Taita Diospa Gobiernoca ¿imahorata cai alpataca mandanga?

Huaquin Jesuspa catijcunaca Taita Diospa Gobierno cai alpata imahora mandai callarinatami yachangapaj munarca. Shinapash imahorapacha Taita Diospa Gobierno cai mundopi mandanataca, cangunaca na yachanachu canguichi nishpami Jesusca nirca (Hechos 1:6, 7). Shinapash shuj shuj ruraicuna cai mundopi pasajujta ricushpami Taita Diospa Gobierno ña mandai callarijujta, cai alpatapash ña mandana horas chayajushcata yachai ushanguichi nishpami Jesusca nirca (Lucas 21:31).

JESUSCA ¿IMACUNALLA PASANAMANDATA PARLARCA?

Jesusca cashnami nirca: “Shuj llactapi causajcunahuan, caishuj llactapi causajcunahuanmi macanajunga. Shinallata llactata jatun mandaj puracunapashmi macanajunga. Shinallata alpa mama ninanda chujchushpa tucuchijuipash, ninan yarjaipash, millai ungüicunapash, shuj shuj llactacunapimi tianga” nishpa (Lucas 21:10, 11). Jesuspa nishcacuna pactarijpimi Diospa Gobierno ña chayamunata ricuchijurca. Shinapash ¿Jesuspa nishcacunaca mundo enteropi pactarijunllu? Chaicuna pactarijushcataca ¿imashinata yachanchi?

1. GUERRACUNA

Huaquin avión de guerra nishca, shuj tanque y armacunatapash ricuchin.

1914 huatapica imahorapash nunca na sucedishca jatun guerrami tiarca. Estudiashca gentecunaca, chai huatapimi mundo enteropi primera guerra mundial tiaimandami mundo enteropi tucui gentecunata ninanda llaquichirca ninmi. Chai guerrapica jatun tanque de guerra nishcacunata, bombacunata, shuj shuj armacunata, gentecunata huañuchingapaj shuj shuj gascunatapashmi gentecunaca utilizarca. Cutin Segunda Guerra Mundialpica jatun bomba atómica nishcacunatami gentecunaca utilizarca. 1914 huatamandapachami shuj shuj llactacunapi ashtaca guerracuna cunangaman tiashca. Chaicunapica ashtaca millón gentecunami huañushca.

2. TERREMOTOCUNA

Shuj terremotomi shuj edificiota urmachishca

Britannica Academic nishca libropica, cada huata casi cien terremotocuna tiashcamandami ashtaca llaquicuna tiashca nin. Shinallata Servicio Geológico de Estados Unidos nishcaca ninmi: “1900 huatamandapacha tiashca terremotocunata ricushpami cada huata casi dieciséis shinlli terremotocuna tianata yachai ushapanchi” nishpa. Gentecunaca cunanbi aparatocuna tiaimandami maipipacha terremotocuna tianata yachai usharin. Chaimi terremotocuna mirajunshna ricurin. Shinapash na mirashpa catijushcachu nin. Pero na shinachu can. Cunanbi terremotocuna ashtahuan tiaimandami llaquicunapash tiashca, ashtaca gentecunapash huañushca.

3. YARJAI TIANATA

Shuj dibujopimi micunacuna asha asha tucurijujta ricuchin.

Cunan punllacunapica guerracunamanda, culqui faltajlla causaimanda, nali gobiernocunamanda, tarpushcacunapash perdirishcamandami mundo enteropi micunaca tucurijun. Programa Mundial de Alimentos nishcaca ninmi: “Mundo enteropica 821 millón gentecunami micuna illaj causan. Chaicunamandaca 124 millón gentecunami yarjaimanda ña huañunalla can” nishpa (2018 Year in Review). Cada huatami más o menos 3 millón yali huahuacuna yarjaimanda huañun.

4. UNGÜICUNA

Shuj dibujopimi ungüicuna imashina mirarinajujta ricuchin

Organización Mundial de la Salud nishcapa shuj informepica cashnami nin: “2001 huatamandapachami millai ungüicuna tiai callarishca. Shinallata cólera, peste y fiebre amarilla nishca ungüicunapash cutinmi ricurimushca. Ashtahuanbash cunan punllacunapica neumonía ungüipash, mushuj gripe ungüicunapash, síndrome respiratorio de Oriente Medio nishca ungüipash, ébola y zika nishca ungüicunapashmi tiai callarishca” nishca. Chairallami COVID-19 ungüipash ricurishca. Cientificocuna, doctorcunapash shuj shuj ungüicunapa jambicunata tarishpapash, na tucui ungüicunapa jambitaca tari ushashcachu.

5. MUNDO ENTEROPI VILLACHINA

Shuj dibujopimi shuj alpata shinallata shuj Biblia pascaria tiajujta ricuchin

Cunan punllacunapi imacunalla pasanamanda parlashpami Jesusca caitapash nirca: “Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga. Chai jipami, tucurimuica chayamunga” nishpa (Mateo 24:14). Cai alpapi ashtaca llaquicuna tiajpipash ocho millón yali gentecunami 240 llactacunapi, shinallata mil yali idiomacunapi Taita Diospa Gobiernomanda villachinajushca. Taita Diospa Gobiernomanda shinapacha villachinajujtaca nunca na ricupashcanchichu.

JESUSPA CAI NISHCACUNATA YACHANACA ¿IMAMANDATA MINISHTIRISHCA CAN?

Jesuspa tucui nishcacunami cunan punllacunapica pactarijun. Shinaca ¿imatata yachajupanchi? Jesús imata nishcata ricupashunchi. Paica nircami: “Chai tucui llaquicunata ricushpaca, Taita Dios mandana ña pactamujujta yachana canguichi” nishpa (Lucas 21:31).

Jesusca paipa mandana pushtumanda, cai alpa shuj paraíso ña tucushcata ricujushcata ricuchin — Ñallapachami Diospa Gobiernoca Taita Diospa munaita pactachinga

Jesuspa tucui nishcacuna, shinallata Bibliapi tucui nishcacuna pactarijujta ricushpami Taita Diospa Gobierno 1914 huatapi, jahua cielopi mandai callarishcata ricupanchi.a Chai huatapimi Taita Diosca paipa churi Jesustaca jahua cielopi mandachun churarca (Salmo 2:2, 4, 6-9). Taita Diospa Gobiernoca ñallami cai alpataca mandanga. Shinami cai mundopi tiashca tucui gobiernocunata tucuchishpa, cai alpataca shuj juyailla paraíso alpaguta ruranga. Chaipimi tucui gentecuna para siempre causanajunga.

Jesusca cashna mañachunmi yachachirca: “Can mandanaca, ucha chayamuchunmi munanchi. Imashnami jahua pachapica can munashcashna ruranajun, chashnallata cai pachapipash, can munashcashna ruranajushpami ali canman” nishpa. Chaica ñallapachami pactaringa (Mateo 6:10). 1914 huatamanda cunangamanga ¿imatata Diospa Gobiernoca rurajushca? Diospa Gobierno cai alpata mandajushpaca ¿imatata gentecunamandaca ruranga?

a 1914 huatapi ima pasashcata yachangapaj munashpaca Cushilla causapashunchi libropi, lección 32ta ricupangui. Chaitaca testigo de Jehovacunami llujchishca.