1925: 100 huatacuna huashaman

PAICUNA SHUYANAJUSHCACA NA PACTARIRCACHU

Ashtaca huauquipanicunaca 1925 huatapi cai alpa shuj paraisoman tigrana cashcatami shuyanajurca. ¿Imamandata chaitaca shuyanajurca? Cuerpo Gobernantemanda huauqui Albert Schroedermi: “1925 huatapi tucui ungidocuna jahua cieloman rina cashcata nirca. Shinallata punda tiempopi Jehová Diosta tucui shunguhuan sirvij Abrahán, David y shuj runacunapashmi cai alpata mandangapaj causachi tucuna cashcatapash” nishca carca. Chaimi chai huatapi imapash na pasajta ricushcamanda, huaquin huauquipanicunaca ninanda desanimarirca (Prov. 13:12).

Shina desanimarishca cashpapash paicunaca villachinataca na saquircachu, paicunapaca Jehová Diosmanda villachina ashtahuan importante cashcatami asha asha cuenta japirca. Cunanga, radiota utilizashpa imashina ashtaca ashtaca gentecunaman chayai ushashcatami ricupashun.

SHUJ SHUJ ESTACIÓN DE RADIOCUNAPASHMI TIASHPA CATIRCA

1924 huatapi WBBR nishca radiota utilizashpami Bibliamandaca yachachin carca. Chai radiopi yachachishpa ali rijta ricushpami huauquipanicunaca Chicago ladopi ashtaca gentecunaman chayai ushachunga shuj estación de radiota rurarca, chai estación de radioca WORD nishca shutitami charirca. Ingeniero Ralph Lefflerca WORD nishca radiotami rurangapaj ayudashca carca, paica nircami: “Chiri chiri tiempopica ashtaca gentecuna caru caru pushtucunapi causashpapash cai radiotami uyan” nircami. Por ejemplo, Pilot llactapi causaj shuj familiaca chai radiotami uyashca carca. Chaimi chai radiopi trabajaj huauquipanicunataca chai radiopi uyashca yuyaicunaca ñucanchi familiataca ninandami animarca nishpami agradicishca carca.

Diciembre de 1925 huatapa atalayapica WORD radiomanda parlashpaca cashnami nijurca: “WORD nishca radioca Estados Unidos llactamanda ashtaca lugarcunamanmi chayan carca y shuj llactacunamanbash. Por ejemplo, Cuba y Alaska nishca llactacunamanmi chayan carca. Shinami Taita Diosmanda ali villaicunata na uyashca gentecunaman chayan carca. Primera vez cai radiota uyaj gentecunaca Bibliamandaca ashtahuanmi yachajungapaj munanajun” nijurcami.

1924 huatapi Canadamanda gentecunaman ali villaicuna chayai ushachunga, Saskatoon nishca pueblopimi shuj estación de radiota rurarca. Chai estación de radioca CHUC nishca shutitami charirca. Pero 1925​pica cai estación de radio yapa uchilla cashcatami cuenta japirca, chaimi chai estaciondaca shuj ladoman apana cashcata ricurca. Chaimandami Saskatoon llactapi shuj antiguo teatrota randishpa chaiman tucuilla estación de radiotaca yalichirca.

Saskatoon llactapi cai emisora de radio cashcamandami, shuj uchilla pueblocunapipash por primera vez Jehová Diosmanda ali villaicunataca uyaita usharca. Por ejemplo, caru caru pueblopi causaj Graham shuti shuj huarmiguca chai emisorata uyashcamandami publicaciongunata mañangapaj escribirca. Shinapash George Naish shuti huauquiguca cashnami nirca: “Graham shuti huarmiguca Bibliamanda yachajuna munaitaca ninandami charin nircami. Chaimandami Estudios de las Escrituras nishca publicaciongunataca cacharca”. Asha tiempo jipaca Graham shuti huarmiguca, Jehová Diospa Reinomanda ali villaicunataca caru caru pueblocunamanmi aparca.

BIBLIAMANDAMI ASHTAHUAN INTINDIRCA

Huauquipanicunaca, Satanaspa organización ashtaca huatacuna huashamandapacha demoniocunata, religiongunata y cai alpapi gobiernocunata mandajushcata ali yacharca. Chaimi Marzo de 1925​pica “Nacimiento de la nación” nishca tema shuj atalayapi llujshirca. Cai atalayapimi “aliguta cazushpa aliguta pensarishpa sirvij esclavoca” Jehová Diospash shuj organizacionda charishcata cuenta japichun huauquipanicunata ayudarca y cai organizacionga Satanaspa organizacionhuanga en contrami can nijurcami (Mat. 24:45). Y cai revistapillatami 1914 huatapi Jehová Diospa reino callarishcata ricuchijurca. Shinallata 1914​pimi jahua cielopi shuj macanajui tiashcata ricuchirca y chai macanajuipica Satanás y paipa demoniocunapash cai alpaman shitamui tucuna cashcatapash ricuchijurca (Apoc. 12:​7-9).

Huaquin huauquipanicunapaca caita intindinaca asha dificilmi carca. Chaimandami, cai revistapica cashna nijurca: “Cai revistapi imata liinajushcata na ashta ali intindinajushpaca, pacienciahuanmi shuyana canguichi Jehová Diospimi confiashpa catina canguichi y ali shunguta charishpami catina canguichi” nijurcami.

Gran Bretañamanda Tom Eyre huauqui marzo de 1925​manda atalayata liishpaca ashtaca huauquipanicuna imashina sintirishcatami parlarca. Paica cashnami nirca: “Ashtaca huauquipanicuna Jehová Diospa Reino jahua cielopi ña mandajushcata yachajushpaca ninandami cushijurca, chaimandami paicuna yachajushcataca cushijushpa villachinajurca. Shinallata Jehová Dios jipa punllacunapi shuj cushilla causaita caranata cuenta japichunmi ayudashca” nircami.

