuacunata, mayorlla gentegucunatapash ayudarca (Mateo 9:36; Marcos 10:16). Lepra nishca ungüita charij shuj runaguca cashnami Jesustaca nirca: “¿Nacha alichihuanguiman [o jambihuanguiman]? nishpa, ninanda mañajurca”, chaita ricushpami Jesusca ninanda llaquirishpa chai runagutaca jambirca (Marcos 1:40-42).

• Jesusca Taita Diospa ñaupapi ali ricurichunmi yachachirca. Jesusca “cangunaca, Taita Diostapash, imata charishcacunatapash, ishcandita servitaca na ushanguichi” nircami. Shinallata cangunata ali tratachun munashcashnami shujcunataca tratana canguichi nishpami yachachirca. Taita Diosca gentecuna imata rurajta ricushpapash, imata pensajta, imata sintijta ashtahuanbacha ricujtami Jesusca yachachirca. Shinaca Taita Diospa ñaupapi ali ricuringapaca ñucanchi shungu ucupi imata charishcatami cuidana capanchi (Mateo 5:28; 6:24; 7:12). Jesusca ciertopacha cushilla causangapaj munashpaca Taita Diospa nishcacunata yachajushpa pactachina cashcatami yachachirca (Lucas 11:28).

• Jesusca juyanatami yachachirca. Jesusca paipa yachachishcacunahuan, ruraicunahuanmi gentecunapa shunguman chayan carca. Bibliapica ninmi: “Jesús chashna juyailla shimicunata rimashca jipaca, gentecunaca pai chashna yachachijujta uyashpami, ricunman quedanajurca. Ashtahuangarin Jesusca, yachachina ninan ushaita charishpami yachachijurca” nishpa (Mateo 7:28, 29). Jesusca “cangunata fiñajcunatapash, juyanami canguichi” nishpami mandarca. Ashtahuanbash Jesusca paita huañuchijcunamandapashmi cashna mañarca: “Ñuca Taitalla, caicunaca na yachaimandami cashna ruranajun, cungapailla” nishpa (Mateo 5:44; Lucas 23:34).

Jesusmi ali mandaj can. Jesusca ninanda juyaimandami ñucanchita ayudangapaj munan. Shinapash ¿imahorashi mandai callaringa?