TAITA DIOSMANDA VILLACHINA IMPORTANTE CASHCATAMI CUENTA JAPIRCA

Cunan punllacunapi ashtaca huauquipanicunaca Isaías 43:10​pi ima nijushcataca alimi yachanchi, chaipica: “Cangunami, ñucamanda villajcuna canguichi. Ñucata servij, ñuca agllashcacunami canguichi” nijunmi. Shinapash huata 1925 nara chayajpica ñucanchi publicaciongunapica chai textotaca na yapa utilizanllu carca. Pero 1925 huatapica, 11 revistacunapimi Isaías 43:​10, 12​ta ashtahuan utilizashpa catirca.

Agosto de 1925 huatapica, huauquipanicunami Indiana llactapi shuj asambleata rurarca. Chai asambleapa programapica Joseph Rutherford huauquipa saludocunami tiarca, chai programapica: “Cai asambleapi yachajushcacunami Taita Diospa ali villaicunata cushilla tucui shunguhuan ashtahuan villachichun ayudanga” nijurcami. Chai asambleaca ocho punllacunatami pararca, cai asambleapica huauquipanicuna villachingapaj tucui oportunidadcunata aprovechana cashcatami ricuchijurca.

29 de agosto de 1925 huatapica “villachishpami catina capanchi” nishca discursotami huauqui Rutherfordca curca. Chai discursopica tucuicunallata villachishpa catingapaj esforzarina cashcatami ricuchijurca. Shinallata Isaías 43:12​ta japishpapashmi cashna nirca: “[Jehová] Diosca, cashnatapashmi nin: ‘Ñucallami, Taita Dios cani. Cangunami, ñucamanda villachijcuna [o testigocuna] canguichi’” nircami. “Ashtahuanbash tucui pueblocuna ricuchunmi shuj banderata o shuj señalta shayachina canguichi” nirca. Cai textotaca Salmos 62:10​mandami liirca. ‘Tucui gentecuna ricuchun, banderata shayachichiyari’ (Is. 43:12; 62:​10, Versión Moderna, 1910). Cai textocunata explicashpami cashna nirca: “Jehová Diosta sirvijcunalla y Jehová Diospa espíritu santota charijcunallami villachishpa catitaca ushanga” nircami.

Chai jipaca huauqui Rutherfordca “Jehová Diospa Reinomanda bendicionguna” nishca shuj documentotami liirca, chai documentopica Jehová Diospa Reinopillami ‘shuj ali causaita, ali saludta y para siemprepash causaita ushashun’ nijurcami. Tucuicunallatami chai documentopi nishcacunahuanga deacuerdo carca. Cai documentotaca, shuj shuj shimicunapimi traducirca y predicacionbipashmi utilizarca. Shinallata 40 millones de copiacunatapashmi llujchirca.

Testigo de Jehová shutita nara charishpapash, Jehová Diosmanda villachina importante cashcatami cuenta japirca.

REVISITACUNATA RURACHUNMI ANIMARCA

Mundo enteropi Bibliamanda yachajungapaj munaita charijcuna ashtahuan mirashpa catijushcamandami, ñaupaman pushaj huauquicunaca Bibliamanda ashtahuan estudiangapaj munaita charijcunata cutin visitachun animajurca. “Jehová Diospa Reinomanda bendicionguna” nishca documentota predicacionbi entregashca jipaca, Bulletina nishca publicacionbimi “Jehová Diospa Reinomanda bendicionguna nishca documentota aceptashca personacunaman cutin visitachun animajurca”.

Enero de 1925 huatapi Bulletin nishca publicacionbimi, Texas llactamanda huauquica cashna nirca: “Por ejemplo, shuj territoriota por primera vez visitajpica gentecunaca alimanga na uyanllu, pero chai territoriotallata cutin cutin visitajpica ashtahuan aliguta uyan cashcatami cuenta japiparcanchi. Shinallata ñucanchi territoriopica shuj uchilla pueblomi tian. Chai pueblomanga 10 huatacunapica solo 5 viajecunatallami rishcanchi. Pero chairallami panigu Hendrix y ñuca mamitaca chai territorioman cutin rirca. Shinapash cai viajeca ashtahuan publicaciongunatami saquita usharca”.

Panamá llactamanda shuj huauquica cashnami nirca: “Por primera vez villachinapi gentecunata visitajpica na uyangapaj munahuarcachu pero más de shuj viajeta rijpica ashtahuan aligutami uyahuarca. Cunanga ñuca tiempotaca ashtahuan revisitacunata rurangapami utilizajupani, shina rurajushcamandami ashtahuan ali experienciacunata charita ushapashcani”.

ASHATACA TRABAJOMI TIAGRIJURCA

Huauqui Rutherfordca 1925 huatapi imacunatalla rurashcata y ashtaca trabajocunata rurashpa catinara cashcatami, shuj cartapica colportorcunaman o precursorcunamanga escribirca. Cai cartapica cashnami nijurca: “Quiquingunaca 1925 huatapica, ashtaca gentecunatami consolashcanguichi y ashtaca gentecunatapash cushilla ali causaiguta charichunbashmi ayudapashcanguichi. Shinallata 1926 huatapica Jehová Diospa Reinomanda villachingapaca ashtaca oportunidadcunatami charigripanguichi y tucuicunallatami tandanajushpa Jehová Diosta alabagrinchi” nishpami escribirca.

1925 huatapica Brooklyn (Nueva York) llactapi betelta imashina jatunyachina cashcatami ricunajurca. Y 1926 huatapica, shuj jatun construcción callarigrijurca.